قلت ليهو رياض كنت متوقعه اتصالك و ختيت التلفون جنبي عشان عارفاك ح تتصل ، قال لي عايزة تصلي لشنو ؟ ضحكتا و قلتا ليهو عفوا ! قال لي سندس عايزة تصلي لشنو؟ قلت ليهو دقيقه دقيقه بأي حق بتكورك و بتتنهر هنا في التلفون بعدين براحه مرتك ما تسمعك قال لي سندس انتي كده ليه ؟ ما كنت متخيل تصلي للمستوى ده ! كل يوم بتندميني اني عرفتك ، قلت ليهو وانت كل يوم بتندمي على اللحظات العشتها معلك و كل مره بتنزل من عيني اكتر ، قال لي عارفه اني ما ح اقدر اصارح زين و انتي ما صارحتيهو سؤالي ليك زين ذنبو شنو ؟ قلت ليهو و منو القال ليك اني شغاله بيك ! انا مرتاحه مع زين انت مشكلتك شنو ؟ ضحك و قال لي بتغشي على نفسك قلت ليهو ما تخليك واثق من نفسك للدرجه دي عشان الثقه العلى الفاضي بتدمرك قال لي سندس ابعدي من زين ، قلت ليهو قول الكلام ده ليهو اذا بتقدر ، صناا وسكت قلت ليهو ما بتقدر صاح ! ده الأنا كنت متوقعاهو منك عمرك ما حتكون قدر كلمتك و قفلت الخط في وشو ، مكالمتو نرفزتني شديد طول الليل قاعده بفكر رياض برغم تصرفاتو الحقيره دي انا لسه حاسه اني دايراهو ليييه الشعور ده ملازمني دايما ، نمتا و الصباح لاقيت زين في الوكاله جا داخل بطوطح في مفتاح العربيه و بدندن ياحليلك يا اسمر ابيت لعيوني تظهر حارمني الوصااال مانعني الوصاال ، قرب مني ابتسم وقال لي صباح الورد ابتسمتا ليهو صباح الخير قال لي الحقيني في المكتب ، بنات الوكاله بعاينو لي و بتشمشروا وانا داخله ليهو المكتب . قعدني في مكانو قلت ليهو في شنو ؟ قال لي عايز اقول ليك حاجه قلت ليهو خير بس قال لي كلمتا اهلي قلت ليهو اها ؟! قال لي وهو بضحك ببسطه يوم الخميس شاي المغرب ح تعمليهو انتي دي ساامعه ! قلت ليهو زين 😳 قال لي قايلانا كمان هينين ولا ما عندنا كلمه ! عاينتا ليهو وقلت ليهو عارفاك قدر كلمتك 💜 قال لي اها ح تلبسي لي شنو لمن اجي اتقدم ليك ؟ قمتا خجلتا و ضحكتا قال لي تخجلي كمان❤ قلت ليهو زين خلاص ياخ ، قال لي انتي عارفه لو لاقيتي اهلي بقميصك بتاع البيت ح يقولو لي عزاال لكن ، قلت ليهو زين والله اعملها😂😂😂 و امك ترجعك من خشم باب بيتنا ، قال لي يلا قومي على شغلك والا ح اخصم منك قلت ليهو زين اصبري لي بس كلها ايام و تاني مابجي الشغل زاتو ، قال لي وييين سندس الطموحه ديك 😂😂 قلت ليهو داك كان كلام جرايد ياشيخ ، طلعتا بره اواصل شغلي و انا حاسه بي كمية من الانتصار انا واصله هدفي خلاص❤ ، يوم الخميس جا كنا مجهزين البيت و ابوي لابس جلابية نضييفه و امي و رشيده تيابهم يلمعوا ، مرادي كانت ماسكه ملاك و سامي جوه الغرفه ، الحوش كان مكنس و مرشوش بالمويه و الدنيا ليل و الجو عليل ❤ انا فكيت شعري بعد استشورتو امل عملت لي الميكب و مرادي جهزت لي فستان بصلي قماشتو مخمل على الجسم اكمامو تلات اربع , لبستني خناق بالدهبي و حلق صغير .. كنت بسيطه و انيقه و كانت اول مره البس فيها فستان على الجسم بس ، ماخلوا عطر و ماعطروني بيهو .. رشيده عملت كيكه💜 و امي