مشينا الكوفير وبدينا نجهز من شعر لي ميك اب لرسم لغيرو لحدي بعد المغرب كده حتى خلصنا بعدها مشينا لي ايلاف لانها كانت في غرفه تانيه طبعا ما شاء الله طلعت قووومر والله بالجد حلو شديد وفستانها رهييييب مشينا حضناها وحصناها وانا وايمان كنا الاشبينات بتاعاتها والاتنين لابسين فساتين كبديه كبدي غاااامض بس القصات مختلفه وشايلين ورد ابيض وهي شايله ورد بنفس لون فساتينا ياخ كنا حلوين شديد بعد مسافه كده اتصل اياد وطلعنا ليهو كان معاهو احمد والعربيه التانيه كان فيها همام وقصي وحسام صاحب همام طبعا لمن شفت قصي قلبي بقى يضرب وكمان راكب مع همام في نفس العربيه بالجد كده كتير علي للحظه حسيت اني عايزه اقعد ابكي لمن بقيت برجف من الخلعه الدخلت فيني ايمان حست بي قالت لي في شنو دا كلو علشان شفتي همام سكت ما رديت عليها اصلا ما كنت قادره اتكلم وقصي بعاين لي وعيونو قلوب قلوب وهمام برضو اول مره اشوف النظره دي في عيونو كان بعاين لي بنظره اعجاب ملياانه حب ما كنت قادره اتحرك من نظراتهم لي ايمان جرت بسرعه ركبت قدام جمب احمد واياد وايلاف ركبو ورا يعني انا مفروض اركب مع همام وقصي الحاجه دي خلت دموعي نزلت بس مسحتها بسرعه لمن قصي قال لي يلا يا اموله اتأخرنا اتحركت عليهم والحمد لله همام هو الكان سايق فتحت الباب بتاع العربيه ركبت جمبو من سكات وبقيت بعاين بالشباك وقلبي عايز يقع مني
قصي: صحبتي المزه شديد اعلن انبراشي اقسم بالله
انا: تسلم
عاينت لهمام لقيتو صاري وشو شديد لمن قرب يقع منو بس ما قال حاجه
قصي : صحي يا اموله الليله تدخلي معاي عايز اقشر بيك
همام: انتو بتعرفو بعض ولا شنو
مع كلامو دا انا عاينت ليهو الود لمن سنونو عاصرهم في بعض من الزعل
قصي: اي ياخ معرفه سنين قرينا الجامعه سوا نحنا فرد شديد ياخ ولا شنو يا امل
انا: امممم
همام: ايوااا كويس والله
تاني سكت وما فتح خشمو خالص وقصي يشيل ويتونس معاي هو وحسام وانا برد عليهم بعد تعب بس ملاحظه لحسام كل شويه بعاين لهمام كانو في حاجه وانا اول مره في حياتي اتلخبط كده كنت مفتكره نفسي حأنبسط الليله بس ربنا ما كاتب لي كده احساسي ما بتوصف مستائه شديد بالجد قصي بتعامل معاي بطريقه لما كنت محتاجه التعامل دا منو ما لقيتو وهسي لما قلبي بقى يدق لغيرو جاء ظهر في حياتي ليه ياخ يجي يلخبط كل شي تاني والشخص النا بحبو ما قادره افهم اذا هو ببادلني الشعور ولا لا ما قادره افهمو اااه يا رب الطف
مشينا اتصورنا وطول وقت التصوير انا ما قادره اكون على طبيعتي المهم تاني اتحركنا على الصاله ولما وصلنا العروس والعريس دخلو متماسكين واحمد وايمان نفس الشي والمفروض انا وواحد من التلاته ندخل سوا وعلى حسب كلام قصي هو حيدخل معاي كنت حاسه اعصابي تلفانه همام نزل وجاء فتح لي الباب ومدا لي ايدو قال لي تسمحي لي طبعا اتخلعت بقيت بعاين ليهو اشر لي على احمد وايمان احساس عايز يدخل معاي ما عرفت اقول شنو مديت ليهو ايدي ودخلنا حسيت قصي اتضايق بس اكلها وسكت دخلو هو وحسام بعدنا دخلتنا كانت حلوه شديد والناس دي كلها تصفر ومبسوطه الا انا ما كنت قادره انبسط مع اني كنت حأنبسط لولا وجود قصي قدامي همام كان مبسوط ومبتسم ومن هناك شايفه امي بتعاين لينا وتتبسم ومحمد وريهام وام همام برضو قاعده معاهم في طاولتهم العروس والعريس رقصو اسلو ونحنا كمان رقصنا انا كنت برقص مع همام وخالص ما قدرت اعاين ليهو بس مدنقره
همام: امل في شنو ملاحظ انك ما على بعضك لو على موقف امبارح انسي الموضوع
انا: ماف شي
همام: طيب ليه من ما شفتيني عابسه انبسطي اتثبتسمي لي اقلا شي وما تدنقري كده
