#فصلية_شيخ
#الحلقة10
ايمان .. رجعت من اختي ووصلني سيف لبيتي
بالطريق شفت علي .. مااعرف ليش لمن اشوفه ارتبك ونبضي يتسارع .. معقوله لسه مانسيته معقوله لسه بعدني احبه ..
علي .. من زواج ايمان واني لسه اعيش تعيس ومامرتاح بحياتي .. بيوم الي شفت زفتها وشلون طلعت بالابيض من بيت اهلها حسيت نفسي مختنك دخلت للبيت ورحت لغرفتي كسرت وصيحت امي ومرتي صافنات بوجهي مستغربات ليش هيج سويت .. بس امي بساع عرفت .. مرت الايام والاشهر وسمعت من امي انه ايمان حامل .. احتركت روحي وبيومها تقربت لزوجتي حتى اسوي طفل على عنادها .. وفعلاً صار عندي طفل .. وره فتره سمعت انها سقطت .. اني هنا تخرجت وصار بيتي وحدي وسمعت باشجان اخت ايمان راحت فصليه .. بسبب اخوها .. امي بيومها تدك وتركص فرحانه وشمتانه بيت عمي وراحت لبيت جدي هناك ولكت مرت عمي يمهم وتعاركن هم ... اني هالسوالف كولها ضجت منها .. بعد اشهر سمعت زوج ايمان توفى ومسجل البيت باسمها لانه عقيم ومكدر يخليها تصير ام .. انصدمت اذا زوجها عقيم منين حبلت وسقطت سألت امي توترت عرفت بوقتها جانت تجذب عليه حتى اني على العناد اسوي طفل .. واني جانت نيتي اترك بنت خالتي .. طبعا زوجتي اني حيل مقصر وياها بحقوقها .. بس ممقصر وياها بالفلوس اسكتها بالفلوس وبالبيت وهيه ملتهيه عني تطلع وتشتري وتجيب وتخلي ..
طبعاً حسيت رجعلي امل انه اتزوج ايمان واخطبها من ابوها .. وجنت حيل معصب منها من رفضتني من اول هيه وامها .. فكرت اتزوجها وانتقم منها ..
كلت لابوي اريد اخطب ايمان بنت عمي صالح .. ابوي كلي وزوجتك كتله ببيتها معززه مكرمه وهاي هم اخليها بيت .. كالي هو انت وحده ومكدرت توفيها حقوقها مو النوب اثنين
كتله يابه اني احب ايمان حياتي بلاطعم من غيرها من تزوجت لسه اني ممرتاح خلوني ارتاح .. كالي هذا هو ابني باجر اروح اخطبها من ابوها واشوف .. طبعاً امي من سمعت بهالحجي دكت ولطمت وبجت وضلت تحجي عليه .. بس اني عاندتها لان هاي حياتي زوجتي طبعا رادت تطلع وتروح لاهلها كتلها اذا طلعتي من البيت مترجعين اله واطلكج واخذ ابني واخلي البيت لبنت عمي .. خافت وكعدت ببيتها
راح ابوي وخطبها من ابوها ...
ايمان .. اجاني ابوي لبيتي .. كالي بابا امونه ابن عمج علي رجع خطبج من جديد شتكولين اني ارتبكت متوقعت يرجع يخطبني .. يعني هو يحبني لسه ..
كتله بابا انطيني فتره افكر .وارجعلك جواب .
رحت ثاني يوم للمدرسه وكف بسيارته يمي كلي صباح الخير .. رديت عليه
علي .. صعدي بالسيارة اريد احاجيج
.. لا مااكدر معلمات منا وطلاب روح انت للكوفي وره المدرسه واني الحكك
.. اويلي لسه تخاف من الناس
.. رحت دخلت للمدرسه طلبت اجازه زمنيه ورحت وراه للكوفي لكيته منتظرني
.. شلونج
.. زينه
..بعدها لمعة عيونج من تشوفيني ..بعدج تحبيني مو
.. سكتت مااعرف شرد عليه
.. ليش مرديتي جواب وليش تفكرين اذا تحبيني ؟
.. طيب وزوجتك وابنك حررام اخذك منهم
.. زوجتي ببيتها معززه مكرمه وابني بحضن امه
ومتاخذيني منهم لان ليله يمج وليله يمهم ..
.. مااعرف ليش ضجت وحسيت بالغيره
.. هااا بعدج تردين تفكرين
.. طيب وين اعيش اني
.. ااجرلج بيت وحدج
.. بس اني عندي بيتي
.. لا مااسكن بيت مره .. اريد اسكن مرتي ببيتي حتى ميكولون اجاها طمعان ..
.. بكيفك بعد
.. يعني هاي موافقه
.. امممممممم
العصر رجعولي جواب رسمي حتى اجيب الشيخ واعقد الاسبوع الجاي
ايمان رجعت جوابي بالموافقه لابوي .. وامي بوقتها تعاركت وياي .. تكولي اجاج طمعان بفلوسج وبالبيت .. مسمعت منها وره اسبوع رحت للصالون عدلت نفسي وشعري ونظفت جسمي .. وجابوا السيد عقد النه وراها عقدنه محكمه .. وبيومها اخذني لبيت يجنن حلو ونظيف ومأثث .. كالي حظري نفسج باجر دخلتنه .. مااعرف ليش انقبض كلبي من حجايته المفروض افرح حبيبي راح يصير االيه ..
اجه يوم دخلتنه وطبعا اجاني للبيت اخذ اغراضي
بيتي قفلته وطلعت رحت للبيت الجديد هو جاب غدا وياه ودخلت وكعدنه على الغده رحت للغرفه الي تكون غرفتنه بدلت ملابسي وحليت شعري ولبست ثوب ابيض قصير
ورحت كعدت يمه جاي نتغده اباوعله حتى مباوعلي ولا شاف شكلي شلابسه ملابسه
هذا شبيه سألته كتله علي شبيك ...
.. مابيه شي اكلي .. حجاها بنتر ..
استغربت من تعامله وياي
راح للغرفه نام وتركني وحدي كاعده كلت يجوز تعبان
للعصر كعد سويت جاي وكيك كعدنه على التلفزيون ونباوع
علي .. اني فرحان لانها صارت اليه بس لازم انتقم لكلبي الي كسرته اذا ماكسرت كلبج اصبري اليه .. باوعت عليها طالعه تخبل لابسه ثوب ابيض كتلها .. وانتي ليش لابسه ابيض بالله
ايمان .. شنو غير عروستك والبسلك الابيض
علي .. الي يسمعج يكول اني ولد ممتزوج وانتي بعدج بنيه
ايمان .. شنو قصدك ؟
علي .. لاترفعين صوتج
عفتها وطلعت ..
ايمان.. شبيه الرجال تخبل ممعقوله هذا علي الي يحبني بسيطه عليوان ... شوف شنو اسويلك اذا مخليتك تموت عليه .. المغرب صليت وكملت .. حظرت العشه ودخلت سبحت ورحت بدلت لبست
ممكن تصويت و متابعه و كومنت حلو مثلكم 😍
