مش حاسس بشي ماني نرى في شي نمشي نتحسس في الحيط بش نعرف الثنية سقايا معادش هازتني نشم و نطعم كان في الدم و ماني نسمع في حتى صوت لا كراهب لا خطاوي عباد معناها البلاص الي اني فيها فارغة خطوة ورىء خطوة منعرش مزلنا في الليل و إلا جاء النهار محسيت بروحي كان تعثرت في القاع ة الدنيا دارت بيا غمضت عينيا لحضة هكا و لا هكا أني منراش اما حركة لا إرادية ستانس في لحضتة التعب و الخوف نغمض عينيا بش نهرب من الوقع اما توى نعطي عمري بش نرى هكي اللحضة الإلي خايف منها و كيما يقولو الحاجة ماتعرف قيمتها كان كي تخسرها ....وأني غارق في بحر همومي خرجتني ريحت برفان بنينة و صوت خطوات قعد تقرب فيسع و صوت نفس و عبد يلهث حسيح بيد مستني و صوت شكون يكلم فيا
"لباس ..تسمع فيا " صوت طفلة
منجمتش نجاوبها معادش عندي قوة بش نتحرك نحس في خلايقي دايرة نسمع فاها تمت
"ياربي شبيه هذا .. شبش نعملو ..و شبيه مدمدم هكا ..زعما نكلم البوليسية "
كي سمعت بوليسية شديتها من يدها الي حاطتها عليا وحركت راسي بالسيف بمعنى لا و رتحت كي سمعتها تمتم مرى أخرى
" بوليسية لا زاد .. بربي شبش نعمل "
و بعد قوات في صوتها على أساس مكنتش نسمع فاها
" باهي تنجم تقوم معايا شوية أني هو بش نحاول نهزك و إنتي عاوني ...." ومغير مستنات نجاوبها بدات تحرك فيا حطت إيدي على كتفها و وقفتني حسيت باها وهي بجنبي بدن صغير مفهمتش منين جابت القوة بش تهز بدني لكل
بدينا نتحركو منيش عارف وين هازتني بعد ما مشينا شويا نسمع في صوت خطوات أخرين وبعد كلي دخلنا لبلاص و حطتني على كرسي و سمعت خطواتها تبعد هه بالطبيعة عندها الحق طفلة و لقات عبد ملوح بكل دم في الشارع عنها لحق تهرب تتسما عملت اكثر من اللازم كي قومتي و دخلتني للبلاص هاذي الي ضهرلي فاها قهوة من ريحتها على غفلة حسيت بحاجة مبلولة على وجهي و ايد هازتلي راسي لفوق و حد يمسحلي فالدم و بعد شميت ريحت الألكول و حسيت لحراق على الجروح الي في وجهي و سمعت صوتها مرة أخرى
" و الله ماني عارف فاش نعمل ....كان تراني أمي نعقم في جروح تع واحد قيتو مطيش فالشارع الي مطيشني كيفو"
رغم الوجيع الي حاسس بها تبسمت منغير منشعر
"هو يتبسم هذا ... يطلعشي عامل الخير في دنيتو و قاعد يتبسم لعزرايل "
سمعت صوت خطوات أخرين وراها و بد صوت راجل
"مدام هاو تحل التليفون "
"مرسي عليك تعبتك معايا "
" فماش حتى مشكلة ..نشالله لباس لخوك و قلو معاش يدخل في عرك "
" إنشالله"
بعد سمعت خطواتو قاعدة تبعد و فهمت ألي هي كذبت عليه و قتلو الي أنا خوها و عامل عركة
حسيت بيها قربتلي و حطتت ايدها على كتفي
" شكون نكلملك ...عندك أكثر من 30 ابال و ميساج اما منتصوركش حاشتك بيهم مدام مجوبتش عليهم ..لحضة هو هذا اخر نومرو انتي كلمتو أحمد نكلمهولك "
حركت راسي بش نجاربها نسمع فاها بدات تحكي سيي ها الطفلة تسإل أما تعمل إلي في راسها
" وي لا منيش هو .." و بعد صوتها بعد و معادش نسمع فاها
رجعت بعد شوية و حطتلي التاليفون في جيبي ..معرفتش وقتاش هزتو ممكن وقتلي وقفتني
سمعت صوت عبد يجري و بعد صوت أاحمد "أسامة تسمع فيا ...قوم معيا عيش خويا ..بربي علاش عاملت في روحك هكا "
وقفني و مشاني للكرهبة و أحنا خارجين سمعتو يكلم في الطفلة " مرسي عليك اختي "
"معملت شي .. نشاالله لباس "
و أول محطني فالكرهبة سلمت
