*نبيل لقى نفسو في موقف صعب جداً، بين إنو عاوز يفرح ب أختو والفرحة تخش بيتهم تاني، وبين إنو م قادر يعيش الفرحة دي وصحبو القريب منو مكسور💔 كيف يضغط على وجع صحبو ويفرح؟
*الجامعة خلاص قفلت ،يعني المكان الوحيد الكانو بتلمو فيهو خلاص بقى مافي مجال ،وملاذ كان عايشة جو من النفسنة والضيق ونفس الوقت مؤمن حاسي إنو عاجز وحياتو بتتحطم قدامو، طوالي مشى ل أبوهو وقال يتكلم معاو:
مؤمن:أبوي أنا عاوز أتكلم معاك
أبو مؤمن(أزهري): أيوة ي مؤمن قول
مؤمن:والله ي أبوي ،أنا كراجل كده ووعدت لي بت ناس بالزواج ،م بقدر أكسر قلبها وأمشي ببساطة أتزوج وحدة لمجرد إنها بت خالي وأنا اصلا م عارف عنها شي ولا بتحب شنو ولا بتكره شنو وحنتفاهم ولا لا وح نعيش مبسوطين ولا حياتنا ح تكون ماشة كيف
أزهري:مؤمن ي ولدي، الزواج ده م بيدك ولا بيدي الحاجات دي مما أمك ولدتك وجابتك للدنيا دي ربنا كتب ليك الح تشاركك عمرك لو كان بإرادتك أو بغيرها ، وحتى لو إنت إتزوجت البتحبها يمكن م تتفقو ،إنك تعيش مع زول في بيت واحد ويبقى نصك البتشاركو أيي شي م زي إنو تكون بينكم علاقة حب تلفونات ومقابلات ووو، كل شئ قسمة ونصيب ي ولدي
*مؤمن م قدر يقتنع ب كلام أبو وفي نفس الوقت م قادر يقنع أبو، والتواصل بينو وبين ملاذ كان عادي ،عمرها م فتحت معاو الموضوع ،م زالت بتهتم بيو وتسأل عليو م عشان لسه متعشمة فيو بس عشان خاطر الأحاسيس الحستها معاو وعشان خاطر حبهم وكل التضحيات القدموها ل بعض،
*ملاذ تدريجيا حاولت تتأقلم مع فكرة إنو مؤمن م ح يكون من نصيبها وإنو حظها في الحب م زي حظ أيي وحدة بتنتهي قصة حبها بالزواج، الفكرة كانت صعبة عند ملاذ بس الأصعب من كده مؤمن وإنو كيف ح يتجاوب مع الموضوع ده💔*في بيت نبيل...
فاطمة:نبيل ناس عمك خلاص وصلو البلد دي وقالو بكرة ح يجو ونعمل خطوبة طوالي ، م عاوزين مواضيع كتيرة
نبيل :كويس ي أمي ربنا يسهل
فاطمة:مالك ي ولد شكلك متغير كده؟
نبيل :مؤمن ي أمي💔
فاطمة:ي ولدي زي م قلت ليك الحاجات دي قسمة ونصيب رغم إنها ح تكون صعبة عليو بس إنت كصاحبو لازم تقيف معاو وتخلي يطلع من الفيو ده بطريقة غير مباشرة هسي أنا ح أتصل ليو وأخلي يجي الخطوبة
نبيل:أي ي أمي كلمي إنتي أنا م ح أقدر
*مرات بنتوجع لأصحابنا أكتر مننا وبنتمنى إنو وجعهم يكون فينا، والله ببقى أهون علينا مما نشوفهم بتضايقو قدامنا وم قادرين نعمل حاجة😪💔
*نبيل شال تلفونو وإتصل ل هند
نبيل:هند كيفك
هند:كويسة الحمدلله كيفك إنت؟
نبيل :م عندي عوجة، بكرة خطوبة لميس ح تجي صح؟هند:ي ريت ي نبيل بس نفسياتي م ح تسمح لي
نبيل:عارف موضوع ملاذ مضايقك وايي شي، بس دي فرصة تخليهم ينسو شوية
هند:ينسو كيف ي نبيل ؟؟ هم ماشين خطوبة يعني إتنين ح يبقو ل بعض، كده ح يتوجعو زيادة
*أثناء م هند بتتكلم مع نبيل ملاذ كانت واقفة وبتسمع طوالي ملاذ لفتت هند من كتفها وقالت ليها
ملاذ:ح أمشي الخطوبة ي هند
*هند قفلت الخط من نبيل وقبلت على ملاذ
هند:ملاذ☹️
ملاذ:ااي ح أمشي ي هند، لمتين ح أهرب من الحقيقة ؟ لمتين ح أكتم وجعي جوة قلبي، لازم أواجه الح يحصل وأتيقن إنو مؤمن م من نصيبي ،تعبت من قفلة نفسي في الأوضة وعدم النوم والأكل البقى مافي تعبت من ضحكتي البصطنع فيها ومن تلفوني الما بفتحو إلا عشان أطمن ع مؤمن، تعبت من نفسي لأني أهلكتها ، لازم أطلع أتغير أنسى وأعرف إنو في حاجة إسمها نصيب
هند :م عارفة أقول ليك شنو ملاذ :م تقولي ولا شي الموضوع ده خلاص عاوز أختمو
هند:ربنا يقويك حبيبتي😞♥️ ويرزقك النصيب الحلو البشبهك
*ماف زول بقدر يقيف ضد نصيبو ولا بنقدر نغير قسمتنا، بس ممكن نبقيها أحلى بإنو ما نخلي الماضي الوجعنا يأثر عليها ونمحي كل الحاجات القديمة🙂💕
*جا الصباح وبيت ناس نبيل مليااان بالناس ،ولأنو التجاني عزالدين معروف وعندو مكانتو ودي أول مناسبة ليو جو ناس كتاار ما بتحسبو ،كمية من الرجال والنسوان ،من أفخر العائلات،
هند وملاذ جو من الصباح يخدمو كأنهم من بنات العيلة م عملو حاجة غير إشتغلو ويخدمو، فاطمة كانت بتعاين ل هند وبتقول ي ربي دي بت منو البتخدم كده ماشاءالله عليها أول م مواعيد الخطوبة قربت خلاص وكل الناس مشت تغير وتلبس فاطمة جات على هند..
فاطمة: ي بتي
هند(وهي م عارفة إنو دي أم نبيل) : أيوة ي أمي إتفضلي
فاطمة:م عرفتك إنتي بت منو
هند: أنا صحبة لميس (ب خوف كده) وطوالي مشت
فاطمة قالت في نفسها أنا بعرف صحبات لميس كلهم بس دي أول مرة أشوفا
*خلاص المغرب جا والناس كلها إتجهزت ومشت الصالة وهاااك ي اللبس وهاااااك ي القشرات وأخر فك شعر وتحشيشة
هند كانت ولاول مرة لابسة فستان بيجي عادي ولافة طرحتها وقاعدة في كرسي أخر الصالة جنبها ملاذ ومعاهم نبيل