عملت فطاير و ابوي اشترى لي البارد و امل جهزت الشاي بالبن ومعاهو يانسون ، كانوا حالفيين اعمل شيء من قروشي و قالوا لي كفايه انك شايلانا .. البسطتني شديد رشيده 💜😭 كانت فرحانه لي شديييد شفتا في عيونها فرحة ساجد الإتحرمتا منها لمن شفتها بتقطع في الكيكه وبترص فيها في الصحانى من بعيد عايزة ابكي بس اول ما دمعتا ابوي جا من شمالي مسكتي من كتفي و ضماني قال لي اووعك اليوم ده يوم فرح ما عايزين دموع اتفقنا ! شفتو وهو مكسور الخاطر بس بحاول يظهر لي بسمتو ، بستو في راسو و قلت ليهو حاضر يا ابوي ، قال لي اها العريس قال وين قلت ليهو دقيقه اشوفو ، دخلتا جوه اتصلت لي زين انتو وين؟ قال لي مشتاقه لي قدر ده ! قلت ليهو زين بطل حركاتك دي مافاضيه ليك هسي براي متوتره ، قعد يضحك قال لي انا متوتر اكتر منك و رياض متوتر اكتر مننا كم مره عايز يخش بي انا و اهلي في حادث بسبب استعجالوا 😂😂 قلت ليهو رياض جاي معاكم؟ قال لي ده سؤال ليك ! قلت ليهو لالا بس قايلاهو مشغول قال لي طيب خلاص قربنا عليكم ، توتري زاد لمن سمعتا رياض جايي معاهم ، كلها نص ساعهه و وصلوا البيت كانت اول مره اشوف اهل زين 💜 ناس طيبييييين شديييد ما ظاهر عليهم انهم متعجرفين نهائياً ، نزلوا و سلموا و كنت بعاين من شباك الغرفه ، زين كان متأنق شديييد 😭😭💜 رياض كان فاتن عديييل ، حاولتا اركز مع زين بس ماقدرتا رياض كان بلفت الانتباه فيهو شيء من الجذابيه اكيد ، قعدوا يتونسوا شويه و بعد امل جهزت الشاي جابتو لي في الغرفه قالت لي اطلعي براحه وديهو قلت ليها ماقادره قالت لي يابت مالك بسم الله قلت ليها وديهو انتي قالت لي سندس 😡 العروس هي البتودي الشاي قلت ليها لالا ما عارفه مالي انا خايفه ، مرادي جات داخله قالت لي اتأخرتوا مالكم ، الناس من قبيل منتظرين بره ! قالت ليها امل اختك المجنونه قالت خايفه و بترجف ، مرادي قعدت تضحك قالت لي يا هبله اساسا ال
عرس ده كلو خوف و قلق هو انتي لسه شفتي حاجه ، امل عاينت ليها مرادي😒 الله يطمنك هسي ده كلام يتقال لي وحده عريسها منتظرها بره يطلب يدها 😒 قالت لي سندس بطلي عواره و امسكي الشاي ده امرقي قبل ما الناس يفوتو يخلوك ، مسكتا الصينيه وانا بالجد بتراجف كلي حاسه بدقات قلبي عامله حفله ، قلتا ليهم بسم الله الاتنين بضحكوا فيني قالوا لي بسم الله امرقي ، طلعتا الحوش ماشه براااحه براااحه ، امي ورشيده في السرير و السرير المقابلو اخت زين و امو .. ابوي في الكرسي الجنب كرسي ابو زين و رياض و زين جنب بعض قاعدين ، اول ما وصلت و قلت ليهم السلام عليكم كلهم عاينوا لي خلعوني زياده و ردوا السلام ، زين نظراتو كانت كلها ريده اللحظه ديك 💜😭 رياض من غير ما يمسك نفسو كان بعاين لي و في عيوني و شعري من فوق لتحت ، كنت حاسه بي انو رياض كان نفسو اللحظه ديك يمسكني من يدي يسوقني بعيييييد عن كل الناس الحولينا ، و كنت شايفه فرحة زين جوا عيونو ختيت الشاي و سلمت على الابو و الام و الاخت قربتا على رياض و زين وقفوا اول واحد