ﻭﺻﻴﺔ ﺻﻔﻴﺔ المؤلّف : منال إبراهيم

16

* ﺍﻟﻔﺼﻞ ﺍﻟﺴﺎﺩﺱ ﻋﺸﺮ *
- ﺑﺮﺿﻪ ﺣﻴﻘﻮﻟﻲ ﺍﻗﻨﻌﻬﺎ .... ﻣﺎﺷﻲ ﻳﺎ ﻋﻠﻲ ... ﻟﻤﺎ ﺍﺷﻮﻑ ﺁﺧﺮﺗﻬﺎ ﻣﻊ ﺑﻨﺖ ﺻﻔﻴﺔ ﺇﻳﻪ ?
- ﻃﻴﺐ ﻫﻮ ﻟﻴﻪ ﺣﻀﺮﺗﻚ ﻣﺴﺘﻌﺠﻞ ﻋﻠﻰ ﻣﻮﺿﻮﻉ ﺍﻟﺠﻮﺍﺯ ﺩﻩ ﻟﻴﻪ ? ﺍﻧﺎ ﺷﺎﻳﻒ ﻳﻌﻨﻲ ﺍﻥ ﻧﻮﺭﻫﺎﻥ ﻣﻦ ﺣﻘﻬﺎ ﺍﻧﻬﺎ ﺗﻜﻤﻞ ﺗﻌﻠﻴﻤﻬﺎ ﻗﺒﻞ ﺍﻟﺠﻮﺍﺯ ﺧﺼﻮﺻﺎ ﻳﻌﻨﻲ ﺍﻥ ﺩﺭﺍﺳﺘﻬﺎ ﻣﺶ ﺳﻬﻠﺔ
- ﻳﺎ ﺍﺑﻨﻲ ﺍﻧﺎ ﻋﺎﻳﺰ ﺃﺟﻮﺯﻫﻢ ﻭﺍﺧﻠﺺ ﻣﻦ ﻣﺴﺌﻮﻟﻴﺘﻬﻢ ﺑﻘﻰ ... ﺃﻧﺎ ﻣﻦ ﺳﺎﻋﺔ ﺍﻟﻠﻲ ﺣﺼﻞ ﻟﻨﺎﺩﻳﺔ ﻭﺍﻧﺎ ﻣﺶ ﺑﻌﺮﻑ ﺍﻧﺎﻡ ﻣﻦ ﺍﻟﻘﻠﻖ ﻭﻣﺶ ﻋﺎﺭﻑ ﻟﻮ ﻣﺎﻛﻨﺎﺵ ﻗﺪﺭﻧﺎ ﻧﻠﻢ ﺍﻟﻤﻮﺿﻮﻉ ﻛﺎﻥ ﺇﻳﻪ ﺍﻟﻠﻲ ﻣﻤﻜﻦ ﻳﺤﺼﻞ ... ﺍﻧﺎ ﺧﺎﻳﻒ ﺍﻱ ﺣﺎﺟﺔ ﺗﺤﺼﻞ ﻗﺒﻞ ﺍﻟﻔﺮﺡ ﻭﺗﻠﺨﺒﻂ ﺣﺴﺎﺑﺎﺗﻨﺎ ... ﻋﺎﻳﺰ ﺍﻃﻤﻦ ﻋﻠﻴﻬﻢ ﻗﺒﻞ ﻣﺎﻳﺠﺮﺍﻟﻲ ﺣﺎﺟﺔ ﻭﺍﺷﻮﻑ ﻛﻞ ﻭﺍﺣﺪﺓ ﻓﻴﻬﻢ ﻓﺒﻴﺖ ﺟﻮﺯﻫﺎ ﻭﻣﺴﺌﻮﻟﻴﺘﻬﺎ ﺗﺘﺸﺎﻝ ﻣﻦ ﻋﻠﻰ ﻛﺘﺎﻓﻲ ... ﺍﻧﺎ ﺗﻌﺒﺖ ﺑﻘﻰ ﻭﻣﻦ ﺣﻘﻲ ﺍﻧﻲ ﺍﺭﺗﺎﺡ ... ﺍﻧﺎ ﻣﺎﺭﺿﺘﺶ ﺍﺗﺠﻮﺯ ﺑﻌﺪ ﺻﻔﻴﺔ ﻣﺎ ﻣﺎﺗﺖ ﻭﺍﺗﻔﺮﻏﺘﻠﻬﻢ ... ﻣﺶ ﻣﻦ ﺣﻘﻲ ﺩﻟﻮﻗﺘﻲ ﺍﻧﻲ ﺍﺭﺗﺎﺡ ... ﺍﻟﻌﻤﺮ ﻣﺎﺑﻘﺎﺵ ﻓﻴﻪ ﺍﺩ ﺍﻟﻠﻲ ﺭﺍﺡ ﻳﺎ ﻋﻠﻲ .
- ﺑﻌﺪ ﺍﻟﺸﺮ ﻋﻠﻴﻚ ﻳﺎ ﻋﻤﻲ ﻣﺎﺗﻘﻮﻟﺶ ﻛﺪﻩ ... ﺭﺑﻨﺎ ﻳﺪﻳﻚ ﻃﻮﻟﺔ ﺍﻟﻌﻤﺮ ... ﺑﺲ ﻓﻴﻪ ﺣﺎﺟﺔ ﺣﻀﺮﺗﻚ ﻣﺶ ﻭﺍﺧﺪ ﺑﺎﻟﻚ ﻣﻨﻬﺎ ... ﺃﻧﺎ ﻟﺴﻪ ﻣﺎﺟﺒﺘﺶ ﺍﻟﺸﻘﺔ ﺍﻟﻠﻲ ﺣﻨﺘﺠﻮﺯ ﻓﻴﻬﺎ ... ﻭﻣﺶ ﻣﻌﻘﻮﻝ ﺣﺎﻟﺤﻖ ﺍﺟﻴﺐ ﺷﻘﺔ ﻭﺍﻓﺮﺷﻬﺎ ﻭﺍﺣﺠﺰ ﻗﺎﻋﺔ ﻭﺍﻋﻤﻞ ﻛﻞ ﺩﻩ ﻓﺎﺳﺒﻮﻋﻴﻦ
- ﻣﺎﻫﻮ ﺩﻩ ﺍﻟﻤﻮﺿﻮﻉ ﺍﻟﺘﺎﻧﻲ ﺍﻟﻠﻲ ﻛﻨﺖ ﻋﺎﻳﺰ ﺍﺗﻜﻠﻢ ﻣﻌﺎﻙ ﻓﻴﻪ ... ﺍﻧﺖ ﻣﺶ ﺣﺘﺠﻴﺐ ﺷﻘﺔ ﻭﻻ ﺣﺎﺟﺔ ... ﺍﻧﺖ ﺣﺘﺴﻜﻦ ﻣﻌﺎﻳﺎ ﻓﺎﻟﻔﻴﻼ
- ﻋﻠﻲ ﺑﺪﻫﺸﺔ : ﺍﺳﻜﻦ ﻣﻊ ﺣﻀﺮﺗﻚ !
- ﺍﻳﻮﻩ ﻳﺎ ﻋﻠﻲ ... ﺍﻧﺎ ﻛﻨﺖ ﻧﺎﻭﻱ ﺍﻛﻠﻤﻚ ﻓﺎﻟﻤﻮﺿﻮﻉ ﺩﻩ ﻭﻗﺘﻬﺎ ... ﺍﻧﺎ ﺑﻌﺪ ﻣﺎ ﺍﻟﺒﻨﺎﺕ ﻳﺘﺠﻮﺯﻭﺍ ﻣﺶ ﻣﻌﻘﻮﻝ ﺣﺎﻗﻌﺪ ﻓﺎﻟﻔﻴﻼ ﺍﻟﻄﻮﻳﻠﺔ ﺍﻟﻌﺮﻳﻀﺔ ﺩﻱ ﻟﻮﺣﺪﻱ ... ﻋﺸﺎﻥ ﻛﺪﻩ ﻋﺎﻳﺰﻛﻮﺍ ﺗﻌﻴﺸﻮﺍ ﻣﻌﺎﻳﺎ ﺍﻧﺖ ﻭﻧﻮﺭﺍ ... ﺍﻧﺎ ﻃﺒﻌﺎ ﻣﺎﻗﺪﺭﺵ ﺍﻃﻠﺐ ﺍﻟﻄﻠﺐ ﺩﻩ ﻣﻦ ﺍﺑﻦ ﺍﻟﺤﺴﻴﻨﻲ ... ﻟﻜﻦ ﺍﻧﺖ ﺍﺑﻦ ﺍﺧﻮﻳﺎ ﻭﻣﺶ ﻣﻌﻘﻮﻝ ﺣﺘﺮﻓﺾ ﻃﻠﺒﻲ ﻭﺗﻜﺴﻔﻨﻲ
ﺗﻨﻬﺪ ﻋﻠﻲ ﻭﻗﺎﻝ ﻓﻲ ﺣﻴﺮﺓ :
- ﻫﻮ ﺣﻀﺮﺗﻚ ﻣﺶ ﺷﺎﻳﻒ ﺍﻧﻚ ﻓﺎﺟﺌﺘﻨﻲ ﺍﻟﻨﻬﺎﺭﺩﺓ ﺍﻛﺘﺮ ﻣﻦ ﻣﻔﺎﺟﺄﺓ ﻣﺎﻛﻨﺘﺶ ﻋﺎﻣﻞ ﺣﺴﺎﺑﻬﻢ .... ﻣﻤﻜﻦ ﺗﺪﻳﻨﻲ ﻓﺮﺻﺔ ﺍﻓﻜﺮ ﻭﺍﺭﺩ ﻋﻠﻰ ﺣﻀﺮﺗﻚ
- ﺻﻔﻮﺕ ﺑﻀﻴﻖ : ﻭﻫﻴﺎ ﺩﻱ ﻣﺤﺘﺎﺟﺔ ﺗﻔﻜﻴﺮ ﺑﺮﺿﻪ ... ﺍﻧﺎ ﺯﻱ ﻣﺎﻗﻠﺘﻠﻚ ﻣﺎﻳﻨﻔﻌﺶ ﺍﻃﻠﺐ ﺍﻟﻄﻠﺐ ﺩﻩ ﻣﻦ ﺍﺑﻦ ﺍﻟﺤﺴﻴﻨﻲ ... ﻟﻜﻦ ﻭﺍﺿﺢ ﻛﺪﻩ ﺍﻧﻲ ﺑﺎﺿﻐﻂ ﻋﻠﻴﻚ ﻓﺤﺎﺟﺎﺕ ﻛﺘﻴﺮ
ﺣﺎﻭﻝ ﻋﻠﻲ ﺍﻥ ﻳﺴﺘﺮﺿﻲ ﻋﻤﻪ ﻗﺎﺋﻼ :
