جبروت_ال_يسار

مؤامره ابن الشيوخ

بارت 12
لجييييين؟!
.. نسرين هي دفعتني ع جدر التشريب بسه من وكعت راح ابني
عافني وفتح الباب وركض بقيت بس اصيح بألم وقهر
وره ١٠ دقايق دخلت سرى وعمتي ووراهم ماما واسراء وبابا واحمد واني شفتهم واني كمت ابجي بقوه اجت ماما حضنتني وكامت تبجي وياي سمعت عمتي تكولي
.. يا المهجومه ليش كلتي ليسار هسه يخليها دمايه
صحت بيها
.. كافي عمه كافي لخاطر الله هواي طمطمتي لهند واختها بسببها انكسرت ايدي واحتركت رجليه وخسرت ابني اعز شي عندي لمن تموتني يله ترتاحين
عمتي ما حجت بس قلبت وجهها وضاجت ما اهتميت
سرى كالت
.. ياااا عزه بعينها يعني نسرين وره وكعاتج كلهن ...والله عمي حقج ويرادلها ذبح هاي الحقيره هم نزل وهم يدبج .. الله لا يوفقها

اجه احمد وبابا واسراء شبكوني وبوسوني واني بحضن ماما
كال احمد
.. تحجين صدك لجين ليش ساكته طول هالمده ؟
كمت ابجي واتباوع لرجليه الملفلفات والالم يصل بيهن كال بابا
.. لا تخافين سألت الدكتور على حرك رجليج كال هذا حرق من الدرجه الثانيه وما واصل للاعصاب الحمد لله يعني بالدهون وتبديل الضماد والمداراة ان شاء الله يطيب
كمت ابجي وحضنت ماما
.. اني حرك قلبي اكبر من رجليه .... بابا .. احمد ابوس ايدكم اخذوني وياكم
كالت سرى
.. يا شجاج لجونه كولي يا الله يسار ما يقبل
.. مالي علاقه بيسار اريد ارتاح تعبت اريدكم تاخذوني وياكم تعبانه.. اني مو بنتكم ؟!
كال بابا
.. بيج خير وادللي بس خلي يجي يسار وناخذ رأيه ما يصير نطلعج وهو ما موجود هو ولي امرج هسه
كالت ماما
.. حبيبتي بنيتي لا تضوجين كلشي يتعوض بس لا تقهرين نفسج
بهاللحظه دك جهاز سرى جاوبت وره شويه سمعناها كمزت
وصاحت
.. يمه صخام الصخمني .. هوار بروح الحسن لا تعوفه وحده بالعباس يكتلوه ليسار

اني قلبي لزمني من ذكرت اسم يسار عمتي سألتها وهي ترجف وره ما سدت التلفون
.. ولج شبيهم ولدي
.. عمه يسار ماخذ سلاحه و هاد على بيت عمتي ويكولهلم طلعلولي نسرين لا اهدم البيت على روسكم واخوانها هادين على يسار ورايدين يكتلوه وكوه مفاككيهم الوادم وعمي وكرار

هي تحجي واني عيوني تصب صدك جنت خايفه عليه بس
كان جرحي منهم اكبر من انه اتعاطف وياهم واولهم يسار اللي جابني وكعدني وياهم وهو يعرف طينتهم
كالت امه
..ها ارتاحيتي هسه وجع روسنه كله من النسوان
سرى كومتها وكالتلها
.. كومي عمه مو وكت هذا الحجي
بوستني وراحت واني بقيت بحضن ماما لمن نمت

