الغزالة والصياد

ولادة وفراق

الغزاله ..والصياد ..!
*قصة أمل وحلم نائم أبت صاحبته إلا أن يستيقظ*.!
جنوب شرق بغداد سنة ١٩٤٠ ميلادي.
القصة تحكي عن طفلة صغيره تفقد والدتها وعندها من العمر سبعة ايام .!
اليوم قصتنه من الواقع بس اليقراها يشوف بيها ضرب من الخيال لا هي قديمه ولا هي جديدة قصة تقروها تگولون عليها فلم هندي بس هي واقعيه وشهودها عندي..!
كان يا ما كان لا في العهد القديم ولا الجديد
زواج يطلقون عليه گصه بگصه وفي الشريعه اسمه زواج الشغار وهذا طبعاً منهي عنه شرعاً.
طبعاً أبطال قصتي اليوم راح أختار الهم اسماء من وحي الخيال تفادياً للقيل والقال وكثرة السؤال...؟
البنات اختاريتلهم  .ليله.. وبهجة
والشباب.اختاريتلهم حمد و هلال
حمد تزوج من ليله اخت هلال وهلال تزوج من بهجة اخت حمد.
حمد وليله متفاهمين وعلى حسب الاصول وحياتهم هادئه طبيعيه .
هلال ما ينجرع ولا بهجة تنجرع بانزين ويمه نار.
ما تفاهمو من اول يوم .
ليله حملت من حمد وجابت بنية اية من السحر والجمال سموها غزالة .
هلال وبهجة ما خلفوا وبقت مشاكلهم ما هدأت  ولا انطفت واخيراً قرروا الطلاق بس هلال گال اذا اني اطلق بهجة لازم  حمد يطلق ليله .صار اعتراض من الطرفين دخلوا ناس خيرين يابه الخاطر الغزاله بعدهي صغيره عمرها اسبوع بس هلال كان قاسي الگلب ومقبل . قَبل ميطلق البهجة اخذ اخته ليله طلقها من حمد وشمر الغزاله على ابوها وكلمن راح الحال سبيله وبقت ليله تبجي على غزالتها بس هلال مثل حجر الصوان لا گلب ولا أذان .
طبعاً هنا عمر الغزاله اسبوع واحد بس .!وقصتنه كلها  تحجي على الغزاله وشلون راح تلگي امها ليله الضيعتها...! الغزاله اخذها ابوها يربيها ما تأخر حمد اتزوج مره ثانية  وبعد قضاء شهر العسل مع العروس الجديده قرر يجي ياخذ الغزاله يربيها عنده بس عمتها البهجة ما قبلت وگالت الغزاله تبقى هنا عدنه ابيت جدها واحنا عمامها انربيها البهجة ما طولت تزوجت مرة ثانية وبقت الغزالة عند عمها الكبير رباها وي ولده فمن كبرت وبدت توعى ما تعرف انه هذوله ولد عمها لاا محسبتهم اخوانها ولا هم يعرفوها انه هي بنت عمهم
الحد مكبروا عرفوا ان الغزالة بنت عمهم .المهم الغزاله كانت حيل تحبهم وكأنه اخوانها حتى تحبهم اكثر من اخوانها الي من ابوها بس الغزاله دائماً تبكي وتريد امها لكن امها اختفت وضاعت اخبارها.
كبرت الغزاله وصارت صدگ غزاله جمال وطول اخلاق وتربيه وقوه وشطاره صدگ غزاله وبعد احلى من الغزاله صار عمرها فوگ ال١٦سنه طبعاً قبل بالارياف يطلعون يرعون الغنم ويجمعون الحطب والاراضي مفتوحة فكانت الغزاله تطلع وي بنات عمها للرعي وجمع الحطب ،.!وكان  اكو شاب بس يمه يمه شلون شاب يجنن هم جمال وهم ورجوله وهم أخلاق وهم شهامه خيال وصياد لا يخاف ولا يهاب يجوب البوادي والصحرى يصيد ذياب البر وصگور الجو شجاع وكريم ابن حسب واصول وعنده غيره وراعي نخوة اخو أخيته  كل  طباعه حلوه اطباع عربيه لكن بي عيب واحد عصبي زياده عن اللزوم ومع ذلك كان حلم كل بنية بذاك الوقت كان هذا الشاب يتردد على اخته لأنها كانت متزوجة بنفس المنطقة الي بيها اهل الغزاله .
وفي يوم  واذا بالصياد يلمح الغزاله من بعيد وسبحان الله والقسمه تريد تصير عرض الموضوع على اخته واخته رحبت بالفكره وقبلوا العمام ينطون الغزاله للصياد ولا وهم عوزهم بعد ما ينطونه اصلاً افتخروا بهذا الزواج  وانه الصياد اقترن اسمه بأسم بنتهم ..وتزوج الصياد من الغزاله وتقرب من بيت عمها أكثر وحبهم مثل ما الغزاله  تحبهم لأن الصياد شهم وكريم والمعروف يرجعه لأهله ضعفين. وشافهم شلون حنينين عليها وشلون يودوها ويحبوها ويزورنها حتى من حملت الغزاله وجابت اولادها الاولاد كانو مفكرين انه هؤلاء فعلاً اهلها وكانو ينادونهم الخوال .فكانوا اعمامها واولاد اعمامها بمثابة اهلها الي ما شافتهم اصلاً .طبعاً هنا الغزاله ما تركت البحث عن امها الفقدتها كانت دائماً تبحث عن امها بس ماكو فايده وايظاً الصياد ما قصر هم  يدور وياها وهم ماكو انقطعت اخبار ليله تگول فص ملح وذاب .
الصياد كان نار ما يعرف يدگ رجلينه بگاع رحاله ما يثبت بمكان واحد ابد وين ما يلگى عشب ومطر وگاع حلوة ياخذ عائلته ويروحلها ويجوز هذا عنده من باب التغيير وحب السفر الله اعلم .هنا طبعاً الغزاله هي واولادها وياه وياه مرافقته شتسوي المره وين تروح وخاصة هي ما عدها اهل حتى اذا العمام يحبوها ويودوها بس تبقى فاقده الاهل ومهما يكون العم مو مثل الأب ولا العمة مثل الأم وكَانت مرافقه الصياد مثل ظله وراضيه بي بحلوه ومره  ما كانت تگدر ترفضله طلب بسبب عصبيته وحدته الزايده ما كان يتفاهم ابد الشور ياخذه  من راسه وما ياخذ شوره من غيره ابد. بس مع ذلك هو كان عاقل ورزن ويوزن الأمور بميزان الحكمه والعقل واكيد ما يسوي شيء يأذي بي الغزاله او اولادها هو حياته هاي وتعود عليها وهي بمرور الوقت هم تعودت على حياتها وياه وافتهمت شلون اتجاريه ولذلك خلفت منه خير من الله صبيان وبنات وما انذكرلي انه كانت اكو بينهم مشاكل بهذا الصدد..!
وبكرى ان شاءالله انزللكم الجزء الثاني والعاجبته قصتي خلي ينتظرني 😘
تحياتي # sanaa -abed