فرحي و سعدي بزهري المكوز

بارت 4

😱 فرحي و سعدي بزهري المكوز 😱
بقلم ✍ : ✌ كاپيطوسة المغربية ✌

   
صبح الحال و بدا نهار جديد كلشي كايوجد راسو باش يخرج ... محجوبة كاتلبس جلابيتها باش تخرج للسويقة مع البعلوكة ديال الدار .. محمد و سلوى باش يمشيو لخدمتهم .. سي الطاهر مشا للخدمة .. زاهية باقا واحلة فداك الماريو اش تلبس اما الباقي ناعسين
زاهية : غا لي يكرع هاد شراوط للجوطية ماصالحينش ماصالحينش ... بقات كاتتسنا فالبيت حتى يخرج كلشي باش عاد تشوف فالطبقة ديال ختها ايلا بان لها مايتلبس وا هو فالأصل راه كااااين عندها مايتلبس غير هي شحال من مرة كاتنوضها معاها و كاتقولها العبارة لي بين الخواتات " ماتقيصيش ليا حوايجي " داكشي لاش بغات تخليهم حتى يخرجو عاد دير خدمتها .. مع سمعات الباب البرانيا تسدات تقلشو ودنيها و بدات كاتعيط باش تتأكد واش كلشي خرج ... ماناقصها صداعات مع ختها فهاد بوصبيح
زاهية : سلوى ... سلواااانتي ... سلووووى ... من مور ماتأكدات بلي خرجات مشات كاطير لطبقة سلوى حلاتها و تحلو عينيها معاها ... تأثرت من جمالية ترتيب الحوايج .. بقات كاتقارنهم مع طبقتها لي كلها طايحة و كل شرويطة منين خارجة و لوكان تجي تقارنهم غايسحاب لك غير زوفري و بنت مشاركين الماريو .. بدات كاتجبد فالحوايج و تقيس اش يجيها حسن ... و بعد مجهود كبيير و اخيرا لقات اش تلبس ... لبسة انيقة بيان سيغ غاتكون أنيقة ... ختها كاتموت على اللباس .. كانت عبارة عن سروال تقطيعة فالركبة فالكحل مع تريكو كحل و تجاكيط فالكري و من لتحت لبسات سبادري فالبيض ... جاتها اللبسة مقودة و خلاتها معقولة على عكس ستايل لي كانت كاتلبس .. كانت كاتبان شمكار اون پيغسون تحلف عليها بالحلوف كاتشم و تتقرقب .. قادات شعرها بابيليز رشات شوية من البارفان لي حتى هي ديال ختها طبعا مع وضع بعض لمسات المكياج الخفيفة ... مشات كاتقلب على داك سيفي مالقاتو غير بستة و ستين كشيفة كلو مكمش هزاتو و خشاتو فصاك هو طيلي و بزطام فيه 10 دراهم لي عطاها خوها مع 20 درهم نتفاتها من محجوبة و سي الطاهر  و دابا بدات المهمة الصعبة ... زيرات على صاك و خرجات من البيت كاتتسلت و تمشا على طراف صبعانها باش مايحصلهاش عصام و يوصلها لختها .. دازت بنجاح من قدام بيتو مشات للكوزينة تعتق الروح بعدا ، شربات كاس ديال اتاي مع قرشالة بالواقفية و خرجات كاطير من الكوزينة باش ماتحصلش .. مع حلات الباب و هو يعيط لها من اللور .. ضارت لقاتو كايتفوه
عصام : ختي الغزااااالة هاي هاي هاي هاني تاني على اللباس المأنتك بلاتي بلاتي ديك تجاكيط ديال سلوى ولا كدبت
زاهية : ههه لا راك غير دايخ بالنعاس سير رجع تنعس
عصام : ( هبط عينيه ) تا داك صاك ديالها لا لا بلاااااااتي اللبسة كاااملة ديالها
زاهية : ( دارت يديها فجنابها ) اييه ديالها و من بعد اصلا هي لي قالت لي مابقاتش بغاتهم
عصام : ( بطنز ) حلفي بالله
زاهية : من اللخر شحال بغيتي
عصام : فاش تخرجي سيفطي معاك 20 دراهم تصالات و الخبار ماغاتوصلش ليها سرك فبييير
زاهية : هااااا ل20 درهم🖕 و هاااا التعبئة 🖕 ... صبعات ليه و خرجات كاتجري من تما
عصام : ( بالغوات ) ا وااااخا فمك البعلووكة
زاهية : ( بنفس النبرة باش يسمعها ) ايلا وصلتي لودنك عضها .. شدات اتجاه المكتبة هو اللول ... خرجات فوطوكوبي على سيفي و عاد مشات للمحطة ديال طوبيس كاتتسنا فطوبيس و كاتشوف فهاد قوم ربي لي حتى هما كايتسناو فطوبيس .. كون مادارتها الحزقة كاع ماتركب فيه ولكن للضرورة احكام عادي عادي والفات الجهاد من اجل بلاصة فالطوبيس ... مع وصل طوبيس كايبان لك بنادم كايتعرض ليه بترحيب الحار كلشي ستاعد للجهاد ... مع وقف و تحلات الباب بدا واحد يدفع واحد و حتى زاهية معاهم .. ماشدات البلاصة حتى ولات كلها مشنتفة ... يتبع