جبروت_ال_يسار

مؤامرة ابن الشيوخ

بارت 2
شنو الما عجبج بيه
احس نار كام تسعر بيه هذا ششايف نفسه
.. ما عجبني غرورك وثقتك الزايده بنفسك وتحس انه بس انت الله خالقك رجال و راح اذب روحي عليك
.. وليش لا اني الف وحده تتمناني بس عيوني شافتج بس الج واختارتج
.. اختار وحده من ذني الالف ما افيدك اني لان مخطوبه
هو فتح عيونه ع وسعهن :
.. المن مخطوبه اني سالت عنج وكالولي ما مخطوبه
.. ما الك علاقه مخطوبه لزميل وياي
.. اوكي ع راحتج اسف ع الازعاج

اندار وراح واني احس رجليت يرجفن ما يشيلني بعد كعدت ع المصطبه
ياربي هذا شيريد مني صدك جذب تورطت انطيت هويتي ذاك اليوم يمكن شور بيه الولد اللي تحرش بيه اوووف ربي شهالمصيبه بس همزين كتله مخطوبه حته يفك ياخه مني

رجعت اقره اريد اركز ما اكدر بالي تشتت دخلت للامتحان ما عرفت اجاوب عدل احس تيهت الاول والتالي بسببه طلعت من الامتحان ابجي فرح تلكتني وهي خايفه
.. يمه حبيبي شبيج لج؟
.. ولج كله بسبب هذا الحقير كلشي ما عرفت اجاوب
.. منو هو ؟
مسحت دموعي وكعدت سولفتلها السالفه كالتلي لجين
.. وحسين عرف ؟
.. عزه غير تصير مذابح ما اريده يعرف اصلا .. كومي فروحه اني اريد اطلع للبيت كلش ضجت
بهالاثناء اجه حسين :
.. ها بناتي .. شلونكم بالام...
وكف وانصدم من شاف دموعي
.. لجين شبيج حبيبتي
ما تحملت هزيت راسي بحزن
.. مو زينه بالامتحان ..
.. عادي حبيبي واذا مو زينه فدوه اروحلج  اني هم هاي كدامج مو زين ورحت ضربتلي كيم بليارد بالقاعه واجيت

مسحت دموعي وتباوعتله
..صدك تحجي انت .. اني اعوف روحي وادعيلك يوميه بالنجاح وحضرتك ضارب الوضعيه

فرح نطقت .
.. عمي صلوا على محمد اني هم وياكم مو زينه يله حته نتشاوف بالدور الثاني ان شاء الله  😂😂😂😂
كمنه نضحك شويه كدرت اتناسى الشغله

رجعت للبيت ما تغديت ما اشتهي من قهرتي من هذا الحقير اليوم لسه جسمي يرجف من الصار اني حته ما اعرف اسمه ولا شكله اليوم يله شفت شكله عدل شنو هالجرأه اللي عنده
هزيت راسي ونمت قيلولة الظهر ...

كعدت العصر لكيت سحر خطيبة ليث يمنه جايه تصفط ملابسها مال العرس وغراضها بالغرفه مالتها  سلمت عليها بوستني هي واختها كتلها تحتاجين مساعده كالت لا شكرا حبيبتي

نزلت ساعدت ماما بالبيت وكعدت اقره المغرب راحت خطيبة ليث واختها وره شويه سمعت حس عياط ماما بنص البيت نزلت اركض اريد اعرف شصار سمعت بابا يكولهم
..وهو وين هس
ه كاله ابن جيرانه
.. محبوس بالقسم
سالت ماما بخوف :
.. ماما شكو ؟
..ولج اخوج احمد
دكيت ع صدري
.. شبيه احمد ؟
.. اخوج ذابيه سجن

ليش وشنو السبب ما عرفنه كمنا نبجي اني واسراء وشابكين ماما اللي كعدت بالكاع تبجي بابا وليث راحوا واحنه ضلينه بس نفتر وماما صعد ضغطها وتخربطت علينه ندك عليهم ما يجاوبون