مجموعه مدرسات في وقت الفسحة يفطرون وكان النقاش محتد
انتفضت ليلى بحده لدرجة اهتز كوب المــــــــــانــــــــــجــــــــــو وقالت باحتقار: هذي صاحية تتزوج واحد من عايله مثل كذا..أنا نفسي اعرف كيف تفكر !!...مستحيل تكون حسبتها صح
جلست نوف في كرسي ملاصق لها وقالت بثقة: أنا أقولك كيف تفكر..هي قالته ...ولد الحسب والنسب تزوجته شــ صار... ما همه فيها ميتة حيه أكلت جاعت عندها مشاعر أو متبلدة...همه يرجع في الليل يلقاها جاهزة في متناول يده و إذا صحي يجحدها ولا كأنه يعرفها...وتزوج عليها بعد ثلاث سنين صابرة عليه وعلى عمايله و ساكتة...وهو ما خلى شينه ما حطها فيها...طلقها و أفتكت منه وتحمد ربي ألف مره انه ما رزقها بعيال منه....خطيبها هــ لحين صح عايلته مو بــ هذاك الزود لكنه عن ألف رجال..ذوق وطيبه و حنيه...الله يخليه لها
قالت بانفعال: و أهلها شرايهم...موافقين!!
ابتسمت صاحبتها برقه: أهلها يبون سعادتها وعشان كذا وافقوا
قالت باستهزاء: إي سعادة هذي .... أنتي وين عايشه...صدق ناس تخلف
قالت صاحبتها سارة تجس النبض : ليلى لو تقدم لك واحد مملوح ودين وربي فاتحها عليه ومن عايله متوسطة الحال وشاريك ...توافقين !!!
فهمت التلميح وبكل ترفع عشان تقطع الخط من بدايته قالت: أنا بنت شيوخ عارفه يعني كيف شيوخ....مملوح شين غني فقير طيب شرير...ما يهمني أهم شي أصله ... بنت الشيوخ ما تأخذ غير ولد شيوخ
قالت سارة بمزح : حيلك حيلك ... بشويش على نفسك لا تتقطعين من كثر الكبر
قالت وهي توقف : يحقلي أنا ليــــــــــلى سارة
باستهزاء : نشوف يحقلك أو لا إذا عنستي ...
وكأنه صفعت كف والموضوع قلب شخصي: والله أعنس ولا اخذ ولد *****
كل العيون توجهت لــ سارة قالت سارة بنفس أسلوب الاستفزاز و الإنكار: لا يكون واحد من عندنا خطبك...لا حبيبتي أنتي تحلمين عيالنا ما....
قاطعتها بترفع: اجل قولي لعمك عمت عينه لا يتلصق بأخوي... ولا يفاتحه في إي موضوع مو قده لا يجيه شلوتي يخرب معالم وجهه ... ووصلي له هــ رسالة مني.. تقولك ليلي لا تناظر فوق تنكسر رقبتك
صمت حل على كل الغرفة من الصدمة الكلام كبير وجارح ووسط مجموعه كبيره من المدرسات ... أهانه ...قمة الإحراج لــ سارة
صرخت سارة بعبره مجروحة : يا حيوانه
و ناويه تناقش أكثر لكن نوف مسكتها وقالت: سارة ..
و أخذتها من وسط الغرفة لخارجها
قالت المساعدة بصدمة و كانت حاضره المشادة الكلامية من البداية: ما توقعتها منك يا ليلى كلامك جدا جارح وغير حضاري بعد