مدا يدو رياض قال لي ربنا يتم على خير ، قلت ليهو وعيني جووه عينو امين ، بعدها سلمت على زين و ما كان قادر يوقف الابتسامه قلت ليهو براحه ابوي شايفك يازول قال لي ممكن نعقد طوالي و اسوقك من هسي ! خجلتا و طوالي رجعتا قعدتا جنب امي ورشيده وهو بي وراي قال عسسل 💖رياض عاين ليهو وسكت ، قعدتا مواجهاهم الاتنين كنت متوتره جدا 😭💔 ام زين قالت لي امي ماشاء الله تبارك الله بنتك جمييييله شديييد ، امي قالت ليها الله ماضراك ، اختو قالت لي تعالي اقعدي هنا جنبنا مشيت السرير التاني قعدتا جنب الاخت ... بقيت مواجهه رياض طوالي كان بعاين لي و انا بتونس معاهم نظراتو كانت مليااانه غضب ، وترني زياده بتفحصو لي مانزل عينو مني ابدا و الكويس انو الناس كانوا ملخومين ما لاحظوا ليهو الا امل من الشباك عامله برج مراقبه بتحمص في الحاصل كلو ، انتهت القعده و التعارف الجميل الكان حلو شديييد و بسييط ودعناهم في باب الشارع ، حسيت بي ابوي اتكيف منهم لأنهم ناس بسيطين رغم وضعهم العالي ، وصلناهم لحدي الباب و زين كان مصر يشاغلني إتأخر في الخطوات عشان يقرب مني و يهمس لي انتي حلوه كده كل يوم ؟ قلت ليهو زين خلاص ، قال لي يعني ح اصحى القى وشك حلو كده ! ولا ح تتقلبي العجوز الشمطاء بعد العرس ، ضحكتا فيهو😂😂 و رياض كان مركز معانا شديد اتلفت لمن ضحكتا لقانا ماشيين اخر ناس للباب و زين بضحك معاي و بشاغل فيني و انا كنت منزله راسي و بتخجل ، ناداهو بحرقه زين ! قال ليهو ايوه ؟ قال ليهو رياض اتأخرنا يلا ! قال ليهو لاحقك ، عاينتا رياض و انا طعم الانتصار ظاهر في ملامح وشي ، ودعتا زين و قلت ليهو نتلاقى حبيبي تصبح على خير ..
عدا اسبوع من يوم التعارف اتكلمنا انا وزين وحددنا في التلفون ، نعمل العقد نهاية السنه و بعدها بي اسبوع بداية السنه يوم 1/1 العرس ... كان باقي لينا شهر عشان نجهز امورنا ، مشينا اخترنا الزفاف و الميك اب و الصاله بدينا نعزم الاصحاب و المعارف ، و الكان زعلان من كل الحاصل ده رياض ، كلم امو بالموضوع و وراهو انو زين ح يتزوج سندس ، طبيعة ام رياض انانيه ما بتهمها مشاعر زول ما كانت مهتمه بي زين يتزوج سندس او يتزوج غيرها المهم انو رياض اتزوج ليها ياسمينه حبيبتها و ده البهمها ، يوم العقد الصباح الناس متوترين و أنا ، كنت قافله تلفوني في الدولاب من الصباح ما عايزة اي حاجه تزيد التوتر علي .. البيت جايط بلمة الناس و اهلنا الكتار و انا محبوسه في غرفة امل كنت خاته فول سوداني في صحن الإستيل بتاع الفول مالاياهو من توتري اكلتا الصحن كلوا قبل العقد و لحظة انا بسمع في الزغاريد بره و الناس بقولوا عقدوا خلاص عقدوا خلاص .. شعوري ما بتوصف باكل في الفول بدون وعي ما حاسه بفرحه ولا بزعله ، ما كان عندي شعور غير الخوف .. لحظة العقد حسيت اني اتسرعتا ! طيب انا دايره كده ؟ كنت بقنع في نفسي انو ده الطريق الصاح و اني ما اتوتر .. انا ماشه صاح ما عايزة تشويش او اي افكار ، بقولوا ده شيطان العرس ! ما بعرف ياخ، طيب انا متأكده من نفسي ! لا ؟ عايزة زين ياسندس؟ ، الأسئله دي سألتها لنفسي بعد فات الآوان و الناس عقدوا ، ما بكيت و ما نططتا من الفرح برضو ، لحدي ما داهموني امي و رشيده و امل و اخواتي بالزغاريد والدموع جوا الغرفه ، حضنتهم واحده واحده ، و ما بكيت لسه ! امل عاينت للصحن اكلتي الفول كلو يابت يا مجنونه😂😂 امل كانت بتبكي برضو و بتتكلم ، دموع الفرح في عيونهم كلهم ، جا ابوي داخل و برضو كان ببكي حضني وسلم علي في راسي و يدي و برضو انا مجمده الشعور ! جا سامي داخل ، لمن جا سامي داخل من غير ما اقدر امسك نفسي صرختا بطريقه هجمتهم و بكيت اتخيلت ساجد الجا داخل علي ، جريت حضنتا سامي و بقيت بببكي و ببكي فيهو .. كلهم زادوا البكا لمن شافوني حسيت بساجد بسأل فيني ما عرستي رياض يعني ؟ ساجد 😭😭😭 مافي زول منعني خلوني بقيت قدرتي و سكتا ، بعدها طلعوا
خلوني تاني براي في الغرفه ، كنت لسه بحاول امسك نفسي و اشجعها انا قويه انا اخترت صح انا ماشه في الطريق الصاح .. لحدي ما مرا الإسبوع بسرعة البرق و جات بداية السنه و جا يوم الزفاف ..
من الصباح في الكوفير زين بتصل ما برد عليهو ، عارفاهو ح يزعجني و انا براي متوتره وبعد ده مابرحمني برسل لي بتعملي في شنو ! برد ليهو بلعب في كوره 😂😂 لحدي ما خبيرة التجميل قالت لي اقفلي تلفونك ، قفلتو وبدت تمكيجني ، ما كنت حاسه بوجع رياض الفتره ديك لأني كنت مبسوطه بيهو بتعذب وماقادر يعمل شيء ، فتحتا التلفون بعد ما لبستا الزفاف و امل كانت الوزيره قالت لي اول ماشافتني ياحافظ ياحفيييظ وبدت تقرا و تحصن فيني ، زين وصل بره و دخل لينا جوا ، امل قالت ليهو الف مبروك ياعريس قال ليها الله يبارك فيك ، عاين لي💜 عيونو كانت طالعه من مكانها و حايمه حولي ، امل ما قدرت تقعد و طلعت خلتنا برانا لأنو شافت في عيونو الشوق كان طالع قدر شنو ، قرب مني و هو بقول ياتا الحلوه ياتا 😂😂 و انا بضحك ، لحدي ما وصلني و قال يا الله انا عملت شنو في الدنيا دي عشان الملاك دي تكون حقتي ! ابتسمتا و قلت ليهو انا المحظوظه بي انو راجلي اطيب زول ربنا خلقو ، قال لي خلينا ما نمشي العرس قلتا ليهو زين 😂😂 قال لي جادي معاك اساسا حاجز التذاكر بس كل العلينا من هنا و المطار ، قلت ليهو و انا بمسك يدو ارح عشان ما نتأخر ، لسه كان بعاين لي بخلعه و انا كنت بضحك من نظراتو قلت ليهو زين خلاص ، قال لي حنتك حلوه💜 ركبنا العربيه و امل رمبت قدام و هو لسه ببحلق فيني كأنوا ما مصدق ، عاينت ليهو و همستا ليهو في اضانو زين انت الليله وجييييه شدييييد انا موافقه خلينا نمشي المطار ، طوالي قال لي صحبو السايقنا يا احمد بالله لف على المطار قلت ليهو زين😂😂 احمد عارفو بهظر كتير قال ليهو انزلكم في الشارع و نكمل نحنا للحفله العشاء ظابط والله ياصحبي مابفوتو عشانك😂😂 وصلنا الصاله ، زي اي عرس انا بشوفو و كنت بحلم بيهو ، دخلتا بي اغنية مكسية بي توب الزفاف و الحنه في الإيد و البخور و ملايكه تحرس فيها ساي 💜💜🌹 .. ما كنتا شايفه رياض في الحفله ! ولا اهلو ؟ جات باركت لي ياسمينه و قالت لي طبعا رياض عيان والله ليهو كم يوم ما بقوم من السرير ، ناس خالتو مسافرين بره هي و البنات ، جيت بس عشان انتي ما تزعلي مننا و عشان خاطر زين ، باركت لي زين و قالت ليهو انا ح اطلع طوالي لأنك عارف صحبك عيان قال ليها اي اطلعي ما تتأخري ، استغربتا رياض عيان مالو؟ كملنا حفلتنا عادي و بعدها مشينا ، سافرنا تاني يوم لبالي💜 قضينا نص شهر و جينا راجعين ... مرت الأيام علي بدون ما افهم حاجه وماقادره اتخيل انو انا مره متزوجه بعد ده ! لأنو رياض و اهلو ما حضروا العرس كان لازم يعزمونا و خصوصا رياض كنت عارفه انو متشوق يشوفني بعد العرس عامله كيف ! عزمنا غداء بحجة اننا عرسان جداد في بيتهم ، و ياسلام على الزمن لمن يدور ، البيت الهانتني فيهو امو الليله ح ادخلوا و انا متزوجه واحد زيو زي ولدها ، امو الكانت بتقول اني مستحيل اتزوج من مستواهم ، اتزوجت من مستوى احسن منهم كمان لمن عرفتا اني معزومه غداء و زين كلمني ما صدقتا ، من الصباح جري على الكوفير اتظبطتا ، حضرتا توبي الاوف وايت بي حرجلي و اتمكيجتا و اتبخرتا ، زين كمان اتظبط و حلق و جهزنا الاتنين ركبنا عربيتنا و ماشيين لي بيت ناس رياض .. كانوا منتظرننا اهل رياض و مرتو ..
إحساس إني ح الاقي المره الرفضتني إحساس حلوو خلاص ، و أقعد معاها في نفس سفرة الأكل ووهي ماقادره تنطق بي حرف قدامي ، اول ما دخلنا البيت استقبلتنا اخت رياض لينا سلمت علينا و سلمت عليهم بنخره مرفوعه فوق و صوت فلهمه شدييده قلت ليها اهليييين ، دخلتا مع زين للصاله لاقيت ام رياض سلمت علينا و برضو سلمت عليها بنفس الطريقه ، اخواتو و ياسمينه كلهم بنفس طريقه الفشخره زين لمن قعد يعاين لي في صوتي الغيرتو فجأة ده 😂 قعدنا جنب بعض كان مبسوط بي شدييد و انا برضو مبسوطه انو راجلي وجيه كده و ولد عز ، بدوا يتونسو مع زين كلهم كنت عارفاهم شاميني كلهم ، و انا مبسوووطه بإحساس العظمه الحاساهو ده ، جا رياض داخل سلم على زين و لمن جا دوري عاين لي ، حسيت انو عيون رياض الوقت داك عايزة تنفجر من الغضب الفيها بس انا حاسه كنت بسعاده كده غرييبه ، قعد جنب زين عشان مايواجهني ، بقى بسأل فيهو اها بالي عجبتكم و الايام كانت كيف! ياسمينه قعدت جنبي في الكرسي المواجهني بقت تسأل فيني اها ياعروسه اخبار العرس شنو ! قلت ليها الحمد لله ، قالت لي شهر العسل كان حلو ! الأماكن كانت رايقه ! قلت ليها حلوة بس مزدحمه عشان الناس كلهم بعرسوا بداية السنه ، عاينت لي رياض وقالت ليهو رياض رايك شنو نعمل رحله مع العرسان لباريس ! هم ما مشوها لسه ، قبلت علي والله ياسندس رهيييبه مشيناها شهر العسل مبالغة اي مكان فيها رومانسي ، زين قال ليها والله تصدقي يا ياسمين الفكره عجبتني ، مالوا لو مشينا نحنا الاربعه ، قمتا انا عاينت لي زين و قلت ليهو براحه انا ما بقدر اسافر قال لي ليه ! قلت ليهو هسي جينا راجعين خليها مره تانيه ، رياض لمن شافني بتكلم معاهو وبحاول الغي