مر العمر

جزء ١٠

الحلقه ال 10

مر العمر
رجع ادهم لتدريبه تاني ولحبيته تاني ..وهو رايح عند حبيبته يقابلها

افتكر كلام والدته وهو ماشي
وفاء: انا عارفه يا ادهم انك بتحب وان الحب جميل قوي..بس انا عايزاك توعدني بحاجه؟؟
ادهم: اوعدك بأيه؟
وفاء: توعدني في كل لحظه وانت معاها تفتكر أيه اختك؟
ادهم: افتكر ايه؟؟ليه بقي؟
وفاء: علشان ما تتعداش حدودك معاها...انا عارفه انا مربياك ازاي.وعارفه اخلاقك كويس..بس ساعات الحب بيخلي الواحد ينسي كل حاجه وما يفتركش غير حبيبته في حضنه..فعايزاك كل ما تكون حبيبتك في حضنك تفتكر ايه اختك...واللي انت ترضي بيه يتعمل لاختك اعمله مع حبيبتك..
ادهم: ايه اللي انتي بتقوليه ده؟؟انا مش هسمح حد يلمس اختي
وفاء: يعني انت بتلمس حبيبتك؟
ادهم: مش قصدي كده...انا فعلا بخاف عليها
وفاء: خلاص يبقي هتعاملها زي ما تحب اختك تتعامل..لحد ما تبقي علاقه في النور ..علاقه انت مستعد تتكلم عنها معانا
ادهم: مش معني اني متكلمتش معاكم عنها اني مش جاد في علاقتي
وفاء: عارفه يا حبيبي..انا بس مش عايزاك تعمل حاجه تندم عليها في يوم من الايام..مش اكتر ..خد بالك منها ومن نفسك
ادهم: حاضر يا امي اوعدك اني هفتكر ايه وانا معاها
وكانت مقابلتهم فوق الخيال كأنهم غايبين عن بعض سنين مش 3 ايام
ادهم: وحشتيني قوي قوي ..اخيرا شفتك من تاني
ليلي: وانت كمان واحشني قوي ..مع اني مش كنت بشوفك كل يوم وممكن يعدي اكتر من كده من غير ما اشوفك بس احساس انك
مش معايا في نفس البلد بيفرق كتير..كنت حاسه اني محرومه من روحي
ادهم: عارف يا ليلي لان كان عندي الاحساس ده..اول مره احس اني وحيد في بيتي ..مع ان اخواتي كانوا حواليا وامي وابويا بس عدم وجودك فرق كتير قوي..
ليلي: وهما عاملين ايه؟؟انت عندك اخت في سني صح؟
ادهم: اممم فعلا في نفس سنك ...المهم سيبك من الكلام عني وقوليلي انتي اخبارك ايه؟
ليلي:طيب ما تسيبني من الكلام خالص وقولي وحشتك قد ايه
ادهم قرب من ليلي ويدوب هيقرب اكتر افتكر ايه اخته فبعد علي طول عنها
ليلي: في ايه يا ادهم مالك؟
ادهم: لا يا حبيبتي مافيش..المهم قبل ما انسي انا جايبلك هديه بسيطه
ليلي: بجد ..؟وانا كمان جايبالك هديه
ادهم: طيب وريني هديتك الاول
ليلي: لا طبعا انت الاول
ادهم خرج علبه صغيره وفيها السلسله واول ما فتحها
ليلي: واو ..دي ليا انا؟ودي هلبسها ازاي بقي ؟
ادهم: هتلبسيها عادي
ليلي: ولما يسألوني جيبتها منين والحرف ده ايه؟
ادهم: هتقولي انها اكسسوري عادي وان الحرف ده لحبيب قلبك
ليلي: حبيب قلبي ؟؟
ادهم: جدك احمد مش حبيب قلبك
ليلي: جدو؟؟انت مفكر في كل حاجه بقي..بس قولي هيا فعلا اكسسوري؟
ادهم: تفرق معاكي؟
ليلي: لا طبعا مش تفرق بس عايزه اعرف يعني لو هلبسها علي طول ولا اقلعها
ادهم: وتفرق في ايه بقي تلبسيها ولا تقلعيها؟
ليلي: لو هيا اكسسوري يبقي لو لبستها علي طول مع الوقت لونها هيغير ولو اتبلت كذا مره هتبقي مش حلوه ده قصدي
