مر العمر

جزء ٢٠

الحلقه ال 20
مر العمر

ليلي طلبت من عماد يتجوزها وادهم مشي مع ندي يشوف مالها
ادهم: في ايه يا ندي بطلي عياط شويه وفهميني ايه اللي حصل؟
ندي: امجد اخوك
ادهم: ماله امجد جراله حاجه؟
ندي: لا
ادهم: امال ايه؟في ايه بس؟
ندي: بيحب عليا وبيخوني
ادهم: بيخونك مره واحده
ندي: متدافعش عنه لو سمحت
ادهم: مش هدافع عنه...عرفتي منين انه بيخونك؟
ندي: شوفته بعيني
ادهم: شوفتيه؟؟؟؟
ندي: ايوه شوفته مش مصدقني؟
ادهم: لا مصدقك بس مش مصدق اللي شوفتيه...شوفتي ايه بالظبط وسيبيني انا احكم علي اللي شوفتيه؟
ندي: شوفتها في حضنه
ادهم: انتي هتنقطيني بالكلام ولا ايه؟؟؟ما تحكي علي طول بقي
ندي: شوفته واخدها في حضنه وبيقولها اتطمني عمري ما هتخلي عنك ابدا ...ولا هسيبك لوحدك ابدا..يبقي بيخوني ولا لأ؟؟؟
ادهم: مش شرط
ندي: انا غلطانه اني جيتلك اصلا انت لازم تاخد صف اخوك
ادهم: اهدي واقعدي...انا مش باخد صفه...مين هيا تعرفيها؟؟؟
ندي: ايوه ايمان السكرتيره
ادهم: ايمان؟؟؟ايمان السكرتيره بتاعت ابويا؟؟انتي غيرانه من ايمان؟؟؟انا كنت عارف انك هبله بس تخيلت انك لما خلفتي عقلتي...
ندي: بقولك شوفته بيحضنها
ادهم: وايه يعني؟؟؟؟
ندي: يعني ايه ايه يعني؟؟؟وبعدين مالها ايمان وحشه ولا ناقصه ولا ايه؟؟مش فاهمه انا
ادهم: اولا ايمان دي تعتبر متربيه معانا من صغرنا نعرفها من سنين وامجد وانا بنعتبرها زي اختنا...وابويا شغلها معاه لانه وعد ابوها يهتم بيها لانه كان صاحبه..وبعدين اللي انتي شوفتيه او
سمعتيه ما يدلش ابدا علي الخيانه...المفروض تكوني اعقل من كده..وتحافظي علي بيتك...شوفتيه ادخلي عليهم واسأليه مش تهربي كده...
ندي: انا كنت عارفه انك لازم هتدافع عنه...
ادهم: ندي انا مش بدافع عنه...طيب انتي دلوقتي بتعيطي لو انا قمت اخدتك في حضني وقلتلك ما تخافيش مش هتخلي عنك ابدا..يبقي انا بحبك او احنا علي علاقه ببعض؟؟؟
ندي: لا طبعا انت اخوي جوزي..
ادهم: ماليش دعوه بقي بعلاقتي بيكي ايه...مش انت عملتيها قاعده ان اي حد ياخد حد في حضنه يبقي بيحبه....يبقي انا بحبك لما رميتي نفسك في حضني اول ما شفتيني وقولتيلي محتجالك قوي يبقي لو امجد شافنا المفروض يطلقك علشان بتخونيه
ندي: انا مش بخونه..وانت زي اخويا
ادهم: بس مش اخوكي
ندي: انت عايز توصل لايه؟؟
ادهم: ان مش معني ان حد ضم حد يبقي حبيبه....انا بضمك وانتي زي اختي...وعبير مرات احمد بعتبرها فعلا اختي ولما بتقع في مشكله بتجري عليا وبتعيط في حضني...مش يمكن ايمان في مشكله وبتستنجد بامجد وهو وعدها يفضل جنبها؟؟؟؟
قبل المشكله دي كان في مشاكل بينك وبين امجد؟؟
ندي: لا امجد بيحبني
ادهم: ولما بيحبك هيخونك ليه؟؟
ندي: يعني اعمل ايه دلوقتي؟؟؟
ادهم: ما تعمليش حاجه تقومي ترتاحي ..وبعدين تعالي نشوف غلاوتك عند جوزك ايه...ايه رأيك؟؟؟
ندي: ماشي...انا متشكره يا ادهم
ادهم: علي ايه؟؟؟اينعم انتي جيتي في وقت رخم بس معلش تتعوض...انتي جيتي ازاي هنا صح؟؟؟
ندي: لا انا مش بغلب
ادهم: عارف انك مش بتغلبي بس برضه عرفتي تيجي هنا ازاي؟
ندي: طلبت احمد صاحبك وقلتله لازم اوصلك ضروري..وهو اتصرف وجابلي عربيه جابتني هنا
ادهم: مجنونه...انتي علي كده من الصبح في الطريق.
ندي: ايوه
ادهم: حد يعرف انك جايالي؟؟
ندي: لأ
ادهم: مش بقولك مجنونه..المهم اطلعي انتي ارتاحي وانا هتصرف
سابته وطلعت وهو اتصل باخوه اللي كان هيتجنن علي مراته وعياله وطمنه وطلب منه يجيله
وصل امجد الصبح بدري وادهم استقبله واخده الفندق
امجد: هما كويسين يا ادهم؟
ادهم: ايوه كويسين
امجد: طيب هيا جت هنا ليه؟؟
ادهم: ليه دي تسألها انت وهيا تجاوبك...انا عقلتها واتكلمت معاها وهيا حاليا هتسمعك...
امجد: طيب قولي انت في ايه؟؟
ادهم: انت عامل حاجه غلط خايف منها؟؟
امجد: لا طبعا