- ﺍﺭﺟﻮﻙ ﻳﺎ ﻋﻤﻲ ﺍﻧﺎ ﻣﺶ ﻋﺎﻳﺰ ﺣﻀﺮﺗﻚ ﺗﺰﻋﻞ ﻣﻨﻲ ... ﻭﻋﻤﻮﻣﺎ ﺇﺫﺍ ﻛﺎﻥ ﺩﻱ ﺣﺎﺟﺔ ﺗﺴﻌﺪ ﺣﻀﺮﺗﻚ ﻭﺗﺮﺿﻴﻚ ﻓﺎﻧﺎ ﻣﺎﻋﻨﺪﻳﺶ ﻣﺎﻧﻊ
- ﻳﺒﻘﻰ ﻋﻠﻰ ﺑﺮﻛﺔ ﺍﻟﻠﻪ ... ﺍﻧﺎ ﺣﺎﻛﻠﻢ ﺍﺣﻤﺪ ﻳﺒﻌﺖ ﺍﺣﺴﻦ ﺍﻭﺿﺔ ﻧﻮﻡ ﻋﻨﺪﻩ ﻓﺎﻟﻤﻌﺮﺽ ﻭﺍﺟﻬﺰﻟﻜﻮﺍ ﺍﻭﺿﺔ ﻣﻦ ﺍﻭﺽ ﺍﻟﻨﻮﻡ ﺍﻟﻜﺒﻴﺮﺓ ﻓﺎﻟﻔﻴﻼ ﻭﺍﻓﺮﺷﻬﺎ ... ﻭﺍﻧﺖ ﺑﻘﻲ ﺟﻬﺰ ﻧﻔﺴﻚ ﻭﺍﺗﻔﻖ ﻣﻊ ﻭﺍﻟﺪﺗﻚ ﻭﺍﺧﺘﻚ
ﻗﺎﻡ ﺻﻔﻮﺕ ﻣﻦ ﻣﻜﺎﻧﻪ ﻭﺍﺗﺠﻪ ﻧﺤﻮ ﺍﻟﺨﺰﺍﻧﺔ ﺍﻟﻤﻮﺿﻮﻋﺔ ﺑﺠﻮﺍﺭ ﻣﻜﺘﺒﻪ ﺛﻢ ﻓﺘﺤﻬﺎ ﻭﺍﺧﺮﺝ ﻣﻨﻬﺎ ﻣﺒﻠﻐﺎ ﻣﻦ ﺍﻟﻤﺎﻝ ﻭﻣﺪ ﻳﺪﻩ ﺑﻪ ﺇﻟﻰ ﻋﻠﻲ ﻗﺎﺋﻼ :
- ﺍﻣﺴﻚ ﻳﺎ ﻋﻠﻲ ﺍﻟﻔﻠﻮﺱ ﺩﻱ ﺍﺩﻳﻬﺎ ﻟﻠﺒﻨﻰ ﻭﻗﻮﻟﻬﺎ ﻋﻤﻚ ﺑﻴﻘﻮﻟﻚ ﻟﻮ ﺍﺣﺘﺎﺟﺘﻲ ﺍﻱ ﺣﺎﺟﺔ ﻣﺎﺗﺘﺮﺩﺩﻳﺶ ﺍﻧﻚ ﺗﻄﻠﺒﻴﻬﺎ ﻣﻨﻪ ... ﺍﻧﺎ ﻋﺎﻳﺰﻫﺎ ﺧﻼﻝ ﺍﺳﺒﻮﻋﻴﻦ ﺗﺠﻴﺐ ﻛﻞ ﺍﻟﻠﻲ ﻫﻴﺎ ﻋﺎﻳﺰﺍﻩ ﻭﻣﺎﻳﻜﻮﻧﺶ ﻧﺎﻗﺼﻬﺎ ﺍﻱ ﺣﺎﺟﺔ
- ﻣﺎﻟﻮﺵ ﻟﺰﻭﻡ ﻳﺎ ﻋﻤﻲ
- ﻫﻮ ﺍﻳﻪ ﺍﻟﻠﻲ ﻣﺎﻟﻮﺵ ﻟﺰﻭﻡ ... ﺩﻭﻝ ﻫﺪﻳﺘﻲ ﻟﻠﺒﻨﻰ ... ﻭﺑﻌﺪﻳﻦ ﻟﺒﻨﻰ ﺩﻱ ﺑﻨﺘﻲ ﺯﻳﻬﺎ ﺯﻱ ﻧﺎﺩﻳﺔ ﻭﻧﻮﺭﺍ ﺑﺎﻟﻈﺒﻂ .... ﻭﺍﻟﻠﻲ ﺑﻌﻤﻠﻪ ﺩﻩ ﻣﺶ ﻓﻀﻞ ﻣﻨﻲ ﺩﻩ ﺩﻳﻦ ﻋﻠﻴﺎ ﻷﺑﻮﻛﻮﺍ ﺍﻟﻠﻪ ﻳﺮﺣﻤﻪ ... ﺍﺑﻜﻮﺍ ﺍﻗﻒ ﺟﻨﺒﻲ ﻓﺎﻛﺘﺮ ﻭﻗﺖ ﻛﻨﺖ ﻣﺤﺘﺎﺟﻠﻪ ﻓﻴﻪ ... ﻋﺸﺎﻥ ﻛﺪﻩ ﺍﻧﺎ ﺍﺧﺪﺕ ﻋﻬﺪ ﻋﻠﻲ ﻧﻔﺴﻲ ﺇﻥ ﻭﻻﺩﻩ ﻳﻜﻮﻧﻮﺍ ﻭﻻﺩﻱ ﻣﻦ ﺑﻌﺪﻩ ...
- ﺍﺣﻨﺎ ﻛﻤﺎﻥ ﻳﺎ ﻋﻤﻲ ﺑﻨﻌﺘﺒﺮ ﺣﻀﺮﺗﻚ ﻣﻜﺎﻥ ﻭﺍﻟﺪﻱ ﺍﻟﻠﻪ ﻳﺮﺣﻤﻪ
- ﺭﺑﻨﺎ ﻳﺒﺎﺭﻛﻠﻲ ﻓﻴﻜﻮﺍ ﻳﺎ ﺍﺑﻨﻲ ... ﺍﺳﻤﻊ ﺑﻘﻰ ... ﺍﻧﺎ ﻋﺎﻳﺰﻙ ﺗﻨﺰﻝ ﺑﻨﻔﺴﻚ ﺗﻠﻒ ﻋﻠﻰ ﺍﻟﻘﺎﻋﺎﺕ ﻭﺗﺸﻮﻑ ﻗﺎﻋﺔ ﺗﻜﻮﻥ ﻛﺒﻴﺮﺓ ﻭﻛﻮﻳﺴﺔ ﻭﺍﻧﺎ ﺍﻟﻠﻲ ﺣﺎﺗﻜﻔﻞ ﺑﻜﻞ ﺍﻟﻤﺼﺎﺭﻳﻒ
- ﺑﺲ ﻳﺎ ﻋﻤﻲ ﻛﺪﻩ ﻛﺘﻴﺮ ﺍﻭﻱ
- ﺍﻧﺘﻮﺍ ﻛﻠﻜﻮﺍ ﻭﻻﺩﻱ ﻳﺎ ﻋﻠﻲ ... ﺳﻮﺍﺀ ﻧﺎﺩﻳﺔ ﻭﻧﻮﺭﺍ ﺍﻭ ﺍﻧﺖ ﻭﻟﺒﻨﻰ ﻭﺍﺣﻤﺪ ﺍﻧﺘﺎ ﺍﻟﺨﻤﺴﺔ ﻭﻻﺩﻱ ... ﻭﺍﻥ ﻛﺎﻥ ﻋﻠﻰ ﺍﺑﻦ ﺍﻟﺤﺴﻴﻨﻲ ﻓﻜﻠﻪ ﻋﺸﺎﻥ ﺧﺎﻃﺮ ﻧﺎﺩﻳﺔ ... ﻳﻼ ﺍﺗﻔﻀﻞ ﺑﻘﻰ ﻋﻠﻰ ﻣﻜﺘﺒﻚ ﻋﺸﺎﻥ ﺗﺨﻠﺺ ﻛﻞ ﺍﻟﺸﻐﻞ ﺍﻟﻠﻲ ﻭﺭﺍﻙ ﻗﺒﻞ ﻣﺎﺗﺎﺧﺪ ﺍﺟﺎﺯﺓ ﺷﻬﺮ ﺍﻟﻌﺴﻞ
- ﺣﺎﺿﺮ ﻳﺎ ﻋﻤﻲ ﻋﻦ ﺇﺫﻥ ﺣﻀﺮﺗﻚ
&&&&&&&&&&&&&&&&&&&&&&&&&
ﻛﺎﻥ ﻋﻠﻲ ﻳﺘﺤﺪﺙ ﻓﻲ ﺍﻟﻬﺎﺗﻒ ﻣﻊ ﺍﺣﻤﺪ ﻭﻳﻘﻮﻝ ﻓﻲ ﻋﺼﺒﻴﺔ :
- ﺍﻧﺖ ﻟﻴﻪ ﻣﺎﻗﻠﺘﻠﻴﺶ ﻗﺒﻞ ﻣﺎ ﺗﻜﻠﻢ ﻋﻤﻲ ﻋﻠﻰ ﺣﺎﺟﺔ ﺯﻱ ﺩﻱ
ﺗﻌﺠﺐ ﺍﺣﻤﺪ ﻣﻦ ﻟﻬﺠﺘﻪ ﺍﻟﺤﺎﺩﺓ ﻭﺍﻟﺘﻲ ﻻ ﻳﺠﺪ ﻣﺒﺒﺮﺍ ﻟﻬﺎ ﻓﻘﺎﻝ ﺑﻬﺪﻭﺀ :
- ﻭﻓﻴﻬﺎ ﺇﻳﻪ ﻳﻌﻨﻲ ﻳﺎ ﻋﻠﻲ ? ﻣﺎ ﺍﻧﺎ ﺳﺒﻖ ﻭﺧﻄﺒﺘﻬﺎ ﻣﻨﻪ ﻗﺒﻞ ﻣﺎ ﺍﻗﻮﻟﻚ ... ﻭﺑﻌﺪﻳﻦ ﻣﺎ ﺍﻧﺎ ﻗﻠﺖ ﺍﻥ ﺧﺎﻟﻲ ﺣﻴﻘﻮﻟﻚ ﻓﻌﺎﺩﻱ ﻳﻌﻨﻲ ... ﻫﻮ ﺍﺣﻨﺎ ﻛﻨﺎ ﺣﻨﺘﺠﻮﺯ ﻣﻦ ﻭﺭﺍﻙ ﻭﻻ ﺣﺎﺟﺔ !?
- ﻣﺎﺳﻴﺎﺩﺗﻚ ﺍﺗﻔﻘﺖ ﻣﻊ ﻟﺒﻨﻰ ﻭﺧﺎﻟﻚ ﻭﺳﺎﻳﺒﻨﻲ ﺁﺧﺮ ﻣﻦ ﻳﻌﻠﻢ
- ﺍﻧﺎ ﻣﺶ ﻓﺎﻫﻢ ﻓﻴﻪ ﺇﻳﻪ ﻟﻜﻞ ﺩﻩ ﻳﺎ ﻋﻠﻲ ?