الصبح كعدت لكيت يسار واهلي يمي كان يسار شفته مشكوكه الظاهر متعارك عركه قويه بس ما اهتميت اله كان الم رجليه والم بطني مموتني تباوعلي يسار وابتسملي ابتسامة حزن وطمأنينه بس ما اهتميتله درت وجهي عنه
ما كدر يحجي شي كانو اهلي يمي
اجه الدكتور كال
.. صباح الخير
واخذ الطبله مال دخوليه وسألني
..شلون صرتي
..دكتور متأذيه رجليه وبطني مأذيني
.. عادي بنيتي ان شاء الله يوم يومين وتصيرين احسن ما يحتاج تبقه هنا بعد راح نضربها ابره مال آلام والتهابات وراح نكتبلها خروج بس الزامي تبديل ضماد رجلها اول اسبوع كل يوم ..وثاني اسبوع بين يوم ويوم واخذ العلاج بانتظام وبالنسبه للاجهاض فقط تاخذ ادويتها وتعوضها بالمقويات
وقع ع الورقه وطلع اجت المضمده ضربتني ابرتين وطلعت
بابا حاجه يسار
.. بويه يسار .. بنتنه تعبانه وتريد تجي ويانه لبغداد اتمنى ما يكون عندك مانع ناخذها كم يوم
يسار فتح عيونه على وسعهن
.. ليش عمي ادري تأذت ببيتي بس الله شاهد الا اخذ حكها مربع منهم ما عاش اللي يأذيها واني موجود
كتله بصوت مقهور
.. اذوني وانت موجود شكدرت تسوي؟ يسار اريد اروح وي اهلي ارتاح كم يوم
بابا اشر لامي واخوتي وطلعوا من الغرفه
اجه يسار كعد يمي وباس ايدي
.. لجين ابوس ايدج لا تسوين هيج بيه والله اتبهذل بدونج
كمت ابجي
.. يسار الله يخليك اعتقني اني تعبانه رجليه لمدة اسبوعين ما راح اكدر امشي عليهن وابني راح مني شنو الحصلته فهمني... يسار اريد ارتاح هواي عليه ؟
دنك راسه ومسح دمعته
رفع راسه وباسني بكصتي وكال بحزن
.. يجرالج روحي وياهم وارتاحي بس لا تطولين عليه والله ما اكدر بدونج
دنكت وما حجيت شي كان شكله تعبان ويكسر الخاطر بس مو بيدي ضايجه من الدنيا كلها و تعبانه وصدك محتاجه لراحه فجأه حسيت بأيده نمدت جوه جسمي وشالني
.. اني اشيلج اوصلج بالسياره
كان يتباوعلي حجه بحنيه وحزن
.. اسف على كل شي صار وداعة عيونج ذني الا اعوضج عن كل هاي الايام
باس راسي ومشه بيه طلعنه كان شايلني كدام اهلي والعبايه على متوني شالني حطني بسيارة احمد اللي كان ماخذها من صاحبه وكال
.. لحكوني للبيت بسيارتكم حته تاخذولها كم قطعة ثوب وغراضها
رحنه للبيت وراه بالسياره
نزل قبلنه للبيت وكال لاسراء.. تعالي اسراء وياي حته تجمعين غراض ل لجين لان ما اعرف شنو تحتاج انتي اعرف
نزلت اسراء وياه وجمعتلي جنطه جبيره اجت سرى لسيارتنا
وجهها مخطوف
.. يا خيه وين تردين تمشين وتعوفينه
ماما كالتلها
.. ترتاح كم يوم يمنه وترجع
.. بس احنه ما نقصر وياهانشيلها بعيوننا
.. والنعم منكم بالاخص انتي ام امير ونعم الاخت بس ميخالف ترتاح اكثر يم اهلها
.. زين تفضلوا تغدوا وروحوا
.. لا والله هم يا الله ورانه طريق
اجتي اسراء ويسار شايل جنطتي فتح جنطة السياره وحطها
وفتح الباب من جهتي وانطاني فلوس تطلع ب٥٠٠ الف تقريبا
.. هاج هاي فلوس خاف تحتاجين شي
.. ما احتاج فلوسك خليهن بجيبك
خزرني
.. لجين
اخذتهن واني مقهوره منه
.. ديري بالج على روحج وانتي خاله امانه تديرين بالج عليها
.. لا توصينه على بنتنا يمه يسار
.. اني بلكت شغلة اسبوعين واحاول اجيكم
تباوعلي نظره اخيره كلها حزن والم
..الله وياكم
سد الباب وشغل احمد السياره ومشيناوهو بقى يتباوع ورانه
كنت نعسانه وتعبانه حطيت راسي ع كتف ماما ونمت