عاينت ليهو وابتسمت ورجعت دنقرت سكت خلاني الرقصه انتهت رجعنا لوضعيتنا القبيل ووصلنا العرسان الكوشه بعد قعدو اخدنا كم لقطه معاهم وبعد داك نزلنا منهم وهنا اتفميت منو
همام: يلا نمشي نسلم على ناس امك
انا: طيب
طول الوقت دا قصي مراقب وانا كل ما اعاين ليهو بحس انو في شرار بطاير من عيونو والحاجه دي بتوترني زياده
اتحركنا لمن سلمنا عليهم ودنقرت اسلم على ريهام قالت لي دا منو وقبل ما ارد خالتو حنان قالت لي همام حلوين مع بعض يا ولدي هنا ريهام لما شهقت كده استوعبت انو دا همام ولد خالتو حنان الانا بحكي عنو قربتني منها تاني قالت لي مز شديد ولايقين شديد وشكلو بحبك عيونو حتاكلك اكل يا امل من جيتو وانا مراقباكم
سكت ساي ما قدرت ارد ابتسمت ليها وقلت ليهم عن اذنكم ماشه لايمان
مشبت وهمام قعد معاهم واتونس مع محمد وكده وبعد مسافه ميل على امو وقال ليها بعد كده ممكن تخطبيها لي كلميهم الجمعه الجايه بنجيهم
حنان: اخيرآ والله قلبي كان محسسني انك حتوافق والله الفرحه ما سايعاني يا ولدي لو علي اقوم ازغرد هسي
همام: لالا يا حجه اهدي شويه لمن يدونا الموافقه بعد داك زغردي
حنان: لالا الموافقه مضمونه تب يا ولدي انا مكلمه امها من بدري انو نحنا حاجزين البنيه
همام: اشي اشي والله خلاص معناها اقوم اشوف البنيه وين انا
حنان: اي امشي ما دايرين زول يخطفها مننا
همام: لالا يا حجه مدام ختيتها في راسي حقتي تب بٳذن الله انتي بس ادعي لينا
حنان: دعواتي معاكم يا ولدي والله
.......
حنان: الولد خلاص قال داير البنيه يا وداد الحمد لله
وداد: ونحنا ما عندنا مانع والله بت زاتها بقت وش جواز بعد دا
حنان: خلاص يختي خير البر عاجله نحنا الجمعه الجايه بنجي ونعمل الاصول
وداد :مرحب بيكم والله ماف اي عوجه
.....
انا مشيت لي ايمان واستلمتني
ايمان: اااااي شايفاكم والمسكه والحركات انا قلت حتدخلي مع قصي مدام صحبك وكده لكن شايفاك دخلتي مع حبيب القلب
لمن قالت قصي انا حسيت نفسي اتوترت ما هو يا جماعه دا حب كم سنه او اعجاب المهم احساس دام عندي كم سنه يعني صعب علي اتجاوزو بالسهوله دي وهو قدام عيوني وكل تصرفات اتغيرت كده
انا: براك قلتيها حبيب القلب اذا البدخلني مع قصي شنو
ايمان: اشي اشي اخيرا اعترفنا بالحب
انا: ايمان اختيني خلاص
ايمان: على سيرتو بيظهر ابن الحلال
همام: شنو يا ايمان انتي واحمد لايقين والله
ايمان: وانت وامل اكترر من لايقين والله
همام: عارف عارف شكرا لمعلوماتك القديمه
ما اتوقعت الرد دا من همام بالجد ردو خلعني عديل لمن نطتت عيوني وايمان كمان اتخلعت
ايمان: لا يا شيخ طيب حلووو شديد
همام: امل
انا: ايوه
همام: وين سرحانه انتي
ايمان: عن اذنكم احمد دا بٲشر لي
همام: تمام تمام يلا هوينا زاتو
ايمان: ماااشي لينا حساب بعدين
همام: ظابط ظابط امل
انا: ايوه
همام: وين انتي يا بت ما معانا خلاص
انا: اسفه بس مصدعه شويه
همام: بسم الله عليك مالك منو شنو ومن بتين مصدعه
انا: يعني من بعد المغرب كده
همام: وانا اقول ليه من قبيل هاديه كده
انا: اي بس عشان الصداع لو لقيتني كويسه كنت حاكون غير
همام: ان شا۽ الله دايما تكوني كويسه حابب اسٲلك سؤال
اتفضل
انتي وقصي علاقتكم كيف مع بعض
ماف شي مجرد اصحاب قرينا مع بعض ومن خلصنا ماف شي لمتنا غير العرس دا بس ليه بتسٲل
ماف شي بس حب استطلاع اسف اذا ضايقتك
لالا عادي ما مشكله ما اتضايقت( نفسي اقول ليك انو بالنسبه لي ما كان مجرد صاحب بس ما بقدر ابدا ما عارفه ليه حاسه انك مهتم بي اااه يا قصي لو ما ظهورك المفاجئ دا كنت حاكون اكتر من مبسوطه بالاهتمام دا بس الفضل يعود ليك رجعت وجوطت كل شي) عن اذنك عايزه اقعد شويه مع ناس ماما
