CAPOGIAN GRANDE SERIES 5: Bewitching Neil (PUBLISHED UNDER PHR)

PROLOGUE

"PAKSYET ka!"

Mabilis na tinanggal ni Forest ang suot niyang sapatos at buong lakas na ibinato iyon sa lalaki na ilang metro lang ang layo sa kanya. Dahil sharpshooter siya, saktong tumama iyon sa noo nito na naging dahilan para ikatumba nito.

Narinig niya ang sunod-sunod na pagsinghap ng mga estudyante na naroon din sa canteen dahil sa ginawa niya ngunit wala siyang pakialam.

Galit na galit siya. Scratch that. Kulang ang salitang galit para ilarawan ang nararamdaman niya ngayon. Kung pwede niya nga lang pulbusin ang lalaki ay baka kanina pa ito pinong-pino sa pagkadurog.

"Damn!" Malakas na mura ni Neil, ang lalaking nagpainit ng ulo niya.

Nang makahuma ito sa ginawa niya ay mabilis itong tumayo. Inilang hakbang lang siya nito at mabilis na hinawakan ang kanyang braso. Bahagya siyang napaigik sa higpit ng pagkakahawak nito sa kanya ngunit hindi siya nagpahalata.

"What was that for?!" May gigil na wika nito.

Kung nakakamatay lang ang tingin ay paniguradong kanina pa siya hindi humihinga dahil sa ibinabatong tingin nito sa kanya.

Nginisian niya ito. Akala siguro nito ay masisindak siya sa ganoon lang. Mukhang nakalimutan 'ata nito na black belter siya.

Hinawakan niya ang kamay ni Neil na nakahawak sa braso niya at sa isang iglap ay nakadapa na ito sa sahig.

"Shit! Aray!" Daing ni Neil at pilit na kumakawala sa pagkakadagan niya rito habang nakapilipit ang braso nito.

"You don't mess with Alexandra Forest Yuhico, Nicario Leon Aragon!" Nakangising sabi niya rito at mas lalo niya pang diniinan ang hawak niya sa braso at balikat nito.

Malakas na napaaray muli si Neil sa ginawa niya. Na lalo niyang ikinangisi. Kung pwede niya nga lang tuluyang baliin ang braso nito ay baka ginawa na niya. Pasalamat ito at kahit konti ay may natitira pa siyang awa sa katawan kaya hindi niya ito tutuluyan.

"A-ah...F-forest, b-baka pwedeng madaan sa mahinahong uspan 'to? Baka mamaya, tuluyan nang maputulan ng braso si Neil sa ginagawa mo."

Nag-angat siya ng tingin. Hindi niya napansin na nakalapit na pala ang barkada ng kumag na sina Jacoby, Paolo, Drake at Dex.

"You want to replace him, Jacoby? It's fine with me," nakangiti ngunit may pagbabanta na sabi niya.

Hindi pa nagku-cool down ang nag-aapoy niyang utak. Wala siyang sasantuhin ngayon dahil sinagad ni Neil ang mahabang pasensya na meron siya.

Mabilis na umiling si Jacoby. "A-ah, hindi, hindi. Okay na 'yan. Si Neil ang may kasalanan sa'yo, 'di ba? Sige lang. Ano pa ba ang gusto mong gawin sa kanya? Gusto mo bang ibitin natin siya patiwarik? O kaya ipakagat sa mga langgam? Wala namang problema 'yun. Paniguradong okay lang naman 'yun kay Neil. 'Di ba, Neil?"

Isang malutong na mura ang pinakawalan ni Neil para kay Jacoby na ikinatawa lang ng huli. Matapos ay pilit na nilingon siya nito. "Kapag ako nakaalis lang talaga sa bakal na kamay mong gubat ka, humanda ka talaga sa akin!"

Isang malademonyong tawa ang pinakawalan niya. "Try me, Karyo. Baka hindi lang braso ang mabali sa'yo." Isa pa ulit diin ang ginawa niya sa braso nito na nagpahiyaw rito.

"Forest, maawa ka naman sa kaibigan namin. Marami pa 'yang hahaplusin—"

Tinapunan niya ng masamang tingin si Dex. Nakangisi ito na tila 'di alintana ang kaawa-awang kalagayan ng kaibigan.

"I mean, marami pa 'yang ido-drawing na plates. Kawawa naman 'yan sa mga prof namin kapag walang napasa. 'Di ba, Drake?" Dugtong nito at binalingan si Drake.

Tumango si Drake bilang pagsang-ayon kay Dex at nakipag-high five rito. Mukhang wala rin itong paki sa kalagayan ng kaibigan dahil may mga aliw pa sa mga matang tiningnan siya nito. "Oo nga, Forest. May deadline kaming plates ngayon. Kapag 'di 'yan nakapagpasa, babagsak 'yan at baka 'di pa maka-graduate ngayong taon."

"Forest, pakawalan mo na si Neil. Kung ano man ang ginawa niya sa'yo, ako na ang humihingi nang pasensya," sabi naman ni Paolo na sa pagkakataong iyon ay lumapit sa kanya at hinawakan siya sa balikat.

Napailing siya. Hindi niya talaga maintindihan kung paano napasama sa barkada nila Neil si Paolo. Sa magkakaibigan kasi ay ito ang naiiba. Mabait, mapagkumbaba at tahimik ito. Hindi katulad nila Dex, Jacoby, Drake at ang pinaka sa lahat ng pinaka na si Neil na garapal ang mga mukha at ubod ng yabang.

"Aw! Shit!"

Dahil nawala siya sa focus ay hindi niya napansin na nawala ang pressure sa pagkakahawak niya sa braso at balikat ni Neil at nakaalis ito sa pagkakadagan niya. Namalayan na lang niya na nasa ilalim na siya nito at mahigpit na hawak na nito ang kanyang mga kamay.

"You don't mess with Nicario Leon Aragon, Alexandra Forest Yuhico!" Panggagaya nito sa sinabi niya kanina at nginisian siya nito.

Sinubukan niyang sumipa para makawala ngunit matibay at mabigat ang mga binti ni Neil na nakadagan sa kanya.

"You, jerk!" Ngitngit niya at nagpumiglas.

Nagulat siya nang biglang lumapit ang mukha ni Neil sa kanya. Nahigit niya tuloy ang kanyang hininga dahil doon. Anong balak gawin ng tukmol na 'to?!

Kumabog ng malakas ang kanyang puso. Pakiramdam niya rin ay may kung anong naglilikot sa tiyan niya. Hindi niya malaman ang gagawin. Para siyang may inaabangan na ayaw naman niyang mangyari. Get a grip, Forest! Do something!

"The best way to tame a tigress is to..." Isang nakakalokong ngiti ang kumawala sa labi ni Neil. Matapos ay mabilis ding nabura iyon nang bumaba ang tingin nito sa kanyang mga labi at matamang tinitigan iyon.

Shit! Anong gagawin niya?!

Nagtatalo pa ang kanyang isip kung ano ang dapat gawin para makawala kay Neil pero mabilis na nanlaki ang mga mata niya nang makitang unti-unti nitong tinatawid ang gahiblang distansya na meron sila.

"...kiss her lips."

Nooooooooooooo!