عشقت قمرا

استعجال

بدت العلاقه بين ليلى وهذا الولد
لكن سرعان ماصارت مشاكل  كون ليلى تبحث عن مجنون وصاحبنه كان معجب بعده ماعايش الحب يعني كانت ليلى بنظره مجرد وحده حلوه عجبته والسلام بس كان ينتقد لبسهه ومكياجهه وضحكته وسوالفهه وجرءته ينتقده بنظرته ومبين عليه الانزعاج من هل الشي بس كان مايحجي ويكول
وليلى تبحث عن شخص غيوره يحب بجنون تريده يخاف عليهه من الهوه
ماعجبهه هيج شخص مايملك ذره حب اتجاهه مجرد اعجاب
قررت تنهي العلاقه وكلمن يروح بطريقه وفعلا انتهت العلاقه لاسباب تافهه ومشت الايام وهم رجعت علاقتهم وره سنه وع نفس الحال صاحبنه مايغار ولايهتم  وليلى لا زالت تبحث عن مجنون
لا هوه فهمهه شنو يريد ولا هيه كدرت توصلهه شتريد منه
وهم انتهت علاقتهم من جديد والسبب عدم البوح بمشاعرهم وضيق حال الولد خاف لايتورط بحب ليلى وتطلب منه زواج
وهيه مو ع مرامه ولا مرام عاداته وتقاليده وخاف لا ليلى تشرط وتتشرط وتطلب منه الي فوك طاقته
خلصت الدراسه وكلمن راح بطريقه واختار مستقبله وويامن يكمل
ليلى اتزوجت جيران بيت عمهه وعاشت حياتهه عاديه لا حبت زوجهه بعد الزواج ولا كرهته مجرد واجب وزوج صار بحياتهه اما
الولد الي كانت ع علاقه بي طلع يدور اخبارهه وبده الظاهر يتعلق بيهه
وفجاه ودك تليفون من الو عرفته من الصوت سدت التليفون لان زوجهه قريب عليهه والرقم هم بعد مادكت انتظرت زوجهه يروح لدوامه جان بعيد فيداوم ١٥ ب١٥ يعني يروح ١٥ يوم ويرجع ١٥ يوم وره اسبوع راحت زوجهه لدوامه دكت ع الرقم منو حضرتك اتصلت عليه قبل اسبوع كالهه لا اسف متوهم عبالي غير رقم
كالتهه اوك اني اعتذر اتصلت ع حضرتك
كالهه ليلى كالت نعم منو
كالهه شخبارج
كالته فلان
كال نعم
وبده السلام والكلام
سالهه ليلى شخبارج وين ماوين كالتله اتزوجت
هنا صاحبنه مااتحمل غص بلحجي وطلب يحجي وياهه غير مره
مااتحمل الظاهر جان الموقف قوي بطل بعد مادك عليهه ولا هيه دكت عليه
وره ٧ اشهر هم اتصل عليهه
ليلى
نعم شخبارج امورج
حمدلله زينه
ماكتيلي شكد صارلج من اتزوجتي
صارلي سنه ونص
صار عندج أطفال
اي نعم
شكد
واحد
ولد ابنيه
ولد
شنو
محمد
هنا دمعت عينه جان امنيته هذا الطفل ابنه ايصير ويكولوا ابو محمد
وانته شخبارك
بعدني نفسي
ليش
مااعرف اتقدم خطوه بحياتي مااكدر
ليش
ليلى احبج
بس اني اتزوجت شوف حياتك
اني مااكدر اشوف حياتي بديت اتعلق بيج صرتي مرضي
اعذرني اني عندي بيتي وابني وزوجي
واني
اتزوج وعيش حياتك
تره مو سهله ليلى
هذا القرار يخصك وماتكدر اتدخل بي مجرد انصحك
ليلى ليش بارده
وانته ليش مشتعل
ليلى احبج
بس اني متزوجه
تحبين زوجج
احترمه واعزه ابو ابني
تحبين زوجج
كتلك ابو ابني
يعني بعدج تحبيني
يجوز احبك بس الاكيد نسيتك
معقوله
مدام اتزوجت واتجازوت مرحلتك من زمان يعني نسيتك
واني
ماادري شي يرجعلك انساني وعيش حياتك
ليلى امي خطبتلي بنات الدنيا بس مااريد
هذا شي مايرجعلي ولايخصني
ليلى شنو هل قسوه مو تكولين جنت احبك
اي نعم جنت هسه مااحبك مثل قبل اكو من شاغل حياتي وتفكيري
ليلى لاتسوين هيج بيه
لاتسوي بنفسك هيج انته
ليلى
ارجوك مع سلامه
دخل صاحبنه باازمه نفسيه
حب حياته راحت من ايده وشلون يرجعهه اله
اتحول إعجابه الى عشق مجنون
وليلى كل مره تجمد مشاعرهه ماتملك من الحب القديم غير ذكريات طفيفه
لحد وره خمس سنوات
ليلى حبت تعرف اخباره اتصلت عليه
الو
الو
عرفهه من الصوت كال ليلى
ضحكت كالت هيج صوتي مااتغير
كالهه صوتج محفور بكلبي نقش منقوش
ضحكت شلونك شخبارك
شعجب اتصلتي
والله حبيت اسال عليك بس اذا ازعجتك عادي اسده واروح
بعدني بخير واحبج
اتفاجئت اي حب مر ع حبنه سنين تراكم عليه غبار انست علاقتنه احنه انسينه
بس اني حبي بعد مالاحه كطره تراب ولاغبار السنين يمسحه وكلما هاي يكبر بكلبي ومااعرف اخليله حد
اتزوجت
هه اكولهه اتنفس هواج وتكلي اتزوجت لاطبعا
الى متى تظل هيج كمل حياتك محد يفيدك ولايدوملك
حمودي شونه
حمودي زين صار بلروضه وصار عندي فروحه
ها
اي نعم هسه ادزلك صورهم عندك فايبر
اي نعم
لا اشكرك لاتدزيلي تريدني تعذبيني
لا اريد اصحيك وافهمك اني بعد مااصيرلك وعندي اطفال ومااكدر اسوي شي
لا تكدرين
شنو
اتطلكي
ياستار صح زوجي ماحبيته لسه بس بيتي مااهجمه ولا اعوفه شتحجي انته
اني اخذج شبيج والله اشيلج شيل من الكاع
ضحكت ضحكه طويله وكالتله لعد ليش مااتزوجتني قبل اشو تقاليدك ماتهمك هسه مجتمعك حياتك
ليلى هسه كلبي يهمني
كالتله تعرف غلطتنه شنو
ماكطعنه هل الحب وخليناه يمشي بينه مثل المرض
علاقه فاشله ماتصير ولا مقدرلهه تصير
روح ياابن الناس وعش حياتك واترك خذلان نفسك لنفسك فلن تحيا مثل العاشقين