"حكـاية شمس"

الحـلـقــة 3

اسامه »»تقربهـا يا### حسابك معاي

الشاب »»تي كنك نبوا نتعرفوا بس

"قعد اسامه يضرب فيه والشاب هرب"

انا بصوت شبه مسموع »»شـ شكرا

اسامه »»العفو نا اسامه وانتي

انا بصوت واطي »»شـ شمس

اسامه »»شنو؟ ماسمعتكش

انا »»اسمي شمس

اسامه »»عاشت الاسامي يامحلا اسمك

انا »»تسلم

"مشيت نجري وقعمزت فالكافيتيرتا وحطيت يدي ع قلبي وتنهدت وجت نجلاء"

انا »»اووووف وينك ياباردة كسدت وحدي وانتي عارفه معنديش صحبات

نجلاء »»والله نضال شغلني شوي...شن درتي

انا »»شئ قعدت مكسده بروحي

"نجلاء صاحبتي من اولى ابتدائي وهيا الوحيده اللي نحكي معاها بطلاقة ومانتحشمش منها "

نجلاء »»شوشو تعرفي

انا »»شنو؟

نجلاء »»نضال يبي يجيب هله

انا بفرح »»جدددد!!!!

نجلاء »»والله

انا »»مبروووووك حبيبتي

نجلاء »»هههه الله يبارك فيك
..
..
..
"خشينا للمحاضرة وطلعنا الساعه 11....مشينا للكافيتيريا شرينا بريوش وشكلاطه ونسكافيه وقعدنا نهدرزوا نا ونجلاء وخشينا المحاضرة الثانية وطلعنا...."

"نجلاء رن عليها خوها ومشت وانا رن عليا بابا ومشيت لسيارته لقيت سيارة اسامه قاعده جنب سيارتنا وبحت فيا وابتسم وانا لا اراديا رديتله نفس الابتسامة...ركبت مع بابا ووصلنا الحوش"
.
.
~~~~~~
"مـروا ايـام ع نفـس الحالة واسامه ديييمه يختلق فالصدف عشان يشوفني ومش عارفه ليش انعجبت بيه وشبه حبيته بس كنت ديمه حاطة خوتي وهلي بين عيوني وخايفه من حاجه تصير..."

"مشيت الجامعه ولقيت نجلاء سلمت عليها وقعدت نهدرز شوي معاها وخشينا المحاضرة وكانت ادرررره الكبد....طلعنا وقعمزنا انا ونجلاء وجانا اسامة 😳.."

اسامة »»شمس نبيك شوي

انا »»ااا انا؟

اسامه »»هههه اها انتي

"مشيت معاه وانا خايفه وقعمزنا في كرسي"

اسامه »»ااا شمس انا معجب بيك"ومدلي ورقة" هذا رقمي ونبيك تحكي معاي واتعرفي علي اكـثر وناوي معاك الحلال

انا »»بـ بس

اسامه »»هههه مفيش بس وماتخافيش

انا »»بـه

"مشيت وانا خايفه ونفكر ووصلت لنجلاء"

نجلاء »»شن قاالك 😳😳

انا »»مدلي رقمه وقال يبيني وناوي الحلال

نجلاء »»لولولولولوليييي

انا »»اسسس مش موافقـه

نجلاء »»لييش؟

انا »»هكي مش موافقه وبعدين عارفه خوتي وهلي

نجلاء »»اششش ماتحكيش هكي انتي تعرفي عليه فتـرة وشكله كويس

انا »»ان شالله خير

"وصلت للحوش وخشيت لداري وقعدت نفكر"

انا »»بس علاقه وهكي حررام والله!!!...اخخخ وخلاص بس الكل يشكر فيه وقالوا كويس....ياااااااارب دلني ع طريق الصواب يارب

"تغدينا وماما غسلت الماعين وكل حد خش لداره....طلعت الورقه وقررت نكتب الرقم....كتبت اول 3 ارقام وبعدها مسحتهن عالسريع...تنهدت وكتبت الرقم كامل ورنيت قعد يرن....خفت لان اول مرة في حياتي نكلم فيها شاب وسكرت...بعد شوي عاود عليا اسامة "

انـا »»اا الو

اسامه »»عاااش من سمع هالصوت الله ليا زمان نتمنى فهاللحظة

انا »»تـ تسلم

اسامه »»شمس ماتخافيش مني انا نبيك ورايدك بالحلال وبإذن الله راجل معاك

انا »»ا ان شالله

اسامه »»احكيلي عليك

انا »»انا شمس م98 نسكن في حي ال***..نقرا ثالثه جامعه اقتصاد

اسامه »»العمررر كله...وانا اسامه م93 معيد في الجامعه ونقرا هندسه

انا »»ماشالله

"قعدت نحكي معاه وانا نحكيله عليا وهوا نفس الشي وانسجمت فالحكي معاه بس مازلت خايفه ومتوترة...سكرت منه بعد مايقارب عن الساعه وانا نحكي معاه وتنهدت وقررت نحطه فالحظر"

انا »»اوووف ليش هكي وشن دار هوا عشان نحطه في الحظر....والله حرام شكله كويس
"حولته من الحظر وانا نفكر وخايفه..."
~~~~~~~~~~~~~
بعـد مرور اسبوعين🍃

"مـروا اسبوعين كاملات وانا نحكي مع اسامه وقعدت متريحتله وعرفته ولد ناس ووثقت فيه وحبيته"

الساعه 12 ليلاً....
"قـاعده نحكي مع اسامه وبعدها قال"

اسامه »»شمس ممكن نطلب طلب بس ماتفهمينيش غلط

انا »»تفضل!!

اسامه »»دزيلي صورتك....ماتفهمينيش غلط لكن والله مرايف ع شوفتك وكان متبيش براحتك

"قعدت خايفه اني ندزله لكن قررت ندزله صورتين وانا بحجابي لاني واثقه فيه وعارفته راجل وولد ناس"

اسامه »»الله اكبرر عليك....ااااخ وخلاص يارب تكوني حلالي وليا نا وبس

انا »»ههههه ان شالله

"قعدت نحكي معاه وبعدها قال"

اسامة »»شمس انا..........

انا بصددمة ،»شنووو!!!!
.
.
.
يــــــتـــــبـــع....~❤❤

للكاتبة سرو الحاسي
SARRO_2003