بديت شغلي في الوكاله ، أول يوم مشيت للشغل يوم مستحيل أنساه 😂 ما كنت متخيله البنات بتعاملوا بالطريقه دي ! أساسا مافي وحده أدتني وش ، اي وحده جنب الكومبيوتر بتاعها البشوف الإستايلات و الشعر والميك اب والأناقه الهم فيها مايشوف لئامتهم و مساختهم في الرد اول موقف لي كان مع وحده قاعده بعيد شويه اسمها رندا قلت ليها ممكن امر من هنا ، زحي لي شويه قالت لي وهي بتعاين ما زاحه شوفي ليك ممر تاني ما كل شويه اقوم و اقعد عشانك برفعة حاجبها كدهه ، قلتا ليها تمام طيب مشيت لفيت لفه طووويلهه عشان اصل مكاني .. تلفوني الخاتينو لي رقم الوكاله اتصل رديت عليهو لقيتو زول عايز عرض شهر العسل الأنا نزلتو في الفيسبوك وريتو العرض و قال لي طيب احجزيهو لي لحدي ما امر من جنبكم قلت ليهو لمن تصل ومعاك الاثباتات يا استاذ حتى بعد كده ممكن احجز ليك ، قام ضحك قال لي انتي جديده ولا شنو ! قلت ليهو عفوا ؟؟ قال لي شكلك جديدة ادي التلفون لي اي وحده جنبك من البنات القدام قمتا مديتو للبنت الجنبي تغريد قالت ليهو السلام عليكم ! قال ليها منو معاي قالت ليهو تغريد من وكالة بيسان اتفضل ؟ قال ليها تغريد انتو الليله مالكم ؟ طاشيين! صوتي ده ماعرفتو ولا شنو 😂😂 انا زين يابت .. قالت ليهو زين اسفه اسفه والله يا استاذ معليش بعتذر ليك قال ليها ولا يهمك يا زوله شوفي لي عروض شهر العسل و احجزي لي لي افخم مكان كده ،، قالت ليهو عندنا عرض لكوالالامبور وعرض لي سويسرا ، عرض باريس ، وعرض ايرلندا وعرض المدينة الزرقاء المغرب ... طبعا هي بتملي فيهو في العروض انا اتغظتا ياجماعه االرزق ده جاني انا. اول و انا العويره برااااي رفستو ياخ كرهتا روحي كره كمان عروض شهر العسل دي فيها كومشينات 😭😭 اححي ياقلبي من الوجع .. و السخيفه الاسمها تغريد بدل ما ترجع لي التلفون وتقول لي اسمو زين ولا زفت ده و وهو صاحب الكابتن مسكت التلفون واخدت عروضي و رزقي ياخ😭😭 ،، بعد حجزت ليهو خلاص مزاجي ااتعكر منها قعدنا مسااافه تاني مافي زول اتصل علي .. والرزق البجي من عرض شهر العسل ماااغسني مغسه الحمد لله بس، بعد شوية جا داخل زين حضرتو الوكاله شاب طويل اسمر وجيه انحف شويه من الكابتن رياض بس حلاتو ياخ😍 و شكلو دمو خفيف .. جا داخل من الباب كده قاعدين سهام ونرمين و انا التلاته جديدين في شغل الوكاله و كان اول يوم لينا ننزل الشغل و هو داخل بلولح في مفتاح العربيه بتاعتو دقا لينا التربيزة التلاته انتي ولا انتي و لا انتي ..طبعا كلهم قعدوا يضحكوا و قف في النص قال لينا ياتا السمحه ياتا ياتا الحلوه ياتا .. الردت علي ياتا بس ، والبنات ديل ماتوا قرقره وضحك الا انا خلاص من اول تلفون شميتو .. جرا كرسيهو وقعد مواجه تغريد قال ليها وينها فيهم ! الكلبه كمان تضاحك وتغير في صوتها قالت ليهو الجنبي دي .. قام اتلفت عاين لي عاينتا ليهو ابتسم لي كده و سكت ياخ ابتسامتو ساي كساااره و سنونو ماشاء الله مرصوصه بالترتيب و بيضا بياض ابيض من ضميري 😂😂 غايتو اتماسكتا وما حبيت اتكسر قدامو ، رفعت ليهو حاجبي قال لي اسمك منو ! قلت ليهو سندس قال لي وهو بمد في يدو سندس الجميله انا اسمي زين قلت ليهو اتشرفت بيك استاذ زين قال لي لالا زين بس كفايه و هو برفع لي في يدو و راجع للكرسي , يادوب هنا ابتسمتا و هو كان لسه بعاين لي قال لي تغريد بما انو العرض منزلاهو سندس الجميله يبقى انا لازم ارجع ليها لأنو من حقها ، جرا كرسيهو و بقى مواجهني اننا طبعا تغريد مافضل ليها الا تبلعني 😳 ماقدرت تخفي الغيره المتطايره زي الشرار المولع ، وانا جريت الابتسامه زياده بعد ما هو قرب لي مكاني و واجهني ، قال لي في رايك كده احسن مكان لي اتنين يقضو فيهو شهر عسل وين ! قلت ليهو امممم بالنسبه لي حسب استطاعة العرسان