ﺍﻟﻔﺼﻞ ﺍﻟﺤﺎﺩﻱ ﻭﺍﻟﺜﻼﺛﻮﻥ *
ﻟﻢ ﺗﺬﻕ ﻧﻮﺭﺍ ﻃﻌﻤﺎ ﻟﻠﻨﻮﻡ ﻫﺬﻩ ﺍﻟﻠﻴﻠﺔ ... ﻇﻠﺖ ﺳﺎﻫﺮﺓ ﺗﻔﻜﺮ ﻭﻛﻠﻤﺎﺕ ﻟﺒﻨﻰ ﺗﺘﺮﺩﺩ ﺃﺻﺪﺍﺅﻫﺎ ﺩﺍﺧﻞ ﻋﻘﻠﻬﺎ ... ﺑﺪﺕ ﻣﻘﺘﻨﻌﺔ ﺇﻟﻰ ﺣﺪ ﻛﺒﻴﺮ ﺑﻤﺎ ﻗﺎﻟﺘﻪ ﻟﺒﻨﻰ ... ﻓﺈﺫﺍ ﻛﺎﻧﺖ ﻧﺎﺩﻳﺔ ﺗﻘﺎﺗﻞ ﺑﻤﺜﻞ ﻫﺬﻩ ﺍﻟﺸﺮﺍﺳﺔ ﺩﻭﻥ ﺃﻥ ﺗﻜﻮﻥ ﺻﺎﺣﺒﺔ ﺣﻖ ... ﻓﻤﺎﺑﺎﻟﻬﺎ ﻭﻫﻲ ﺻﺎﺣﺒﺔ ﺍﻟﺤﻖ ﺗﻘﻒ ﻣﻮﻗﻒ ﺍﻟﻤﺸﺎﻫﺪ ﻭﺍﻟﻤﺘﺎﺑﻊ ﻟﻤﺎ ﻳﺠﺮﻱ ﺩﻭﻥ ﺗﺪﺧﻞ ﻣﻨﻬﺎ ... ﺃﻻ ﻳﺴﺘﺤﻖ ﻋﻠﻲ ﺍﻟﻤﻘﺎﺗﻠﺔ ﻣﻦ ﺃﺟﻠﻪ ... ﻭﺇﻥ ﻛﺎﻧﺖ ﻧﺎﺩﻳﺔ ﻗﺪ ﺃﺧﺘﺎﺭﺗﻬﺎ ﺧﺼﻤﺎ ﻟﻬﺎ ... ﻓﻼﺑﺄﺱ ﻣﻦ ﺃﻥ ﺗﻜﻮﻥ ﺧﺼﻤﺎ ﻋﻨﻴﺪﺍ ﺻﻌﺐ ﺍﻟﻤﺮﺍﺱ ﻳﺪﺍﻓﻊ ﻋﻦ ﺣﻘﻪ ﺣﺘﻲ ﺍﻟﻨﻬﺎﻳﺔ ... ﺍﻟﺘﻲ ﺳﺘﻜﻮﻥ ﺣﺘﻤﺎ ﻟﺼﺎﺣﺐ ﺍﻟﺤﻖ ... ﻓﻬﻜﺬﺍ ﺗﺤﻜﻲ ﻛﺘﺐ ﺍﻟﺘﺎﺭﻳﺦ ﻣﻨﺬ ﻗﺪﻳﻢ ﺍﻷﺯﻝ ... ﺃﻥ ﺍﻟﺨﻴﺮ ﻻﺑﺪ ﻭﺃﻥ ﻳﻨﺘﺼﺮ ﻓﻲ ﺍﻟﻨﻬﺎﻳﺔ
ﻓﻲ ﺍﻟﺼﺒﺎﺡ ﻛﺎﻥ ﻋﻠﻲ ﻣﺘﺠﻬﺎ ﻧﺤﻮ ﺳﻴﺎﺭﺗﻪ ﻟﻴﺴﺘﻘﻠﻬﺎ ﻣﺘﻮﺟﻬﺎ ﺇﻟﻰ ﻋﻤﻠﻪ ﻟﻴﻔﺎﺟﺄ ﺑﻨﺎﺩﻳﺔ ﺗﻘﻒ ﺇﻟﻰ ﺟﻮﺍﺭﻫﺎ ﻓﺎﻗﺘﺮﺏ ﻣﻨﻬﺎ ﻗﺎﺋﻼ : ﺧﻴﺮ ﻳﺎ ﻧﺎﺩﻳﺔ ... ﻓﻴﻪ ﺇﻳﻪ ﻋﻠﻰ ﺍﻟﺼﺒﺢ ?
