لولآ الغرام

البارت_19_

مهرة
سحبني من ايدي عالغرفه وانا ميتي خوف دغشع اش اعملتو وهو هاكذ عصبي فتنا عالغرفه دفعني عالباب وصاغ قدامي وانا ميتي خوف وخجل صاغ قريب فغد مرة وعيحكي بعصبيه مامنتبه على نفسو واني اغيدو بس يخلص ويغوح بالزور فهمتو انو مايغيد اطلع قدام ابن عمو قتولو اي وفتح الباب ونزلنا
وانا عدفكر هذا بينو انفصام بالشخصيه اش علينو منو
هو عيغاغ عليي لو هاكذ بس لان يضوج من ابن عمو بعدين قلتو بقلبي لا ايما يغاغ هوا ليش معبرني ديغاغ
نزلتو والبنات كرايبو سمموني بحكيهم وانا سيكتي فاتت سارة سمعتم
سارة : حبايبي الي عنده اعتراض على زواج نزهان لو على زوجته يحجي كدامه مو كدام زوجته
مهرة تعاي وياي
تمنيتو من الله سارة تحكي معاهم وهم مليح حكت هيم نخرسو ولا طلع نفس منم وانا قمتو طلعتو معاها
سارة : لج مهرة شلون تسكتيلهم متكدرين تردين صيحيني وانا اعرف شلون اسكتهم
ولا تزعلين من حجيهم هم مغثوثين شلون تركهم كلهم واخذج
لليل جا نزهان شويه واخذتو سارة بصفحه
انا ما ابالي دتحكيلو السالفه مال اليوم اغشع طلع انا قيعدي يم امو وبينا شويه مجال
جا ديقعد
نزهان : شو بالله سوولي مجال خل اكعد بين عزيزات كليبي
عمة نزهان : ها ولك بعتنا كلنا وماكو بس اثنين
نزهان : والله يعمه ماكدر اجذب انا هذول تختلف معزتهم غير امي الجنه مالتي
عمه نزهان : ومريتك شنو اذا امك الجنه
نزهان : لا هاي تختلف هي الروح
جدة نزهان : ها ولك اخذت عكلك شو تسودنت
يمه
..
مهرة
هيم يحكون وانا متو من الخجل اشبينو هذا اليوم ماطقتو بعد اضل قيعدي وهيم يحكون هكذ
دقوم  اغشع صاح نزهان
نزهان : ها وين
مهرة : دقوم مع البنات
اغشع حكت عمه نزهان الكبيغه تموت مني : ادري على شنو ماخذها شو كلشي متفهم من حجيها
نزهان : يعمه شلون ما افهم غير حفظت كلامها كلمه كلمه هو انا شعندي غيرها اهي حرمة الشيخ نزهان
عمتو : والله يمه متلوكلك هيج وحده
نزهان : عمه لهنا وبس لحد يتدنى صوب حرمتي عمتي على عيني وراسي بس ما اسمح لأحد ينزل من مقامها والكل يسمعني الي يحجي وياها ويأذيها حسابه ويايه
..
مهرة
قيعدي والدمعه بعيني بالف زور ميسكه نفسي شيورتونو وانا ميتي خجل قدامم بس اش اعمل لا اطيق اضل قيعدي ولا اطيق اقوم اكيد ديرجعني
مهرة : نزهان حباب خلي اقوم اختنقتو الله يخليك
نزهان : كعدي معليج بأحد
مهرة : بس اتنفس والله اختنقتو
نزهان : كومي ورجعي لتتأخرين
قمتو وانا مخنوقه اغيد بس ارتاح واتنفس والدمعه بعيني بسرعه طلعتو عالغرفه فتو وقفلتو الباب ووقعت دموعي
ياربي تعبتو انا ماعدطيق اتعايش معاهم مايحبوني كلم معغف اش بيهم معاي حيسديني علينو وهو اربعه وعشرين ساعه عصبي لو ياخذونو ديعغفون