- ﻓﻴﻪ ﺍﻥ ﺳﻴﺎﺩﺗﻚ ﺣﻄﻴﺘﻨﻲ ﻓﻮﺭﻃﺔ ﻣﺎﻋﺮﻓﺘﺶ ﺍﺧﺮﺝ ﻣﻨﻬﺎ ﺍﺯﺍﻱ
- ﻃﻴﺐ ﺇﻫﺪﻱ ﺑﺲ ﻭﻓﻬﻤﻨﻲ ﺇﻳﻪ ﺍﻟﻠﻲ ﺣﺼﻞ ﻭﺧﻼﻙ ﻣﻨﻔﻌﻞ ﺑﺎﻟﺸﻜﻞ ﺩﻩ
- ﺍﻟﻠﻲ ﺣﺼﻞ ﻳﺎ ﺳﻴﺪﻱ ﺍﻥ ﺧﺎﻟﻚ ﻃﻠﺐ ﻣﻨﻲ ﺍﻋﻤﻞ ﻓﺮﺣﻲ ﺍﻧﺎ ﻭﻧﻮﺭﺍ ﻣﻌﺎﻛﻮﺍ ﻓﻨﻔﺲ ﺍﻟﻴﻮﻡ ﺯﻱ ﻛﺘﺐ ﺍﻟﻜﺘﺎﺏ ﺑﺮﺿﻪ
- ﻃﻴﺐ ﺩﻱ ﻓﻴﻬﺎ ﺇﻳﻪ ? ﻣﺎﺍﻧﺖ ﻛﻨﺖ ﻛﺪﻩ ﻭﻻ ﻛﺪﻩ ﺣﺘﺘﺠﻮﺯ ... ﻭﻻ ﺍﻧﺖ ﻛﻨﺖ ﻣﺘﻔﻖ ﻋﻠﻰ ﻛﺘﺐ ﻛﺘﺎﺏ ﺑﺲ
- ﻻ ﻳﺎ ﻇﺮﻳﻒ ﺍﺣﻨﺎ ﻛﻨﺎ ﺣﻨﺘﺠﻮﺯ ﺑﺲ ﺑﻌﺪ ﺳﻨﺔ ﺑﻌﺪ ﻣﺎ ﻧﺎﺧﺪ ﻋﻠﻰ ﺑﻌﺾ ﻭﺍﺣﺲ ﺇﻧﻲ ﺑﺤﺒﻬﺎ ﺯﻱ ﻣﺎﺑﺘﺤﺒﻨﻲ ... ﻟﻜﻦ ﺩﻟﻮﻗﺘﻲ ﺣﻨﺘﺠﻮﺯ ﺍﺯﺍﻱ ﻭﺍﺣﻨﺎ ﻣﺶ ﻃﺎﻳﻘﻴﻦ ﺑﻌﺾ ﺑﺎﻟﺸﻜﻞ ﺩﻩ ? ﺩﻱ ﺣﺘﻲ ﻫﻴﺎ ﻛﻤﺎﻥ ﺭﻓﻀﺖ ﻭﻋﻤﻚ ﻣﺼﻤﻢ ﻳﻨﻔﺬ ﺍﻟﻠﻲ ﻓﺪﻣﺎﻏﻪ
- ﻛﻨﺖ ﻗﻮﻟﻪ ﺍﻧﻚ ﻣﺶ ﻣﻮﺍﻓﻖ ﻣﺎﻓﻴﻬﺎﺵ ﺣﺎﺟﺔ ﻳﻌﻨﻲ
- ﻳﺎ ﺳﻼﻡ ﺑﺎﻟﺒﺴﺎﻃﺔ ﺩﻱ ﻋﺎﻳﺰﻧﻲ ﺍﻗﻮﻟﻪ ﻣﺶ ﻋﺎﻳﺰ ﺍﺗﺠﻮﺯ ﺑﻨﺘﻚ ﺩﻟﻮﻗﺘﻲ
ﺍﺟﺎﺑﻪ ﺍﺣﻤﺪ ﻗﺎﺋﻼ ﺑﺤﺪﺓ :
- ﺁﻩ ... ﻓﺎﻧﺖ ﻃﺒﻌﺎ ﻗﻮﻟﺘﻠﻪ ﺍﻧﻚ ﻣﻮﺍﻓﻖ ﻭﺳﻴﺒﺘﻬﺎ ﻫﻴﺎ ﺍﻟﻠﻲ ﺗﻘﻮﻝ ﻷ ﻭﺗﺒﻘﻰ ﻓﻮﺵ ﺍﻟﻤﺪﻓﻊ ﻣﻊ ﻋﻤﻚ ... ﻭﺍﻧﺖ ﻋﺎﺭﻑ ﺍﺳﻠﻮﺑﻪ ﻣﻌﺎﻫﺎ ﻋﺎﻣﻞ ﺍﺯﺍﻱ ... ﺍﻟﻤﻬﻢ ﺍﻧﺖ ﺗﺤﺴﻦ ﺻﻮﺭﺗﻚ ﺍﺩﺍﻣﻪ ﻭﺗﺒﻘﻰ ﺍﻟﻤﻄﻴﻊ ﺍﻟﻠﻲ ﺑﻴﺴﻤﻊ ﻛﻼﻡ ﻋﻤﻪ ... ﻟﻮ ﻛﺎﻥ ﻋﻨﺪﻙ ﺍﻟﺸﺠﺎﻋﺔ ﻛﻨﺖ ﻗﻠﺖ ﺍﻧﻚ ﺍﻧﺖ ﺍﻟﻠﻲ ﻣﺶ ﻣﻮﺍﻓﻖ ﻣﺶ ﺗﺠﻴﺒﻬﺎ ﻓﻨﻮﺭﺍ ﻭﺗﺒﻘﻰ ﺍﻧﺖ ﻣﺎﻋﻤﻠﺘﺶ ﺣﺎﺟﺔ ... ﺑﻘﻰ ﻫﻴﺎ ﺩﻱ ﺍﻟﺮﺟﻮﻟﻪ ﻳﺎ ﻋﻠﻲ ?
- ﺍﻧﺖ ﻣﺶ ﺣﺘﺒﻄﻞ ﺍﺳﻠﻮﺑﻚ ﺍﻟﻤﺴﺘﻔﺰ ﺩﻩ ﻣﻌﺎﻳﺎ
- ﺩﻩ ﺑﺪﺍﻝ ﻣﺎ ﺗﺤﻤﺪ ﺭﺑﻨﺎ ﺍﻥ ﻋﻨﺪﻙ ﺻﺎﺣﺐ ﺯﻳﻲ ﻛﺪﻩ ﺑﻴﺮﺟﻌﻚ ﻟﻠﺤﻖ ﺑﺪﺍﻝ ﻣﺎﻳﻌﻴﻨﻚ ﻋﻠﻰ ﺍﻟﻐﻠﻂ
- ﻭﺍﻟﻠﻪ ﻳﺎ ﺍﺣﻤﺪ ﺍﻧﺎ ﻣﺎﻓﻜﺮﺗﺶ ﻓﻴﻬﺎ ﻛﺪﻩ ... ﺍﻧﺎ ﺧﻔﺖ ﺍﻗﻮﻝ ﺍﻳﻮﻩ ﻫﻴﺎ ﺗﻜﻮﻥ ﻣﺶ ﻣﻮﺍﻓﻘﺔ ﺑﺴﺒﺐ ﺍﻟﺼﺪﺍﻣﺎﺕ ﺍﻟﻠﻲ ﺑﺘﺤﺼﻞ ﺑﻴﻨﺎ ﻣﻦ ﺍﻭﻝ ﺍﻟﺨﻄﻮﺑﺔ ... ﻭﻓﻨﻔﺲ ﺍﻟﻮﻗﺖ ﺧﻔﺖ ﺍﺭﻓﺾ ﻫﻴﺎ ﺗﻌﺮﻑ ﻭﺗﻔﺘﻜﺮ ﺇﻧﻲ ﻣﺶ ﻋﺎﻳﺰﻫﺎ ... ﻭﺍﻟﻠﻪ ﺍﻧﺎ ﻋﻤﻠﺖ ﻛﺪﻩ ﻋﺸﺎﻧﻬﺎ ... ﻣﺎﻓﻜﺮﺕﺵ ﻓﺎﻟﻠﻲ ﺍﻧﺖ ﺑﺘﻘﻮﻟﻪ ﺩﻩ ... ﺍﻧﺎ ﻣﺶ ﻧﺪﻝ ﺍﻭﻱ ﻛﺪﻩ ﻳﺎ ﺍﺣﻤﺪ
- ﻭﻫﻴﺎ ﻣﺶ ﺩﻱ ﺍﻟﺤﻘﻴﻘﺔ ﻳﺎ ﻋﻠﻲ ... ﻭﻫﻮ ﺍﻧﺖ ﻋﺎﻳﺰﻫﺎ ﻳﻌﻨﻲ ?