ادهم: لا من الناحيه دي ما تقلقيش..ما تقلعيهاش من رقبتك ابدا مفهوم؟
ليلي: علم وينفذ..لبسهالي بقي
لفت ليلي وعطيته ظهرها ورفعت شعرها وهو لبسها السلسه وقفلها ..لفيت هيا وشها ليه وحطت راسها علي صدره ..مسكت السلسه في رقبتها وبصتلها من قريب
ليلي: ايه ده؟؟؟
ادهم: ايه في ايه؟
ليلي: دي عليها اسمي واسمك؟
ادهم: وده مضايقك؟
ليلي: لا مش مضايقني..بس ممكن حد يشوفه
ادهم: طول ما انتي لابسها هيكون الوش هو اللي باين مش الظهر فمتخليش حد يشوف ظهرها ..وما تقلعيهاش فحد يشوفها وبعدين
محدش هيعرف يقراهم الا لو ركز من قريب لكن من بعيد مش هيبانوا
ليلي: خلاص ماشي هخليها ديما فوق قلبي كده
ادهم: هو انتي مش قلتي جايبالي هديه؟ولا غيرتي رأيك
ليلي: لا طبعا مش غيرت..بس توعدني انك تلبسها ديما
ادهم: البسها؟؟؟؟؟؟وهيا تتلبس؟
ليلي: اه تتلبس..اوعدني
ادهم: طيب قبل ما اوعدك انتي عارفه اني ظابط ومش هينفع البس حاجه كده ولا كده
ليلي بتضحك: انت خايف من ايه بالظبط؟هجيبلك فستان مثلا واقولك البسه؟
ادهم: مجنونه وتعمليها..وبعدين طول ما بوعد بوفي يا ليلي ولو مش هقدر اوفي مش بوعد اصلا
ليلي: طيب اوعدك انا انها مش حاجه مجنونه,,هيا زي هديتك بالظبط..كده اتطمنت
ادهم: سلسله يعني؟؟ماشي يا ليلي اوعدك اني مش هقلعها الا لو غصب عني
ليلي: انا مش حابه الا دي؟
ادهم: طبيعه شغلي ..ما تنسيش...هلبسها علي طول الا لو كنت في مهمه او حاجه تتطلب مني اقلعها بس مش اكتر ..كفايه الوعد ده؟
ليلي: كفايه ماشي
طلعت ليلي السلسله كانت زي التميمه ومكتوب عليها حرف L كبير وجوي الحرف مكتوب فيه et ove ive ong
كانوا مكتوبين تحت بعض وحرف ال L ضاممهم كلهم كعامل مشترك في كل الكلمات يعني مكتوب
LET LOVE LIVE LONGمعناها "دع الحب يعيش طويلا"
وعلي الناحيه التانيه مكتوب اسمها LAILA
ادهم: انتي بجد عايزاني البس دي؟سلسه عليها دع الحب يعيش طويلا والناحيه التانيه اسمك
ليلي: وفيها ايه؟ما انت جايبلي سلسله عليها اسمك؟
ادهم: حبيبه قلبي انتي بنت والبنات عادي يلبسوا سلاسل ..لكن انا راجل وظابط وبقلع هدومي كتير سواء قدام زميلي او في التدريب فهيكون منظري ايه وانا لابس سلسله عليها اسمك؟
ليلي: هقولك زي ما قلتلي ...ما تقلعهاش ومتخليش حد يشوف ظهرها ؟؟؟
ادهم: انتي بتقتليني يا ليلي؟
ليلي: خلاص يا ادهم لو مش عجباك ما تلبسهاش ...سلام
ولسه هتقوم تمشي
ادهم: استني هنا مش موضوع مش عاجباني..
ليلي: موضوع انك كبير وانك ظابط واني عيله خلاص فهمت
ادهم: انا مقلتش انك عيله
ليلي: مش لازم تقولها صريحه يا ادهم
ادهم: خلاص يا ستي ..ليلي انا مش عايزك تزعلي مني ..بجد مش بستحمل زعلك او انك تروحي زعلانه وتقعدي ولو لحظه متضايقه...حقك عليا مكانش المفروض اهتم برأي حد..هلبسها واللي مش عاجبه ما يبصش ولا ايه؟واوعدك مش هقلعها ابدا..الا لو شغل بس ..غير كده هتفضل ديما في رقبتي ..اتفقنا
ليلي: اتفقنا يا حبيبي
رجع ادهم للمعسكر ..كانوا خلاص قربوا يخلصوا مده تدريبهم