عشكت بغدادية

البارت 9

عشكت بغداديه
.................

سجاد : يلا عمي نتوكل ، اني وحسن راح نروح بسيارتنه وانتو امشو ورانه يلا تمارة اركبي ليوره
أحمد (عم سجاد ) : ماشي ، لا عمي تمارة خليها ويه البنات يتونسون سوه وانتو روحو كدامنه
سجاد : يلا حسوني ....
حسن : خرب بحظي هي هاي هم حسوني والي تكولها رتوجه حسوني اخ بويه كون هسه أروح ابوكها من أهلها واشرد بيها ... أستغفر الله يا ربي شبيه اني اتخبلت وكاعد أفكر بيها قبل لا يصير شي رسمي بيناتنا أعوذ بالله من الشيطان الرجيم هاي عرضي شلون اباوع على عرضي بس والله مو بيدي من تصير كدامي مدري شيصير بيه ....
سجاد : ركبنا بالسيارة وهما يمشون ورانه ... وره تقريبا ربع ساعه وصلنا ...
تمارة : عمي ما قبل أروح وياه اخواني أصر أركب وياهم .. كعدنه اني و ريماس و ريتاج ليوره وتيم يسوق وعمي بالصدر اني صرت وره كرسي السايق بالطريق اني والبنات نسولف وكل شويه يسئلوني على شغله وكل ما أرفع راسي الكه تيم يباوعلي حيل ارتبكت وابد ما رفعت راسي بعد ....
ريماس : ركبنه بالسيارة وتمارة جتي ويانه وصارت كعدتها وره كرسي السايق كل ما اباوع ليكدام الكه تيم يباوعلها بالمرايه وهي خطيه مدنكه وتفرك بايديها بصراحه شكلهم كلش حلو بس هذا اخويه اعرفه أبو بنات خاف يروح يسويلنا سالفه وشيخلصنه كلت بس نرجع احجي وياه أشوف شنو سالفته بس اني اعرف اخويه كلش زين يباوعلها بنظرات كلش حلوة مو نظرات رغبه أو شهوه لا نظره كلها حنيه وحب بلكي الله يجبر كلبه ويلكه الحب وياها وينسى حبيبته الأولى ويستقر وتمارة خوش بنيه حبابه ... تقريبا وره ربع ساعه وصلنا بس شنو الأراضي مالتهم فد شي وعدهم مزرعه كلش حلوة بابا كال أول شي نروح للبستان بعدين للمزرعه .....
تيم : همزين ابويه خله تمارة تجي ويانه لو مو العيب إلا أروح ابوسه كدامهم ما أدري ليش من تكون ويايه بنفس المكان ارتاح وافرح مع العلم كومه شايف بنات وعندي هواي صديقات وكلهم حلوات بس ليش هي احسها تختلف عنهم احسها طفله كلها برائه ونزاكه من صعدنه بالسيارة صارت ورايه ضليت طول الطريق اباوعلها هي انتبهت عليه اني كبل التفتت سويت نفسي اباوع على الشارع بس عيون بدون ما أحس تباوعلها هي من انتبهت عليه ضلت مدنكه حيل ضجت أريدها بس ترفع رأسها من أشوف عيونها ارتاح وادوخ ومدري شيصير بيه ... من وصلنه نزلت من السيارة هي فتحت الباب تريد تنزل السيارة عاليه وهي ناعمه ولابسه كعب رادت تنزل عثرت و رادت توكع اني كبل لازمتها صارت عيوني بعيونها عيونها مدمعه مبينه راح تبجي كلها صاحت الله خو ما اتاذيتي هي بس تهز برأسها ما حجت من نزلت صارت بصفي كتلها بصوت ناصي لخاطر الله انتي طولج شبر ونص شكو لابسه كعب يعني كوه تريدين تصيرين طويله بعدين شبيج جنج عوده  معصمصه شنو ما تاكلين .. جذب هي جسمها كلش حلو ومرتب بس قزومه شويه بس شفتها مدمعه وحيل ضايجه ردت احجيها ... هي باوعتلي صفح وكالت ...
