نزلت الشغل بس على حسب ما انا وايمان الاتنين صحبات ايلاف فبقى عندنا مسئوليه جديده غير الشغل نمشي نلف معاها الاسواق والشنطه حقتها وحاجات الحبسه ونزورها وغير كده نجهز نفسنا نحنا زاتنا كلو شهر وحيمر بلمح البصر بصراحه شلت هم للعرس دا وهمي الاكبر كان اني اكيد حألاقي همام فيهو بالتأكيد حيجي لانو اياد شبه صحبو حاليا نسبه لعلاقتو مع احمد وانا ما عايزه اكون مبشتنه وفي نفس الوقت متوتره اني حأتعامل معاه كيف وانا لمن اشوفو كل شي فيني بتجوط وبعملها واضحه ببقى هبله عديل بالجد خايفه من تصرفاتي الهبله قدامو وخايفه زول يلاحظ لي ويشغلوها لي لكن مجبوره طبعا لانو ايلاف اقرب زوله لي المهم ربنا يعديها على خير
غايتو لمن مرا اول اسبوع نحنا ما شاء الله روحنا طلعت من اللف في الاسواق ما خلينا شي ما اشتريناها ليها ومعانا اياد كمان الود لمن لونو غمض من اللف معانا بعدها هي بدت الحبس وقعدت في الدخان ومتابعه مع خبيره والجلسات والحاجات دي ونحنا ماشين وجايين ليها ومرات بنتناوب انا بمشي ليها وايمان تقعد في الصيدليه والعكس والحمد لله الشي الكويسه في بت تالته جات اشتغلت معانا كانت محتاجه للشغل وكده اسمها نهى المهم ما اختلطت معانا شديد بس معظم الوقت هي البتكون شغاله وما شاء الله بت ناس كده بس شكلو ظروفهم حبه تعبانه غايتو زوله هميمه وبشوشه مع الزباين لكن جاده وما بتاعت ونسه وضحك زينا وقت الاستراحه تصلي وتقرأ قرأن وكده متلزمه بالجد زوله كويسه شديد ونحنا مستأمنينها المهم هسي فضل عشره يوم للعرس ونحنا بدينا نفكر في نفسنا يداب اشترينا القماش ومشينا الترزي وكده وبقينا مع الماسكات والحاجات الطبيعيه وبحكم ايلاف بت عمي طبعا امي ما كانت بتقول حاجه لمن امرق معاها وكده وخصوصا انو من جيه ايلاف المستشفى لي ريهام نظرتها لي ايلاف اتغيرت لانها هي الوحيده من بنات العائله الشباب اللي جاتنا ووقفت معانا وكده ودايما بتزورنا وحتى امي مشت ليهم كم مره رغم انها ما كانت بتحب تمشي لناس من اهل ابوي الا بالشديد القوي بس سبحان مغير الاحوال وطبعا ريهام حسب العمليه وكده وانو الحركه صعبه عليها والجرح ما بلتئم سريع وكده فما مشت في الايام الاوله بس ايام العرس قالت بتمشي اكيد
المهم الفتره دي حياتي هاديه خاليه من همام اللي هو الكان حاصل عليه انو رجع للشغل وفي رحلات متواصله وبقى مشغول شديد وعادي ما بجي بيتهم كم يوم ولو جاء بجي كم ساعه وبمشي
بالرغم من عدم ظهورو في وشي وقدامي كان موجود في خيالي على دايما وطول الوقت بفكر فيهو وبكون بعمل في شنو ويا ترى حيجي العرس دا ولا حيكون مشغول ما عارفه نفسي اشوفو ونفسي يجي نفسي يتكلم معاي واسمع صوتو ولو شويه بس حتى لو ما كان الحديث موجه لي المهم اسمع صوتو نفسي اشوفو بيضحك مره تانيه زي لما كان بيضحك مع محمد اخوي وشفت ابتسامتو وسمعت ضحكتو اللهم الثبات انا بالجد ما قادره ابعد المخلوق دا عن خيالي رغم اني ما عارفه اذا هو اساسا مهتم بي او حتى شايفني من الاساس