بس قال لي كدي خليها الاستطاعه دي وريني بس مكان ، قلت ليهو الطبيعه 💕 مكان الطبيعه و الهواء النقي و الجمال و في نفس الوقت الرومانسيه قال لي وين الكلام ده ! قلت ليهو فرنسا ، باريس💜 قال لي ياسلاااام عليك كمان عندك زوق عالي و لبقه في الكلام بتعرفي كيف تجذبي الزبون ليك يعني ما جمال خلقه بس ، جمال فكر و زينة عقل بس .. اول مره اخجل لأنو اول مره زول يشاغلني كده و يحسسني اني زوله فاهمه و واعية في الدنيا دي 💕 قلتا ليهو يعني احجز ليك ! قال لي و هو بضحك لسه ما إتأكدتي مني زين ولا لا ! قمتا ضحكتا قلت ليهو ماشاء الله عريس صغير ! قال لي وهو بنطط في عيونو عريس صغير😳😂 عمري 29 سنهه لكن والله لسه ما عايز اخش الورطه دي 😂😂 خليتها لي اخوي الكبير ده كدي نشوفو بستحمل الموضوع ده قدر شنو ، قلت ليهو وانا بضحك يعني ما انت العريس😂😂 قال لي نوو بصوت مضحك كده 😂 قلتا ليهو طيب وين جوازات العرسان ! قام طلعهم لي من جيبهم لمن عاينتا للبنات لقيتهم كللهم بحمروا لي حمييير 😒 ولا عبرتهم هو بالجد زين ده زول لطيف كده و ظريف و دمو خفيف , و انا بحجز ليهم في الكومبيوتر هو كان بعاين لي و بتبسم ياخ 😍 كنت عامله شعري فوق ضنب حصان ومثبتاهو في النص بطوق رفيييع جدا و خصل و اساسا هو بادي من قدام ، زين كان بعاين لي نظرات بتاعت إعجاب لحدي ما أنا حجزتا ليهو لشهر العسل و بالجد ما كنت متخيله العرض بربح كده كنت خاته 15 مليون كوميشن للحجز و الوكاله بتقسم الربح على تلاته ، يعني ال 15 دي انا عندي منها خمسه😍 طوالي زين طلع القروش و دفع لي ، خلاص لمن انتهى و وقف على حيلو و قال ليهم مع السلامه ابتسم لي كده براي و قال لي تاني خلاص انتي زولتي ياسندس اي حجز عايزو ح اتصل بيك هنا قلت ليهو ان شاء الله وقفتا على حيلي لازم طبعا اظهر لبستي بالاسكيرت بتاع الجينز ودعتو و طلع ، بس مشى كده البنات قبلو علي كلهم بحمروا لي لمن انا حسيت بتوتر و عدم راحه ومستغربه منهم انا عملتا ليهم شنو ! ، اليوم الاول عدا و كلو توتر و تنشنه .. بعد اسبوع من بداية شغلي اول مره كان الكابتن يمر على الوكالات ماكنت عارفه انو بحدد يوم بس يمر فيهو و الناس بتستعد .. اليوم داك مشيت قاااشره و متظبطه لحسن حظي وبدون علمي لمن وصلت الوكاله و لقيت البنات ديل مكياج يطقش مكياج و الاكسسوارات و كلو اتهجمتا البنات ديل متظبطاات كده مالهم زيي 😂😂 قعدتا مكاني و سألتا نريمين في شنو ! عرس منو الليله بسم الله الصلاه على النبي ديل مالهم 😱😂 قالت لي اسكتي براحه مايسمعوك براهم دايرين فرقه فيك بعد القروش الدخلتيها الاسبوع الفات من الحجوزات شامينك كيف ، سمعتهم بقطعوا فيك يابت قالوا من جات و القروش صابه فيها مطر مطر قلتا ليها اعووذ بالله من عيونهم الحاسدات ديل 😒 قالت لي الليله الكابتن رياض جايي قالوا بمر كل فتره على الوكالات بشوف الشغل ماشي كيف ! ياخ لمن قالت كابتن رياض قلبي ده فررررا من مكانو لمن اتلبشتا ياخ القلم في يدي وقع مني ، انتظرتا الساعه اتنين دي تجي بفااارغ الصبر والله عشان رياض جاي الوكاله لحدي ما جات الساعه الجا داخل فيها رياض ، احححح 😍😍 لمن جا داخل ياخ ، لمن قال السلام عليكم بصوتو القووي داك و ردينا ليهو كلنا و عليكم السلام ، قعد جنب السوبر فايزر و سألها أها الأمور ماشه ! قالت ليهو الحمد لله تمام ، اتلفت علينا كلنا مرصوصين زي كعك السكر كلنا جنب بعض كده ، انا في النص قاعده لمن عيونو وقعت في عيوني ابتسمتا بيهو أول مره كان اتكحل فيها و أول مره رياض يقوم من مكانو و يجي لحدي مكان بنت بدون ما يحس هو بعمل في شنو ، جا و قف قدامي مبتسم ختا يدينو بين الكومبيوتر حقي و قال لي مساء الخير ، ياربي ده تأثير الكُحل !
" و سمراء تكحلت فأربكت قلب تائبٍ عن الحُب "
يتبع.....
