CAPOGIAN GRANDE SERIES 5: Bewitching Neil (PUBLISHED UNDER PHR)

CHAPTER 08

"KUNG sino ang matalo, kailangan niyang mag-grant ng isang wish sa mananalo, okay?" Nakangising sabi ni Neil sa kanya.

Gumanti siya ng ngisi rito at tinaasan niya ito ng kilay. "Deal! At alam ko na kung sino ang matatalo rito," confident niyang sabi.

Matapos nilang magtanghalian ni Neil ay inaya siya nitong maglaro. Dinala siya nito sa isang booth kung saan gamit ang toy gun ay patutumbahin ang mga maliliit na item tulad ng toy soldier sa kanilang harapan.

"Don't be too confident, tigress. You might lose in this game," ani ni Neil at kinindatan siya.

"'Di mo 'ko matatalo rito, Karyo. This is my space," aniya at nginisan ito.

Bukod sa archery, isa sa mga paborito niyang pampalipas ng oras sa Fun Town Amusement Park ay maglaro sa booth na iyon. Kilala na siya ng tagapagbantay roon kaya naman nangiti ito sa kanya n'ong sinabi niya iyon.

"Naku, sir. Mahihirapan kang talunin 'yan si ma'am. Halos siya lang ang nakakaubos ng papremyo rito sa galing niyang bumaril," nangingiting sabi ng tagapagbantay. "Kapag siya ang napupunta rito, nalulugi ang negosyo ko. Mabuti na lang at hindi niya kinukuha lahat ng prizes niya."

"She'll lose, manang. Tiwala ka lang sa akin," ani ni Neil at hinawakang mabuti ang toy gun. Tumingin ito sa kanya na may ngisi muli sa mga labi. "Ten shots. Kung sino ang pinakamaraming mapatumba, siya ang panalo, okay?"

Confident na tumango siya. "Fine! Nakikinita ko na ang pagkatalo mo, Karyo!" Aniya at humalakhak.

Tumawa si Neil sa sinabi niya at ipinosisyon ang hawak na toy gun. "Ako na ang mauna, ha?"

"Sure!" Sagot niya at nakangising humalukipkip.

Ngayon pa lang ay iniisip na niya kung ano ang ipapagawa niya kay Neil kapag natalo niya ito. At sisiguraduhin niyang mahirap iyon kaya naman excited siyang talunin ito sa laro nila.

Bumaril si Neil ng sunod-sunod. At nabura ang malapad na ngisi sa kanyang labi nang makitang walang mintis nitong naitumba ang sampung item sa harapan.

Bigla tuloy ginapangan siya ng kaba. Hindi niya akalain na magaling din si Neil sa larong iyon! Anak ng tinapa! Kapag natalo siya ay paniguradong hindi madali ang hihilingin nito sa kanya. Kailan niyang galingan kundi patay siya!

"Ikaw na," ani ni Neil sa kanya at gumilid. Kita niya ang mapaglarong ngiti sa labi nito habang lumilipat ng pwesto.

Napalunok siya. Biglang nagtago ang confidence niya. Magaling siya sa larong iyon at alam niya sa sarili na kaya niyang patumbahin din ang mga item sa unahan niya pero kinakabahan siya lalo na't mariing nakatitig na si Neil sa kanya. Nawala na ang mapaglarong ngiti sa labi nito at tila may malalim itong iniisip habang nakatingin sa kanya.

Concentrate, Forest! Hindi ka pwedeng matalo! Kapag natalo ka, patay ka kay Neil!

Huminga siya ng malalim at pumwesto. Kinalma niya ang sarili at itinutok na ang toy gun sa harapan. Naiilang siya sa paninitig ni Neil sa kanya pero pinilit niya ang sarili na huwag pansinin iyon. Hindi siya pwedeng matalo. Hindi niya alam kung ano ang ipagagawa sa kanya ni Neil kapag natalo siya. Kung siya nga ay nag-iisip ng bagay na hindi madali na ipapagawa rito, ito pa kaya?

Bumaril siya ng sunod-sunod. At napanatag siya nang makitang walang mintis na tinamaan niya ang mga target. Isang bala na lang ang meron siya at titira na sana siya nang marinig niya si Neil magsalita.