تاني يوم من الصباح اتصل علي صحاني من النوم وقال لي اجهزو سريع نطلع عشان المساء عندي شغل ما بقدر الف كتير وبعدين انا عايز نخلص موضوع السوق دا سريع عشان تفضي لنفسك وتتجهزي خجلني طبعا ما قدرت غير اقول ليهو طيب
جهزنا انا وريهام وطلعنا معاه لفينا السوق دا لف وسبحان الله اشترينا نص الحاجات في اليوم دا وفي وقت وجيز وطبعا ريهام وهمام يشيلو ويتونسو وانا بس ساكته وطبعا الحاجه بتعجبني وبتعجب ريهام وهمام في نفس الوقت اشترينا التياب بطقماتهم كلهم واشترينا تياب البيت انا براي ١٢ توب من بيت لمرقه بدون توب الجرتق وتلاته تياب بطقهم لامي وامو وريهام زاتها اصرا عليها واشترى ليها فضل لينا حاجات البيت وكده قلنا بنجي نكملهم بكره ومشينا الصايغ اشترينا الدبل والمحبس وطقم كده حلو شديد سلسل وحلق وساعه وغوايش وخاتم وحجل كمان ومشينا مطعم اكلنا وبعد داك رجعنا البيت المهم انا كنت خجلانه وقلت لي ريهام كيف هو حيمشي معانا وانا حاشتري حاجات البيت وحتكون كلها كيف كيف وبقيت اقول ليها نقول ليهو ما يمشي معانا وهي تشيل وتضحك وقالت لي لا يمشي همام دا فردتي بقى وغير كده ما بفوت علي فرصه اضحك فيكم وانتو بتتخجلو قلت ليها ما حيوانه بس عشان كده دخلنا البيت وحكينا لماما بالحاجات الاشتريناها وانبسطت شديد وكده وقلنا ليها انو بكره او بعد بكره بالكتير بنخلص موضوع الشيله دا
دخلت غرفتي استحميت وغيرت وصليت ورقدت كده تلفونو ضرب عاينت للرقم لقيتو قصي واول مره يتصل علي مكالمه طبعا قلبي نغذني قلت دا مالو كمان وما قدرت ما ارد حركه بااايخه شديد حتكون رديت
انا: الو
قصي: مبرووك يا عروسه
انا: الله يبارك فيك عقبالك
قصي: منوو انا لالا لالا ما اظن لو كان القالها لي غيرك كان معليش بس منك لالا وبعد دا من غيرك ما تنفع
انا: ( طبعا خلاص اتوترت دا شنو الكلام الغريب دا وليه صوتو غريب كده وبتكلم كيف كيف ) ليه بتقول كده
قصي: لالا ولااا حاجه سلامتك افرحي واتهني بس
انا: قصي في شنو ما فاهمه عليك يا صحبي
قصي: ايوا ايوااا زكرتيني اني صحبك صحبك اهاااا صحبك انا كيف نسيت اني صحبك امل مع السلامه مع السلامه يلا باي
وطق قفل الخط بالجد استغربت فيهو في شنو قصي دا مالو ما قدرت افهم شي صوتو متغير وطريقه كلامو غريبه خوفني واتوترت شديد قلت ارجع ليهو تاني قلت شكلو متضايق من حاجه خليهو يرتاح كان نفسي امشي جري لغرفه ريهام احكي ليها بس قلت ما ازعجها هسي ومحمد يداب جاء استغفرت ربي ورقدت في سريري حاولت انوم بس النوم طاير مني اتصل علي همام ما كان نفسي ارد اصلا خلاص حسيت نفسي مقفوله من اي شي وزهجانه لكن رديت
انا: الو
همام: يسعد مسائك كيف من تعب قبيل
انا: الحمد لله وانت
همام: خلصت شغلي يداب راجع البيت
انا: ايوا كويس بس اكيد تعبت حاول لما ترجع ترتاح وتنوم على طول
همام: كويس انتي تأمري أمر
انا: ما امر ولا حاجه بس عشان تعبان قلت ترتاح حبه
همام: عارف ياخ بكسر ليك في تلج مالك زعلانه
انا: لالا ماف شي مصدعه شويه
همام: طيب حأقفل منك حاولي نومي
انا: طيب ( ما عارفه ما حسيت اني عايزه اتكلم ما قدرت اجامل حتى واقول ليه خليك مع اني عارفه انو حيصر علي امشي انوم )
همام: طيب بكره لو ما بتقدر ما نمشي السوق
انا: خليها لبكره وبقدر ان شاء الله
همام: تمام تصبحي على خير
انا: وانت من اهل الخير
قفلت منو ورقدت نمت