مرو الايام جري وفضل اربعه يوم للعرس وطبعا إياد عامله تلاته حنات واليوم الرابع الدخله وهنا ايلاف عاملين ليها حنتين حنه بنات بس وحنه للاهل وكده حنه اياد الاوله كانت التلاتاء ودي طبعا مشينا حضرناها انا وايمان وصورناهو لي ايلاف اثناء ما الحفله شغاله ومهججين الناس لمحت زول ابدا ما غريب علي وفجأه حسيت قلبي اتعصر كده وحرقني وهو كان بعاين لي وفي نفس الوقت فرحت لاني طولت ما شفتو رفع لي ايدو وجاء ماشي علي وانا لا اراديا مشيت عليهو ووقفنا الاتنين في نص المسافه مبتسمين بس الاتنين ابتسامتنا كانت باهته اينعم انا عندي سبب يخلي ابتسامتي تبهت بس هو ليه ابتسامتو باهته حسيت بحاجه بتنغزني في صدري لما قال لي امل العسل ازيك مشتاقين يا صحبتي
انا: قصي يا قصي كتير الشوق والله
قصي: كيفك ياخ طولت منك شديد من خلصنا جامعه تاني ما عرفت عنك شي معقوله كده يا اموله
انا: والله يا قصي تلفونو اتسرق وغيرتو وارقامكم راحت مني وكده لكن لو كنت بتحاول في رقمي كنت لقيتو فاتح لاني بعد فتره طلعت بدل فاقد للشريحه حتى منى متواصله معاها ومياده برضو متواصله معاها وخالد الا انت يا سجم الرماد
قصي: حاولت كم مره وبعد داك يئست قلت بتكوني غيرتي الشريحه اخبارك شنو والجابك هنا شنو بتقربي إياد انتي لالا بقرب زوجتو المستقبليه وشبه صديقه ليهو عشان كده جيت حنتو
قصي: كويس والله يا محاسن الصدف
انا: ( مين القال كده الحمد لله على ما اراد الله بس ما كان نفسي ارجع اشوفك ابدا يا قصي ما صدقت اتخطيتك انا يا سبحان الله ما اتغيرت ابدا بس في حاجه غريبه في نظراتك ليه الحزن كاسي عليك ليه باين عليك عقلت يا ربي شنو المأثر فيك معقوله حبيت او اتزوجت )
قصي: سرحانه وين ما عاجباك الصدفه ولا شنو
انا: لالا ابدا ما كده صدفه حلوه بس اتأخرنا وكده ومعاي صحبتي وعايزين نمشي عشان كده عن اذنك
قصي: طيب انا ممكن اوصلكم اصلا انا كمان ماشي وزهجت من الحفله دي استني اودع اياد ونتخارج
انا: لالا ماف داعي بعربيتنا نحنا
قصي: حلو والله طيب يا زوله خير بس اديني رقمك عشان ما يضيع
انا: ( تفتكر انها ناقصاك يا قصي ولا ناقصه اني اتواصل معاك لاقيتك ليه انا ليه بس )
قصي: امل شنو ما عايزه تديني رقمك
انا: لالا ابدا ما كده اكتب عندك
مليتو الرقم وودعتو ومشيت لايمان قلت ليها يلا نمشي ودعنا اياد وطلعنا رجعنا البيت
طبعا رجعنا البيت ورغم التشوش الكنت حاسه بيهو ما كنت حابه ابين شي ولاقينا ايلاف وطبعا كاويناها مكاوه وقلنا ليها اياد كان طالع قرض عديل والحنه دي في يدينو تسو كدي مبالغه والله وجابو فنان كده ما بعرف اسمو لكن كان هجاج رغم اني ما بحب الحفلات لكن كنت مستمتعه بالحفله وايلاف تشيل وتدعي فينا شكيتكم الله الله وانا اشيل واقول ليها والبنات ديل جمبو زي المهلبيه سمحات سماحه وهي اتضايقت عديل وقعدنا نضحك فيها المهم بعد تشغيلات كتيره كده قلنا خلاص ننوم وهم نامو وانا مسافه ما قدرت كنت مشوشه وبقول ليه قصي رجع ظهر في حياتي اكيد حابين تعرفو قصي دا منو قصي دا قرأ معاي في الجامعه وكان من شلتي بس ما كان في قرب شديد بينا وانا كنت معجبه بيهو او كنت بحبو بس هو ما مبادلني الشعور حتى انو مربط وانا كنت متأزمه