Writing Style
Pinag-aralan namin sa Komunikasyong Filipino ang mga Antas ng Wika. Habang binabasa ko ito ay nasabi kong maaari itong gawing batayan o gamitin sa pagsusulat ng akda.
"Ang tunay na pagkatao ng isang indibidwal ay nakikita sa wikang kanyang ginagamit. Sa mga gamit niyang salita ay mabisang palatandaan kung anong antas ng lipunan ang kinabibilangan ng isang tao."
May pitong antas ang wika, una dito ay ang:
1. Pampanitikan
Ito ay ang mga salitang karaniwang matatayog, malalim, at masining. Mga idyoma at tayutay ang mga halimbawa ng pampanitikan.
Kung gusto mong pormal ang paraan na gagamitin mo sa iyong akda, ito ang antas ng wika na angkop para sa'yo.
Imbes na isulat mong: Marami ang namatay noong lumindol sa Japan, pwede mo itong isalin sa: Bumaha ng dugo noong lumindol sa Japan.
Kakaunti lamang ang gumagamit ng ganitong istilo ng pagsusulat. Hindi kasi natin madalas gamitin ang mga idyoma at tayutay.
2. Pambansa/Lengua Franca
Madalas itong gamitin sa Wattpad. Ang ganitong uri ng wika ay hindi maituturing na dalisay. Halimbawa nito ay ang pinaghalong English at tagalog na tinatawag nating Taglish.
Marami ang mga salita sa Ingles na walang katumbas na salita sa ating wika. Salitang hiram o hiram na salita ang tawag sa mga 'yan.
Hal: Gusto ko ng bilhin 'yung nakita kong bag, limited edition lang 'yun!
Out of stack 'yung paborito kong perfume.
3. Idyolek
Naiibang paraan ng pagpapahayag ng isang indibidwal. Ito ay may kaugnay ng kanyang personalidad, katayuan sa buhay at uri ng salitang ginagamit niya bunga ng kanyang karanasan o kinalakihang kapaligiran.
Sa madaling salita, jejemon. Pinapalitan ang s ng z, ang p ng f, ang b ng v at nadadagdagan ng h.
Para sa akin, huwag itong gamitin kapag nagku-kwento ang tauhan. Gamitin lamang ang antas na ito sa mga text/chat at dayalogo.
4. Dayalekto
Ito ay ang mga salitang ginagamit ng mga tao sa isang partikular na pook o probinsya. Madalas kong mapansin na ang karamihan sa mga manunulat, para lang ipakita na taga-Bicol, Ilocos, Pampanga o anu pang probinsya sa bansa ay isinasalin nila ang kanilang mga wika.
Hal. (Kapampangan): "Keta ing bale na?" (Doon ang bahay niya?"
Hindi naman kailangan na paduguin ang ilong ng mga mambabasa niyo para lang ipakitang Kapampangan ang taong 'yun. Pwede namang: "Doon ang baay niya?"
Alam mong Kapampangan siya. Bakit? Dahil madalas na sabihing walang letrang "h" ang mga kapampangan.
Sa mga Batangas, ang paggamit ng "ga" ang palatandaan nila, sa mga bisaya naman, madalas na ipinagpapalit ang e at i, sa Kapampangan, ipinagpapalit ang o sa u.
5. Wikang Teknikal
Ito ang wika ng makabagong teknolohiya. Wika ito na ginagamit sa agham at matematika.
Hal: C.P.U.-Central Processing Unit, F.B.-Facebook
Inuulit ko, sa agham at matematika lamang! Hindi sa tao! Kadalasan ay nagiging BF ang boyfriend/bestfriend, GF ang girlfriend.
6. Kolokyal
Ito ay ang mga salitang ginagamit sa mga pagkakataong impormal. Ito rin ay ang pagpapaikli ng mga salita.
Para sa akin, mas angkop na gamitin ito sa mga dayalogo. Mas natural kasi ang nagiging dating ng kwento.
Hal: A.) "Mayroon ka raw bang lapis diyan?"
"Oo, kailan mo ba gagamitin?"
"Maghintay ka, tatanungin ko siya."
(Kolokyal)
B.) "Meron ka bang lapis diyan?"
"Oo, kelan mo gagamitin?"
"Teka, tatanungin ko siya."
7. Balbal
Maituturing na pinakamababang antas ng wika. Hindi ito repinado o makinis. Kabilang dito ang mga salitang kalye at ang mga salitang ginagamit ng mga third sex.
Maaari din itong gamitin para maging natural ang daloy ng kwento. Kadalasan sa mga kabataan ngayon ay ito ang ginagamit na antas ng wika.
Hal:
yosi-sigarilyo
datung-pera
junakis-anak
erpat-papa/ama
--
Alam kong kumunot ang inyong mga noo dito. Sana ay may natutunan kayo sa mga isinulat ko na hindi ko alam kung nakuha niyo ba. Salamat sa pagbabasa!
BINABASA MO ANG
Mga Tulong sa Pagsusulat
Non-FictionLahat tayo ay may karapatang magbigay ng tulong.