#بنت_عمي
الفصل الخامس
عمي سالم .. اكيد يا احمد تكلم
انا بتنهيدة .. انا عطيت بنتي لراجل عشان يصونها ويحافظ عليها
الشيخ باستفهام .. هيا بنت عمك والله بنتك
انا.. #بنت_عمي يا شيخ لكن انا اللي ربيتها وكبرتها نين خليتها عروسة سلمتها له وعمري ماحسبتها الا انها بنتي وبس
الشيخ .. اه كمل
انا بتأثر وقهر .. ثاني يوم زيجتها دقت الباب وهيا دم تنزف من خشمها وفمها ووجها مافيه ماينشاف ومش قادرة تمشي وشنو راجلها اللي مفروض يكون سندها وعزوتها وصدرها الحنون بعدي ضاربها ليش لان شك فيها انها مش بنت بدل مايفهم منها وهو عارف ومتأكد انها ماعرفتش غيره في حياتها كلها وبعد ما بنتي فهمت ليش يضرب فيها زي الثور الهايج قالت ليه يرفعها للمستشفى وفعلا رفعها وكانت في دكتورة نسائية اسمها لميس وقتها شادة واهو الدكتور علاء ينوب عليها في شرح اللي صار و التقرير عند الشيخ اللي كتباته الدكتورة
وصبى الدكتور علاء شرح الموضوع بطريقة طبية ساهلة بيش يفهمو عليه ورغم ان الموضوع كان محرج ليا قدام عمامي ورجالة كبار واجد لكن هذا حق بنتي مستحيل نسيبه وخانتني دمعة مسحتها بسرعة بيدي وبعد ماكمل علاء كلامه
الشيخ .. شنو ردك يا رواد
رواد بوجع .. ماقالوش حاجة غلط كله صار ونا محقوق والحق اللي يبوه انديره
الشيخ .. شنو يا احمد تبي
انا.. مانبي شئ غير انه يعتذر ليها قدام ناسي اللي معاي كلهم ويطلقها
رواد.. مستعد نبوس رجليها مش نعتذر بســ
ولما سمعت كلمة رواد الحق تاثرت لان صعبة على راجل يقول كلمة زي هذي قدام الجمع هضا كله الا فعلا يحب وحاسس بالندم
انا.. مش لهدرجة الاعتذار سادنا والطلاق
رواد قطع كلامي بوجع .. الا هذي يا احمد الطلاق لا
انا والتفت جيهة الشيخ .. ونحن مصرين عليه
رواد للشيخ .. مستعد اندير اي شئ لكن طلاق لا
الشيخ .. بس هيا ماتبيكش
رواد.. هيا تو مجروحة وخلو الايام اداوي الجروح ويكون الباب موارب انها ترجع ليا لكن اني نطلقها ونقطع اي امل يرجعها ليا لا
انا بتنهيدة .. مش مهم ياشيخ بس في معلومه انها بتسافر معانا ومش عارفين امتى نرجعو مانبيشي يدير اي مشكلة ليها
رواد بحزن .. مش مهم يا احمد تسافر معاك وين ماتبي المهم طلاق لا
انا.. خلاص مانبي شئ ثاني ياشيخ
الشيخ .. وتو نحكو في حق العرب
الحاج علي عم رواد .. اللي تبوه نحن فيه
الشيخ .. في عرفنا الشرف برقبة والرقبة ديتها 100000 او رد الحق وبما انك يا احمد ضربته وضريته حيكون الحق اخف حيكون اقل من هكي بشوي
الحاج موسى .. ونحن حاضرين
عمي سالم .. تمام ياشيخ ونحن وصلونا الفلوس
الشيخ .. كيف
عمي سالم .. نحن المهم عندنا حق بنتنا المعنوي والاعتذار هو الاهم اما الفلوس مانبو منهن شئ كاننا خذينهم لان جرح بنتنا فلوس الدنيا ماتشفيه
طبعا عمي سالم وعمي محمد متفاهم معاهم على ان اي فلوس يرفضوها
الحاج موسى .. بس هضا حقها وهضا حق العرب اللي طلبتوه
عمي محمد.. نحن طلبنا حق العرب لرد اعتبار بنتنا بالدرجة الاولى للناس اللي شافتها وهي مضروبة وجاية للمصحة ثاني يوم زواجها اللي تناقلت سمعتها الناس اللي مستحيل تصدق ان راجلها ضاربها ثاني يوم عرسها بسبب لحظة جهل منه هو هذا المهم عندنا ان الناس تعرف ان بنتنا نظيفة من تهمة هيا بريئة منها وحق العرب اليوم اكبر اثبات على هكي يا حاج موسى مش الفلوس اللي كنا نبوهن ولو بنتنا يهونن عليها الفلوس لدفعانكم اللي تحتكم وفوقكم
الشيخ .. خلاص تم الكلام وتو بعد ماتطلعو يمشي معاكم رواد وهله ويعتذر منها قدام الكل
الحاج موسى .. تم يا شيخ
الحاج علي .. هيا تفضلو عشان يكون الصلح بالعيش والملح بينا
أنت تقرأ
الجزء الاول من (سلسلة أقرباء ولكن ) بنت عمي 💙(منقوله )
Romanceلمحة من ورواية كل علاقة ليها عمقها واخطائها وحسناتها وحتى حزنها وفرحها لكن علاقتي ببنت عمي علاقة من نوع ثاني مانقدرش نعطي ليها اي اسم او اني نقدر نعطيها وصف يناسبها #حياة منقووووولة 💙
