لا تسألني من أنا(زهور جمال الدين)

الحلقةة الاولى💕

#لا_تسألني_من_أنا

🖤{بقلم زهور جمال الدين}🖤
___________________

قصتنا بدايتها علي بنات الدار،

ايه ايه دار الرعاية،راهم حتى هما بنادمية وخلقهم ربي ،
الله غالب في الي اهلها معروفين شكون،وتوفوا،وضروف اقاربهم صعب تحتويهم ولدلك حطوهم في الدار لانة اءمن مكان ليهم،مرات معدورين

وفي الي اهلها مش معروفين من هما. لقوها قدام الدار. ماعرفولها اصل من فصل

*في الي بنات حلال

*وفي الي الله غالب مش دنبها. طلعت ع الدنيا غير شرعية. الدنب ذنب بوها وامها

في الي مرتاحة في عيشتها في الدار

وفي الي متمرمدة وتقول علاش اني من دون بنات الناس

فيه الي جامها زي الفرس. داسة في قلبها وساكتة وتراجي في فرصة باش تتطلع من السجن هادا

عموماً في قصة في بالي وخاطري نحكيهالكم

___________________

سنة 1980
خالد خطب نجاة...هي كان زميلتة في العمل..وقبلها كانت زميلة دراسة..

متعرفين قديم من قبل مكانو يخدمو مع بعض...خالد ونجاة يخدموا في وزارة الزراعة...تخرجو من الكلية وشتغلو مع بعض...وكانو يحبو بعض من اسامات الكلية وتخرجو وخطبها بس كان هوا وخوتها متحابوش من البداية..عندها خوها لامين دكتور جراحة وخشمة في السما...شهادتةة جايبها من بريطانيا...وخوها التاني يقولوله مختار ...صاحب محلاة كبار هلبا للاتات في قلب طرابلس....خوتها معبيين وفلوس ومدايرين روحهم حاجة كبيرة...حتى بوها عنده الرزق...طبعاً هي امها متوفية ... الي وقف معاها من الزواج هو بوها...لقاها تبيه.

وخالد كان انسان بسيط ومتواضعة مايلعبش معاه الجو متع خوتها والنفخ الزايد...ولدلك كان شاد روحة علية

قولو تزوجو شهر1سنة81وعلي طول حملت نجاة

وفي شهر12سنة1981

جابنت نجاة بنت وسمتها رواسي..الاسم مكانش متداول هلبا في ليبيا هداكا الوقت..بس كانت معاهم موضفة عراقية اسم بنتها رواسي..سمتها رواسي لان عجبها الاسم

شهر 6 سنة 1984 توفى بو نجاة ... وكان مخليلهم رزق ماشاء الله ... وكانو ناويين يقسموه بعد العزي.

وفي شهر 8 سنة1984 بعد وفاة بو نجاة بشهرين ... رواسي كان عمرها سنتين و8 شهور

بوها وامها كانو فرحانين بيها..لكن الله غالب الحلو مايكملش

في ليلة سودة مافيهاش ضي قمر .. كانت نجاة في حوش اماليها .. لان خالد عندة طلعة للجبل ... ولما روح فات عليها بيروح بيها. ركبت هيا وبنتها السيارة .. روحو وخشو للحوش وملاحظوش شيء غريب