مرت سنه والقلب يعشق الكابتن مرت سنه وانا عايشه في سعاده وهنااا مرت سنه والدنيا تضحك لي انااا مرت سنه ويا رب تدووم كل السنين بنفس الهنااا
الليله زكرى زواجنا انا وهمام يعني الليله تمينا سنه بالمختصر المفيد في السنه دي انا عشت احلى ايام حياتي فعلا همام ما دايما جمبي وبغيب مني بالايام وبحس اني فقدت قلبي وروحي فقدت موطني وملاذي وبقيت ضايعه بس لما يرجع بعوضني بحس انو انا ملكت الدنيا والفرحه رجعت لي والدنيا بتضحك لي بحس بالامان
في السنه دي ريهام جابت بنوته حلوه تشبه القمرر سميناها امل الصغيره اي بسس ياهو على اسم عمتها السمحه وهي ما شا۽ الله فايته عمتها سماحه وكمان ايمان اتخطبت لاحمد وعرسها بعد تلاته شهور وايلاف حامل في الشهر السابع كنت بتكلم معاها قبل شويه وقالت البيبي بيتحرك وهي واياد مبسوطين بيهو شديد
في السنه دي انا ما حملت بس لا همام لا خالتو حنان لا عمو ما حصل حسسوني بالنقص ابدا مع انو اهل همام دايما بسٲلوني ما بقيتو تلاته لسه? اينعم الحاجه دي بتزعجني بس همام بقول علي طفلتو وانو ما مستعجل على الموضوع دا ولو ما جبت اولاد ما مشكله انا طفلتو وحبيبتو وكل شي بالنسبه ليهو بس برضو انا متضايقه زي وزي اي وحده نفسي اجيب بيبي يملا علينا حياتنا ونفسي اسكت الناس من الكلام في موضوع خلفتنا الليله لازم اظبط مفاجٲه حلووه لهمام ونحتفل بعيد زواجنا خصوصا انو ليهو اسبوع مسافر ويداب جاء امبارح وهسي طلع رحله صغيره لدبي وحيرجع المساء وخالتو وعمو ماشين ناس اهل عمو محمد عندهم عرس وانا قلت ما ماشه حٲنتظر همام واصلا خالتو حنان متفقه معاي انو انا وهمام نحتفل الليله وقالت حيتٲخرو علشان نكون في البيت برانا بحبها انا المرا دي ياخ بالجد بحسها امي عمرها ما عاملتني كمره ولد محسساني اني بتها بالجد ودايما بتقيف معاي ضد همام مع انو نحنا ما بنتشاكل بس بنتناقش نقاشات خفيفه وبتنتهي بضحكنا على همام انا وخالتو حنان لانو دايما بكون خسران في النهايه وطبيعي في حاله استسلمت خلاص انتو الكسبانين
طبعا جهزت غرفتنا وزينتها وعملت لهمام الاكلات البحبها مكرونه بالبشمل وكفته وسينابون وطلعت استحميت ولبست فستان كبدي مع الركبه وضيييق وفاتح من الصدر على شكل تسبيعه صغيره والباقي على شكل نص القلب الفوق بالجهتين ما فيهو اكمام حلو شديد ومتأكده حيعجب همام لانو هو الجابو لي قبل تلاته شهور في عيد ميلادي وما لبستو ليهو وهسي حبيت البسو ليهو بمناسبه عيد زواجنا الباب بدق شكلو همام جاء ماشه افتح
عاينت بالفتحه بتاعت الباب لقيتو فعلا همام
انا: حبيبي قبل افتح ليك غمض عيونك
همام: لا انتي افتحي الباب وغمضي عيونك
انا: انا قلت اول اذا انا الربحانه
همام: كل مره بخليك تربحي المره دي لا
انا: همام ارجوك حتخرب لي المفاجأه تبعي
همام: طيب دقيقه وراجع
انا: ماشي وين
همام: ماشي اخبي المفاجئه تبعي
انا : طيب
مشى خباها وجاء راجع غمض عيونو وفتحت ليهو وبعد حضنتو وبستو على خدودو غطيت عيونو بإيدي
همام: ما انا اصلا مغمض ليه مغطيه لي عيوني
انا: لسببين علشان حابه اعمل كده وعلشان ما تغش وتعاين
همام: امري على الله
وصلنا الغرفه فوق وانا مغمضه ليهو عيونو قلت ليهو خليك مغمض وانا حازح ايديني قال لي طيب زحيت ايديني ودخلنا الغرفه وطفيت النور وولعت الشموع ووقفت قدامو وقلت ليهو فتح
همام: اوووو دا شنو دا كلو حبيبتي دا شنو القمر دا
انا: اممم خليني انا عاين للغرفه
همام: هو انا قادر اشيل عيوني منك الفستان حياكل منك حته لحظه لحظه
انا: ماشي وين حبيبي
همام: راجع ليك هسي ثواني بس
جاء راجع ماسك ورد وعلبه شكولاته ووعلبه صغيره ما عرفت فيها شنو اداني الورد والشكولاته وفتح العلبه كان فيها سلسل فضه حلووو مكتوب فيهو ملاذي الضائع طبعا لمن شفتو اتخلعت شديد لانو انا مشتريه ليهو ساعه واسوره رجاليه كبيره كده بتاعت فضه منحوت فيها ملاذي الضائع
لبسني ليهو وانا مقهيه فيهو ودموعي جاريه ما عارفه اعبر اقول شنو انا بحبو شديد ياخ لدرجه صعب اوصفها حضنتو وهو كمان ضماني عليهو وباس راسي وقال لي بحبك
انا: وانا كمان بحبك وبموت فيك والله لحظه حبيبي
مشيت جبت الساعه والاسوره لبستهم ليهو وهو اتخلع شديد وقال لي ما ممكن نكون فكرنا في نفس الحاجه قلت ليهو قلوبنا مرتبطه ببعض باسني ومشينا قعدنا في الصفره اتعشينا ونتونس ونضحك وبعد خلصنا مشينا غرفتنا وتمو الباقي خيال وكانت احلى ليله وكنت مشتاقه ليهو شديد وهو مشتاق اكتر كمان صحينا الصباح همام مشى شغلو وانا قعدت انتونس مع خالتو حنان وطبعا شاغلتني بليله امبارح وانا اشيل واتخجل وهي تضحك فيني