همام: تمام انا زاتي ماشي لي ايمان واحمد اشغلها ليهم شويه
انا: ماشي طيب
همام: ( الحمد لله طلعت ما مهتمه لقصي ولا جن دا الحمد لله يا ربي بس انا حاسس انو هو مهتم بيها يا رب الطف بقلبي يا رب واكتبها لي يا رب في اقرب وقت نتلمى في بيت واحد)
رجعت الطاوله بتاعت ناس ماما وقعدت اتونس مع ريهام كنت محتاجه احكي معاها
ريهام: الود لكن مز مزازه ما شا۽ الله ليك حق تدشدشي يختي انا اتدشدشت
انا: اممممم
ريهام: امل مالك ما على بعضك كده في شنو
انا: قصي
ريهام: قصي منو
انا: زميلي في الجامعه
ريهام: قصي لالا ياخ ودا كمان ظهر من وين ما صدقنا نسيناهو ياخ
انا: الله اعلم
ريهام: طيب انتي حاسه بشنو يا امل
انا: ما عارفه بس هو متغير يا ريهام ما قصي الزمان بعاين لي بطريقه غريبه محسسني انو هو بفكر فيني نظراتو دي اتمنيتها زمان وما لقيتها ولمن حسيت اني حٲبدٲ حياه جديده ظهر انا متلخبطه شديد
ريهام: طيب وهمام ما حاسه بٳحساسو شنو اتجاهك
انا: ما فاهماهو والله احيانا بحس انو مهتم بس خايفه اكون زي وزي اي بت في حياتو وما يكون اهتمام حقيقي
ريهام: ما اظن حاسه انو مهتم بيك
انا: ما عارفه يا ريهام ما عارفه محتاجه افكر كتيير
ريهام: حٲسٲلك سؤال وجاوبي عليه على حسب احساسك واول اجابه بتخطر على بالك لمن كنت داخله مع همام كنت حاسه بشنو ولما شفتيهو اول مره بعد ما ظهر قصي حسيتي بشنو
انا: في المرتين حسيت انو قلبي حيطير من محلو ما كنت شايفه او بفكر في شي غيرو كنت حاسه اني بحلم
ريهام: طيب ولمن شفتي قصي حسيتي بشنو
انا: ما كنت مبسوطه حتى اتمنيت لو انو ما ظهر من الاساس
ريهام: طيب منتهي يا امل شيلي قصي دا من راسك خالص لانو قلبك مع همام
انا: تفتكري كده بس انا لمن اشوفو بتضايق ما بقدر اكون مبسوطه لانو نظراتو لي ما زي زمان اتغير لو كان قصي بتاع زمان ما كنت حاتضايق
ريهام: اتجاهليهو اعتبري انو فات الاوان على النظرات دي وانو انتي حاليا قلبك مع همام ونظرات غيرو ما حتٲثر فيك
انا: بس يا ترى قلب همام كمان لي
ريهام: ما عارفه بس حاسه كده وانتي ادعي بكده
انا: ان شاء الله
بعد حكيت مع ريهام حسيت براحه كبيره بس برضو كان في شك في قلبي بخصوص شعور همام اتجاهي واتمنيت انو بالجد ربنا يطلعني من الاختبار دا ويكتب لي الخير مهما كان سوا۽ مع همام او قصي او غيرهم وكلت امري لله وحاولت اقفل الموضوع على كده واحاول انبسط بالحفله وبزواج اعز صحبه لي
مشيت لايلاف واياد وقومتهم يرقصو ورقصت معاهم وحاولت اتجاهل الشخصين البراقبوني اللي هم همام وقصي حاولت انسى اني بعرف واحد فيهم بس للاسف ما قدرت قصي جا۽ وبقى بشاغل فيني ويرقص معاي كنت متضايقه بس ما قدرت اعمل شي واستسلمت للامر الواقع بالرغم من نظرات همام الغاضبه الكانت بتربكني
انتهت الحفله وبدٲ الجرتق وما شا۽ الله ايلاف طلعت بتوب الجرقت حلوه شديد عملنا ليها كل عادات وتفاصيل الجرتق وانبسطنا بالجد وبعد انتهت الحفله ودعنا العروسين ورجعنا بس ما بيتنا بيتهم بيتنا هناك والصباح ساعدنا خالتو في الترتيب وبعد الظهر كده كل زول رجع على بيتو واتفقنا. ناخد باقي اليوم راحه وبكره ننزل على شغلنا انا وايمان
رجعت البيت سلمت على ماما وريهام ما شا۽ الله لقيتهم قاعدين مع بعض وبشربر في القهوه ويتونسو ما احلاهم ربنا يحفظهم قعدت معاهم شربت قهوه وسبحان الله اول مره احس امي دي مبسوطه كده وبتضحك من قلبها اتونست معاهم مسافه وبعد داك استئذنت وطلعت غرفتي علشان ارتاح كان العصر اذن صليت ورقدت نمت
