Badtameez

Chapter 1

" Allah hu Akbar Allah hu Akbar "

Moizn bohot hi pyari awaz main azaan de raha tha.... Uski dil main utar jane wali awaz uske kanon main gunj rahi thi.... Woh pareshan hogayi ke azaan kahan ho rahi hai.... Aur... Aur woh larka kahan gayab hogaya jo thori der pehle roo raha tha... Woh junjhla kar uth bethi.... Uski sans phool rahi thi... Raat ki tareeki main khuli khirki se halki halki roshni namudaar ho rahi thi... Azaan apne urooj par thi

" La ilaha il Allah "

Akhri kalme ke baad azan khatam hogayi lekin baki masjidon se azaan ki awazein ana shuru hogayin.... Woh humesha ki tarah ajj bhi pehli azaan par uth gayi thi... Usne apne apko pur sakoon kiya aur phir namaz parhne ke liye khari hogayi... Wazu karne ke baad usne jan-e-maaz bichai aur niyat kar ke 2 rakat sunnat ada karne lagi... Phir 2 rakat farz aur salam pher kar apne rab ke age hath phela diye...

" Ya allah mujhe nahi maloom ke woh kon hai... Lekin uska rona mujhse bardasht nahi hota... Woh jo bhi hai.... Use jo bhi takleef hai... Use door karde... Uske naseeb main khushyan bhar de.... Ya phir.... Ya phir uss khwab ko dikhana khatm karde... Ya mere Allah woh khwab mujhe na aya kare... Mujhe uss khwab se wehshat hoti hai...."

Uski ankon main ansu the.... Uss shaks ki wajah se jise woh janti tak na thi.... Uss khwab wale larke ke liye.... Kyunke woh itni hi hassas thi... Bilkul 5 saal ke chote bachon ki tarah jo kisi kabutar ke marne par bhi roo roo kar tabyat kharab kar lete hain... Zindagi ki talkhiyon se koson dur kisi paryon ki dunya main rehne wali... Jahan sirif khushyan... khushyan aur bas khushyan hoti hain... Khwabon ki dunya... Asli dunya se bohot door... Uski family uske liye sab kuch thi... Uski zindagi apni family se shuru hoti thi aur apni family par hi aakar khatam hojati thi... Uske bohot sare dost the... Use chahne wale... Usse pyar karne wale.. Uska khayal rakhne wale... Har jagah mojood the... Apne ma baap ki akloti aulaad hone ki wajah se woh unki ladli thi... Aur apne donon chacha ki ankhon ka tara thi... Apne sabhi cousins main bhi use sab se zyada ehmiat hasil thi... Par kyun? Iss baat ki use fikar nahi thi... woh to bas jo milta gaya sament ti gayi...

Achanak darwaze par dastak hui... Usne foran apni ankhon se ansu saaf kiye aur jane maaz utha kar rakhi... Phir darwaza khola... Darwaze par dadi khari hui thin... Dadi use dekh kar thora sa pareshan huin...

" Mahi... Meri jaan... Tum roo rahi thi?" Dadi ne bohot pyar se uska chehra apne hathon ki pyali main liya..
" Nahi dadi..."
" Kya matlab?... Tumhe pata hai na ke tum se jhoot nahi bola jata... Chalo shabash batao kya hua?..." Dadi use lekar kamre ke andar aa gayin... Woh use fajr ke liye jagane ayi thin lekin hisbe mamool ki tarah ajj bhi woh namaz parh chuki thi...

" Meri jaan ko kis ne dukh diya..." Dadi ke chehre par pareshani saaf nazar aa rahi thi... Woh to kya koi bhi use rote hue dekhta to pareshan hojata tha... Woh bohot kam roti thi... Aur roti bhi kyun... Woh to ek sukhi shehzadi thi... Uska kaam to muskurana tha... Khilkhilana tha... Chehek chehek kar iss talkh dunya ko batana tha ke dekho... Dekho... Main hun khushyon ki shehzadi... Baharein mere dam se hain... Main khwabon ki shehzadi hun... Aur parinde mere dost hain... Mein hansti hun to ye sansaar hansta hai... Agar befikri ka koi chehra hai to woh main hun... Har gham... Har dukh se anjan... Har fikr se befikr... Bhala woh kese dukhi hosakti hai...

" Dadi... Mujhe woh khwab dubara aya tha..." Bohot hi masumiat se kaha gaya fikra dadi ko pareshan karne ke liye kafi tha...
" Mere chanda, konsa khwab?" Dadi ne bohot pyar se magar pareshani se poocha..
" Kuch nahi dadi?" Usne jese baat ko talna chaha... Magar dadi phir dadi thin.. Poori baat ki teh tak pohonchna unko ata tha...
" Batao kya dekha tumne?"
" Kuch nahi dadi..." Woh sar aur nazrein jhukae dadi ke samne bethi abhi bhi khwab ke mutalik soch rahi thi....
" Bari hogayi ho... Batein chupane lagi ho..." Dadi ne kafi sanjeedgi se kaha... Aur bas... Dadi ka ye andaz use acha nahi laga... Woh foran boli...
" Nahi dadi... Esi baat nahi hai..." Uski ankhon se pareshani saaf jhalak rahi thi...
" To kesi baat hai?..." Dadi ka andaz zara bhi nahi badla tha...
" Dadi app khafa na hon... Main apko batati hun..." Usne dadi ka hath apne hath main le liya aur unhe apna khwab batane lagi... Dadi bhi gor se sunne lagin...