بسببو بس ما حصل بينت ومع مرور الزمن اتعودت وبقيت ما بتأثر شديد زي الاول ولمن تلفوني اتسرق وارقامهم ضاعت انا كنت حافظه رقمو بس قررت اتخطاهو لانو هو شايف حياتو وفعلا بعد فتره دا الحصل وحسيت اني متخطياهو بس هسي لما شفتو قلبي وجعني وجرحي رجع اتفتح اينعم انا ما حاسه اني بحبو حاليا بس شوفتو رجعت لي كل الزكريات وفتحت جرح ما صدقت دفنتو والشي المضايقاني اني شايفه نظره غريبه في عيونو ما اتعودت اشوفها في قصي الفرفاش بتاع الهظار المهم بتمنى وجودو ما يأثر علي يلا خلاص مش عرفتوهو مفروض انوم بعد دا عشان حنصحى بدري نودي ايلاف الكوفير ونجي نساعد ناس البيت عشان الحنه الاوله حقت الاهل وكده وحتكون في البيت فكان في حاجات كتير علينا نسويها ونجهز الضيافه وكده وانا طبعا معسكره من اسبوع كامل مع ايلاف وامي نهائي ما رفضت حتى بنات عمي احمد مستغربات لانو انا المناسبات بجي مع امي وبعربيتنا وفي الصاله بس ولا مع وقت الحاجه يعني حنه بنجي بعد المغرب كده بعربيتنا نحضرها ونرجع وهكذا يعني كونو انا اكون قاعده اسبوع كامل مع ايلاف الناس دي كلها كانت مستغربه وكونو ماما تجي كم مره قبل العرس كده كانت بالنسبه ليهم مفاجأه وعمو عبدالله ابو ايلاف دا كان مبسوط بي شديد لانو انا بت اخوهو الوحيده يعني وكده وما كنت بجيهم كتير وهم محرومين من ريحه اخوهم الموجوده فينا فما كان مصدق اني طول الشهر دا بجيهم وبكون مع ايلاف طوالي وحتى لمن جبت حاجاتي بدايه الاسبوع وجيت قعدت معاهم بالجد كان فرحان شديد وحتى ام ايلاف كان مبسوطه شديد بينا اصلا هي وامي كانو صحبات بس امي بعد وفاه ابوي قست شويه وتواصلهم قلا وشبه انعدم ولمن امي جات كم مره انبسطت شديد ما علينا نرجع للقصه يلا بنات عمو احمد ديل ما بطيقوني وما بطيقهم هم اتنين وحده اسمها هدى والتانيه هويدا هدى دي الصغيره قدري وهويدا اكبر منها بسنتين لكن ما عندها معاي شغله كده ما احتكينا ببعض بس يعني ما بطيقني برضو حاجه ظاهره كده اما هدى دي فبتكرهني عمى وبتعملها واااضحه وبتحب تسمعني كلام بس دايما انا ما بشتغل بيها والحاجه دي مفوراها شديد مني
صحينا الصباح وقمت صليت وقريت شويه قرأن وحسيت نفسي احسن شربنا الشاي وقعدنا شويه كده نساعد في خالتو وبعد فطرنا مشينا الكوفير ودينا ايلاف وجينا راجعين الظهر كده صلينا وبدينا نجهز في الضيافات البارد والحلويات والفنكوش والبوشار وجهزنا البيت كلو رغم كبرو وبنات عمو احمد مشو الكوفير طبعا الحمل كلو اترمى علي انا وايمان بس نحنا ما بنقصر وكلو عشان لوفتي
المساء كده صلينا المغرب وطوالي بدينا نجهز انا لبست فستان اسود كان حلووو شديد وايمان برضو لبست اسود كنا مطقمين مع بعض وما شاء الله رغم البساطه بتاعتنا حلوين شديد طلعنا وطبعا نحنا الاشتغلنا في التوزيع برضو وخالتو دي حبتنا شديد وقالت لينا الله يخليكم ما قصرتو ابدا لو ما انتو كان حالنا اتشال وعمو عبد الله برضو كان مبسوط شديد مننا ريهام وناس ماما جو وريهام كانت ماسكه ايد محمد وشكلهم مبسوطين شديد بالجد انبسطت لمن شفتهم داخلين مع بعض والناس دي كلها بتعاين ليهم لمن قعدت اقرأ ليهم من العين وخصوصا انو ريهام حلوه شديد وكانت لابسه توب اسود مع لونها وجسمها مزه مزازه لمن بهناك ربنا يحفظهم
