زينب علي .....
طائر العنقاء .....
كملت الريوك وخلصت رحت دكيت عليها الباب . تفضل .
زينب ممكن احجي وياج .
اي نعم . شويه واطلع .
وضليت انتظر . هسه تطلع هسه تطلع هسه تطلع ماكو .
زينب ممكن اطلعين .
فد دقيقه .
بديت شويه اضوج من وضعها لا تقريبا تصرفاتها بدت متعجبني خايفه مني ما ادري شنو ما اعرف شلون اعلل وضعها .
يلا زينب فضيها .
طلعت زينب صاكه رجليها كوه تمشي . من خلال معرفتي بجنس حواء . مبين عليها خايفه لا انام وياها . عرفتها من حركات جسمها .
تعاي كعدي .
نعم .
زينب اني مراح اكلج . وكتلج ما اتقربلج خلاص ما اتقربلج .
هزت راسها .
زينب انتي صرتي زوجتي . سمعتي بيدج وحياتي بيدج تكدرين تحولين حياتنه جنه . وتكدرين تحوليها جحيم .
ما فهمت .
انتي كتيلي الزواج ع الورق صح لو لا ؟؟
صح ..
واني نفذت الي طلبتي . وبنفس الوقت اريد احس براحه لان هسه انتي خايفه مني وقالقتني . واني هلشي مهسترني بحيث ما اعرف اتصرف طبيعي .
مخايفه .
زينب . اني مو ابن اليوم لخاطر الله . افهمي عليه . صيري طبيعيه وياي حته اكدر اصير طبيعي .
ماشي .
اني مجايبج خدامه تكومين تسوين اكل وترجعين جن شي مفروض . واذا ع الاكل اني كضيت عمري اطبخ وحدي .
سهله ان شاء الله .
يلا اني هسه راح اطلع حته اشوف جماعتي .
ماشي .
دكولي الله وياك شبيج .
الله وياك .
اي شويه بحبحيها شجاج جنج زيتونه مرة بباي .
خزرتني لان عيبت عليها .
غمزتلها اذوووب .
طبت لغرفتها ضايجه . كلت بكلبي مو شكول نعمه . شكول نقمه . اهووو امده قسمتك .
.
مرت الايام وزينب على نفس وضعها نهااائيا ما تغيرت ومرات احسها تعاند بلزايد . مرات اسمعها تبجي . خو من تبجي بغرفتها اخس سجينه وجاي تمزك بكلبي . ما اعرف شسويلها . طبعها صعب ومتنطي من روحها نهائيا . وچن عاجبتها فكره نضل اصدقاء . واني بعد ما اكدر ابدددد .
لحد ما اجه اليوم الي كالت . اريد اطلع .
وين .
خابرت صديقتي واتفقت وياها .
