قاعده في بداااايه الممر الفي البلكونه بغني ومبسوووطه ومديه الدنيا شلوت فجأه سمعت محمد اخوي بقول نزليهو انتي لازم تنزلي نحنا مش عاملين حسابنا انو ما تحصل غلطه زي دي انا عارفها صعبه عليك بس انا ما في ايدي شي اعملو ليك ي بت الناس انتي لازم تنزليهو مسكت راسي من الوجع ليه كده معقوله محمد اخوي بخون ريهام اصلو ما بصدق مرتو المسكينه دي بتحبو اكترر من الدنيا وما فيها دي جزاتها يعني انو تتخان بس محمد هو كمان بحبها ليه عمل فيها كده قلبي وجعني شديد طوالي ظهرت ليهو
انا: ليه يا محمد مش حرام عليك ربنا بسألك لمن عاينت في عيونو شفت دموع استغربت شديد
محمد: ريهام حامل يا أمل
انا: الف الف الف مبروك حبيبي انا دا الحلم الانتو مستنينو ليكم سنه كامله طيب ليه بتقول ليها نزليهو
محمد: لانو خطر عل حياتها الحمل دا وهي مصره تجيب لي جنى وهي عندي اغلى من اي شي انا ما عايزو مدام ممكن يأثر عليها يا أمل اغنعيها معاي
انا: يعني هي مالها يأثر عليها في شنو بس ما تخوفني عليها عليك الله يا محمد
محمد: قبل اربعه شهور ريهام كانت مصره نمشي الدكتور نشوف تأخير الخلفه دا سببو شنو ومن حبي فيها ما حبيت اكسر بخاطرها سقتها الدكتور والحمد لله اني سقتها يا امل الحمد لله
انا: طيب هسي وريني المشكله شنوو بالظبط ليه خايف كده انت يعني ما عندها علاج
محمد: هي عندها ورم حميد في الرحم والورم دا متفشي في الرحم وصعب يشيلوهو الا يشيلو الرحم كلو وهي قعدت تبكي واصرت انو مستحيل تشيل الرحم بتاعها والحمل خطر عليها بس في دكتور شاطر هو الوحيد الممكن يخاطر ويعمل العمليه دي وهو مسافر عندو مؤتمر عملي في باريس وبجي بعد شهرر ونحنا كنا مستنين انو الدكتور دا يجي بقينا بنستخدم طرق الحمايه عشان ما يحصل حمل بس حصل يا أمل حصل وريهام مصره تحتفظ بيهو حتى لو حيأدي لموتها وانا ما لي غنى عنها اعمل شنوو بس وريني
انا : (دموعي في وشي) طيب ليه ما وريتنا من بدري يا محمد ليه بس حرام عليك انت ما عارف ريهام بتعني لي شنو يا الله والله حرام شايله الحمل التقيل دا طول الكم شهرر الفاتو وانا اقول ليه عل طول سرحانه ومتوتره
محمد: امي يا امل السبب امي انتي شايفه امي معاملتها بدون سبب مع ريهام ما كويسه وريهام لو ما بت ناس وبتحبني ما بتستحمل العيشه الفقر المعيشاها ليها امي دي وهسي لو كان امي عرفت انو عندها مشكله وعدم خلفتنا دا منها حتسمعها مليون كلمه فارغه وممكن تقول لي عرس غيرها وانا غير ريهام ما عايز يا امل وانتي عارفه يعني شنو ريهام بالنسبه لي عارفه وقفتها جمبي وعارفه حبها لي انا ما بقدر ابعد عنها او اخسرها لاي سبب كان ودموعو نزلت
انا: استهدى بالله يا محمد ووالله كلو لي خير بس انت خلي ثقتك في ربك كبيره وانا بتكلم مع ريهام وبحاول اقنعها ان شاء الله بس انت ما تشيل هم
محمد: اي عليك الله يا امل اقنعيها اقنعيها ما داير اضيعها من ايدي ما عندي غيرها في دنيتي