ﻇﻞ ﻋﻠﻲ ﺻﺎﻣﺘﺎ ﻟﻔﺘﺮﺓ ﻭﺍﺣﻤﺪ ﻳﻨﺘﻈﺮ ﻣﻨﻪ ﺟﻮﺍﺑﺎ ﻟﺴﺆﺍﻟﻪ ﺣﺘﻲ ﻧﻄﻖ ﺍﺧﻴﺮﺍ ﻗﺎﺋﻼ :
- ﺍﻳﻮﻩ ﻋﺎﻳﺰﻫﺎ ﻳﺎ ﺍﺣﻤﺪ ﻋﺎﻳﺰﻫﺎ ﺍﺭﺗﺤﺖ ﻛﺪﻩ
ﺍﺑﺘﺴﻢ ﺍﺣﻤﺪ ﻗﺎﺋﻼ :
- ﻃﺐ ﻭﻣﺎﻟﻚ ﺑﺘﻘﻮﻟﻬﺎ ﻛﺪﻩ ﻟﻴﻪ ? ﻃﻴﺐ ﺍﻣﺎﻝ ﺇﻳﻪ ﺍﻟﻠﻲ ﻗﻮﻟﺘﻪ ﻣﻦ ﺷﻮﻳﺔ ﺩﻩ ﻭﺍﻧﻚ ﻣﺶ ﻋﺎﻳﺰ ﺗﺘﺠﻮﺯ ﺩﻟﻮﻗﺘﻲ
ﻣﺴﺢ ﻋﻠﻲ ﻋﻠﻰ ﻭﺟﻬﻪ ﻭﺍﺧﺬﻧﻔﺴﺎ ﻋﻤﻴﻘﺎ ﻗﺒﻞ ﺍﻥ ﻳﺠﻴﺒﻪ ﻗﺎﺋﻼ :
- ﺷﻮﻑ ﻳﺎ ﺍﺣﻤﺪ ... ﻫﻴﺎ ﻓﻴﻬﺎ ﺷﻮﻳﺔ ﺣﺎﺟﺎﺕ ﻛﺪﻩ ﺑﺘﻀﺎﻳﻘﻨﻲ ﻣﻨﻬﺎ ﻟﻜﻦ ﺩﻩ ﻣﺶ ﻣﻌﻨﺎﻩ ﺍﻧﻲ ﻣﺶ ﻋﺎﻳﺰ ﺍﺗﺠﻮﺯﻫﺎ ... ﻭﺩﻩ ﻏﻴﺮ ﺇﻧﻲ ﻣﺶ ﻗﺎﺩﺭ ﺍﺣﺪﺩ ﻣﺸﺎﻋﺮﻱ ﻣﻦ ﻧﺎﺣﻴﺘﻬﺎ ﻋﺎﻣﻠﺔ ﺍﺯﺍﻱ ﻟﺤﺪ ﺩﻟﻮﻗﺘﻲ ... ﺑﺺ ﻳﺎ ﺍﺣﻤﺪ ﺍﻧﺎ ﻣﺘﻠﻐﺒﻂ ﺍﻭﻱ ﻭﻣﺶ ﻋﺎﺭﻑ ﺍﻧﺎ ﻋﺎﻳﺰ ﺇ ﻳﻪ ﺑﺠﺪ ... ﻓﺎﻛﺮ ﻟﻤﺎ ﻗﻠﺘﻠﻚ ﺍﻧﺎ ﺑﺤﺲ ﺍﻧﻬﺎ ﺯﻱ ﺍﺧﺘﻲ ... ﻟﺤﺪ ﺩﻟﻮﻗﺘﻲ ﺣﺎﺳﺲ ﺇﻧﻲ ﻣﺶ ﻗﺎﺩﺭ ﺍﺗﻐﻠﺐ ﻋﻠﻰ ﺇﺣﺴﺎﺳﻲ ﺩﻩ
ﺷﻌﺮ ﺍﺣﻤﺪ ﺑﻤﺎ ﻳﻌﺘﻤﻞ ﺩﺍﺧﻞ ﺻﺪﺭﻩ ﻓﺮﺃﻯ ﺍﻥ ﺫﻟﻚ ﻟﻴﺲ ﺍﻟﻮﻗﺖ ﺍﻟﻤﻨﺎﺳﺐ ﻟﻤﻤﺎﺭﺳﺔ ﺍﻟﻤﺰﻳﺪ ﻣﻦ ﺍﻟﻀﻐﻮﻁ ﻋﻠﻴﻪ ﻓﻘﺎﻝ ﺑﻬﺪﻭﺀ :
- ﺍﺗﺠﻮﺯﻫﺎ ﻳﺎ ﻋﻠﻲ ... ﺍﺗﺠﻮﺯﻫﺎ ﻭﺣﺎﻭﻝ ﺗﺘﻜﻠﻢ ﻣﻌﺎﻫﺎ ﺑﻬﺪﻭﺀ ﻋﻦ ﺍﻟﺤﺎﺟﺎﺕ ﺍﻟﻠﻲ ﺑﺘﻀﺎﻳﻘﻚ ﻣﻨﻬﺎ ... ﺳﺎﻣﻌﻨﻲ ﺑﻬﺪﻭﺀ ... ﺑﻼﺵ ﺗﺒﻘﻲ ﻣﺪﺏ ﺯﻱ ﻋﺎﺩﺗﻚ ... ﻭﺍﻛﻴﺪ ﻳﻌﻨﻲ ﻟﻤﺎ ﺗﺘﺠﻮﺯﻭﺍ ﻭﺗﺒﻘﻮﺍ ﻣﻊ ﺑﻌﺾ ﺍﻛﻴﺪ ﻳﻌﻨﻲ ﺣﺘﻨﺴﻰ ﺣﻜﺎﻳﺔ ﺍﺧﺘﻚ ﺩﻱ ﻭﺍﻇﻦ ﺍﻧﻚ ﻓﺎﻫﻤﻨﻲ ﻛﻮﻳﺲ
ﺑﺪﺍ ﻋﻠﻴﻪ ﺍﻹﻗﺘﻨﺎﻉ ﻭﻫﻮ ﻳﺠﻴﺒﻪ ﻗﺎﺋﻼ :
- ﻃﻴﺐ ﻭﺍﺗﺠﻮﺯﻫﺎ ﺍﺯﺍﻱ ﺇﺫﺍ ﻛﺎﻧﺖ ﻣﺶ ﻃﺎﻳﻘﺔ ﺗﺒﺺ ﻓﻮﺷﻲ ﻓﺎﻟﻮﻗﺖ ﺍﻟﺤﺎﻟﻲ
- ﺍﻧﺖ ﻋﺎﺭﻑ ﻛﻮﻳﺲ ﺍﻧﻬﺎ ﺑﺘﺤﺒﻚ ﻭﺍﻥ ﺍﻟﻜﻼﻡ ﺩﻩ ﻣﻦ ﻭﺭﺍ ﻗﻠﺒﻬﺎ ... ﺍﻭ ﻳﻤﻜﻦ ﻋﺎﻳﺰﺓ ﺗﺴﻤﻌﻬﺎ ﻣﻨﻚ ﺍﻧﺖ ﻭﺗﺤﺲ ﺍﻧﻚ ﻋﺎﻳﺰﻫﺎ ﻓﻌﻼ ... ﻗﺮﺏ ﻣﻨﻬﺎ ﻳﺎ ﻋﻠﻲ ﻭﻗﻮﻟﻬﺎ ﺍﻟﻜﻠﻤﺔ ﺍﻟﻠﻲ ﻧﻔﺴﻬﺎ ﺗﺴﻤﻌﻬﺎ ﻣﻨﻚ ﺣﺘﻰ ﻟﻮ ﻣﺶ ﺣﺎﺳﺴﻬﺎ ﻓﻌﻼ ﻳﺠﻮﺯ ﺍﻟﻜﺬﺏ ﻋﻠﻰ ﺍﻟﺰﻭﺟﺔﻳﺎ ﺁﺧﻲ ... ﺻﺪﻗﻨﻲ ﻣﻤﻜﻦ ﺳﺎﻋﺘﻬﺎ ﺗﻼﻗﻴﻬﺎ ﻫﻴﺎ ﺍﻟﻠﻲ ﺑﺘﻘﻮﻟﻚ ﺗﻌﺎﻟﻰ ﻧﺘﺠﻮﺯ ﺩﻟﻮﻗﺘﻲ ... ﻭﻟﻮ ﺇﻧﻲ ﻋﺎﺭﻑ ﺍﻥ ﺑﻨﺖ ﺧﺎﻟﻲ ﻣﺤﺘﺮﻣﺔ ﻭﻣﺶ ﻣﻤﻜﻦ ﺗﻘﻮﻝ ﻛﺪﻩ
ﺷﻌﺮ ﻋﻠﻲ ﺑﺎﻟﻐﻴﺮﺓ ﻣﻦ ﻛﻠﻤﺎﺕ ﺍﺣﻤﺪ ﺭﻏﻢ ﻋﻠﻤﻪ ﺑﻤﻘﺼﺪﻩ ﻣﻨﻬﺎ ﻓﻘﺎﻝ ﻣﺤﺎﻭﻻ ﺗﻐﻴﻴﺮ ﺍﻟﻤﻮﺿﻮﻉ :
- ﻣﺎﺷﻲ ﻳﺎ ﺍﺧﻮﻳﺎ ... ﻛﻔﺎﻳﺔ ﻛﻼﻡ ﺑﻘﻰ ﻋﻦ ﺑﻨﺖ ﺧﺎﻟﻚ ﻭﻗﻮﻟﻲ ﻧﺎﻭﻱ ﺗﻌﻤﻞ ﺇﻳﻪ ﻓﺎﻷﺳﺒﻮﻋﻴﻦ ﺍﻟﻠﻲ ﺑﺎﻗﻴﻴﻦ ﺩﻭﻝ ?
ﺍﺧﺬ ﺍﺣﻤﺪ ﻳﻘﺺ ﻋﻠﻰ ﻋﻠﻲ ﻣﺎ ﻳﻨﺘﻮﻱ ﻓﻌﻠﻪ ﻓﻲ ﺍﻷﻳﺎﻡ ﺍﻟﻤﻘﺒﻠﺔ ﻭﺍﻧﻪ ﺳﻮﻑ ﻳﺤﻀﺮ ﺇﻟﻰ ﺍﻟﻘﺎﻫﺮﺓ ﺑﺼﺤﺒﺔ ﺷﻘﻴﻘﺘﻪ ﺃﻣﻨﻴﺔ ﻟﻴﺼﺤﺒﺎ ﻟﺒﻨﻰ ﻟﻜﻲ ﺗﻘﻮﻡ ﺑﺸﺮﺍﺀ ﺍﻟﺸﺒﻜﺔ ﻭﻓﺴﺘﺎﻥ ﺍﻟﺰﻓﺎﻑ ... ﻭﺍﺧﺒﺮﻩ ﺍﻧﻪ ﻗﺪ ﺍﻧﺘﻬﻰ ﺗﻤﺎﻣﺎ ﻣﻦ ﺇﻋﺪﺍﺩ ﺍﻟﺸﻘﺔ ﻭﺗﻐﻴﻴﺮ ﺩﻳﻜﻮﺭﺍﺗﻬﺎ ﻓﺴﺄﻟﻪ ﻋﻠﻲ ﻣﺘﻌﺠﺒﺎ :
- ﺍﻧﺖ ﺍﺯﺍﻱ ﻟﺤﻘﺖ ﺗﺨﻠﺺ ﺍﻟﺸﻘﺔ ﻓﺸﻬﺮﻳﻦ ﺍﺗﻨﻴﻦ
- ﺍﻳﻪ ﻳﺎ ﻋﻢ ... ﻫﻮ ﺍﻧﺖ ﻓﺎﻛﺮ ﺍﻥ ﺍﻧﺖ ﻟﻮﺣﺪﻙ ﺍﻟﻠﻲ ﻣﻬﻨﺪﺱ ﺩﻳﻜﻮﺭ ﺷﺎﻃﺮ ﻭﻻ ﺇﻳﻪ