الفكره يادووب ما دخلت راسو قال لي زين والله يا زين انا زاتي عجبتني فكرة ياسمينه بالمره نكوم اتفسحنا نحنا الاربعه و بالمره نكون جددنا شهر عسلنا برضو ، زين قال ليهو خلاص تمام والله ماعندي اي مشكله بس نمشي في المواعيد دي عشان بتكون بااارده ، قال ليهو تمام يازول ، عاينتا لي رياض بحمر ليهو انت كيف توافق! و هو ابتسم لي بنظره بتاعت انتي خايفه من شنو لو مشينا كلنا سوا ، اتفقوا على الفكره و انا الوحيده العارضتها بس زين كان مصر نمشي ، بعدها قمنا للغداء كلنا اكلنا و اتونسنا تاني ، كنت سااكته ما بتونس و رياض كان بعاين لي كتير ، جات عيني في عين ام رياض ، كان عندي كلام كتييير و ظهر من نظراتي ليها ، كنت بقول ليها من خلال عيوني ، شايفه ! انا متزوجه منو ! قاعده وين ! ولدك محروق كيف ! شايفه العز و السعاده الأنا فيها ! وشايفه الندم على وش ولدك! شايفه كيف قدرت ادخل بيتك و انا مرت اعز اصحاب ولدك و انتي ساكته ماقادره تتكلمي و تقولي دي سندس يا زين ! ، لأننا نسوان الاتنين فاهمين نظرات بعض ، وصلتا كلامي لي ام رياض الما كانت قادره تفتح خشمها من الحرقه ، يمكن انها ممغوصه اكتر من ولدها و الماغصها اكتر انها ماقادره تقول ليهو سندس بتعمل كده عشان تموت ولدي بس ، اتغدينا و بعدها قمنا وصلونا رياض و ياسمينه لي باب الشارع ، لمن لقيت رياض لسه بعاين لي بحرقه ، مسكتا زين من يدو و ثبتا فيهو قال لي مالك ! قربتا منو اكتر و قلت ليهو نعستا شدييد قام ضحك ، رياض ما فضل الا يجي يتحشر في نصنا ، ياسمينه برضو كانت بتعاين ، قالت لي زين خلاص ما نعطلكم عيدوها تاني قال ليها ان شاء الله بنتشاور و برد ليكم ، ودعناهم وركبنا عربيتنا مشينا بيتنا كان عندنا شقه في بيت ناس زين قاعدين فيها بعد رجعنا من شهر العسل ، بننزل تحت ناكل كلنا سوا انا و امو واختو وابوهو و زين لمن يكون قاعد ، لمن رجعنا البيت بالليل زين فتح معاي الموضوع قال لي فكرة ياسمينه ما عجبتك ولا شنو قلت ليهو لالا عجبتني ليه مالك سألتني ! قال لي لأني شفتك متضايقه لمن قلت نمشي حسيت بي ملامحك اتغيرت ؟ قلت ليهو زين ! ماقصة كده بس نحنا نمشي الاربعه ليه ! قال لي رياض صحبي و دي مرتو و حنتبسط شديد كلنا سوا بعدين نحنا مشينا برانا بالي ، قلت ليهو انا ما عندي مشكله قال لي ارد ليهم على اننا موافقين ! قلت ليهو و انا بضحك انت اساسا رديت قبل كده بموافقتنا ، قال لي طيب يعني موافقه ؟ قلت ليهو زين موافقه كلمهم ، اتذكرتا ملامح رياض و هو بحاول يقول لي خايفه مالك من السفره ! و لأني مابحب زول يتحداني وافقت على السفره ، بعد اسبوعين رياض كان جهز اي حاجه للسفره بتاعتنا كلنا الاربعه ، اتلاقينا في المطار و كنا مسافرين لباريس لمدة 15 يوم ما كنت عارفه انه باريس البحبها و نفسي اشوفها من زمان ح تخلي حياتي تتقلب من اول و جديد ، وصلنا باريس ❤ مدينة الرومانسية والاحلام .. منو كان البتخيل اني من زواجي ازور بالي و باريس بالسرعه دي ، طيب ده العز و دي الراحه الكنتا منتظراها من زماان انا ليه حاسه نفسي بغش في روحي اني مبسوطه وانا ما حاسه بي انبساطه نهاائيا ، مجرد كلام بتقال لي اهلي و الناس سندس سافرت و سندس لافه العالم ، وانا كل الاماكن الكنت بحلم