ايلاف جات وكان طالعه قوووومر بس ما شاء الله كانت لابسه فستان تفني ساااده بسيييط وانيق ايديه نص كم ورقبه الفستان ما دائريه كانت على شكل تربيعه وفيه كسر كده من الوسط ومن تحت على شكل فستان باربي فاااري وكبير بس ما واصل الارض تلات ارباع ولابسه معاه عقد لؤلؤ على حد رقبتها وحلق لؤلؤ كبير كده ورافعه شعرها كعكه فوضويه كانت بالجد غايه في الجمال والبساطه حلوووه شديد حتى الميك اب هادي
الحفله كانت حلوه شديد واتصورنا معاها كتير وحتيناهو حت مبالغ فيه وبعد انتهت الحفله رفعنا الصور في الاستوري وإياد دا لمن رسلنا ليهو الصور قرب يجن قال ليها ما بعرف بس بعد العرس تاني تلبسي الفستان دا وترجعي بنفس الهيئه وبعمل لينا حفله برانا طبعا موتنا ضحك
رقدنا نمنا وصحينا الصباح والحاجه الكويسه حنه الليله بنات بس وفي الصاله يعني ما حنتعب شديد وحنتفرغ لتجهيز نفسنا
اليوم دا ابدا ابى يمر علي هادئ هدى من صباح الرحمن بتحاول تعكنن فيني وتعلي في صوتها وتعمل حركات حتى لمن مشينا الكوفير هم مشو معانا ومجاكراني في اي حاجه وانا ساكته عشان خاطر ايلاف عندي لو ما كده كنت ربيتها خلصنا حاجاتنا واتحركنا على الصاله كلنا كنا طالعين حلوييين شديد انا كنت لابسه كاجول شديد ردا جينزي معاه تيشيرت رمادي غااامض نص كم ولحدي نص بطني بس وجاكييت جوافي كبيييير وطويل لنهايه رجولي بدون اكمام وعامله كعكه بنص شعري القدام والباقي فاكاهو ولابسه حلقات كباااار كده وميك اب خفيف
وايمان كانت لابسه فتان لحدي الركبه الجزء الفوق ضيق والجزء التحتاني واااسع ولونو اخضر كده غااااامض مع لونها حاجه خراافيه الحفله كلها كانت فساتين معدا انا الكنت كاجول والنصيحه شلت نوره الحفله كلها الا ايلاف طبعا برا الحساب كانت لابسه كبدي فستان كده يعجز الشخص يوصفو المهم بالجد فستان خورااافي لابعد الحدود والغريبه ما كان قصير طويل كان بس قصتو فظييييعه ومع جسمها حاجه عجيبه
رقصنا ما خلينا شي وهدى دي تشيل وتحمر لي بس ما اشتغلت بيها مع انو ناويه بعد العرس اشوف اخرها شنو لكن هسي ما عايزه اعكنن مزاجي اصلا كنت متضايقه انو ريهام ما جات وكده عشان كده ما حأسمح للانسه الكريمه تزيد علي الانا فيهو
خلصت الحفله وكانت المصيبه انو إياد قال نلاقيهو انا وايمان يسلمنا حاجات كانت طالباها منو ايلاف وما لقى طريقه يجيبهم ليها لانو كان موصي واحد صحبو جاء من السفر الليله يداب وحابهم معاه مفروض نمشي نستلمهم نحنا عشان ايلاف ما مفروض تلاقيهو قبل العرس ونحنا مناظرنا لا تسر الناظرين ابدا ابدا بقينا ما عارفين نسوي شنو ايمان قالت لي انا فستاني ما شاذ شديد وتحت الركبه ما مشكله بس برضو ما بمشي برااي تتصرفي تمشي معاي بعد تعب اتذكرت انو انا كنت قبيل لابسه بنطلون جينز قلت حلي الوحيد البسو بس وامشي معاها بس المصيبه انو التيشيرت الكنت لابساهو كان بظهر جزء كبير من البطن وكده اتوكلت في النهايه ولبست البنطلون