بكيتو شويه وارتاحيتو قمتو عدلتو وجي ونزلتو تقريبا كن غاحو كن ضل بس عمين من عمامو فتو عالمطبخ واغشع انفتح الباب وفات ويحد دحقتو هذا الي حذرني منو نزهان انداغيتو دطلع اغشع قام يصفر
نكردنا معغف وين اغوح من الخوف نثولتو تيهتو الطريق وهو معغف اش عيحكي
طلعتو سريع عالغرفه وانا اغيد ابكي اش هل يوم واش هل مواقف ياربي هسه اش اعمل لا اطيق اخبي على نزهان هاكذ صاغ ولا اطيق احكي اخر شي جا ببالي احكي لسارة وهي تقلي اش اعمل
نزلتو صحتوها وطلعتو جت عليي
سارة : ها ولج مهرة شبي وجهج اصفر
مهرة : سارة ماكو غيغكي معغف اش اعمل
سارة : شكو ولج شبيج لتخوفيني شصاير
مهرة : ولي الصبح حذرني نزهان من هذا ابن عمكي معغف اش اسمو
سارة : اي
مهرة : وهسه انا بالمطبخ هو فات عالمطبخ وقام يصفر ويتحارش ويقول منو هالحلوة ومعغف ايش والله طلعتو عالسريع بس هو ضل يحكي
سارة : صخام الصخمنا وهذا فهيد ولا يكعد
مهرة : ولي سارة اش اعمل
سارة : لتسوين شي انا اتصرف
مهرة : وي خيفي من نزهان اش ديعمل
سارة : معليج ميسوي شي هو الي دخل عالمطبخ مجنتي تعرفين
مهرة : حبابه سارة لا تقليلو
سارة : لا ولج شلون ما اكله غير يكسر راسي وراسج
هو راح يتصرف انتي معليج احنا العلينا نبلغه وهو راح يتصرف
خل اخبره يصعد فوك ونشوف
مهرة : انتي تحكيلو انا انزل
سارة : انا احجي فهمناها بس لتنزلين ابقي كاعده هسه مو يكول ليش اجيتي بوحدج وشمعنى ماتحجي هي وياي ولك لتصيرين ثوله وتصرفين بثول وتخسري
اكسبي ولج والله مو لان اخوي بس متلكين مثله شفتي شلون دافعلج كدامهم بس كتله حجو وياج وضوجوج
مهرة : انتي قتيلو
سارة : اي كتله مشفتي شلون حجا وياج
حتى يقهرهم
مهرة : غشعتو بس وي دحقي هليوم ثاني مصيبه من وغاي نفجعنا هسه يقتلني
سترة : وانتي شعليج بس سكتي خل اخابر
سارة : الو نزهان وينك
نزهان : هلا جوا
سارة : نزهان بس اطلع فوك شويه ولتبين كدام احد
نزهان : اي زين مع السلامه
سدو وشويه وطلع
نزهان بشك : شكو شصاير
سارة : نزهان ححجيلك بس لتعصب اهدا واسمعني
نزهان : شكو شبيكم شصاير
سارة : شوف فهد متحارش بمهرة
نزهان : شنوووووو شتحجون شنو متحارش بمهرة
سارة : نزهان بس اهدا لتعصب وتصيح
نزهان : سارة لتكفريني شنو اهدا وانتي الثانيه
شلون تحارش بيج وبين شافج
مهرة بخوف : والله كنتو بالمطبخ عدشتغل وهو فات وبسرعه طلعتو بس هو كان عيحكي وانا طلعتو
نزهان بحده : شسوا وشحجا وياج 
مهرة : من فات غشعني قام يصفر بس عدطلع سمعتو عيقول منو هالحلوة والله طلعتو ركض انا ماعليي
نزهان وهو يحاول يهدا : رجلج تعتب باب الغرفه اكسرها فهمتيني
سارة : نزهان شعليها هي خطيه
نزهان : فهمتي كلامي
مهرة ودموعها تنزل : اي
..
نزهان