ﺍﺧﺒﺮﻩ ﻋﻠﻲ ﺑﻄﻠﺐ ﻋﻤﻪ ﺍﻥ ﻳﺒﺤﺚ ﻋﻦ ﻗﺎﻋﺔ ﺟﻴﺪﺓ ﻟﻴﻘﺎﻡ ﻓﻴﻬﺎ ﺣﻔﻞ ﺍﻟﺰﻓﺎﻑ ﻭﺍﻧﻪ ﺳﻴﻘﻮﻡ ﺑﺘﺤﻤﻞ ﻛﺎﻓﺔ ﺍﻟﺘﻜﺎﻟﻴﻒ ... ﺍﻷﻣﺮ ﺍﻟﺬﻱ ﺭﻓﻀﻪ ﺍﺣﻤﺪ ﻗﺎﺋﻼ ﺑﺈﻋﺘﺮﺍﺽ :
- ﻻ ﻃﺒﻌﺎ ﺃﻧﺎ ﻣﺶ ﻣﻮﺍﻓﻖ ﻋﻠﻰ ﺣﺎﺟﺔ ﺯﻱ ﻛﺪﻩ
- ﻣﺎﻓﻴﻬﺎﺵ ﺣﺎﺟﺔ ﻳﺎ ﺍﺣﻤﺪ ... ﺩﻩ ﺧﺎﻟﻚ ﻭﻋﻤﻲ ﺍﻧﺎ ﻭﻟﺒﻨﻲ ﻭﻧﺎﺩﻳﺔ ﻭﻧﻮﺭﻫﺎﻥ ﺩﻭﻝ ﺑﻨﺎﺗﻪ .... ﻋﺎﺩﻱ ﻳﻌﻨﻲ ... ﻳﺎ ﺳﻴﺪﻱ ﺍﻋﺘﺒﺮﻫﺎ ﻫﺪﻳﺔ ﺍﻟﻔﺮﺡ ... ﻣﺶ ﻛﻔﺎﻳﺔ ﺍﻧﻚ ﺭﻓﻀﺖ ﺗﺎﺧﺪ ﻣﻨﻪ ﺍﻟﺸﻘﺔ ﻭﺻﻤﻤﺖ ﺍﻧﻚ ﺗﺸﺘﺮﻳﻬﺎ
ﺍﺧﺬ ﺍﺣﻤﺪ ﻳﺸﺮﺡ ﻟﻌﻠﻲ ﻭ ﺟﻬﺔ ﻧﻈﺮﻩ ﻗﺎﺋﻼ :
- ﺍﻧﺎ ﻛﺎﻥ ﻻﺯﻡ ﺍﻋﻤﻞ ﻛﺪﻩ ﻃﺒﻌﺎ ... ﺍﻧﺎ ﻣﺎ ﺍﻗﺒﻠﺶ ﺍﻧﻲ ﺍﺳﻜﻦ ﻣﺮﺍﺗﻲ ﻓﺸﻘﺔ ﻣﺶ ﺟﺎﻳﺒﻬﺎ ﻣﻦ ﻋﺮﻗﻲ ﻭﺗﻌﺒﻲ ﺣﺘﻰ ﻟﻮ ﻛﺎﻧﺖ ﻣﻦ ﺧﺎﻟﻲ ﺍﻟﻠﻲ ﻫﻮ ﻋﻤﻬﺎ
- ﺍﻣﺎﻝ ﺣﺘﻘﻮﻝ ﻋﻠﻴﺎ ﺇﻳﻪ ﻟﻤﺎ ﺗﻌﺮﻑ ﺍﻥ ﻋﻤﻚ ﻋﺎﻳﺰﻧﺎ ﻧﺴﻜﻦ ﻣﻌﺎﻩ ﺑﻌﺪ ﻣﺎ ﻧﺘﺠﻮﺯ ﻋﺸﺎﻥ ﻣﺎﻳﺒﻘﺎﺵ ﻓﺎﻟﻔﻴﻼ ﻟﻮﺣﺪﻩ ﺑﻌﺪ ﺑﻨﺎﺗﻪ ﻣﺎﻳﺘﺠﻮﺯﻭﺍ
- ﻻ ﻳﺎ ﺣﺒﻴﺒﻲ ﺍﻟﻮﺿﻊ ﻣﺨﺘﻠﻒ ... ﻧﻮﺭﻫﺎﻥ ﺩﻱ ﺑﻨﺘﻪ ﻳﻌﻨﻲ ﻣﺎﻓﻴﻬﺎﺵ ﺣﺎﺟﺔ
- ﻃﻴﺐ ﺳﻼﻡ ﺑﻘﻰ ﻳﺎ ﺍﺧﻮﻳﺎ ﻋﺸﺎﻥ ﺍﻟﺤﻖ ﺍﺭﻭﺡ ﻋﻨﺪ ﻋﻤﻲ ﻭﺍﺗﻜﻠﻢ ﻣﻊ ﻧﻮﺭﻫﺎﻥ ﻭﺍﺣﺎﻭﻝ ﺍﻗﻨﻌﻬﺎ ﺑﻤﻮﺿﻮﻉ ﺍﻟﺠﻮﺍﺯ ﻋﺸﺎﻥ ﻣﺎﺗﻌﻤﻠﺶ ﻣﺸﻜﻠﺔ ﻣﻊ ﺧﺎﻟﻚ
&&&&&&&&&&&&&&&&&&&&&&&&&&&&&&
ﻛﺎﻥ ﺻﻔﻮﺕ ﻳﺘﺤﺪﺙ ﻣﻊ ﻧﻮﺭﺍ ﻓﻲ ﺃﻣﺮ ﺯﻭﺍﺟﻬﺎ ﺣﻴﻦ ﺍﺧﺒﺮﺗﻪ ﺑﺮﻓﻀﻬﺎ ﻭﺻﻤﻤﺖ ﻋﻠﻴﻪ ﻗﺎﺋﻠﺔ :
- ﻳﺎﺑﺎﺑﺎ ﺑﻌﺪ ﺇﺫﻥ ﺣﻀﺮﺗﻚ ﺩﻩ ﺭﺃﻳﻲ ﻭﺍﻧﺎ ﻣﺶ ﺣﺎﻏﻴﺮﻩ
ﺍﺷﻌﻞ ﺭﺩﻫﺎ ﻓﺘﻴﻞ ﻏﻀﺒﻪ ﻓﺎﺟﺎﺑﻬﺎ ﺑﺈﻧﻔﻌﺎﻝ :
- ﺍﻧﺘﻲ ﺑﺘﺘﺤﺪﻳﻨﻲ ﻳﺎ ﺑﻨﺖ ... ﻳﻌﻨﻲ ﺇﻳﻪ ﻣﺶ ﻋﺎﻳﺰﺓ ﺗﺘﺠﻮﺯﻱ ﺩﻟﻮﻗﺘﻲ ? ﻫﻮ ﻟﻌﺐ ﻋﻴﺎﻝ
- ﻳﺎﺑﺎﺑﺎ ﺍﻧﺎ ﻣﺶ ﻋﺎﻳﺰﺓ ﺍﺗﺠﻮﺯ ﻏﻴﺮ ﻟﻤﺎ ﺍﺧﻠﺺ ﺩﺭﺍﺳﺘﻲ ﺍﻷﻭﻝ ﺍﻇﻦ ﺩﻩ ﻣﻦ ﺣﻘﻲ ... ﻭﻣﺶ ﻣﻌﻨﻰ ﺍﻥ ﻟﺒﻨﻰ ﻭﺍﻓﻘﺖ ﻳﺒﻘﻰ ﺍﻧﺎ ﻛﻤﺎﻥ ﻻﺯﻡ ﺍﻭﺍﻓﻖ
- ﺍﺳﻤﻌﻴﻨﻲ ﻛﻮﻳﺲ ﻋﺸﺎﻥ ﺍﻟﻜﻼﻡ ﺩﻩ ﺣﺎﻗﻮﻟﻪ ﻷﺧﺮ ﻣﺮﺓ ... ﺍﻧﺎ ﺍﺗﻔﻘﺖ ﻣﻊ ﻋﻠﻲ ﺍﻥ ﺍﻟﻔﺮﺡ ﺣﻴﻜﻮﻥ ﻣﻊ ﻓﺮﺡ ﺍﺧﺘﻚ ﻭﺑﻨﺖ ﻋﻤﻚ ﻭﻛﻠﻤﺔ ﺯﻳﺎﺩﺓ ﻓﺎﻟﻤﻮﺿﻮﻉ ﺩﻩ ﻣﺶ ﻋﺎﻳﺰ ﺍﺣﺴﻦ ﻣﺎ ﺗﺒﻘﻲ ﺍﻟﺠﺎﻧﻴﺔ ﻋﻠﻰ ﺭﻭﺣﻚ
ﻟﻢ ﺗﺠﺪ ﻧﻮﺭﺍ ﺑﺪﺍ ﻣﻦ ﺃﻥ ﺗﺮﻣﻲ ﺑﻮﺭﻗﺘﻬﺎ ﺍﻷﺧﻴﺮﺓ ﻓﻘﺎﻟﺖ :
- ﻳﺎﺑﺎﺑﺎ ﺣﻀﺮﺗﻚ ﺳﺒﻖ ﻭﺍﺗﺠﻮﺯﺕ ﻏﺼﺐ ﻋﻨﻚ ﻭﻛﺎﻧﺖ ﺍﻟﻨﺘﻴﺠﺔ ﺍﻟﻠﻲ ﺍﺣﻨﺎ ﻓﻴﻪ ﺩﻟﻮﻗﺘﻲ ... ﻳﻌﻨﻲ ﺍﻟﻤﻔﺮﻭﺽ ﺍﻥ ﺣﻀﺮﺗﻚ ﺗﺤﺘﺮﻡ ﺭﻏﺒﺘﻲ ﻭﻣﺎﺗﻀﻐﻄﺶ ﻋﻠﻴﺎ ﺍﻛﺘﺮ ﻣﻦ ﻛﺪﻩ
ﺃﻟﺠﻤﺘﻪ ﺍﻟﻤﻔﺎﺟﺄﺓ ﻭﻟﻢ ﻳﺘﻮﻗﻊ ﺍﻥ ﺗﺮﺩ ﻋﻠﻴﻪ ﻧﻮﺭﺍ ﺑﻬﺬﺍ ﺍﻟﺮﺩ ﺍﻟﺤﺎﺳﻢ ﺍﻟﺬﻱ ﻛﺎﻥ ﻳﺮﻯ ﺍﻧﻬﺎ ﻣﺤﻘﺔ ﺑﻪ ﺗﻤﺎﻣﺎ ... ﻟﻢ ﻳﺠﺪ ﺍﻟﻜﻠﻤﺎﺕ ﺍﻟﻤﻨﺎﺳﺒﺔ ﻟﻠﺮﺩ ﻋﻠﻴﻪ ﻓﻘﺮﺭ ﺍﻥ ﺗﻜﻮﻥ ﻳﺪﻩ ﻻ ﻟﺴﺎﻧﻪ ﻫﻲ ﺍﻟﻤﺠﻴﺒﺔ ... ﻓﺎﻗﺘﺮﺏ ﻣﻨﻬﺎ ﻭﺍﻣﺘﺪﺕ ﻳﺪﻩ ﻟﺘﺠﺬﺑﻬﺎ ﻣﻦ ﺧﺼﻼﺕ ﺷﻌﺮﻫﺎ ﺍﻟﺤﺮﻳﺮﻱ ﺍﻟﻤﻨﺴﺪﻝ ﺧﻠﻒ ﻇﻬﺮﻫﺎ ﻭﻫﻮ ﻳﺤﺮﻛﻬﺎ ﻳﻤﻨﺔ ﻭﻳﺴﺮﺓ ﺻﺎﺭﺧﺎ ﺑﺈﻧﻔﻌﺎﻝ :
