الغزالة والصياد

بحث و عناء

نتمنى مرور الساعات والأيام والشهور بسرعة  علنا نجد ضالتنا ونحقق احلامنا ونتقدم في خطواتنا ولكن نسينا او تناسينا أن هذه الساعات التي تمضي ما هي الا ايام تسقط من اعمارنا فيتقدم بنا العُمر وتأخذ التجاعيد تظهر في وجوهنا ويذبُل عنفواننا للأشياء .....
مرت الايام والسنين والغزاله ما قطعت الأمل في البحث عن امها
وطبعاً تخللت هذه السنين احداث ووقائع بحياة الغزاله والصياد.

اتعرفوا على ناس تركوا ناس اولادهم كبروا وعدهم ايضاً اولاد
صغار ومن احلام الغزاله والصياد انه يشوفون اولادهم احسن الناس واصلين ومتعلمين وبالخير مترفهين وإن الغزاله والصياد يقضون كل عمرهم سوى هم واولادهم مجموعين ما يفقرقهم لا زين ولا شين .
طبعاً الغزاله كانت ذكية ولماحة . فكانت بأي مكان تگعد بي تسولف سالفتها وشلون امها ضيعتها عسى ولعل تجد في يوم ظالتها .وكأن لسان حالها يقول.
هلي ويا من  ضيعوني
راحو ويمكنهم جفوني.
وللنوح والبواجي خلوني .
وأظنهم من طول البعد نسوني.
هلي دروبهم مهجورة.
وعلى فراگهم روحي مكسورة.
هلي بعيدين وانا بديار الغرب مأسورة.
ومرت الايام لا الغزاله وجدت أمها ولا أمها وجدتها .وكل ما تكبر الغزاله يكبر حزنها ويضيق صدرها .
طبعاً الغزاله كان عدها اخ واحد من ابوها يعني ابوها صاروا عنده من زوجته الثانية بنات غير الغزاله لكن ولد واحد فقط فكان هذا عزوة الغزاله وصدرها الحنين وايضاً عدها واحد من ولد عمها العاشت وياهم هذا كان اصغر اولاد عمها فشلون هي المربيته من كانت عند بيت عمها المهم هذوله الاثنين كانوا فعلاً عزوة الغزاله وَهُم الي يصبرونها على فراگ اهلها فكانو مالين عليها حياتها يودونها يزورنها يحبونها ويحبون اولادها تعرفون المرة تتباهى گدام زوجها واهله انه هي عدها اهل يحبوها ويجون عليها قبل الناس على نياتها ويرضون ويقنعون بالبسيط يعني الاخ لو جاب جكليتات الجهال اخته اووو اخته تبقى سولف بيهن شهر.

المهم ما طول عليكم السالفه يا فرحة الماتمت على الغزاله.اخوها وابن عمها الي هُم عزوتها واهلها وحزام ظهرها يستشهدون بحرب أيران اعتقد بنفس السنه  يعني ضربتين براس الغزاله بسنه وحدة واتخيلوا الموقف
وحيده وفاقده محنة الاهل واثنين هُم عزوتها وخيمتها وتفقدهم بسنة وحدة شنو الاحساس  الي هي عاشته شنو كانت مشاعرها شلون تجاوزت هذه المحنه والله ما اعرف  .الظاهر والأكيد انه الصياد عداها من قساوة اطباعه والله اعلم .
راح شهر جي شهر ويصير الي لا على البال ولا على الخاطر ويمووووت الصييييياد هنا من صدگ صارت للغزالة كسرة الظهر وانتهت بمعنى الكلمة لا اهل لا مكان لا مأوى لا عزوه  ومثل ما يگول القيصر  تلتحف السماء وتفترش الحصا وتلوك الصخر خبزا. لكن الغزاله تبقى غزاله ومثل ما عهدناها  والقوية تبقى  قوية وللزمن ما طخ راس ولا تنكسر الغزاله من نسوان قبل  شهامة وعزه وكرامه تماسكت الغزاله واستقوت بالله ومن ثم بأولادها واستجمعت قواها وقررت تروح على ابوها حتى يشوفلها صورة حل ابوها الرجل ما قصر عنده ارض اعطاهيا وگاللها هنا ابني واگعدي انتي واولادك وفعلاً استقرت هي واولادها بأرض ابوها لفترة من الزمن .!
اهلنه قبل كانوا على نياتهم فمن يريدون شيء او تضيق صدورهم يروحون على مقام امام بمنطقتهم ويكأنهم يتنفهون من صعوبة الحياة ويتخلصون من ضيق العيش ويرمون حمولهم باب الامام  بس شنو الي صار وشنو الحدث المهم الي راح يقلب حياة الغزاله رأساً على عقب معقولة تلاگي أمها الله اعلم......؟؟؟
وبكرى ان شاءالله نعرف شصار والعاجبته قصتي خلي ينتظرني