تمارة : أولا شكرا لأن ساعدتني ، ثانيا اني مو قزمه ولا شبر ونص بس حضرتك جنك درج إطفاء فتشوف الباقين قصار ، ثالثا مو اسمها معصمصه اسمها رشاقه ماشي دكتور ....
تيم : هي تسولف بعصبيه بس بهدوء حتى محد يسمع هي تسولف واني كوه ضام الضحكه أخير شي كالت ماشي دكتور ، كتلها ماشي دكتورة هي باوعتلي هيج 😒 ومشت ... وره ما راحت متت من الضحك شكلها كلش حلو هي وعصبيه كلت اليوم إلا اخبلها بسيطه ...
ريتاج : أول ما وصلنه كبل نزلت وكمت أتمشى وحدي هم يمشون على كيف ويسولفون اني عفتهم ومشيت وحدي المكان كلش حلو وكله خضار و زرع اخذت صور وتعديت من يم زرع باوعت عليه كله خيار دنكت كطعت وحده شكلها كلش يشهي طلعت كلينكس ومسحتها وكعدت على نخله مكصوصه أكل واباوع على الزرع فززني صوت من ورايه ....
حسن : دنمشي كلنه سوه انتبهت عليها هي عافتنه وراحت تمشي لوحدها لحكتها كلت خاف اتضيع والكاع جبيره هي تمشي واني أمشي وراها بس من بعيد حتى لا تنتبه عليه ضلت تمشي وتأخذ صور أخير شي تعدت من يم الزرع احنا زارعين خيار وطماطه وبصل وكومه مخضر .... هي دنكت على الخيار حاشت وحده وطلعت كلينكس مسحتها وراحت كعدت على جذع نخله مكصوصه وتأكل بالخياره اني واكفه وراها مرتاج على النخله ما تشوفني من كعدت اجيت من وراها كتلها شلون تاخذين خياره بدون ما تستاذنين ...
هي جنت كاعده من حجيت اني هي كبل فزت و وكعت بالكاع من الهبطه ...
حسن : الله الله ههههه خو ما تاذيتي اني آسف ما عبالي راح تخافين هيج جان ما حجيت ههههه ...
ريتاج : اوووي عفيه هاي ليش هيج والله فززتني النوب ملابسي توسخت اي كول احم سوي أي شي مو هيج تجي فجأة من وره الواحد و تخوفه ......
حسن : اخ بويه شلون تكول اوووي كلب انشلع هي كالت حسوني اشتعل جدي النوب علينه الاوووي وين انطي وجهي (بكلبي طبعا ) ... والله آسف ما عبالي هيج تخافين أعتذر
ريتاج : هي مو شغله أخاف بس اني كاعده لوحدي وهدوء فجأة انته جيت من ورايه فززتني ... المهم حصل خير تفضل ..
حسن : ابتسمت وقسمت من الخيارة وانطتني. . اني عقدت حواجبي وسويت نفسي عصبي كلت خلي انصب عليها كتلها شلون تاخذين خيار بدون إذن هااا ... هي ارتبكت وكالت ...
ريتاج : اسفه والله مو قصدي ما عبالي ما تقبلون جان ما أخذت بس من شفتها اشتهيتها ما عبالي والله ... هسه شلون اني كطعتها بعد ما تترجع جان رجعتها ...
حسن : صدكت وعيونها دمعت شويه وتبجي اني بعد ما أتحمل كبل طكيتها بضحكة ... ههههههه يمعودة شبيج راح تبجين اتشاقه وياج ألف عافيه وهسه احيشلج سله كامله إذا تريدين ...
ريتاج : اووي عابتلك والله وكعت قلبي عبالي صدك ما تقبلون لئيم بعد لا تسويهآ ترى اكول لعمو محمد عليك ....
حسن : يمه أروح فدوه للاووي النوب تكول عابتلك اخ بويه اشتعل جدي ... ههههه خلص آسف بعد ما اعيدها كل شي ولا عمو محمد ... ومن أروح فدوة للعمو شكد حلوة بحلكها. .
ريتاج : اوك ، تمشي لو تكعد ...
حسن : لا نمشي ، يلا امشي ...
ريتاج : اوك ، يلا ....