- ﺍﻟﻈﺎﻫﺮ ﻛﺪﻩ ﺍﻧﻲ ﻣﺎﻋﺮﻓﺘﺶ ﺍﺭﺑﻴﻜﻲ ﻛﻮﻳﺲ ﻗﺒﻞ ﻛﺪﻩ ﻋﺸﺎﻥ ﺗﻘﻔﻲ ﻭﺗﺮﺩﻱ ﻋﻠﻴﺎ ﺑﺎﻟﺸﻜﻞ ﺩﻩ .... ﻭﻳﻈﻬﺮ ﻛﻤﺎﻥ ﺍﻧﻚ ﻋﺎﻳﺰﺓ ﺗﺘﺮﺑﻲ ﻣﻦ ﺍﻭﻝ ﻭﺟﺪﻳﺪ
ﺍﻏﻤﻀﺖ ﻋﻴﻨﻴﻬﺎ ﻣﺘﺄﻟﻤﺔ ﻭﻫﻲ ﺗﺮﺟﻮﻩ ﺃﻥ ﻳﺘﺮﻙ ﺷﻌﺮﻫﺎ ﻗﺎﺋﻠﺔ ﺑﺄﻟﻢ :
- ﺷﻌﺮﻱ ﻳﺎ ﺑﺎﺑﺎ ﺷﻌﺮﻱ ... ﺛﻢ ﻓﺠﺄﺓ ﺷﻌﺮﺕ ﺑﻴﺪ ﻗﻮﻳﺔ ﺗﻀﻤﻬﺎ ﻭﺍﺷﺘﻤﺖ ﺭﺍﺋﺤﺔ ﻋﻄﺮ ﺭﺟﺎﻟﻲ ﺟﺬﺍﺏ ﺗﻌﻠﻢ ﺟﻴﺪﺍ ﺑﺎﻟﻄﺒﻊ ﻟﻤﻦ ﺗﻜﻮﻥ ... ﻓﺘﺤﺖ ﻋﻴﻨﻴﻬﺎ ﻟﺘﺠﺪ ﻋﻠﻲ ﺍﻟﺬﻱ ﻟﻢ ﻳﻨﺘﺒﻪ ﺃﻳﺎ ﻣﻨﻬﻤﺎ ﺇﻟﻴﻪ ﻋﻨﺪﻣﺎ ﻃﺮﻕ ﺍﻟﺒﺎﺏ ﻟﺘﻔﺘﺢ ﻟﻪ ﺍﻟﺨﺎﺩﻣﺔ ﺛﻢ ﻳﺪﺧﻞ ﻟﻴﻔﺎﺟﺊ ﺑﻬﺬﺍ ﺍﻟﻤﺸﻬﺪ ﺍﻣﺎﻣﻪ ﻭﻫﻮ ﻳﻀﻤﻬﺎ ﺑﺈﺣﺪﻱ ﻳﺪﻩ ﻭﺑﺎﻟﻴﺪ ﺍﻷﺧﺮﻯ ﻳﺤﺎﻭﻝ ﺗﺤﺮﻳﺮ ﺧﺼﻼﺕ ﺷﻌﺮﻫﺎ ﻣﻦ ﻗﺒﻀﺔ ﻋﻤﻪ ﻭﻫﻮ ﻳﻘﻮﻝ ﺑﺮﺟﺎﺀ :
- ﻳﺎﻋﻤﻲ ﻟﻮ ﺳﻤﺤﺖ ﻣﺎﻓﻴﺶ ﺩﺍﻋﻲ ﻟﻠﻲ ﺣﻀﺮﺗﻚ ﺑﺘﻌﻤﻠﻪ ﺩﻩ ... ﺍﺩﻳﻨﻲ ﻓﺮﺻﺔ ﺑﺲ ﺍﺗﻜﻠﻢ ﻣﻌﺎﻫﺎ ﻭﺍﻧﺎ ﺣﺎﻗﻨﻌﻬﺎ
ﻧﺠﺢ ﻋﻠﻲ ﺃﺧﻴﺮﺍ ﻓﻲ ﻣﻬﻤﺘﻪ ﺑﻌﺪ ﺍﻥ ﺗﺮﻛﻬﺎ ﺻﻔﻮﺕ ﻗﺎﺋﻼ ﺑﻠﻬﺠﺔ ﺣﺎﺩﺓ :
- ﺍﻟﺒﻨﺖ ﺩﻱ ﻋﺎﻳﺰﺓ ﺩﻣﺎﻏﻬﺎ ﺗﺘﻜﺴﺮ ﻋﺸﺎﻥ ﺗﺤﺮﻡ ﺗﺮﺩ ﻋﻠﻴﺎ ... ﻭﺗﻘﻨﻌﻬﺎ ﺍﻭ ﻣﺎ ﺗﻘﻨﻌﻬﺎﺵ ﺍﻧﺎ ﻗﻠﺖ ﻛﻠﻤﺔ ﻭﻣﺶ ﺭﺍﺟﻊ ﻓﻴﻬﺎ
- ﺍﻭﻋﺪﻙ ﺍﻧﻬﺎ ﺗﻌﻤﻞ ﺍﻟﻠﻲ ﺣﻀﺮﺗﻚ ﻋﺎﻳﺰﻩ ﺑﺲ ﺍﺩﻳﻨﻲ ﻓﺮﺻﺔ ﺑﺲ ﺍﺭﺟﻮﻙ
- ﺍﻧﺎ ﻃﺎﻟﻊ ﺍﻭﺿﺘﻲ ﺩﻟﻮﻗﺘﻲ ﻭﺍﻣﺎ ﺍﺷﻮﻑ ﻛﻼﻡ ﻣﻴﻦ ﺍﻟﻠﻲ ﺣﻴﻤﺸﻲ
ﺻﻌﺪ ﺻﻔﻮﺕ ﺇﻟﻰ ﻏﺮﻓﺘﻪ ﻓﻘﺎﻝ ﻋﻠﻲ :
- ﺗﻌﺎﻟﻲ ﻧﻘﻌﺪ ﺑﺮﻩ ﻓﺎﻟﺠﻨﻴﻨﺔ ﻭﻧﺘﻜﻠﻢ ﺑﺮﺍﺣﺘﻨﺎ
ﺍﻣﺘﺜﻠﺖ ﻧﻮﺭﺍ ﻟﻄﻠﺒﻪ ﻓﺎﻣﺴﻚ ﻋﻠﻲ ﺑﻴﺪﻫﺎ ﻭﺧﺮﺟﺎ ﻣﻌﺎ ﺇﻟﻰ ﺍﻟﺤﺪﻳﻘﺔ ﺛﻢ ﺟﻠﺲ ﻋﻠﻰ ﺍﺣﺪ ﺍﻷﺭﺍﺋﻚ ﻭﺍﺟﻠﺴﻬﺎ ﺇﻟﻰ ﺟﻮﺍﺭﻩ ﺩﻣﻮﻋﻬﺎ ﺗﺸﻖ ﻭﺩﻳﺎﻧﺎ ﻋﻠﻰ ﺧﺪﻳﻬﺎ ... ﺷﻌﺮ ﻋﻠﻲ ﺑﺈﺭﺗﺠﺎﻓﺔ ﺟﺴﺪﻫﺎ ﻓﻀﻤﻬﺎ ﻣﺠﺪﺩﺍ ﻭﻫﻮ ﻳﻤﺴﺢ ﻋﻠﻰ ﺷﻌﺮﻫﺎ ﺑﺤﻨﺎﻥ ﻗﺎﺋﻼ :
- ﺧﻼﺹ ﺇﻫﺪﻱ ﺑﻘﻲ ﻋﺸﺎﻥ ﺧﺎﻃﺮﻱ ... ﺃﻧﺎ ﺍﺳﻒ ﺇﻧﻲ ﻛﻨﺖ ﺍﻟﺴﺒﺐ ﺍﻧﻚ ﺍﺗﻌﺮﺿﺘﻲ ﻟﻠﻤﻮﻗﻒ ﺩﻩ ... ﺣﻘﻚ ﻋﻠﻴﺎ
ﻣﺪ ﻋﻠﻲ ﻳﺪﻩ ﻓﻲ ﺟﻴﺐ ﺳﺘﺮﺗﻪ ﻭﺍﺧﺮﺝ ﻣﺤﺮﻣﺎ ﻭﺭﻗﻴﺎ ﻭﻣﺪ ﻳﺪﻩ ﺑﻪ ﺇﻟﻰ ﻧﻮﺭﺍ ﻗﺎﺋﻼ :
- ﺍﻣﺴﺤﻲ ﺩﻣﻮﻋﻚ ﺩﻱ ﻋﺸﺎﻥ ﻧﻌﺮﻑ ﻧﺘﻜﻠﻢ
ﺍﺧﺬﺗﻪ ﻣﻨﻪ ﺛﻢ ﺟﻔﻔﺖ ﺩﻣﻮﻋﻬﺎ ﻓﻘﺎﻝ ﻫﻮ ﺑﺈﺑﺘﺴﺎﻣﺔ :
- ﻫﻮ ﺍﻟﻤﻨﺪﻳﻞ ﺩﻩ ﻣﺶ ﺑﻴﻔﻜﺮﻙ ﺑﺤﺎﺟﺔ ?
ﻟﻢ ﺗﻔﻠﺢ ﺩﻋﺎﺑﺘﻪ ﻓﻲ ﻣﺤﻮ ﺳﺤﺎﺑﺔ ﺍﻟﺤﺰﻥ ﺍﻟﺘﻲ ﻇﻠﻠﺖ ﻋﻴﻨﻴﻬﺎ ﻓﻘﺎﻝ ﺑﻤﺰﺍﺡ :
- ﻳﺎﺍﺍﻩ ... ﺩﻩ ﺍﻧﺎ ﻳﻈﻬﺮ ﺍﻥ ﺩﻣﻲ ﺗﻘﻴﻞ ﺍﻭﻱ
ﻭﺿﻊ ﻋﻠﻲ ﻳﺪﻩ ﺍﺳﻔﻞ ﺫﻗﻨﻬﺎ ﻭﺭﻓﻊ ﻭﺟﻬﻬﺎ ﺇﻟﻴﻪ ﻭﻧﻈﺮ ﺇﻟﻰ ﻋﻴﻨﻴﻬﺎ ﻗﺎﺋﻼ :
- ﻣﻤﻜﻦ ﺍﻋﺮﻑ ﻣﺶ ﻋﺎﻳﺰﺓ ﺗﺘﺠﻮﺯﻳﻨﻲ ﻟﻴﻪ ?
ﺧﻔﻀﺖ ﺭﺃﺳﻬﺎ ﻭﻗﺎﻟﺖ ﻓﻲ ﺍﺳﻰ :
- ﻋﻠﺸﺎﻥ ﺍﻧﺖ ﻛﻤﺎﻥ ﻣﺶ ﻋﺎﻳﺰ ﺗﺘﺠﻮﺯﻧﻲ ﻳﺎ ﻋﻠﻲ
- ﻣﻴﻦ ﻗﺎﻟﻚ ﻛﺪﻩ ﺑﺲ ?
- ﺗﺼﺮﻓﺎﺗﻚ ﻛﻠﻬﺎ ﺑﺘﻘﻮﻝ ﻛﺪﻩ ﻳﺎ ﻋﻠﻲ ... ﺩﻩ ﺣﺘﻰ ﺑﺎﺑﺎ ﻫﻮ ﺍﻟﻠﻲ ﻃﻠﺐ ﻣﻨﻚ ﺍﻥ ﻓﺮﺣﻨﺎ ﻳﻜﻮﻥ ﻣﻌﺎﻫﻢ ﻳﻌﻨﻲ ﺩﻱ ﻣﺶ ﺭﻏﺒﺘﻚ ﺍﻧﺖ
.. ﻟﻮ ﻣﺎﻛﺎﻧﺘﺶ ﺩﻱ ﺭﻏﺒﺘﻲ ﺍﻧﺎ ﻛﻤﺎﻥ ﻣﺎﻛﻨﺘﺶ ﻭﺍﻓﻘﺖ ﻋﻠﻰ ﻃﻠﺐ ﻋﻤﻲ
- ﺍﻓﻬﻢ ﻣﻦ ﻛﺪﻩ ﺍﻧﻚ ﻋﺎﻳﺰﻧﺎ ﻧﺘﺠﻮﺯ ﺩﻟﻮﻗﺘﻲ ?