بيها اتحققت بس ما حاسه بي طعم للسعاده ، زين زول طيب و مسكين و على نياتو يمكن هو السبب في اني ما احس بالسعاده ؟ يمكن لأني ظلمتو و لسه بظلم فيهو وبخدعوا بي اني بحبو و دايراهو وانا من جواي متأكده اني ما دايراهو بس عايزة اعيش وضع الغنى والقروش و المستوى العالي بس ، و الراحه و الافتراء ، اي لابسه احسن الماركات و عايشه احسن عيشه بس ماسعيده ، طيب من زمان انا بقول السعاده هي القروش و بس ، قانوني ده اتغير ليه ! السبب لعنة زين ؟ لأني بقيت وحده ظالمه ! يمكن ام زين بتدعي انو ربنا يضر اي زول بيأذي ولدها ، يمكن الدعوات دي بترجع لي ، السعاده وين الأنا كنت بحلم بيها ! ، وصلنا باريس و رياض الكان حاجز الفندق و الأماكن كهديه منو ل زين حاجز غرفتين فاتحات في بعض ! رياض قااصد يوترني و يخليني مقلقه من افكاروا ؟ ، اول يوم ارتحنا من السفر و ما لاقينا بعض ، تاني يوم نزلنا تحت المطعم بتاع الفندق معمول بطريقه الحديقه الاصطناعيه يعني كأنك قاعد في حديقه حقيقيه بس الفرق انو الديكور و الشلال المعومل ده و اشعة الشمس البتدخل للمطعم الكان عباره عن طابق كامل بس التصميم بحسسك انك في منتجع سياحي و سط البحر و الشلالات ، نزلنا انا و زين في البدايه عشان الفطور و بعدنا نزلوا رياض و ياسمينه ، قاعدين للفطور و الجو بااارد ، رياض و زين جنب بعض و انا وياسمينه جنب بعض ، كنا بنتونس شويه قبل الفطور و لمن جابوهو لينا سخن مع الشاي ، رياض كان بسرق نظراتو و بعاين لي من مره لي مره لابسه بلوزة البرد بتاعتي و حاسه بي برد و بشرب في الشاي ، كان شعري اسود سواد الليل و كاوياهو بالمكوه و عيوني بتلمع من البرد ، زين قعد يضحك فجأة ، قلنا ليهو التلاته في شنو ! قال لي شايفه وشك عامل كيف ! قلت ليهو برداانه ياخ 😂😂 قال لي طيب اطلعي فوق ارتاحي قلت ليهو لالا ، قال لي سندس عشان ما تمرضي الجو بارد ، قلت لي ياسمينه ماحتضايقي! لو طلعتا قالت لي لا طبعا ارتاحي و اخدي راحتك لانو بالليل و رانا مشوار رهيييب ، قلت ليها طيب تمام استأذنتا منهم و طلعتا للغرفه بتاعتنا ، كنت حاسه بتعب فعلا فظيييع و جسمي مكسر رقدتا في السرير و نمتا نومه طوييييله ، صحيت على صوت زين بقول لي حبيبي قومي , قمتا من النوم بتمغى قال لي ارتحتي قلت ليهو شكلي كنت مرهقه شديييد بس قال لي نوم العافيه يارب ، قومي اخدي دش و صحصحي عشان طالعين نشوي برا في مكان حلوو ح يعجبك قلت ليهو طيب تمام ، قمتا فعلا لبستا فستان مورد و كنت راسمه رسم العروس و ختيت شال في رقبتي و سرحتا شعري ضنب حصان ، زين اتظبط و طلعنا لقينا رياض و ياسمينه منتظرين تحت و هي لابسه بنطلون جينز و بلوزة قصييره سوداء بتلمع كمها شفاااف 😳