ضميت محمد علي وبقت دموعنا نحنا الاتنين نازله اصلوو ريهام دي غاليه علينا شديد لمن محمد خطبها انا كنت لسه في تانيه جامعه كانت خطيبتو تلاته سنين ونص حتى اتزوجها وفي السنين دي بقت لي اكترر من الاخت والصحبه وبالرغم من انو امي ما كانت راضيه وما عاجباها ريهام وحاولت كتير تخرب ليهم العرس وتقول لمحمد مالك بتقعد باير راجيها لمن تخلص جامعتها وكده الا انو ربنا اراد ومحمد كان بحبها شديد وعرسهم تم علي خير بعد تخريجي بشهرين ومن جات سكنت معانا امي معادياها سنه كامله ومشغلاها ليهم شديد لانها للان ما حملت بس ريهام عمرها ما علت صوتها عل امي ولا سمعتها فارغ وحتى لو حست محمد حيحاول مجرد محاوله يجادل امي ولا يسمعها فارغ هي البتقيف ليهو وتمنعو بالجد ريهام اكترر وحده طيبه وحنينه ومحترمه لاقتني وبالجد دا ابتلاء ليهم وربنا يصبرهم ويقويهم ان شاء الله يلا طبعا ما عرفتكم علينا عرفتو اسمي طبعا واسم اخوي نحنا اتنين بس لامنا وابونا امي اسمها وداد وابوي متولي الحاج بس ربنا يرحمو متوفي من لما كان عمرري ١٢ سنه بس بتذكرو كويس انا كنت بحب ابوي شديد ومتعلقه بيهو اكترر من امي بكتيير اصلو امي بطبعها مرره متسلطه وما بتدور الخمج ما بقول انها ما حنينه وطيبه زي باقي الامهات بس دور التسلط والقسوه طاغي عل حنيتها وطيبتها ابوي هو الكان الحضن الدافي لينا وبعد مات امي شالت المسئوليه بعد ابوي ومشتنا عل الصراط المستقيم نحنا الحمد لله وضعنا المادي كويس شديد ابوي خلا لينا تركه كبيره الحمد لله ومحمد اخوي مسك كل شغل ابوي من بعدو نحنا ساكنين في المنشيه بيتنا تلاته طوابق وعندنا عربيتين وحده حقت محمد والتانيه بسواقها لمشاوير ناس البيت والبشوفنا ويشوف حياتنا يقول نحنا عايشين مبسوطين شديد بس دايما البيوت ليها اسرار ودايما الناس الاغنياء ديل حياتهم بكون فيها فراغ وبكونو وحيدين واختلاطهم بالناس بسيط شديد كل الناس بتحس انو دا تكبر منهم او افترى بس هم من صغار اتعودو عل الوحده او ما عارفه الفهم بالظبط شنو لكن في البعض منهم بالجد بكون انبهار وافتراء بالعيشه العايشنها بس البعض الاخر بكونو بس من صغرهم ما اتعودو عل الناس وما اختلطو بيهم ومستنين ناس يقتحموهم ويغيرو من طباعهم ودا الحصل معاي في الجامعه كنت بعيده كل البعد عن الناس بس ربنا رزقني بأصحاب احمد ومنى اقتحموني واقتحمو حياتي بالجد وملوها سعاده بعيد عن نكد البيت وعن تسلط امي وحسابها لينا في كل تصررف بنتصرفو عشت ايام حلوه شديد في الجامعه وزعلت شديد والله بعد التخررج لانو رجعت للبيت تاني ولي الحياه الروتينيه والممله البنعيشها جوا بيتنا وهسي لي سنه قاعده لاشغله ولاعمله لانو امي رافضه اني اشتغل طبعا انا قريت صيدله واتخرجت بإمتياز بس يا حليلي شهادتي ليها سنه مجدوعه لانو امي رافضه فكره اني اشتغل ونحنا ما محتاجين بتقول دي قله ادب بنات ساي المهم دي حياتنا الاحنا عايشنها كده ملل في ملل وحتى المرقه من البيت الا لي بعض الاهل وبمناسبات يعني حتى تواصلنا مع اهلنا قليل ما نوع الناس البكون كل جمعه مع ناس من اهلهم وفي بينهم ود ومواصله وكده نحنا شبه منقطعين عل طول في بيتنا الا مناسبات البكيات والافراح بنمشي لي اهلنا عندي بت عمي اسمها ايلاف دي فردتي شديد من كل الاسره وانا وهي دايما عل تواصل في الفيس والواتس لمن نتلم في عرس ولا بكاء ما بنتفارق وامي ما عاجبها الوضع دا لانو ما عندي شغله كتيره مع بنات اخواتها وبتقول عل ايلاف قليله ادب فاكه ساي مع انها والله مؤدبه ومحترمه بس اهلها مدينها حريتها وبثقو فيهو وبتتصرف عل كيفها بس كمان في حدود وزوله وناسه وبتاعت فرفشه بس في حدود والله المهم دي صحبتي الوحيده من العايله الكريمه بت حلبيه كده