- ﻭﺍﻟﻠﻪ ﻟﻮ ﺭﻓﻀﻚ ﺩﻩ ﺳﺒﺒﻪ ﺇﻧﻚ ﻓﺎﻛﺮﺓ ﺍﻥ ﺩﻩ ﻋﻠﻰ ﻏﻴﺮ ﺭﻏﺒﺘﻲ ﻳﺒﻘﻰ ﻋﺎﻳﺰ ﻧﺘﺠﻮﺯ ﺩﻟﻮﻗﺘﻲ ... ﻟﻜﻦ ﻟﻮ ﺭﻓﻀﻚ ﺩﻩ ﺳﺒﺒﻪ ﺍﻧﻚ ﻋﺎﻳﺰﺓ ﺗﺨﻠﺼﻲ ﺩﺭﺍﺳﺘﻚ ﺍﻷﻭﻝ ﻓﺎﻛﻴﺪ ﻣﺴﺘﻘﺒﻠﻚ ﻳﻬﻤﻨﻲ ... ﻭﺳﺎﻋﺘﻬﺎ ﺍﻧﺎ ﺣﺎﺩﺧﻞ ﻟﻌﻤﻲ ﺍﻗﻮﻟﻪ ﺇﻧﻲ ﻣﺶ ﻋﺎﻳﺰ ﺍﺗﺠﻮﺯ ﺩﻟﻮﻗﺘﻲ ﻭﺍﺧﻠﻴﻬﺎ ﺗﻴﺠﻲ ﻣﻨﻲ ﺃﻧﺎ
- ﻋﻠﻲ ﺍﻧﺎ ﻋﺎﺭﻓﺔ ﻛﻮﻳﺴﺔ ﻭﻣﺘﺄﻛﺪﺓ ﺍﻥ ﺟﻮﺍﺯﻱ ﻣﻨﻚ ﻋﻤﺮﻩ ﻣﺎ ﺣﻴﻌﻄﻠﻨﻲ ﻭﻻ ﺣﻴﻜﻮﻥ ﻋﻘﺒﺔ ﻓﻄﺮﻳﻖ ﻣﺴﺘﻘﺒﻠﻲ ... ﻭﺍﻧﺖ ﻋﺎﺭﻑ ﺍﻥ ﺩﻱ ﻣﺠﺮﺩﺣﺠﺔ ﻛﻨﺖ ﺑﺎﺗﺤﺠﺞ ﺑﻴﻬﺎ
- ﻋﻠﻲ ﺑﺈﺑﺘﺴﺎﻣﺔ : ﻧﻮﺭﻫﺎﻥ ﺍﺣﻨﺎ ﻓﻌﻼ ﻣﺤﺘﺎﺟﻴﻦ ﻧﺘﺠﻮﺯ ﻋﺸﺎﻥ ﻧﻘﺮﺏ ﻣﻦ ﺑﻌﺾ ﺍﻛﺘﺮ ﻭﻛﻞ ﻭﺍﺣﺪ ﻓﻴﻨﺎ ﻳﻌﺮﻑ ﺍﻟﺤﺎﺟﺎﺕ ﺍﻟﻠﻲ ﺑﺘﻀﺎﻳﻖ ﺍﻟﺘﺎﻧﻲ ﻭﻳﺒﻄﻞ ﻳﻌﻤﻠﻬﺎ
- ﻣﺶ ﺩﻩ ﻟﻤﺎ ﻳﻜﻮﻥ ﺍﻟﺤﺐ ﻣﻮﺟﻮﺩ ﺍﻷﻭﻝ ﻋﺸﺎﻥ ﻳﺒﻘﻰ ﻛﻞ ﻭﺍﺣﺪ ﻓﻴﻨﺎ ﻋﻨﺪﻩ ﺇﺳﺘﻌﺪﺍﺩ ﻳﺘﻐﻴﺮ ﻋﺸﺎﻥ ﺍﻟﺘﺎﻧﻲ
- ﻭﻣﻴﻦ ﻗﺎﻟﻚ ﺇﻧﻪ ﻣﺶ ﻣﻮﺟﻮﺩ ﺑﺲ ?
ﺛﺒﺘﺖ ﻧﻮﺭﺍ ﻧﻈﺮﻫﺎ ﻋﻠﻰ ﻋﻴﻨﻴﻪ ﻭﻛﻠﻬﺎ ﻟﻬﻔﺔ ﻟﻤﻌﺮﻓﺔ ﺇﺟﺎﺑﺔ ﺳﺆﺍﻟﻬﺎ ﺍﻟﺘﺎﻟﻲ :
- ﻳﻌﻨﻲ ﺍﻧﺖ ﺑﺘﺤﺒﻨﻲ ﺑﺠﺪ ﻳﺎ ﻋﻠﻲ ? ﺭﻳﺤﻨﻲ ﻭﻗﻮﻟﻲ ﺍﻟﺤﻘﻴﻘﺔ ﻳﺎ ﻋﻠﻲ ﺣﺘﻰ ﻟﻮ ﻛﺎﻧﺖ ﻷ ... ﺑﺲ ﻋﻠﻰ ﺍﻷﻗﻞ ﻫﺒﻘﻰ ﻋﺮﻓﺖ ﺍﻟﻠﻲ ﻓﻴﻬﺎ ﻭﺍﺭﺗﺤﺖ
ﻇﻞ ﺻﺎﻣﺘﺎ ﻟﻔﺘﺮﺓ ﻳﺘﺄﻣﻠﻬﺎ ﻓﺎﺭﺩﻓﺖ ﻗﺎﺋﻠﺔ ﺑﺤﺰﻥ :
- ﻫﻮ ﺍﻟﺴﺆﺍﻝ ﺻﻌﺐ ﺍﻭﻱ ﻟﻠﺪﺭﺟﺔﺩﻱ ?
ﺍﺯﺩﺭﺩ ﻟﻌﺎﺑﻪ ﻭﺍﺟﺎﺑﻬﺎ ﻗﺎﺋﻼ ﺑﺼﺖ ﻳﺸﺒﻪ ﺍﻟﻬﻤﺲ :
- ﺍﻛﻴﺪ ﺑﺤﺒﻚ ﻳﻌﻨﻲ ﺍﻣﺎﻝ ﺣﺘﺠﻮﺯﻙ ﻟﻴﻪ ﺑﺲ
ﻇﻠﺖ ﻋﻴﻨﺎﻫﺎ ﻣﻌﻠﻘﺔ ﺑﻌﻴﻨﻴﻪ ﺗﺤﺎﻭﻝ ﺃﻥ ﺗﺴﺘﺸﻒ ﻣﺪﻯ ﺻﺪﻗﻪ ﻣﻨﻬﻤﺎ ... ﻟﻜﻢ ﺗﻌﺸﻖ ﺗﻠﻚ ﺍﻟﻌﻴﻨﻴﻦ ﺭﻏﻢ ﺫﻟﻚ ﺍﻟﻐﻤﻮﺽ ﺍﻟﺬﻱ ﻳﻜﺘﻨﻔﻬﻤﺎ ... ﺇﻻ ﺃﻥ ﺍﻟﺴﺤﺮ ﺍﻟﻤﻄﻞ ﻣﻨﻬﻤﺎ ﻳﻔﻮﻕ ﺫﻟﻚ ﺍﻟﻐﻤﻮﺽ ﺑﻜﺜﻴﺮ ... ﺍﺑﺘﺴﻢ ﻣﺤﺎﻭﻻ ﺇﺧﻔﺎﺀ ﺗﻮﺗﺮﻩ ﻓﺒﺎﺩﻟﺘﻪ ﺍﻹﺑﺘﺴﺎﻣﺔ ﻗﺎﺋﻠﺔ :
- ﻃﻴﺐ ﻧﻔﺴﻲ ﺍﺳﻤﻌﻬﺎ ﻣﻨﻚ
ﺍﻣﺴﻚ ﻋﻠﻲ ﺑﻴﺪﻳﻬﺎ ﻭﻭﺿﻌﻬﻤﺎ ﺑﻴﻦ ﻛﻔﻴﻪ ﻭﻗﺎﻝ ﺑﺘﺮﺩﺩ ﺟﺎﻫﺪ ﻛﺜﻴﺮﺍ ﺍﻥ ﻳﺨﻔﻴﻪ :
- ﺑﺤﺒﻚ ... ﺑﺤﺒﻚ ﻳﺎﻧﻮﺭﺍ
ﺟﺬﺑﺖ ﻳﺪﻳﻬﺎ ﻭﻭﺿﻌﺘﻬﻤﺎ ﻋﻠﻰ ﺻﺪﺭﻫﺎ ﻗﺎﺋﻠﺔ ﺑﻔﺮﺣﺔ :
- ﺑﺎﻟﺮﺍﺣﺔ ﻋﻠﻴﺎ ﺃﺑﻮﺱ ﺇﻳﺪﻙ ... ﻣﻔﺎﺟﺌﺘﻴﻦ ﻓﺠﻤﻠﺔ ﻭﺍﺣﺪﺓ ... ﺑﺤﺒﻚ ﻭﻳﺎ ﻧﻮﺭﺍ ... ﺩﻩ ﺍﻧﺎ ﻛﺪﻩ ﻣﻤﻜﻦ ﻳﺠﺮﺍﻟﻲ ﺣﺎﺟﺔ
- ﻻ ﺑﻌﺪ ﺍﻟﺸﺮ ﻋﻠﻴﻜﻲ ... ﻣﺶ ﻛﻨﺘﻲ ﻋﺎﻳﺰﺍﻧﻲ ﺍﻗﻮﻟﻚ ﻳﺎ ﻧﻮﺭﺍ ... ﻣﻦ ﻫﻨﺎ ﻭﺭﺍﻳﺢ ﻣﺶ ﺣﺎﻧﺎﺩﻳﻜﻲ ﻏﻴﺮ ﺑﺎﻹﺳﻢ ﺍﻟﻠﻲ ﺑﺘﺤﺒﻴﻪ ... ﻣﺒﺴﻮﻃﺔ ﻳﺎ ﺳﺘﻲ ?