طلعنا و كان سايق العربيه رياض ، فاتحين اغاني و بغنوا كلهم الا انا ، وصلنا المكان فعلا رومانسي شدييد بحر منور بالشموع حتى الترابيز منوره بالشموع ، الجو كان بارد شديييد بوفي مفتوح فيهو كل انواع المشويات بمشي اي زول لمكان الشواء بشيل الحاجات العايزها مبهره و متبله و السلطات جاهزه ، الشيف بشويها ليك و بديها ليك سخنه بتشيلها وبترجع لتربيزتك حتى الاغاني المفتوحه كانت رومانسيه ، زين قال لي المكان عجبك ! قلت ليهو ايوه حلووو شديييد ما توقعتو كده ، قال لي ماجعتي ! قلت ليهو لالا بردانه قال لي خلاص انا ح اقوم اكل جعتا اجيب ليك شنو ! قلت ليهو حاجه سخنه اشربها لمن اجوع بقوم اكل براي ، سأل ياسمينه و رياض و انتو جعتو! رياض قال ليهو لا انا ما جعان ياسمينه قالت جعانه و قامت مع زين لمكان الشيف ، خلونا برانا مواجهين بعض انا و رياض قبلتا منو على البحر بعاين عشان ما يتكلم معاي ، كنت متجمده من البرد و بفرك في يديني و هو كان بعاين لي لسه قال لي بردانه ! قلتا ليهو ما شغلتك خليك في روحك قام ضحك و سكت شال كبايتو بتاعت المويه و شرب منها ، كنت بعاين لي زين و ياسمينه بعاد مننا و بتونسوا مع الشيف و بختاروا في الأكل ، رياض قرب على الطاوله و مسك يديني الاتنين ، فكيتها منو بسرعه 😳 قلت ليهو انت جنيت قال لي خفتي مالك ! قلت ليهو رياض انت جنيت ! كيف تمسك يدي ! قال لي زي ما كنت بمسكها زمان تتذكري؟ قلت ليهو رياض انا هسي مرت صحبك و انت راجل متزوج ، مافي حاجه اسمها زمان فاهم ؟ الغريبه كان بضحك لسه قال لي انتي ليه زعلانه قدر ده ، ليه لسه غضبانه مني ! مش وصلتي للعايزاهو ؟ عرستي واحد زيي و ده الإنتي كنتي دايراهو صاح ! قلت ليهو المشكله يارياض انك شايف نفسك احسن واحد في الدنيا و الناس كلها جاريه ورا رضاك ، عليك الله سيب الوهم الإنت فيهو ده ، قال لي اقنعيني انتي ما مشتاقه لي لسه ! قمتا من الطاوله و قلت ليهو انت شكلك جنيت فعلا ، كان بضحك👊🏻 عايز يستفزني بضحكتو لسه .. مشيت لحدي مكان الاكل وقفتا جنب زين قال لي مالك جيتي ! قلت ليهو انا تعبانه خلينا نرجع و كنت صاره وشي بدون ما احس ، ياسمينه عاينت لي وقالت لي مالك ؟ قلت ليها انا تعبانه بس عايزة ارجع زين قال ليها خلاص شيلي طلبي وديهو لي رياض بناكل
نفس الشي ، خليني ارجعها شكلها سندس محمومه و دي بداية نزله ، قالت ليهو تمام ، ركبنا انا و زين ورجعنا الفندق . واصلوا هم السهره براهم ، انا و زين رجعنا الغرفه نمتا انا و خليتو مساهر في التلفزيون .، صحينا الصباح فعلا جاني التهاب زين نزل يشرب الشاي تحت و انا في سريري ما قمتا ، حسيت اني بتبايخ مع زين و هو بدا يزهج قلت اقوم البس و انزل اتجاهل كلام رياض و حركاتو و فعلا لبستا و ختيت الشال و شايله كيس مناديلي و قلت انزل ، اول ما فتحتا الباب لقيت رياض و ياسمينه نازلين لي زين برضو ، كانت ياسمينه ماسكه يد رياض و مقربه منو شديييد ، تاكيت الباب و بقيت بعاين ليهم كانت بتضحك و بتتكلم معاهو وهو بقفل في باب الغرفه كانت مقربه منو شديد ماعارفه لي اضاريت عشان اشو
يتبع.....
