إحساس إنو الزول العزيز عليك اتوفى ، مات ، بقى مافي ، فارق الدنيا، اللحظات الأولى البوروك فيها انو الزول ده مات ! بتكون في حاله من الخمول و عدم التصديق و كأنك انت في دنيا تااانيه خااالص ، احساس اطرافك مجمده و عيونك تااايهه ، ما كنتا واعيه لي اي شي اللحظه ديك كنت بعاين لي زين و انا ما قادره ابكي عايزة اتكلم اقول حاجه بس لساني مربوط و حلقي مخنوق و اضاني بتصفر ، زين كان بتكلم معاي بس بقول في شنو ما سامعاهو شال تلفوني ضرب لي امل وصفت ليهو بيتنا .. ركبني في العربيه و دور انا طول الطريق ساااكته و مخلوووعه لحدي ما وصلنا بيت رشيده الناس ملمومه من بره البيت و رجال الحله ماليين الشارع و النسوان بسكلبوا ، و انا لسه ساكته زين فتح الباب و نزلني البيت ، الحيطان كان شكلها غريب! البيت ريحتو غريبه! الدنيا كلها غريبه ! و رشيده كانت بتسكلب و تكورك و تكب التراب في راسها ، مرادي حاضنه سامي و بتبكي بي وجع ، امي حاضنه ملاك و ببكوا ، ابوي ببكي بطريقه غريبه ، الاصوات دي كلها كانت حوليني و انا في اضاني صوت واحد صوت ساجد وهو بسألني إنتي ح تبيتي معانا بتين ! امل صحبتي جات جاريه علي و هي بتبكي حضنتني بس انا ولا دمعه نزلت مني ، جاني شعور كأنوا ملك الموت بسأل فيهو اشيل روحك و هو بقول ليهو لسه سندس ما جات نامت معانا في بيتنا ، بعاين للناس ماقادره افهم اي شعور مرا بي ، ما قادره اصدق ! لحدي ما اولاد عمي جوا شايلين الجثمان و بكبروا طالعين من الغرفه لحظة شفتو مكفن و هو صغير , مرفوع فوق العنقريب جنازه ، طلعت مني صرخه حسيت بيها طلعت من جوه صدري جريت على الجنازه بكورك و ببكي ساااجد انت ما متا صاح ! ساجد انت بتهظر معاي ! ساااجد انا عايزة ابيت معاكم الليله ، الناس كلهم صنوا بعد صرختي كنت ماسكه العنقريب و بشاكل في اولاد عمي ما تشيليوهو حرام عليكم 😭😭 هو صغير لسه صغير لسه حرااااااام كنت بكورك و ولد عمي بقول لي استغفري ياسندس كانوا بسحبوا فيني لي ورا و انا برجع بعارض ليهم للعنقريب و بقول ليهم ماتشيلوهو شيلوني بدالوا ، امل قالت ليهم ختو ليها شويه هي مصدومه ما كانت في المستشفى ، لمن نزلو لي العنقريب و قعدت جنبو في الارض بعاين ليهو ، الدموع الطلعت من عيوني كانت بتكفي بحور ، قلت ليهو انت مش قلت لي نبيت مع بعض ! انت مش منتظرني ! انا جيت خلاص قوووم قووووم انا منتظرااااك ، قووووووم يا ساااااجد انت كويس و ماعندك حاجه قووووم ، امل جات قعدت جنبي في الارض بتبكي و بتقول لي خلاص كفايه قطعتي قلوبنا و قلب امو ، يادوب انا شفتها دي امل ! قبيل ما كنت شايفاها لمن دخلت البيت ، كنت وين ! في ياتو عالم ؟ قالت لي خلاص استغفري ربنا كلنا لله راجعون قلت ليها يعني ساجد مشى لي الله ! يعني تاني مافي ساجد في الدنيا! يعني ساجد ما ح يقول لي انا بحبك و بحبك لمن تجينا ! يعني انا ما نمتا معاهو في بيتهم لمن كان نفسو ! يعني انا خليتو يموت و ما ساعدتوا ! ، ابوي جا قعد في الارض جنبي برضو حضني و انا ببكي و قال لي استغفري الله هو ماغالي على ربنا ، قلت ليهو و انت بتبكي مالك ! انا سامعه صوت ساجد لسع انت ماسامعو يا ابوي ؟ ولد عمي قرب و عايز يبدا يرفع العنقريب صرختا فيهووو لاااا ما تهبشوهو ، ساجد عاايش انا سامعه صوتو ساااجد قوووم علييييك الله قووووم قوووووووم ياساااجد ، هبشتا مكان رجلينو الصغاار شميت رجلينوو و قلت ليهو انت زعلان مني! انت ماعارفني انا بحبك كيييف ، انا برييييدك قووووم خلاص ولا سوقني معاك انوم معاك في بيتك الجديييد ، انت ح تنوم كيف براك ؟ ، ولد عمي قال لي ولد عمي التاني امسكها و زحها خلينا نرفع الجنازه هي ما حتقوم من هنا ، مسكني هو و ابوي و زحوني و انا بفرفر ليهم فكووووني حرااام عليكم عايزين تخلوهو براهو ! خلوني انوم معاهو ، كنت بعلين لي ابوي و بقول ليهو انت ماعندك قلب ؟ ح تخلوهو تحت التراب و تمشوا ! ما حرااام عليكم و بصرررخ و انا شايفاهم بكبروا و بهلللوا لحدي ما امي و مرادي مسكوني عشان ابوي و ود عمي يمشوا الدفن ، كنت شايفه الناس ببعدوا بالعنقريب و صورة ساجد وضحكتوا قدامي بقول لي مع السلامه ، كنت سامعه الله اكبر من اضان و اضاني التانيه فيها ضحكة ساجد ، عافرتا امي و اخواتي و كل النسوان بقوه ماعارفاها جاتني من وين ، مليت نفسي بالتراب و انا بفرفر عشان يفكوني و الحقوا و لسه بصرخ و بكورك و بنادي فيهو ، كنت بعاين لي امل و بقول ليها ساجد خلاني ! كانت بتبكي! امل بتبكي ليه! ساجد خلاني انا ! 😭😭😭 سااااجد ما ماااات ، كل الكلام الكنت سامعاهو اللحظه ديك استغفري و ماغالي على ربنا و انا لله و انا اليه راجعون ، لحدي ما غميت على صوت العربيه بتدور و الرجال بكبروا و بهللوا .. ودوني المستشفى في عربية زين مشت معاي امي و امل ادوني حبوب و دربات ، لمن صحيت كنت حاسه نفسي في حلم ! حلم شين شديييد ! بس كنت واعيه شايفه امي و شايفه امل و شايفه زين ! زين الجابوا شنو و بتين! حسيت اني مخدره تاااني
، دموعي كانت بتنزل و مستمره ، امي بتبكي و امل ! الحلم حقيقه؟ ، قعدت في نص السرير و بقيت بصرخ و بضرب في نفسي و وشي و بجر في شعري ، امل حاولت تمسكني هي و امي ، بس ما قدروا ، سمعتا الدكتور بقول ليهم خلوها هي مصدومه ، قال خلوها !! كأنوا زول اذن لي اطلع الجواي ! صرختا صرخه كبيره سمعت كل المستشفى ، بعدها بقيت ببكي و بببكي و الدكتور ببعد في امي و بقول ليها خليها كان واقف في راسي و بقول لي اخوك اتوفى اخوك ساجد اتوفى ، كأني يادوب سمعتها ! تاني صرختا و فقدتا توازني ماقدرتا اصنقر لسه و قعتا على المخده براسي و ختيت يدي في خشمي و بقيت بقول سااااجد ما ماااات و الدكتور بقول لي ساجد اتوفى و انا بببكي و بعضي في يدي و بقول ليهو مااا مااات ، لحدي ما صوت البكا بقى بنخفض مني شويه شويه .. و نمتا ! ماعارفه نفسي الوقت داك نمتا او غفيت كل العارفاهو صحيت و انا بعاين لي اسقف بيت رشيده الغرفه البنوم فيها ساجد و يديني الاتنين مطعنات بي ابر ولا حقن ! راقده في سرير ساجد ! مافي زول جنبي في الغرفه صوت الصواريخ بره ، خلوني براي ، مسكتا مخدتو حضنتها و مليتها دموع حسيت بيهو سامعني بتكلم معاهو ، كنت سامعه سؤالو بس سندس ح تنومي معانا بتين! سندس انا ح العب مع اصحابي بتين! ، طعم الوجع و الغصه الجوا قلبي الفتره ديك ما كان في زول بقدر يتحملها ، كنت بتكلم مع المخده زي المجنونه انا جيت انوم معاك لكن لقيتك مافي ، انا كنت عايزه العب معاك لكن انت مشيت ، انت خليتني ليه ! انا زعلتك ! انت مش فرحان بي اختك ! مش اختك بتشبه الممثلات! خلينا نمشي مع بعض جنب اولاد الحله عشان اشوف ابتسامتك ديك ، انت قايلني انا بكرهكم ! انا بحبكم شديييد انا بحبك ياساجد ، ليه خليتني برااي؟ انا ماكنتا دايره انوم معاك و نلعب سوا ليه يا ساجد ! يعني انا تاني ما ح اشوفك ! يعني انت مشيت لمكان بعيد ! انت وين ياساجد؟ الجنه حلوه ؟ طيب ليه ما سقتني معاك ! انت مش بتحبني اكتر من مرادي و ملاك ! انت قاعد كيف هسي براك ! طيب انت مابتحب الضلام ، يعني انت خلاص خليت الدنيا؟ يعني انا اتأخرتا و ما عالجتك ! يعني انت زعلان مني مش! انا الغلطانه مش؟ يعني تاني ما ح تهبش لي شعري ؟ يعني مافي زول ح يفرح بي جيتي! ، انت ليه توجعني كده ! انت ليه مشيت بدري ! ياريتني انا الفتا قبااالك ياريتني انا الكنت مكانك ! , اااااه ياساجد من الوجع الخليتو لي براااي ، ااااه من فراااقك ياحبيبي ..
نقطة التغير البتحصل في حياتنا بكون وراها سبب عظيم ، بخليك تتغير يا للأحسن يا للأكعب ، صدمه ، خيانه ، موت ، فراق .. حاجه بتخليك تغير نفسك من جوه 360 درجه، انا من الناس القواني الوجع و خلاني اتغير لوحده انا مابعرفها .. مرا علي اربعه شهور من وفاة ساجد في البدايه كانت صعبه علي حتى التعويده على موتو كانت فتره اتمسكتا فيها بصلاتي وقرآني و دعائي عشان ربنا يصبرني على موت ساجد و اقدر استمر من دونو ، فتره زي ما كانت مره علينا كلنا بس فتره جمعتنا ببعض ، العلاقات اتغيرت بين امي و رشيده و بيني وبين ابوي ، يمكن لأننا فقدنا طعم الدنيا و مسخت علينا بعد رحيل ساجد ، مافي زول كان عندو قدره على الشكل و التوتر و الانفعال ، كانت الامور طيبه بينا كلنا ، بس انا كانت جواي حسرة ما ممكن تنتهي حسيت بي اني قصرتا في حق ساجد و اني السبب في موتو ، بعد اربعه شهور و بعد ما فقدت الامل في الدنيا جات امل صحبتي ترجعوا لي تاني ، كانت قاعدة معاي في غرفتي فاتحه الاذاعه و عامله شاي تقيل يروح لي الصداع ، قعدت جنبي و سألتني سندس ماحاسه انو جا الوقت عشان تطلعي للعالم البره ؟ عاينت ليها بعين مكسوووره قالت لي سندس ده اكتر وقت مفروض تكوني فيهو قويه اهلك محتاجين ليك و لي وقفتك معاهم ، ابوك ما مشى الشغل من يوم ساجد اتوفى ، ماشايفه الكسره الفي جواهو و احساسو بالعجز ! انتي محتاجه تقيفي على رجليك لأنو اهلك محتاجين ليك اكتر من اي وقت تاني ، اهلك مكسوريين كلهم بس الراح ما برجع تاني الله يرحمو ، بس ياسندس الحياه ح تستمر ، كلنا راحلين و كلنا عندنا وقت معين واجل بنمشي فيهو عندنا فتره بنعيشها بنقدم فيها كل البنقدر عليهو و بعدها بنفوت ، اعملي الانتي بتقدري عليهو عشان ما يجي يوم و تندمي على تقصيرك ، انتي مفروض تكوني مصدره قوه لي اهلك ، ابوك مكسور و اختك ما ح تقدر تقدم ليكم حاجه و هي محموله و الفيها مكفيها ، سندس مافي غيرك ح يتحمل المسؤوليه بعد ده ، ختي في راسك مسؤوليتك اتجاه اهلك و بس .. دي اكتر فتره قعدتي فيها مع نفسك و عرفتي انو مافي زول دايم لي زول ، و انو الاهل هم اعز الناس علينا ، لمن قالت اعز الناس سرحتا في ساجد للآن بتذكر أمنياتو الكانت بسيييطه بس نحنا عجزنا عليها ، واصلت امل كلامها و قالت لي لو في زول تاني مرض؟ لو كان محتاج لي مساعده ! ح تكوني لسه بتعايني من بعيد كده ! الحزن ما ح يرجع ساجد ، بس في اولى من ساجد هسي ، في سامي و في ملاك و محتاجييين كتيييير منك انتي ، في امك و ابوك و ام ساجد القلبها مقطوع كلهم محتاجين رعايه و في اختك المحتاجه مساعده برضو ، عايني لي اهلك و لي وضعهم و ارمي اي حاجه وراك ، قومي اتنفضي ياصحبتي و اطلعي للدنيا لأنو اي شي بروح من اليد تاني مابرجع .. عاينت لي امل و ابتسمتا بعد فتره نسيت فيها طعم الابتسامه ، حضنتني وشالت كباية الشاي بتاعتها .. فتحت التلفزيون كانت متابعه برنامج اسمو قعدة مساء ، بكون كل يوم مع زول مشهور فنان ،ممثل ، كاتب, صحفي , سياسي .. مع اي زول هو معروف في السوشيال ميديا و المذيعه كانت ياسمينه ، امل ما كانت بتعرفها فتحتو و هي بتحضر انا اتخلعتا ياسمينه ؟ لابسه دبله بالشمال ! سألتا امل المذيعه دي متزوجه ! ولا دي دبله ساي! قالت لي متزوجه ياسندس😍 قبل شهر و نص كده اتزوجت عروسه جديده للآن ، قلت ليها ليه ما محننه قالت لي بكون راجلها مسافر .. غايتو شايفه تعاليق الناس في صفحتها قالوا راجلها سمح و اتخيلي كابتن طيران 💜 لكن ما نزلت صورهم كلوو كلوو بس بتنزل صورها في الفيس براها ، انا من متابعنها .. ما خليتها تتم كلامها وقاطعتها قلت ليها دي مرت رياض ، اتخلعت و نططت لي عيونها و قالت لي سندس !! قلت ليها ياسمينه دي مرت رياض قالت لي مستحيل يا سندس ، قلت ليها خشي صفحتو و شوفيهو قامت دخلت لقتو ما عامل اي بوست بتاع عرس ولا تهاني و اخر بوست ليهو قبل شهرين عن انو مسافر ، قالت لي ما اظن انتي متأكده ؟ قلتا ليها بضحكه استهتار شديد كمان ، عاينت لي و سكتت قلت ليها يلا ياخ ما علينا .. قالت لي زعلتي! ما كان اوريك بالحاجه دي هسي! قلتا ليها انتي عارفه الكان حاصل بينا كلو ، مافي شي فارق معاي والله ، قالت لي طيب اخليك براك و امشي اشوف امك في المطبخ اساعدها ، فعلا طلعت و خلتني لأنها كانت عارفه و متأكده اني ح ابكي ، ماقدرتا امسك نفسي من الدموع و بكيت شديييد برااي و بعدها قشقشتا دموعي و قمتا على حيلي ، استحميت و غيرتا و قلت لي امي طالعه مشوار و جايه .. امل عاينت لي و سكتت ركبتا و انا وجهتي الوكاله كنت عايزه اسأل من عنوان لي زين .. بس لمن وصلتا الوكاله اتفاجأتا بي رياض ! كان ماسك تلفون بتكلم وفي يدو الشمال الدبله ، رياض! لو كنت انا الزمان بنفس دمها الحار كنت انفعلتا و شاكلتو بس لا هسي اي شي اتغير في حياتي ، قربتا منو و لفتو رياض ، قبل علي و شافني بعد شهور من انفصالنا ! شهور حصل فيها كتييير !!! ، قال لي سندس! استغرب لمن شافني جيت الوكاله .. قال لي كيفك ! قلتا ليهو كويسه الحمد لله و انت؟ قال لي كويس الحمد لله ، قلتا ليهو مبروك , قال لي الله يبارك فيك " كان حديث عادي خالس من اي شعور بالنسبه لي ، كان احساس بعدم الرغبه في اي شي ، ما كان فارق معاي هو اتزوج او لا ، قال لي البركه فيكم , قلت ليهو البركة في الجميع و شكرا ، امل وصلت لي انك جيت ايام العزاء بس انا ما كنت بقدر اقابلك وقتها ، قال لي لاشكر على واجب ، اتفضلي ! دخلتا معاهو المكتب قال لي اعمل ليك قهوه ؟ قلت ليهو لا ما عندي وقت اشربها ، قال لي ايوا سامعك ! قلت ليهو رياض انا محتاجه لشغل ممكن ارجع الوكاله ؟ عاين لي مستغرب سندس! سندس المغروره ديك اتكسرت كده ؟ كانت ما بتحب زول يتفضل عليها ! و هسي جايه توريني انها محتاجه لشغل ! ، ما كان عايز يظهر لي انو مستغرب بس انا كنت عارفاهو ح يتسائل من جواهو ، قال لي سندس والله وكالة بيسان هنا مقفله مافي مكان خالي ، براكي جيتي داخله و شفتي كل الأماكن ملانه ، قلت ليهو ما مشكله خلاص شكرا و عايزة اقوم على حيلي قال لي سندس استني ، ممكن تشتغلي في وكالة الزمرد ! بس حاليا ماسك ادارتها زين .. قمتا رجعتا و قعدتا قلت ليهو ايوه ما عندي مشكله اذا زين موافق ، قال لي دقايق اتصل عليهو ، اتصل عليهو و كلمو قال ليهو سندس عايزة مكان في الوكاله تشتغل ارسلها ليك ! قال ليهو طوالي انا حاليا قاعد في المكتب .. رياض ملاني العنوان و طلعتا منو ، اتصلت علي امل سألتني مشيتي وين! قلت ليها لاقيت رياض قالت لي سندس😡قلت ليها مشيت ليهو يشغلني قالت لي سندس😡 كيييف الله قدرك مشيتي! عايزة تزلي ليهو نفسك و تخليهو يشفق عليك ! قايله كده ح ترجعيهو ليك ؟ عايزاهو يعرف انك محتاجه ! عايزاهو يتأكد انك طمعانه في حقو زي ما قالت الحقيره امو ؟ ، قلتا ليها امل انتي متخيله اني اعمل كده؟ قالت لي اها مشيتي تسوي شنوو وريني ! قلت ليها وحياة ساجد لو ما بكيت رياض و امو ما ابقى اسمي سندس ، من اليوم ده يا امل إتأكدي اني لو ما رديت الزله الزلتني ليها ام رياض ليها هي و ولدها ما ابقى انا سندس ، امل خافت اكتر لمن سمعت كلامي .. قفلت منها و من اللحظه الأنا ماشه فيها ل زين قررتا اطوي صفحه من حياتي اسمها رياض و انسى شعور اسمو حب ، من اللحظه ديك بقيت سندس تااانيه .. وصلت المكتب ل زين دخلت جوه انتظرتو كان بتكلم بره لحدي ماجاني داخل قال لي كيفك! قلت ليهو كويسه, بقيتي كيف؟ قلت ليهو احسن الحمد لله .. ابتسم لي و قال لي تشربي شنو ! قلت ليهو شكرا .. كان بعاين لي في وشي شديد و ملامحي يمكن لأني ماعامله حاجه! قلت ليهو اول حاجه انا كنت عايزة الاقيك انت لمن مشيت وكالة بيسان ، كنت عايزة اشكرك على العملتو معاي قال لي ياخ بتبالغي اي زول كان ممكن يتصرف كده ، قلت ليهو شكرا ليك ، قال لي اها هسي جاهزه للشغل ولا محتاجه فترة راحه ! قلت ليهو لالا حاسه اني ح ارتاح في الشغل .. قال لي طيب انا ما عندي مانع طبعا انتي عارفه الشغل و النظام واحد نفس وكالة بيسان البفرق بس الزي ، البنطلون اسود و البدله بيجي و القميص ابيض فيهو حركه بقدام .. قلت ليهو طيب قال لي استلمي الزي و ابدي شغل طوالي .. قلت ليهو من بكره باذن الله ، قال لي بس خلي بالك انا ما برحم زي رياض😂😂 انا بمر كل يومين اشوف الحاصل شنو ، قلت ليهو بقلبي هو رياض برحم يعني؟ .. موقف رياض ما كان موقف ممكن انساهو ليهو بسهوله ما كنت عارفه الظروف الخلتو يتزوج ولا عارفه الكان حاصل شنو بس الكره الإتولد جواي محى اي شعور حلو كان اتجاهو ، قررتا ابدا من جديد من الوكاله و طوااالي نزلت من الحافله مشيت الكوفير لي وشي و حواجبي .. بعد يومين داومتا ، رجعتا سندس زاتها بزيها الجديد سرحتا شعري بعد استشورتو و عملت ميكب خفيف و طلعتا من البيت و هدفي اهلي قدامي و بس ، و صلتا الوكاله و ما اديت وش لي اي بنت هناك كنت وحيييده منطويه اسبوع مستمره و زين بجي داخل و طالع يعاين لي شغاله كيف ، و الاسبوع التاني يوم الخميس لمن جا متعودين البنات يطلعوا بدري الا انا واصلتا لنهاية اليوم .. جا زين و لقى الوكاله شبه فاضيه غير الكومبيوترات و المشرفه و انا مافي زول .. سأل المشرفه مالك ماطلعتي بدري ردت ليهو سندس لسه قاعده ! قال ليها مامشكله امشي خلاص ، جا داخل جوه لقاني لسه في الكومبيوتر جا قعد جنبي في الكرسي الجنبي قال لي مجتهده شديد ! قلت ليهو بتين جيت ! معليش ما انتبهت ، عاين لي في عيوني و قال لي ماشاء الله قلت ليهو نعم! قال لي ااا قصدي على العروض المنزلاها ، ابتسمتا ليهو و سكتا قال لي في زول خميسو في المكتب غيرك! رفعتا ليهو حاجبي وقلتا ليهو في قال لي منو ؟ قلت ليهو مديري , قام ضحك قال لي صحي والله .. قلت ليهو ليه مريت واحنا ح نقفل ! عاين لي و ابتسم و سكت ، قلت ليهو زين ! قال لي و هو بعاين في الكومبيوتر كنت عارف انك ما حتطلعي ترفهي عن نفسك و عارف قدر شنو انك ضاغطه نفسك ، ممكن المدير يقعد مع موظفتو اذا كانت هي ما مديه نفسها حقها ولا ما ممكن! عاينت ليهو و سكتا ، قال لي سندس اراهنك على حاجه ! قلت ليهو باستغراب شنو! قال لي من هنا لحدي الساعه تسعه مساء لو اديتيني فرصه انا ممكن احقق ليك امانيك كلها ، قلتا ليهو بالله ! قال لي اي والله موافقه؟ قلت ليهو انا ما عندي مانع لأنب عارفاك ما حتقدر ، قام قال لي من هنا للساعه تسعه ح احققها ليك بس قبل ما نبدا اوعك تقولي لي حاجه مستحيله😂😂 قلت ليهو من هسي ! من هسي بدينا 😂😂 ، قال لي لو انا عملت القلتو ليك انتي ح تعملي الحقولوا ليك تمام ! و كأنوا زين عارفني بحب التحدي ! قفلت الكومبيوتر و قلت ليهو تمام ، اول امنيه عندي هي ..
يتبع......