- ﻣﺒﺴﻮﻃﺔ ﺑﺲ ... ﺩﻩ ﺍﻧﺎ ﺣﺎﺳﺔ ﺇﻧﻲ ﻃﺎﻳﺮﺓ ﻣﻦ ﺍﻟﻔﺮﺣﺔ ... ﻋﻦ ﺇﺫﻧﻚ ﺑﻘﻲ ﺣﺎﻃﻠﻊ ﺍﺗﺄﺳﻒ ﻟﺒﺎﺑﺎ ﻭﺍﻗﻮﻟﻪ ﺇﻧﻲ ﻣﻮﺍﻓﻘﺔ ﺧﻼﺹ ﻋﻠﻰ ﺍﻟﺠﻮﺍﺯ
- ﻃﻴﺐ ﻗﺒﻞ ﻣﺎﺗﻤﺸﻲ ﺍﺑﻘﻲ ﺍﻋﻤﻠﻲ ﺣﺴﺎﺑﻚ ﻋﺸﺎﻥ ﻧﻨﺰﻝ ﺳﻮﺍ ﺑﻜﺮﺓ ﺍﻭ ﺑﻌﺪﻩ ﻧﺸﺘﺮﻱ ﺍﻟﺸﺒﻜﺔ ﻭﻓﺴﺘﺎﻥ ﺍﻟﻔﺮﺡ
ﺃﻭﻣﺄﺕ ﺑﺮﺃﺳﻬﺎ ﻣﻮﺍﻓﻘﺔ ﻗﺒﻞ ﺍﻥ ﺗﻨﻄﻠﻖ ﻣﺴﺮﻋﺔ ﺇﻟﻰ ﺍﻟﺪﺍﺧﻞ ﻫﻲ ﺗﻜﺎﺩ ﺗﻄﻴﺮ ... ﺑﻴﻨﻤﺎ ﺍﻏﻤﺾ ﻋﻠﻲ ﻋﻴﻨﻴﻪ ﻗﺎﺋﻼ :
- ﻳﺎﻩ ﻳﺎ ﻧﻮﺭﺍ ... ﻣﻌﻘﻮﻝ ﻛﻠﻤﺔ ﺻﻐﻴﺮﺓ ﺯﻱ ﺩﻱ ﺗﻌﻤﻞ ﻓﻴﻜﻲ ﻛﻞ ﺍﻟﻠﻲ ﺍﻧﺎ ﺷﺎﻳﻔﻪ ﺩﻩ ... ﻣﻌﻘﻮﻝ ﺍﻟﺤﺰﻥ ﺍﻟﻠﻲ ﻛﺎﻥ ﻣﺎﻟﻲ ﻋﻨﻴﻜﻲ ﺍﺗﺤﻮﻝ ﻟﻠﻔﺮﺣﺔ ﺩﻱ ﻛﻠﻬﺎ ﻓﺜﻮﺍﻧﻲ ... ﻳﺎﺭﺏ ﺍﺯﺭﻉ ﺣﺒﻬﺎ ﻓﻘﻠﺒﻲ ﻭﻗﺪﺭﻧﻲ ﺇﻧﻲ ﺍﺳﻌﺪﻫﺎ
&&&&&&&&&&&&&&&&&&&&&&&&&&&
ﻧﺎﺩﻳﺔ : ﺃﻧﺎ ﻣﺶ ﺣﺎﺭﻭﺡ ﻣﻌﺎﻙ ﻓﺄﻱ ﺣﺘﺔ ﻭﻣﺶ ﺣﺄﺷﺘﺮﻱ ﻣﻌﺎﻙ ﺃﻱ ﺣﺎﺟﺔ ... ﺭﻳﺢ ﻧﻔﺴﻚ
ﺳﺎﻣﺢ ﺑﻀﻴﻖ : ﺍﻧﺘﻲ ﺣﺮﺓ ... ﺍﻧﺎ ﻋﻤﻠﺖ ﺍﻟﻠﻲ ﺑﺎﺑﺎ ﻃﻠﺒﻪ ﻣﻨﻲ ﻭﺧﻼﺹ ... ﺣﺎﺭﻭﺡ ﺍﻗﻮﻟﻪ ﺍﻧﻚ ﺭﻓﻀﺘﻲ ﻫﻮ ﺑﻘﻰ ﻳﻜﻠﻢ ﺑﺎﺑﺎﻛﻲ ﻳﺘﻔﺎﻫﻢ ﻣﻌﺎﻩ
- ﺃﻧﺖ ﺑﺘﻬﺪﺩﻧﻲ ﻭﻻ ﺇﻳﻪ ? ﻣﺶ ﻧﺎﺩﻳﺔ ﺻﻔﻮﺕ ﺍﻟﻠﻲ ﺗﺘﻬﺪﺩ ﻳﺎ ﺑﺎﺑﺎ ... ﺍﺗﻜﻠﻢ ﻋﻠﻰ ﺍﺩﻙ ﻳﺎ ﺍﺳﻤﻚ ﺇﻳﻪ ﺍﻧﺖ
- ﻗﺴﻤﺎ ﺑﺎﻟﻠﻪ ﻳﺎ ﻧﺎﺩﻳﺔ ﻟﻮ ﻣﺎ ﺍﺗﻌﺪﻟﺘﻲ ﻣﻌﺎﻳﺎ ﻟﺘﺸﻮﻓﻲ ﻣﻨﻲ ﺃﻳﺎﻡ ﺳﻮﺩﺓ
- ﺗﺼﺪﻕ ﺧﻮﻓﺘﻨﻲ ... ﻟﻤﺎ ﻧﺸﻮﻑ ﺑﻘﻰ ﻣﻴﻦ ﺍﻟﻠﻲ ﺣﻴﻮﺭﻱ ﻣﻴﻦ
- ﺍﻟﻠﻬﻢ ﻃﻮﻟﻚ ﻳﺎ ﺭﻭﺡ ... ﺍﻗﻮﻟﻚ ﻋﻠﻰ ﺣﺎﺟﺔ ... ﺇﻥ ﺷﺎﺀﺍﻟﻠﻪ ﻣﺎﻋﻨﻚ ﺭﻭﺣﺘﻲ ﻭﻻ ﺍﺷﺘﺮﻳﺘﻲ ﻭﻻ ﺍﺗﺠﻮﺯﺗﻲ ﻣﻦ ﺍﺻﻠﻪ
ﺍﻧﻬﻰ ﺳﺎﻣﺢ ﺟﻤﻠﺘﻪ ﺍﻷﺧﻴﺮﺓ ﺛﻢ ﺍﻏﻠﻖ ﺍﻟﻬﺎﺗﻒ ﻓﻲ ﻭﺟﻪ ﻧﺎﺩﻳﺔ ﺍﻟﺘﻲ ﺍﺳﺘﻔﺰﺗﻬﺎ ﻓﻌﻠﺘﻪ ﻓﺼﺮﺧﺖ ﻗﺎﺋﻠﺔ :
- ﺁﻩ ﻳﺎ ﺍﺑﻦ ﺍﻝ ..... ﻣﺎﺷﻲ ﻳﺎ ﺳﺎﻣﺢ ﺑﻘﻰ ﺍﻧﺎ ﺗﻘﻔﻞ ﺍﻟﺴﻜﺔ ﻓﻮﺷﻲ ... ﻭﺍﻟﻠﻪ ﻻﻭﺭﻳﻚ
&&&&&&&&&&&&&&&&&&&&&
ﻛﺎﻥ ﺻﻔﻮﺕ ﻳﻠﻮﻡ ﻧﺎﺩﻳﺔ ﻋﻠﻰ ﺗﺼﺮﻓﻬﺎ ﻣﻊ ﺳﺎﻣﺢ ﻗﺎﺋﻼ ﺑﺤﺪﺓ :
- ﻛﺪﻩ ﺑﺮﺿﻪ ﻳﺎ ﻧﺎﺩﻳﺔ ... ﻫﻮ ﺩﻩ ﺍﻟﻠﻲ ﺍﺣﻨﺎ ﺍﺗﻔﻘﻨﺎ ﻋﻠﻴﻪ ... ﻣﺶ ﻗﻮﻟﻨﺎ ﺗﻬﺪﻱ ﺍﻟﻠﻌﺐ ﻣﻌﺎﻩ ﺷﻮﻳﺔ ﻟﺤﺪ ﻣﺎ ﺍﻟﻔﺮﺡ ﻳﻌﺪﻱ ﻋﻠﻰ ﺧﻴﺮ
- ﻳﺎ ﺑﺎﺑﺎ ﻳﺮﺿﻴﻚ ﻳﻌﻨﻲ ﻳﻘﻔﻞ ﺍﻟﺴﻜﺔ ﻓﻮﺷﻲ
- ﻳﺎ ﺑﻨﺘﻲ ﻣﺶ ﺍﻧﺘﻲ ﺍﻟﻠﻲ ﺍﺳﺘﻔﺰﻳﺘﻴﻪ ﻓﺎﻟﻜﻼﻡ ﻭﺭﻓﻀﺘﻲ ﺗﺮﻭﺣﻲ ﻣﻌﺎﻩ ... ﻋﺎﻳﺰﺍﻩ ﻳﻌﻤﻞ ﺇﻳﻪ ﻳﻌﻨﻲ ?
- ﻳﻌﻨﻲ ﻳﺎ ﺑﺎﺑﺎ ﺇﻳﻪ ﺍﻟﻤﻄﻠﻮﺏ ﻣﻨﻲ ﺩﻟﻮﻗﺘﻲ ?
- ﺍﻟﻤﻄﻠﻮﺏ ﺍﻧﻚ ﺗﻜﻠﻤﻴﻪ ﻭﺗﺘﻔﻘﻲ ﻣﻌﺎﻩ ﻋﻠﻰ ﻣﻌﺎﺩ ﺗﻨﺰﻟﻮﺍ ﻓﻴﻪ ﺗﺸﺘﺮﻭﺍ ﺍﻟﺸﺒﻜﺔ ﻭﻓﺴﺘﺎﻥ ﺍﻟﻔﺮﺡ
- ﻻ ﻃﺒﻌﺎ ... ﺍﻧﺎ ﻻ ﻳﻤﻜﻦ ﺍﻛﻠﻤﻪ ﺑﻌﺪ ﻣﺎﻗﻔﻞ ﺍﻟﺴﻜﺔ ﻓﻮﺷﻲ ... ﺛﻢ ﺍﻧﺎ ﻣﺶ ﻋﺎﻳﺰﺓ ﺍﺭﻭﺡ ﻣﻌﺎﻩ ﻓﺎﻱ ﺣﺘﺔ
- ﺧﻼﺹ ﺍﻧﺎ ﺣﺎﻛﻠﻢ ﻭﺍﻟﺪﻩ ﻋﺸﺎﻥ ﻳﺨﻠﻴﻪ ﻳﺘﺼﻞ ﺗﺎﻧﻲ ﺑﺲ ﺍﺑﻘﻲ ﺍﺗﻜﻠﻤﻲ ﻣﻌﺎﻩ ﻛﻮﻳﺲ ... ﻟﻮ ﻣﺶ ﻋﺎﻳﺰﺓ ﺗﻨﺰﻟﻲ ﻣﻌﺎﻩ ﻟﻮﺣﺪﻛﻮﺍ ﺧﺪﻱ ﺍﺧﺘﻚ ﻣﻌﺎﻛﻲ
- ﻧﻮﺭﺍ ﻣﺶ ﺣﺘﻮﺍﻓﻖ ﺗﻴﺠﻲ ﻣﻌﺎﻧﺎ ... ﻭﻟﻮ ﻭﺍﻓﻘﺖ ﺍﻛﻴﺪ ﻋﻠﻲ ﻫﻮ ﺍﻟﻠﻲ ﺣﻴﺮﻓﺾ
ﺻﺮﺥ ﻓﻴﻬﺎ ﺻﻔﻮﺕ ﻗﺎﺋﻼ ﺑﺈﻧﻔﻌﺎﻝ :
- ﺍﻧﺘﻮﺍ ﻋﺎﻳﺰﻳﻦ ﺗﺠﻨﻨﻮﻧﻲ ﺍﻧﺘﻮﺍ ﺍﻻﺗﻨﻴﻦ ... ﺍﺧﻠﺺ ﻣﻦ ﻭﺍﺣﺪﺓ ﺗﻄﻠﻌﻠﻲ ﺍﻟﺘﺎﻧﻴﺔ ... ﺍﻟﺤﻤﺪ ﻟﻠﻪ ﺍﻧﻜﻢ ﺣﺘﺘﺠﻮﺯﻭﺍ ﻭﺍﺧﻠﺺ ﻣﻨﻜﻮﺍ ... ﺍﻧﺎ ﻣﺶ ﻓﺎﻫﻢ ﺍﻧﺎ ﻓﺤﻀﺎﻧﺔ 2 ﻫﻨﺎ ﻭﻻ ﺇﻳﻪ ? ﺍﻧﺎ ﻃﺎﻟﻊ ﺍﻧﺎﻡ ﺍﺣﺴﻦ ﻣﺎﻳﺠﺮﺍﻟﻲ ﺣﺎﺟﺔ ﺑﺴﺒﺒﻜﻮﺍ
ﺻﻌﺪ ﺻﻔﻮﺕ ﺇﻟﻰ ﻏﺮﻓﺘﻪ ﺑﻴﻨﻤﺎ ﺑﻘﻴﺖ ﻧﺎﺩﻳﺔ ﻭﻫﻲ ﺗﺘﻤﺘﻢ ﻗﺎﺋﻠﺔ :
- ﻭﺍﻟﻠﻪ ﻷﻭﺭﻳﻚ ﻳﺎ ﺳﺎﻣﺢ ﻋﺸﺎﻥ ﺧﻠﻴﺖ ﺑﺎﺑﺎ ﻳﺰﻋﻞ ﻣﻨﻲ ........
ﻳﺘﺒﻊ