حاربي من اجلي

البارت الثالث

عائلة عزام كلهه مجتمعين باليل ديسولفون و يضحكون ف ام عمر اندارت على ام ياسر و كالتلهه
ام عمر - شيختنه ( غاليه الجدة) شنو رائيج انسوي عزيمة الكل عائلة على سلامة الحجي.
ام ياسر( الجدة) - باوعت عليهه و ابتسمت اي والله ام عمر خوش فكرة شنو تكولين الاسبوع الجاي يوم الجمعة فجرت حسرة حتى الكل العائلة تتجمع و ماعدهم دوام.
ام عمر- ابتسمت هم و كالت اي شيخة تدللين رح اكول هم ام محمد تجي تساعدنه هي و بناتهه.
ام ياسر- اي زين يمه خوش حجي سوي الي ترديه.
فالمه ياسر راد يحجي دك تليفونه راسا شاله مشاف منو جان كريم راسا كال هلا خويه ياسر اجمد معرف شنو يحجي فكال.
ياسر- هلا خوية شلونك.
كريم- بخير اني ابوية شلونه و امي انتو شلونكم.
ياسر- اندار على ابوه و كال الحمدالله الكل بخير و شيخنه الحمدالله زين و كاعد ويانه هسه.
الحجي كلبه نغزة و حس الي ديحجي ويه ياسر كريم بس محجه شي.
كريم- الحمدالله اني رح اجي للعراق اريد اشوف ابوية و اطمن عليه.
ياسر- فرح و بالعافيه سيطر على نفسه من الفرح اي خوية تعال البيتك الكل مشتاقيلك مو كافي غربة.
كريم- كام يضحك و يكوله خوية نارل اجازة اني مو على طول بس الله كريم متعرف الله شنو كاتبلنه.
ف ام ياسر باوعت على ابنهه بصدمة و عيون مفتوحة و عرفت الي ديحجي ويه ياسر كريم و اجتمعت الدموع بعينهه بس منزلتهه من الفرح اخيرا رح اتشوف ابنهه الصغير بعد 28 سنه و الحجي ايباوع على ياسر بس محجه شي ولا بين شي على وجهه
ياسر مستمر وياه وكاله - بحماس اي خوية يعني شوكت.
كريم - يوم الاحد يعني باجر رح اجي وحدي بعدين احمد وغالية و احلام ييجون وراية يوم الاربعاء لان غاليه حفلة التخرج مالتهه يوم الاثنين و ما اريدهه تعوفهه تعب سنين هذا و احمد ميريد ايفوته و غاليه لازم تروح للمستشفى تسوي عمليه المريض يوم الثلاثاء فتجمعوا و احلام متكدر تعوفهم وحدهم فهم يجون يوم الاربعاء واني قبلهم.
كريم راد ايروح وحده الاول حتى ايشوف ابوه اذا يستقبلة لو لا ميريد هذا الشي يصير كدام عائلته.
ياسر- هلا بيك خوية شوكت تنزل طيارتك باجر ياساعة حتى اجيك للمطار. عزام كلبه كام ايدك بسرعة و توتر و ام ياسر ابتسمت و دموعهه نزلت و الاخوان كلهم فرحوا و ابتسموا بحماس و فرحة و خواته بدموع الفرح ينتظرون يخلص مكالمة حتى ايسالوا شوكت ييجي بس مروة بقت مجمدة متعرف شنو اتسوي صارت اعصاب و راسا ركضت الغرفتهه متريد تسمع او تشوف احد محد انتبه عليهه غير ام عمر.
كريم- خوية رح تنزل الساعة تسعة الصبح.
ياسر - بفرحة بصوته رح انتظرك خوية رح انتظرك.
كريم- بصوت مخنوق مشتاقلكم خوية بكد رحمة الله مااعرف شوكت ييجي باجر و اشوفكم.
ياسر- دمعت عينه و راسا مسحها واحنه اكثر والله خوية واحنه اكثر.
جان جنان تركض تجر التليفون من ايد ياسر و تحجي و دموعها تجري - اي بابعد اختك هيج هنه عليك و متكول انطوني اختي احجي وياها لو بس ياسر اخوك تحجي و تبجي متكدر اتوقف دموعها.
كريم- بصوت مخنوق لا يا اختي انتي الغالية شلون تهونين عليه انتي الي بالقلب بس ها باجر اني الظهر يمكم اريدج اتسويلي سمج مشتاق اكلهه من ايدج.
جنان-جان تضحك و تمسح بدموعها خير خوية مو تكول خاف اتسمم من ايدج.
كريم- ضحك من كل قلبه و كال جان اتسمم عواد( زوج جنان) و جهالج بس الحمدالله سلامات صار 30 سنه.
جنان- تكوم تضحك وتكول تدلل خوية اطيب سمج اسويلك و جان تباوع على امها الي تبجي و تمسح بدموعها و مدنجه راسهه و تكول الكريم غاليتك بس تبجي.
كريم- بصوت مخنوق و دموع تريد تنزل انطيني اياها.
تكوم جنان من يم ياسر و تروح الامهه و تحط التليفون باذنهه.