ودمها خفيف نسيت اعرفكم عل شكلي انا بت سمراء سمره فاااتحه كده وعيوني كبااار والبشوفهم بقول مكحلات ما شاء الله وعيوني عسليه زي عيون بابا الله يرحمو وجسمي حلوو شديد وطويله بس ما طول شاذ يعني مع تقسيمه جسمي طولي حلوو شدييد واولاد العايله كلهم مكسرين فيني من ناحيه اهل امي ومن ناحيه اهل ابوي بس انا من صغيره ما بتستهويني العلاقات دي وما بهتم بيها شديد وكنت برفض اي زول يحاول يقررب مني بس برضو بتعامل معاهم كويس يعني برفضهم بأدب وبكون صديقه في نفس الوقت يعني كلهم رسخت ليهم فكره صحبتك حبابك بس حبيبتك ما يلزمني وفي النهايه هم اولاد اهلي ما ممكن اقطع تواصلي معاهم نهائي امي طبعا كانت دايراني لود اختها منى اسمو عمار قاعد في السعوديه بس انا رفضت تماما اصلو انا الود دا ما ارتحت ليهو نهااائي وما بدورو ولا بدور خلقتو مع انو وجيه وسمح عديل لكن قلبي مابيهو عدييل اي نعم امي صعبه بس بالنسبه للزواج دا هي فهما انو نحنا الحنعيش الحياه دي ولازم نكون نحنا متحملين نتيجه قرارنا يعني هي ما عايزه تغصبنا عل شي وتتحمل النتيجه لحياتنا بعدين عايزانا ناخد قرارتنا بنفسنا بس دا ما بمنع انها كأم من الطبيعي ترشح لي كم زول عاجبها وبتتمناهو لي بتها الوحيده وكده اما القرار النهائي فهو برجع لي انا وانا رفضتو طبعا لانو ما قادره احبو او ارتاح ليهو خالص ما علينا غايتو المهم قفلنا السيره دي من فتره وتاني ماف زول فتحها معاي
امي: يا امل يا بت يا أمل انتي وين
انا: اي يا امي دقيقه جاياك
امي: تجيك الكشه لي سنه بكورك ليك يكوركو بي موتك يا قليله الادب سرحانه وين انتي انا اكورك لمن حلقي نشف
انا: ليه بس الدعاوي السمحه دي بالمغارب يا نبع الحنان والله حرام عليك طبعا بقول في الكلام دا تحت تحت لو سمعتني بتفنني بالشبشب اللابساهوو💔😹😹 اي يا امي جيت اها امري يا ست الكل
امي: بلا ست الكل معاك طيري ناس خالتك نجاة سريع جيبي لي منها طقمي بتاعت العشاء جايني ضيوف يتعشو معاي
انا: حاضر بس ضيوف منو يا امي مالك ما وريتيني من الصباح كنت ساعدتك ولا كده
امي : وانتي مالك بتحشري انفك كمان مجبوره انا اوريك اي شي مالك ومالهم ناس بعرفهم انا وجايين يتعشو معاي في بيتي الا استئذن منك يعني
انا: لالا العفو يمى ما كان قصدي كده بس قلت اساعدك لو محتاجه حاجه
امي: كتر خيرك وبارك الله فيك ما محتاجه منك اي حاجه دايره تفضحيني عل اساس بتعرفي تعملي حاجه في المطبخ يعني يا بت ما تطيري من قدامي تجيبي لي الطقم دا سريع وابقي مره اكسري منو واحد عشان اكسر راسك دا ما تشيلي براك خلي واحد من الاولاد يشيل معاك واعملو حسابكم ما يتكسر ولا صحن والله ما اريحك يا امل كان اتكسر واحد بس
انا: طيب حاضر مشيت طلعت غرفتي لبست العبايه ونزلت وانا بطنطن هسي يعني امي دي مالها هايجه فيني كده عملت شنو انا سمعتني طبعا
امي: بتطنطني بتقولي في شنو بطلي طنطنه وحركات بنات قليلات ادب وامشي سريع وتعالي تمشي مكسره
انا سكت ساي ومرقت بيت ناس خالتي نجاه قريب مشيت برجولي دقيت الجرس ما فتحو بسرعه وانا زهجانه وما قادره اقيف جريت سلكه الباب ودخلت لقيت خالتي في المطبخ سلمت عليها وسألتها من البنات فاديه وفدوى وين تومات طبعا بس صغار يداب في تامن طبعا خالتي دي اصغر وحده فيهم قلت ليها ما دايره ازعجهم بكونو بقرو ربنا يوفقهم سلمي لي عليهم