حذرتها من فهد ونزلت طلعت للمضيف لليل دخلت وسارة حجتلي شلون مسمعين مهرة حجي وغاثيها وحاجين عليها وعلى اساس بنت الموصل ومسويتله عمل او صاير بينهم شي وهيج ماخذها سكيتي
كتلها تركيهم انا اتصرف  دخلت كعدت وبدو يحجون وعمتي الجبيرة معاجبتها مهرة كلش مادري شبيها وياها حجيت وياهم وحذرتهم
شاورتني مهرة وطلعت ورا ساعه تقريبا خابرت سارة طلعت وشكلهم ميبشر بالخير وجهم بكول اكو مصيبه جديده
حجولي على فهد وانا اعصابي فارت عيوني صارت بكصتي من العصبيه اريد بس امسكه الهل قليل الغيرة هذ شكد سكط وميستحي على نفسه والله حرت شسويله وشتصرف معا
وصلت ويا يتحارش بمرتي بيتي
نزلت وانا اتمنه المحا الا اكسره والي خلقه
طلعت برا واكف بالكراج
سحلته من ياخته لورا البيت
فهد : شبيك وياي نزهان شكو
نزهان : ولك عار تتحارش بمرتي بيتي
فهد : جذابه متحارشت بيها جذابه
نزهان وهو يضريه يدميه : ولك عار شكد اكول احجي ويا بلكي ينعدل مراح تنعدل ذيل الجلب يضل اعوج
بقى يضرب بي دماه وبعدها كام جاب مي ذبه علي وكله هسه ادخلك وتكول اجو جماعه ضربوني ملثمين معرفتهم واذا كالو عندك عداوة او شي كللهم لا معرف معندي عداوة وي احد وتسد الموضوع لو وحك رب الكعبه يا فهد جيله براسك واخلص منك ومن هل مشاكل ابن عم هيج ما بلازم واحد سكط مثلك بالناقص منه
دخلته والكل انصدم
كتلهم مادري جماعه ذبو وراحو وهو كللهم اخذوني منا من كدام الباب ودوني لساحه مشفت شي منهم ملثمين بقو يسئلون وانا واكف بصفحه اريد لشرب من دمه بعد مشفى غليلي منهم
كعدت امه تعقمله جروحه انا خليت وطلعت للديوان
لليل كلش دخلت داطلع للغرفه واسمع حس بجي ووحده تدعي تقربت الصوت من غرفتي صوت مهرة دتبجي وتحجي
الصراحه نقهرت كلش عليها فعلا دتنظلم هوايه بس شسوي مو بيدي الي جاي يصير
يعني انا للمرة الثانيه تصيرلي مصايب من وراها احذرها من شغله وترجع تسويها شسويلها مادري
اليوم كتلها لتطلعين كدامه ادري جانت بالمطبخ بس اعصابي مكدرت امسكها من دريت متحارش بيها
والله لوما عمي وكف بعيني جان حطيتلي طلقه براسه
نزلت جوا وانا افكر ليش داسوي كل هذا وانا ما حبها لعد على شنو هيج اتعصب
معقوله هيج بس لان حرمتي عالورق
بس لو حرمتي بس عالورق جان مهتميت تحجي وي زوج اختها والا فهد يحجي وياها شعليه
بقت الافكار توديني وتجيبني وانا افكر معقوله حبيتها بهل سرعه
والا شنو السالفه

 
...

عٌيِّنِأّګ مَصٌدِر طّمَئنِيِّنِتّيِّ  🌸

مساء الورد مشتاقتلكم حبايبي🍁
البارت اليوم لان خلصت دراستي من وكت
ولخاطر كل متابعه طلبت اكمل القصه
والله جاي احاول اكتب واتمنى تعذروني كلش والله وقت مابيدي وكل ما اخلص دراستي من وكت والا عندي وقت فراغ ححاول اكتبلكم
احبكم كلش ❤