كريم- يمه لمن غالية سمعته كامت تبجي بصوت متكدر تسكت فكريم كال الهه يمن فدوة اروحلج لتسويين هيج باجر جايج و تشوفيني و راد ايضحكهه دا اكلج من هسه اذا متسويلي برياني ارجع بنفس الطيارة.
ام ياسر- جان تضحك و تمسح بدموعهه و تكوله تدلل يمه تدلل بس تعال انت.
كريم- جايج يمه جايج.
ام ياسر - وهي تهدء و تحجي وحدك يمه يعني ممزوج انت.
كريم- و هو يضحك ويريد يعرف تعبير وجهه لايمه مزوج و عندي ولد و ابنية.
ام ياسر - بفرح و لهفه على ابنهه صدق يمه يعني انت مرتاح هناك.
كريم - ببتسامه اي يمه مرتاح و عندي احمد و غالية.
ام ياسر - تفتح عيونهه و تاخذ التليفون من جنان وتحجي لصدمة غالية.
كريم ضحك و كال اي يمه غالية تشبهج بكل شي بالشكل و الطبع رح تجي هي و اخوهه و امهه يوم الاربعاء و تشوفيهه.
ام ياسر - بفرحة هلابيهم يمه و بيك.
كريم- تسلميلي يا غالية جان غالية تدخل على ابوهه بالمكتب مالته وتكوله شنو يابو غلوش تتحلم بيه.
كريم ضحك و كال لا يا غلوش دا احجي و غالية قلبي ف غالية تعقج وجهه و تزعل ليش بابا عندك غير غالية. فضحك و كال يمه تحجين ويه غالية فضحكت ام ياسر انطيني اياها ف غالية باوعت الابوهه بصدمة و اخذت التليفون منه و كلبهه ايدك و كالت الو
ام ياسر- هلا يمه شلونج.
غالية- هلو بيبي شلونج انتي تحجي و مرتبكة لان اول مرة و خجلت.
ام ياسر- يا يمه فدوة الحمدالله ياغالية بس ناقصني شوفتكم شكد عمرج يا حبيبة .
غاليه بخجل- تسلمين بيبي 23 سنه ان شاء الله نجي ونشوفج و من خجلهه كالت بيبي بابا يريد يحجي وياك و انطت التليفون الابوها و راحت ركض كام يضحك كريم عليهه و يكول هلا يمه.
ام ياسر بضحك لك يمه شنو بنتك هاي الله يحرسهه.
كريم- يمه هاي غالية العزيزة مثلج.
ام ياسر بتنهيده الله يحفضها.
كريم- الله يسلمج يمه اني اترخص منج لان عندي هواي اشياء اخلصهه قبل لا اجي.
ام ياسر- مرخوص يمه دير بالك على روحك و بوسلي غالية.
كريم بشقة اي يمه من هسه بعتيني ماكو لا ابو غالية شي.
ام ياسر- اول مرة من سنوات تضحك من قلبهه ولك شكبرك صرت مبطلت سوالف.
كريم- بضحك لايمه بعدني شنو تحجين انت يلا يمه مع سلامة.
ام ياسر وهي تضحك الله وياك يمه.
فسدت التليفون و ضحكت يا بعد روحي شكد ارتاحيت هسه من سمعت صوته . فجنان تباوع على امهه و تكول منو غالية فبتسمت ام ياسر و كالت بنت اخوج سماها على اسمي و يكول بكلشي تشبهني الله يحرسهه و يحفضهه الشبابهه جنان بصفنه ان شاء الله يمه.
————————————————
السويد
كريم طلع للصالة و يضحك لمن شاف غالية وجهه احمر ضحك بالزايد وكال هذا شطول السانج هذا مكدرتي تحجين كلمتين ف احلام جانت كاعده بالصاله و تكلب بالتلفزيون باوعت عليهم و كالت .
احلام- ليش شبيهه غاليه.
ف كريم اندار عليه و كعد بصفهه مابيهه شي بس لمن انطيتهه التليفون تحجي ويه امي معرف تحجي و كمل ضحك. ف احلام انصدمت و باوعت عليه حجيت ويه امك.
كريم- بتنهيدة اي حجيت وياها و كلتلهم رح اوصل باجر . راسا احلام عافت الريمونت و اندارت عليه ولزمت ايده اي شنو ردت فعلهم.
كريم- ببتسامه فرحوا الجيتي حجيت ويه جنان و ياسر هم كلش فرحوا بس ابوية معرفت شي عنه بس ان زين.
غالية حست ابوها ايريد يحجي ويه امهه اترخصت منهم و صعدت الغرفتهه و ظلت اتفكر شنو رح اتكون ردت فعل اهل ابوها الشوفتهم وره كل هاي السنين و ليش ابوها و عائلته ميتواصلون ابدا ولا يوم سمعت ابوهه خابرهم او بريد ايروحلهم بس اياد يتواصلون وياه كعدت على سريرهه و حضنت المخده و تسال الاسئلة الي ميعرف اجابتهه غير ابوهه و اتمنت كلشي يمر بسلام على عائلتهم .

اتمنى يعجبكم البارت😊😊
البارت الجاي رح اتكون احداث كل اهواية بيه و رح ينكشف شوية من اللغز الي بين كريم و ابوه
لتنسون اتصوتون و تكولولي رائيكم