وحاولت اقفل الجاكيت عشان ما يظهر جزء كبير من جسمي كفايه نص ايديني برا وفكره القى طرحه دي ماف طريقه عديل المهم طلعنا ليهو برا وكده شفنا عربيه اياد اتحركنا عليهو نزل سلم علينا وانا اشيل واجرجر في الجاكيت المهم هو ما ركز بس الغريبه كان معاهو زول جوا العربيه ايمان لمحتو وبقت تكورك همام يا حيوان بتين جيت ليك كم ما راسلتني ياخ السفر قاعد يشيلك مننا شديد والله فتح باب العربيه ونزل وانا خلاااص اتجمدت ما لابسه طرحه وشعري مفكوك ومنظري الحمد لله بس عليه دا غير ايديني البرا ونص جسمي ياخ كرهت اني لبست كاجول من الاساس قلت هسي لو احرمت نفسي ولبست فستنا ما كان احسن
فتح باب العربيه ونزل اول شي عينو وقعت علي وطبعا انا دنقرت ورجعت خطوتين لورا وهو اتفاجئ وبقى يعاين لي مسافه تاني نزل عينو مني وسلم على ايمان وقعدو يتشاغلو مع بعض وانا ما قادره ارفع راسي فجأه حسيت بإيدو بتتمدا لي وانا كنت ماسكه الجاكيت بيدي اليمين فكيتو عشان اسلم عليه وفي اللحظه دي هوا جاء من وين ما عارفه طير الجاكيت بعد ما هو مسك ايدي قام هو جراهو لي ومسكني ليهو في يدي الشمال وفكا يدي احترمت الحاجه العملها شديد وخجلت من موقفي شديد دنقر تحت وقبل على جهه العربيه في الوقت دا اياد كان بطلع في الحاجات من العربيه وايمان كانت بتساعدو هم ما شافو الحصل دا ثبت الجاكيت وضميتو علي بعدها ايمان قالت لي يلا ارح انا شلت الحاجات اتحركت معاها وانا بتحرك بالعافيه وهو واقف وبعاين لينا واحنا ماشين لمن اياد لفتو شنو يا مان ارح بعد دا
همام: يلا اي اصلا انا تعبان ماشي انوم لكن بجيكم بكره من الصباح
اياد: خير يا زول ما بتقصر تب وشكرا على الحاجات تعبتك معاي
همام: لالا ماف مشكله عادي
اتحركو وهمام ما قادر يشيل صورتي من بالو ابدا وكل شويه ببتسم رغم ضيقو اني لابسه كده بس برر لي انو هي حفله بنات واني لمن جيتهم كنت محاوله قدر ما اقدر اخبي نفسي بس الهوا هو الخذلني لما هو سلم علي
اما انا فكنت حاموت من الخحل والموقف البايخ وايمان تشيل وتضحك وقالت لي انتي بالبنطلون خجلتي واتحرجتي كده لو شافك بالردا القبيل تعملي شنو
انا: ايمان اسكتي اختيني عليك الله الفيني مكفيني انا
ايمان: امممم عاد ما حبيب القلب
انا: الحبيب القلب في عينك عشان قلت ليك معجبه بيهو طوالي بقيتيهو حبيب القلب غلطانه انا القلت ليك يا شيخه
ايمان خلاص ما تزعلي بهظر ساي والله
سكت ساي وصلنا البيت القاعده فيهو ايلاف. اديناها الحاجات ورجعنا بيتهم عشان نساعد الناس بكره قبل نمشي لايلاف في الكوافير المهم اول ما وصلنا وختينا راسنا على السرير بعد الصلاه وكده على طول نمنا رغم اني كنت مشوشه شديد خصوصا اني فقدت الامل في انو يجي بس فجأه ظهر قدامي وانا بالمنظر دا بس ما قدرت افكر في الموضوع كتير من التعب نمت على طول
تاني يوم مرا اليوم تمام كلو وهدى وهويدا من الصباح ماف ونحنا كنا شغالين بمزاج وانا مبسوطه لاني اكيد حألاقي همام اليوم وحأشبع من شوفتو خلصنا الحاجات ولحدي بعد الفطور والصلاه بتاعت ظهر الجمعه حتى اتحركنا مشينا لي ايلاف في الكوافير