ادهم: طيب قلقان من ايه روح واتكلم معاها وشوفها زعلانه من ايه وصالحها...
امجد: انا متشكر
ادهم: علي ايه؟؟؟انت اخويا يا عبيط
امجد: اخوك بس ديما بحملك مشاكلي
ادهم: وانا ماشتكيتلكش..روحلها
امجد وندي اتصالحوا وندي عرفت انها فهمت غلط وفهمت ان طبيعه الرجاله في العيله دي بيحبوا يساعدوا اي حد محتاج مساعده,,,اخيرا جه اخر النهار وجه معاد ادهم وليلي...
ادهم فضل مستني ليلي تيجي بس للاسف استني واستني واستني
فضل يحط عذر وري عذر وري عذر لحد الليل عرف انها مش هتيجي..راحلها المستشفي وسأل عليها عرف انها ما جتش خالص اليوم ده...
تاني يوم ادهم راحلها المستشفي واول ما شافها اخدها علي جنب ودخلوا اوضه يتكلموا فيها
ادهم: مجيتيش امبارح ليه؟؟؟انا استنيتك كتير
ليلي: وكنت عايزني اجي ليه؟؟؟يا برودك يا اخي
ادهم: انا بارد ؟؟؟في ايه بقي؟؟؟؟
ليلي: معدش يهم
ادهم: لا يهم ...قولتلك لازم نتكلم
ليلي: مش هنتكلم
ادهم: مجيتيش امبارح ليه يا ليلي؟؟؟
ليلي: مكنتش فاضيه
ادهم: كان وراكي ايه بما انك مجيتيش الشغل كمان؟؟؟
ليلي رفعت ايدها وورته الدبله
ليلي: كانت ورايا خطوبتي
تاني مره يتحط في نفس الموقف ...فضل شويه مش عارف ينطق بس نطق
ادهم: تاني؟؟؟؟ انتي خساره الواحد يضيع من عمره ساعه علشانك مش عشر سنين..مبروك
وقبل ما يمشي خلع سلسلته ومسك ايدها وحطهالها
ادهم: معدتش تلزمني اتفضلي
سابها ومشي قبل ما تنطق ..كان نفسها تقوله انه ما ضيعش ولا لحظه من عمره وانه اتجوز وخلف وان هيا اللي عمرها ضاع
ادهم مشي وقرر نهائي يشيلها من قلبه ويكمل حياته من غيرها .
راح اخد عيال اخوه يلعب معاهم وينسي بيهم همه لان الوقت الوحيد اللي بينسي فيه كل شيئ لما بيكون معاهم ويلعب معاهم بيحس ان الدنيا لسه جميله...وفي نفس الوقت يدي لاخوه فرصه
يقضي وقت مع مراته..اخد العيال وراح النادي وفضل يلعب معاهم ويجري وراهم ويضحك معاهم من كل قلبه
ليلي شافته بيلعبهم وافتكرت انه بيغيظها ويقلها انا عندي اللي مش عندك ..كانت بتتفرج عليه بغل مالي قلبها
عماد: ليلي سرحانه في ايه كده؟؟
ليلي: ممكن اطلب منك طلب؟؟
عماد: انتي بس تشاوري وانا انفذ
ليلي: ممكن نعمل كتب كتابنا الخميس الجاي ده علي طول..
عماد: الخميس اللي بعد بكره ده؟؟
ليلي: ايوه ممكن؟؟؟مش عايزه اضيع وقت اكتر من كده
عماد: طبعا ممكن ..هتكلم مع ابوكي واتفق معاه واجهز كل حاجه
الكل كان مستغرب من استعجالها علي كتب الكتاب والكل اعترض بس هيا اصرت وقدام اصرارها وافقوا
الحفله كانوا بيجهزولها في النادي
ادهم كان رايح النادي بس سيف مصر يمنعه علشان ما يعرفش
وادهم مصر يروح وفعلا راحوا وهناك عرف ادهم ان بكره كتب كتاب ليلي
ادهم: علشان كده انت مش عايزني اجي؟؟؟فاكرني مش عارف؟
سيف: انت عارف؟؟
ادهم: عرفت...ليلي بتنتقم مني ..مش عارف ليه..بس خلاص معدتش فارقه معاياي خلاص بقي تعبت منها واكتفيت
سيف: طيب هتسافر؟
ادهم: اسافر فين؟
سيف: القاهره
ادهم: وما احضرش الفرح؟؟؟انت اتجننت...ده انا هعمل معاها احلي واجب
سيف: ادهم انت ناوي علي ايه بالظبط؟
ادهم: ولا حاجه هنعمل واجب ونمشي...وبعدين امجد ومراته هنا ولسه عايزين يقعدوا كمان يومين...وهتبقي فرصه حلوه يحضروا الفرح برضه
سيف: انا مش فاهم دماغك فيها ايه؟؟؟
ادهم: دماغي مفيهاش اي حاجه
جه الخميس والكل متوتر ؟؟عماد خايف لانه مش حاسس بفرحه ليلي...ليلي خايفه لانها بتتسرع جدا ولسه بتحب ادهم...سيف خايف من رد فعل ادهم...ادهم مطنش كل حاجه وعادي جدا..كأنه اكتفي منها خلاص

وبعد كتب الكتاب بالليل في الحفله والكل موجود وليلي كانت زي القمر الحزين ..دموعها بتهدد في اي لحظه تنزل
ادهم طلع الستيج وبدأ يتكلم

بكره نشوف ايه اللي هيحصل في الفرح؟؟؟
قصتنا انتهت كده ولا لسه ليها باقي؟؟؟
الحب انتهي ولا هيفضل موجود؟؟
استنوني

ShimoOo