جبروت_ال_يسار

مؤامرة ابن الشيوخ

بارت 20
بس دمعتي نزلت
ما حجه ولا كلمه وصلنه البيت دخل السياره للبيت واجه وراي للغرفه صاح بصوت مقهور

.. لجين ليش هيجي تسوين بنفسج ؟ اني ما كدرت اصيح واحجي بنص الطريق ....ابوج راح لدار حقه وكلنه ع هذا الطريق ...صح حزننا عليه وحقج تنقهرين بس الحي ابقى من الميت وهذا مو معناه تهملين صحتج وصحة الطفل انتي مره حامل وهذا الطفل امانه برقبتج و.....
جنت متضايقه ومريضه وضايجه كلش انداريت عليه وصحت بوجهه بصوت عالي
.. ما اعتقد تهمك صحتي بكد صحة الطفل فلا تسوي روحك ميت عليه انت حتى ما سألتني شلون صرتي فوك كل هذا تصيح ... لا تضل تتفلسف براسي
اجه لزمني من زندي بقوه وعيونه تجدح
.. لجييييين احترمي نفسج ولا تعلين صوتج شنو زعطوط كدامج بس مو صوجج صوجي اني اللي انطيتج مجال كلش هواي وتماديتي
نزلت دموعي
.. لان كلت الحقيقه صرت اتمادى هسه عرفت اني من مات ابوي ما بقه عندي احد وانت اناني ما تحب غير نفسك
لزمني من زندي وصاح بصوت بصوت رج البيت
.. انجبيييييي كااااااااافي لجيييييين 

ما تحملت لا صياحه ولا مرضي ولا حزني  انهاريت ووكعت جوه ايده

كعدت ع قطرات مي على وجهي لكيت نفسي ع الجربايه
تباوعت ليسار لكيته لازم الكلاص ويتباوعلي بقلق
.. شبيج لجين .. شنو رجع هبط ضغطج؟
درت وجهي عنه :
.. لا ما عندي شي بس دخت
تباوعلي وكال بصوت عصبي
.. رايح اجيبلج اكل من بره واجي حتى تبلعين دواج
.. ما اريد لا تجيب شي
بس ما جاوبني عافني وطلع اني كعدت كمت ابجي لمن نمت واني ما ادري

كعدني يسار كال بصوت متضايق مني
..هذا الاكل جبته كعدي اكلي ...وابلعي دواج مكتوب عليه الاوقات
.. ما اريد
.. خلي لا تاكلين وشوفي شلون بعد تشوفيني بهالبيت!

وعافني وطلع اني بقيت بس اتباوع لمكانه ودموعي تصب
هذا زعل فوك ما هو غلطان بحقي يزعل ؟! كمت ابجي وفتحت العلاليك وكعدت اكل لأن ادري بيه يزعل ويسويها ويعوفني اذا ما اكلت

بلعت دواي ورجعت نمت كعدت بنص الليل لكيت الضوه مطفي... تلمست مكان يسار ما موجود  كعدت مخترعه فتحت الضوه رحت للاستقبال لكيت التلفزيون مفتوح وهو نايم ع التخم وحاط ايده على عيونه
اني فتحت عيوني على وسعهن هذا ليش نايم هنا صدك ضجت سديت التلفزيون وكعدته
.. يسار .. يسار .. ليش نايم هنا ؟
تباوعلي ودار وجهه وغطه راسه بالغطا ورجع نام
اني احس بروحي صدك انهضمت عفته ورحت نمت بفراشي واني ابجي ساعه اكول ليش هيجي سوه وياي وساعه اكول اني غلطانه بحقه جانت مشاعري مخربطه بسبب الحمل  ونفسيتي كلش تعبانه لأن موت والدي هزني تركت كلشي لثاني يوم ونمت

كعدت الصبح لكيتها الساعه ب١٠ حيل شنو هذا النوم رحت للمطبخ لكيت جبن عرب وعسل وكيمر وصمون حار بالمطبخ صدك اشتهيته تباوعت بالبيت يسار ما موجود انقهرت من تصرفاته ليش هالشكل تعامله وياي
كعدت تريكت وغسلت المواعين ونظفت البيت وغسلت هدوم
وردت اغسل الطارمه تباوعت منا منا على سطوح الجوارين ماكو احد
كنت لابسه تراك برمودا وبديت اغسل بيها وصلت للنص اجه يسار فتح الباب شافني فتح عيونه على وسعهن
سد الباب بقوه واجه اخذ الماسحه والصونده مني وصاح
.. انتي شلون تطلعين هيجي ؟؟؟؟؟
.. شبيك يسار ليش تصيح تباوعت ماكو احد يله بديت اغسل الطارمه وسخه
.. انعل ابو الطارمه يابو الوصخ وياها ولج ليش تلبسين هيجي وتطلعين شافج احد ؟ انتي الى متى تبقين ثوله
صاح بيه
.. امششششششي طببببي جووووووه
دخلت جوه للمطبخ وهو كمل غسل الطارمه كعدت ابجي ليش هيجي يسوي وياي ويغلط سويت شي غلط اني؟ مو جديده اغسل الطارمه وهيجي لابسه معقوله كله لأن صيحت بوجهه بس والله مو قصدي  لأن نفسيتي تعبانه وهو هم ما قصر وضربني بجيت هواي لمن حسيت عيوني كام يوجعني كمت غسلت وجهي ورحت اسوي غدا اجه هو دخل للاستقبال وسد الباب وراه