فرحي و سعدي بزهري المكوز

بارت 1

😱 فرحي و سعدي بزهري المكوز 😱
بقلم ✍ : ✌ كاپيطوسة المغربية ✌

وسط الدار جالسة مولات الدار و الري و شوار محجوبة إمرأة على مشارف الأربعينات هازة و وافية لابسة بيجامة ديال ربعميات ريال و عاقدة زيف حياتي على راسها ...  مفرڭا رجليها و طالقاهم .. قدامها طبسيل ديال جالوق وسطو العدس كاتنقيه و فالجهة الثانية جالسة عكوزتها طامو باينا فيها حاارة وجهها مكمش و من دوك التجاعيد غايبان لك بلي دوزات حرب الأندوشين ما هي فالسبعينات و ما هي فتمانينات عمرها مامضبوطش حيت فوقتها ماكانش كناش الحالة المدنية ولكن لي عارفينو داكشي لي عاشتو ماعاشتوش الحاجة الحمداوية ضاربا لك بيجامة ديال الموبرا و من الفوق بينوار تحلف عليها هي العروسة و محجوبة العكوزة ... ... هي و محجوبة كي القط مع الفار شد ليا نقطع لك كأي عكوزة و عروسة مغربية
محجوبة : زااااهية ... واااااا زاااهية ... واااااا بنت الهم ... صممممك ... تمات هابطة الزاهية كاتنكر
زااااهية : كررررهتوني فراااسي سير يا جدي لهلا يرحم فيك شي عضم على هاد السمية لي مخليهم يخسرو عليها حولي بكرونو
محجوبة : شكون كدب عليك ا بنتي و قالك حولي بكرونو .. خسرو عليك فروج و عتروس كان قريب يموت
الحاجة طامو : ( و عينيها فتلفازة ) ا هاديك هاه اش كاتبركمي تما
زاهية : وااالو ا مي لالة ماقالت والو
محجوبة : ااااه ا بنتي حتى من سبوعك ماكان عندك فيه زهر داك حطب جهنم ديال جدك حتى من زرورة ديال النفيسة طمع فيها و مشا كايتعرض للناس فالدروج يشدها من عندهم تقول هو لي نفيسة
زاهية : ها هي غاتسمعك مي لالة غاتصدقو منوضينها صباط تاني
محجوبة : فييين هي راها مطردقة عينيها فتلفازة
زاهية : مهم ا مي عيطتي لي اش كاين
محجوبة : جيبي لي بزطامي نسخرك تجيبي الخبز من الفران
زاهية : عااااوتاني ا مي و دوك المتارف ديال ولادك اش كايديرو منين مايتسخروش هادشي لي حاضيين غير سريط و المريط
محجوبة : منين داك العود من دييك شجرة طريكة الناقصة ماينفعو مايضرو
زاهية : كاتقصدي راسك بديك الشجرة؟ ... وا غووووووول صندالة تطبعات فالجبهة ديالي زاهية
محجوبة : نوووضي ينوض لك جلد على العضم كاتعايريني دابا يا وجه النحس ... ناضت طايرة تخبعات مور طامو حتى قفزاتها من بلاصتها
زاهية : وا مييي ما قلت والو ياك نتي لي معنيتي على راسك
محجوبة : مزال ماباغا تحشمي عاد مازايدا فيه ا بنت الحرام ...
الحاجة طامو : ا هياااتا مالك مع البنت
محجوبة : حيدي الحاجة خليني نربي والديها كاترد عليا الهضرة صافي طواااال لك اللسان
زاهية : وا صافي ا مي اري نتسخر لك لابغيتي يلاااااه
محجوبة : جيبي لي بزطامي يا السلعة الناقصة
الحاجة طامو : ايوا يوا يوا يوا حدك تما مالها سلعتي؟؟؟ ا دوي يا بنت الخماس ... مشات الزاهية وقفات الوسط
زاهية : صافي صافي مي لالة .. الواليدة حبسو غايدخل با يشوفكم مخاريين غايقربلها علينا هاكي ها بزطامك ... عطاتها البزطام باش تعطيها فلوس الخبز
زاهية : شدي و رجعي لي الصرف خبزنا هو لي فالطبق ديال الخشب مغطي بمنديل ليموني
زاهية : وا صافي ا مي عرفتو
محجوبة : ماتنسايش دوزي على داك المتروف ديال خوك للكولفازور يجي يتغدا
زاهية : و با؟؟
محجوبة : باك خدام ... مشات زاهية للبيت لي كاتنعس فيه مع خوتها زادت المونطو فوق بيجاماتها و جمعات شعرها بمقبط ديال درهم و خرجات ... بينما توصل هي للفران نعرفكم عليها ... زاهية ماعندكم ماديرو بالكنية زينها عادي بحالها بحال اي بنت فصالتها ما طويلة ما قصيرة طول عادي و ما رقيقة ما غليضة فصالتها عادية عينيها كوحل و بشرتها قمحية ملامحها مغربية 100% السن 22 سنة سالات قرايتها و شدات لرض عائلتها ماشي عائلة مشهورة ... عائلة بحالها بحال كاع العائلات المغربيات ماعندهمش و ماخصهمش عندهم دويرة ففاس طلعها الاب ديالهم و الام ديالهم بعرق كتافهم و هي فين عايشين ... عندها 2 خواتاتها وحدة كبيرة و وحدة صغيرة و 2 دراري كبار ... كايميزوها 2 حوايج شعرها الكحل طويل لي مغرقاه الحاجة طامو بالزيوت و الوصفات و الحنة و الحاجة الثانية لي كاتميزها على الباقي هي زهرها المكوز المكور المخور لي فوقما كايسحابلها الدنيا غاضحك لها كايغفلها زهرها بتصرفيقة ترجعها للواقع ... من الصغر و هي ماعندها زهر فاش تزادت كانت مها بغات تسميها ياقوت صدق جدها خرج لهم فعودهم و طلع لحافة السطاح بغا ينتاحر واااالو يا يسميوها زاهية يا ينتاحر ... و فاش بغاو يشريو لها الحولي حلف تا يمشي يشريها هو غبر نهار كامل ماجا حتى للعشية جايب فيديه عتروس راكباه الموت رجليه كايترعدو غير بوحدهم و فروج داكشي باش ضطرو يذبحو العتروس قبل مايموت و يصدقو لا لحم لا هم يحزنون و خلاااص قضية زرورة راها فخباركم ... يتبع