ابتسام
قمت من النوم الظهر والنفسية للأرض لاحظت إن عنادوه أمس ما نام هنا ولا كلف على نفسه يجي يأخذ بخاطري أكيد وأنا من أكون عشان يتنازل لي ويعتذر!!! جمعت ذهبي كله بما فيه الدبلة ... لكن مو بالعند أروضه بلين و تكتيك أنثوي و السحر الحلال ويشوف البنت المشتراة من مسجد وش تسوي فيه!! ....... هي خاربه خاربه خليني أعميها... وبعدها ....
نزلت تحت ناويه نية... بس بعد ما افطر لاني جوعانة نزلت من الدرج الجانبي لأنه اقرب للمطبخ و مو ضروري أمر من الصالة واللي أكيد مجتمعين فيها صدمت بولد عمره عشر سنين تقريبا ناظر فيني وصرخ بصوت عالي: شغالة
ناظرت ورأي ما شفت احد قلت وأنا أناظره بتفحص: ما فيه احد من تقصد؟
فتح عينه بصدمة وقال: يا الله شغالة وتعرف تتكلم سعودي؟
قلت له بعد ما فهمت قصده وأنا نفسي أعطيه كف يعدله: تقلع من وجهي أشوف يا لله
قال بنفخه: أنتي اللي تقلعي
أوف صدق رفعت ضغط تعديته ودخلت المطبخ شفت وجهي منعكس على زجاج المطبخ عيوني صغار وحمراء و منفوخة من كثر ما بكيت البارح وشعري واقف وقصير فعلا كأني شغالة اندونيسيه حسبي الله عليك يا عنادوه شوف كيف صايره بسبتك أنت واهلك
خلصت أكل وأنا اقلب كلام عنادوه في راسي وقبل اخرج من المطبخ جاء البزر وهو يسحب في يده حرمه في أوساط الثلاثين قال الولد بحماس: هذي الشغالة اللي تتكلم سعودي
هنا أنا فار دمي و ارتفع ضغطي من ذا البزر قالت أمه ببسمة اعتذار وهي تمد يدها وتسلم : يا هلا وغلا أخبارك يا قلبي أكيد أنتي ابتسام...أنا أم هادي خالت زوجك و أكون زوجة عمه بعد..
أوف يعني ثلاث أخوات متزوجين ثلاث أخوان والله عائله خيال
قلت وأنا نفسي ازنط البزر: هلا بك ... بخير ونعمه ... أنتي كيفك؟
ضربت راس الولد بيدها فاهتز رأسه وهو يناظرها بضيق قال باحتجاج : وأنا شــ سويت ؟؟
قالت بنعومة :اعذريه ما عرفك يظنك صديقه لوحده من البنات
قال الولد قبل ليخرج تماما :اعرف هذي حبيبة .. عناد
حبك برص أنت وعناد ...أول مره أحس بإحساس القاتل يا ناس يا عالم نفسي اذبحه
طلعت أنا و الحرمة من المطبخ وهي تقول بإحراج : أوف من العيال والله يشيبون ألراس و يجيبون العلة... ما أقول إلا الله يهديهم
دخلنا الصالة وكان فيها أم عناد والبنات (ما دري متى رجعوا من بيت عمهم) جلست جنب أم هادي ما قدرت أخليها وأصعد غرفتي أحسيها قلة ذوق ... واشتعلت سوالف الحريم اندمجت اسمع
دخل بهيبته وتكشيرته عاكسه مزاجه ألنكدي الله عالم وين نام أمس !!... جلس على ألكنبه وعينه في عيني يا كرهي له
دخل الولد الصغير ومباشره توجه لعناد قال : عناد شوف ... بالله ما تشبه الشغالات؟
زالت ألتكشيره وحل بدالها ابتسامه لعب قال بتريقه: واحلي شغالة بعد