خالتي: الله يسلمك ي اموله اي والله مجتهدات الايام دي امتحاناتهم قرربت تعالي اقعدي النجيب ليك مويه
انا : لالا يا خالتي انا زاتي مستعجله امي قالت ليك دايره طقم العشاء عشان عندها ضيوف جاين يتعشو معاها
خالتي : اي كلمتني والله كنت دايره اخلص حاجه كده واجيها قالت لي تعالي لي
انا: ايواا كويس طيب لكن الضيوف ديل منو يا خالتي انا يداب عرفت هسي وامي ما ورتني
خالتي: ديل صحباتنا من زمان والله افترقنا فتره ما عرفنا عنهم حاجه لقينا وحده منهم في قروب كده ووصلتنا للباقيات وامك عزمتهم يجو يتعشو معاها ونتلاقى تاني
انا: ايوااا كويس والله اها عمر وين عشان يشيل معاي الطقم
خالتي: عمر ماف وانا زاتي خلصت ارح نشيلو سوا ونمشي
انا: تمام احسن حاجه يا خالتو
شلنا الطقم ومشينا البيت انا طلعت غرفتي وخليت امي وخالتي بجهزو في الصفره امي قالت لي كتر خيرك تاني ما دايرين منك اي حاجه امشي غرفتك لمن اناديك تسلمي بس عشان كده طلعت غرفتي رقدت في السرير وانا زعلانه بالجد ليه ماما بتعاملني كده وبتعايرني اني ما بعرف اشتغل في المطبخ وكده ودي مسئوليتها هي انها تحببني في المطبخ وتعلمني ياخ كل ما يكون نفسي اخش المطبخ اساعدها بتقول لي بتبشتني لي ساي طيب انا حاتعلم من منو يعني وكيف اصلا وهي ما بتسمح لي اعمل اي شي في المطبخ يا ررب انا لمتين حأتحمل التعامل دا يعني بس اليوم كلو وكوراك ونبز ودعاوي وكمان ريهام ماف عشان تفرق علي تلاته يوم وانا براي لكن اخير ليها ترتاح عند اهلها شويه مع انو مع الحاصل ليها دا اكيد نفسياتها زي الزفت هسي يا الله محمد بعد فات ليها بكون اغنعها ولا لسه طيب حقو اتصل عليها انا وفعلا اتناولت جوالي واتصلت عليها لما الجرررس كمل ما ردت تاني اتصلت برضو ما ردت قلت بتكون ما سامعه او بتتناقش مع محمد وكده خليها بكره بتصل عليها
حسيت بزهجه شديده قلت اقوم استحمى واغير واشغل اغاني افرق بيها شويه وفعلا دا الحصل وفجأه اسمع ليك امي بتخبط عل الباب يا امل تعالي سلمي قلت ليها حاضر جايه قفلت الاغاني واخدت نفسي ونزلت ليهم تحت كانو سته نسوان ومع امي وخالتي بقو تمنيه قلت ليهم السلام عليكم وبديت اسلم عليهم فردا فردا اول مره سلمت عليها كان اسمها حنان من زحيت منها لحدي ما سلمت عل الباقين هي ما زحت عيونها مني بس سبحان الله نظرتها ما كانت كعبه ما كنت متوتره كانها مراقباني لانها كانت بتعاين لي بعفويه وعيون كلها اعجاب ماما قالت لي ديل صحباتي من زمان شديد الظروف فرقتنا لكن الحمد لله اتلمينا تاني قلت ليها الله يديم جمعتكم بالخير ان شاء الله وتدوم المحبه بينكم ي ماما قالت لي اميين ان شاء الله قعدت معاهم شويه كده لحدي ما اتعشينا مع اني رفضت وقلت ما جعانه بس اصرو علي وخصوصا خالتو حنان قمت قعدت معاهم لكن ما قدرت اكل كتير مع انو الاكل ما لذ وطاب لكن برضو ما عارفه غايتو يمكن عشان ما متعوده عل اللمه مع انو صحبات امي كلهم طيوبات وظراف وشكروني لي امي شديد وعجبتهم كلهم لكن برضو كان في حاجز بينا كده يمكن خجل او احترام بعد العشاء انا طلعت فوق وهم شويه كده وقالو ماشين نزلت ودعتهم وخالتو حنان اصرت عل امي انو لازم نجيهم زياره وماما وعدتها انو في اقررب فرصه حنجيهم وبعدها طلعو فاتو وانا رجعت غرفتي صليت وقريت شويه قرأن ورقدت نمت
يتبع
