أعـــد لــــي حيــــاتي

البارت التاسع

بقيت واگفة وصافنة واني اشوف خوات غيث لكبار بالباب

طلعتلهم ماما ورحبت بيهم بس ما قبلن يدخلن وبقن واكفات بالباب

بقيت اني واكفة اباب الهول واباوع بدون لا يشوفوني
واسمع حجيهم

ماجدة: تفضلوا بناتي امر خدمة

_ سلامتج خالة بس احنه اجيناج بموضوع وندري بيج مثقفة وواعية وراح تفتهمينه

ماجدة:اي ماما تفضلي

_ خاله فدوة اروحلج خلي سرى تبتعد عن غيث ..غيث اخونه الوحيد وما نريد احد يحجي عليه بالمو زينة وانتو هم جيرانه وسرى صديقة اختنه وهم مو سهلة علينه احد يحجي عليهه

اشوف ماما بقت صافنة وماتعرف شنو ترد

حجت اخته الثانية
_ احنه ماندري اذا جنتي ع علم بعلاقة غيث وسرى لو لا واحنه ما جايين لا نشهر بيها ولا نريد نفضحها كدامج لأن سرى بنية ونعم التربية بس يا خاله السالفة صار عليها حجي هواي والمثل يكول الباب اليجيك منه ريح سده واستريح

ماجدة:يصير خير انشالله

طبكت ماما الباب بوجهم قبل لا تسمع ردهم ودخلت للبيت

لاكتني يم الباب خزرتني وعيونها حمره من الغضب

ماجدة: تعاليلي للغرفة

رحت وراهه بدون لا احجي شي
دخلت وسديت الباب وماحسيت غير ع الراشدي الي نزل ع خدي

ماجدة:ادبسز هاي اخرة تربيتي ..احنه ربيناج هيج ...احجي

بقيت ابجي وما حجيت ولا كلمة

ماجدة:ولج احجي جاوبي..ليش هيج تسوين بينه ليش هاي جزاتنه اني وابوج تنزلين راسنه بالكاع...ولج مرة شكبرني سكتني ماعرفت شجاوبهن والفضل يرجع الج ست سرى ارتاحي سويتينه سيرة ع كل السان

حجيت من بين دموعي: ماما

ماجدة: بسسسس...انجبي ولا كلمة ماريد اسمع شي منج خلي يجي ابوج اشوفه حتى يستعجل عماد ياخذج وافتك منج ومن بلاويج

عافتني وطلعت من الغرفة وكعدت بالكاع ابجي بحركة

ليش هيج دا يصير بيه ولله العظيم اني ما مسويه شي ولا رايدة شي غير ارتاح بس

طلعت رحت يم بيبي وبعد ما رجعت البيتنه ابد ولا شفت احد ولا احد شافني

ما طلعت الا ثاني يوم جنت امشي رايحة البيتنه وجان اشوف دعاء واكفة بالحديقة ويه عماد ويسولفون

عفتهم ودخلت البيتنه
لكيت عمتي فاطمة وماما وبابا كاعدين بالهول يسولفون

سلمت ودخلت الغرفتنه قبل لا يجي عماد

كعدت ادرس اني وغسق ورسل واكفة كدام لمراية تعدل بنفسها

سمعت صوت عماد دخل وركضت طلعت من الغرفة وسدت الباب