الغزالة والصياد

بصيص أمل

الجزء الثالث*الغزاله والصياد *
*قصة أمل وحلم نائم أبت صاحبته إلا أن يستيقظ*

الغزالة وهي گاعده بضريح الإمام لگت نسوان اثنين فتجاذبن اطراف الحديث ومثل مگتلگلم الغزاله كانت ذكية ولماحة وين متگعد تسولف سالوفتها وشلون امها ضيعتها عسى ولعل في يوم تلاگي ظالتها .الغزاله وذني النسوان الغريبات وهنه يسولفن كانن موجودات وراهن نسوان اثنين يستمعن الحديث ، هس شگد صارن النسوان احسبوا وياي لا تنسون صارن  اربعة اثنين متلقيات للحديث وجه بوجه هذني شغلتنه مو يمهن واثنين مستمعات گاعدت خلف ظهر الغزاله  .وانتبهولي على ذني النسوان الاثنين المستمعات الگاعدات خلف ظهر الغزاله لأن كل لغز القصة عدهن وهنه الي راحن يحلن لغزنه .اقتطع هذا المشهد عليكم واروحلكم على مشهد الأم المفقوده الليله .
طبعاً الكل تساءل ليش ليله ما دورت على الغزاله وبس الغزاله دور عليها .
ومنو گال ليلة ما مدوره الغزاله ومنو گال الليله ناسيه الغزاله الليله ما ناسيه الغزاله ولا عايفه ذكرها ولا تاركه البحث عنها  لكن ظروفها اقوى منها .قبل البنية ممنوع تطلع وحدها مو مثل هس دشته بكيفهن النسوان يطبن ويطلعن . ومثل مگتلگم الهلال اخو الليله كان صعب وقاسي گلب هاي اذا عنده گلب اصلاً فمهدد الليله انه متروح وتسأل على بنتها الغزاله وطبعاً الليله مزوجيها مره ثانية ومخلفه من زوجها اربع اولاد وبنت واكيد صعبه على زوجه انه طالب  زوجها بأنه يبحثلها عن بنتها من زوجها الاول  .الليله ما ناسية الغزاله ابد وكانت دائماً تحكي لاولادها انه هم عدهم اخت ولازم يبحثون عنها ويلگوها سواء بحياتها او بعد مماتها وموصيتهم عليها وانه يديرون بالهم عليها وزارعه حب الغزاله بگلوب اخوانها وهذا الحب  لمسته الغزاله من لگتهم .فكانت  الليله دائمة البكاء عليها وفعلاً باحثين عن الغزاله  ولكن ما لاگيها لان قبل ماموجودة اتصالات ومثل مگتلگم كانو يغيرون اماكنهم فمو بالسهوله الواحد يلاگي شخص. طبعاً عند الليله واحد من اولادها يعني اخو الغزاله من امها ماشاءالله شاب شلون نگول علي سبع هذا الشاب كان ظابط فمو يشوف الليله تبجي على غزالتها وممرتاحه يوعد الليله يگللها هاي السنه لو اني لو الغزاله.
غزالتنه  لو بحر اطب الگاها و اجيبها ونخليها بعيونه ،.! سبحان الله مدري حظ الليله مدري حظ الغزاله ويروح هذا البطل ويرجع لليله بتابوت استشهد الله يرحمه بحرب ايران وبمكان ما كانت الليله تبجي بس على الغزاله گامت تبجي على اثنين .!
ومن كثر  حزنها على ابنها تركت البحث عن الغزاله لكن ما نستها ورب العالمين ما تركهم وهس نشوف شلون رب العالمين يدبر التدابير ويرجع الظاله لاهلها شلون رجع نبينا يوسف لنبينا يعقوب عَلَيْهم وعل نبينا افضل الصلاة والسلام،.! نرجع المشهد الغزاله وهي تحكي قصتها طلبت منكم قرائي الكرام انه تنتبهولي على النساء الاثنين المستمعات .بعد ما كملت الغزاله قصتها اتقربت منها وحدة من النسوان الاثنين المستمعات الگاعدات خلفها اتخيلوا المشهد وياي.!
مقربه ايدها على وجه الغزاله دايره وجه الغزاله يمين تگللها تشبهينها راجعه دايره وجه الغزاله يسار ترجع تگللها والله تشبهينها.! اريد أسألج انتي اسمج الغزاله گايلتلها الغزاله ؟
اي نعم اني اسمي الغزاله!
گايلتلها والمرة الفاقدتها  وتگولين عليها امج اسمها الليله؟
گايلتلها الغزاله  اي أمي اسمها الليله؟
گايلتلها زين وماخذينج من امج وعمرج اسبوع واحد؟
الغزاله تجاوب اي ؟
گايلتلها ابوج اسمه حمد؟
گايلتلها الغزاله اي؟
هاي المره رأساً مختلطه دموع الشوق مع دموع الفرح فحاظنه الغزاله وتگلها انتي غزالتنه المفقودة انتي بنيتنه  .احنه خوالج وانتي الغزاله الاحنه مضيعينها.
طلعت هاي المره المستمعة من خوال الغزاله
وتلاگي الغزاله اول خيط يوديها على امها.
طبعاً رأساً رايحة الغزاله على خوالها لكن ما شافت امها اول مرة لاا ولد الخال بس اخذوهاعلى بيتهم وهناك تعرفت على خوالها ورحبوا بيها ترحيب خيالي بحيث صارت نجمة الليله عدهم  سوبر ستار فرحانين بيها كثيييير ويسألوها عنها وعن احوالها وشلون اخبارها وعن اولادها وعن ابو بيتها وهي كلش فرحانه بيهم وما تعطي فرحتها الاحد بهذا اليوم...! بس ما اعرف شافت هذا ختيار النحس والجن 👿هلال ما شافته مادري والله 👊🏻👊🏻👊🏻....! لو اني ومنها الف عگاله على رگبته وعلگة بعمود بنص حديقة بيته واجيب بانزين وكل ما تحر الشمس ارش عليه بانزين وشمس العراق كفيله تحرگة هالميخاف الله هذا بس هي جان گلبها طيّب .!
يعني اتصوروا والي اني سمعته انه كل اهله لهذا مسود الوجه هلال ناقمين عليه بسبب الغزاله والسواه بيها وبأمها .المهم ما طول عليكم السالفه رجعت الغزاله الاولادها والي رجعوها طبعاً ولد خوالها وبشرت أولادها انه هي لگت خوالها وهمه راح يودوها على امها بس بين ميبلغون الليله انه لگوا الغزاله لأن هذا خبر احتمال متتحمله الليله وشلون يرتبون  لقاء بين الام وبنتها واخوانها ...!  لكن هل الغزاله راح تشوف امها بعد غياب ٤٥ سنه لو يصيررر حدث يقلب السالفه راساً على عقب  ..!
وبكرى ان شاءالله انشوف هل تم اللقاء على خير ما بين الغزاله وامها لووووووو ...؟
ومثل ما دائماً اگللگم اصدقائي العاجبته  قصتي خلي ينتظرني...!