ﻋﻘﺪﺕ ﺫﺭﺍﻋﻴﻬﺎ ﺍﻣﺎﻡ ﺻﺪﺭﻫﺎ ﻭﻗﺎﻟﺖ ﺑﺒﺮﻭﺩ : ﺩﻩ ﺑﺪﻝ ﻣﺎﺗﻘﻮﻝ ﺻﺒﺎﺡ ﺍﻟﺨﻴﺮ ﻳﺎ ﻧﺎﺩﻳﺔ ... ﻭﺑﻌﺪﻳﻦ ﺣﻴﻜﻮﻥ ﻓﻴﻪ ﺇﻳﻪ ﻳﻌﻨﻲ ? ﺍﻟﻌﺮﺑﻴﺔ ﺑﺘﺎﻋﺘﻲ ﻟﺴﻪ ﻋﻨﺪ ﺍﻟﻤﻴﻜﺎﻧﻴﻜﻲ ... ﺣﺎﺭﻛﺐ ﻣﻌﺎﻙ ﻋﺸﺎﻥ ﺗﻮﺻﻠﻨﻲ ﺍﻟﺸﺮﻛﺔ ... ﻭﺍﻋﺘﻘﺪ ﻧﻮﺭﺍ ﻣﺎﻋﻨﺪﻫﺎﺵ ﻣﺤﺎﺿﺮﺍﺕ ﺩﻟﻮﻗﺘﻲ ﻳﻌﻨﻲ ﻣﺎﻓﻴﺶ ﻭﺭﺍﻙ ﺣﺪ ﻏﻴﺮﻱ
ﺷﻌﺮ ﺑﺎﻟﻀﻴﻖ ﻭﺍﻹﺭﺗﺒﺎﻙ ... ﻓﻜﻴﻒ ﻟﻪ ﺃﻥ ﻳﺘﺨﻠﺺ ﻣﻨﻬﺎ ﻫﺬﻩ ﺍﻟﻤﺮﺓ ﻭﻳﺒﺪﻭ ﺃﻧﻬﺎ ﻋﻠﻤﺖ ﺃﻥ ﻣﺤﺎﺿﺮﺓ ﻧﻮﺭﺍ ﻗﺪ ﺃﻟﻐﻴﺖ ... ﻻﻣﻔﺮ ﺇﺫﺍ ﻣﻦ ﺃﻥ ﻳﺼﻄﺤﺒﻬﺎ ﻣﻌﻪ ﻟﻠﺸﺮﻛﺔ ... ﺃﻧﻘﺬﺗﻪ ﻧﻮﺭﺍ ﻣﻦ ﺣﻴﺮﺗﻪ ﺣﻴﻦ ﺭﺃﻫﺎ ﺗﻘﺘﺮﺏ ﻣﻨﻬﻤﺎ ﻗﺎﺋﻠﺔ : ﻓﻴﻪ ﺣﺎﺟﺔ ﻳﺎ ﻋﻠﻲ ?
ﺃﺟﺎﺑﺖ ﻧﺎﺩﻳﺔ ﺑﺪﻻ ﻋﻨﻪ ﻗﺎﺋﻠﺔ : ﺍﺻﻠﻲ ﺭﺍﻳﺤﺔ ﺍﻟﺸﺮﻛﺔ ﻣﻊ ﻋﻠﻲ ﻋﺸﺎﻥ ﻋﺮﺑﻴﺘﻲ ﻟﺴﻪ ﻣﺎﺟﺎﺗﺶ ﻣﻦ ﺍﻟﺘﺼﻠﻴﺢ
ﺃﺟﺎﺑﺘﻬﺎ ﻧﻮﺭﺍ ﻗﺎﺋﻠﺔ ﺑﺒﺮﻭﺩ ﺣﺎﻭﻟﺖ ﺃﻥ ﺗﺘﻘﻨﻪ ﺟﻴﺪﺍ : ﺑﺄﻗﻮﻟﻚ ﺇﻳﻪ ﻳﺎ ﻧﺎﺩﻳﺔ ... ﻣﺎﺗﻘﻮﻟﻲ ﻟﺒﺎﺑﺎ ﻳﻐﻴﺮﻟﻚ ﻋﺮﺑﻴﺘﻚ ﺍﻟﻠﻲ ﺑﺪﺃﺕ ﺗﻌﻄﻞ ﺩﻱ
ﻧﺎﺩﻳﺔ ﺑﺘﻬﻜﻢ : ﻭﻟﺤﺪ ﻣﺎ ﺍﻏﻴﺮﻫﺎ ﺣﺎﻓﻀﻞ ﻭﺍﻗﻔﺔ ﻛﺪﻩ ﻳﻌﻨﻲ ?
ﺍﺟﺎﺑﺘﻬﺎ ﻧﻮﺭﺍ ﻭﻫﻲ ﺗﻤﺪ ﻟﻬﺎ ﻳﺪﻫﺎ ﺑﻤﻔﺎﺗﻴﺢ ﺳﻴﺎﺭﺗﻬﺎ : ﺃﻧﺎ ﻋﻤﻠﺖ ﺣﺴﺎﺑﻲ ... ﺩﻱ ﻣﻔﺎﺗﻴﺢ ﻋﺮﺑﻴﺘﻲ ﺗﻘﺪﺭﻱ ﺗﺮﻭﺣﻲ ﻭﺗﻴﺠﻲ ﺑﻴﻬﺎ ﺯﻱ ﻣﺎ ﺍﻧﺘﻲ ﻋﺎﻳﺰﺓ ﻟﺤﺪﻣﺎﻋﺮﺑﻴﺘﻚ ﺗﻴﺠﻲ ﺑﺎﻟﺴﻼﻣﺔ
ﺯﻓﺮﺕ ﺑﻀﻴﻖ ﻭﻫﻲ ﺗﺠﻴﺒﻬﺎ ﻗﺎﺋﻠﺔ : ﻭﺍﻧﺘﻲ ﺣﺘﺮﻭﺣﻲ ﺍﻟﺠﺎﻣﻌﺔ ﺍﺯﺍﻱ ?
ﻧﻮﺭﺍ : ﻣﺎﺗﺸﻐﻠﻴﺶ ﺑﺎﻟﻚ ﺑﻴﺎ ... ﺍﻧﺎ ﻣﺶ ﻣﺤﺘﺠﺎﻫﺎ ﺻﺪﻗﻴﻨﻲ ... ﺗﺤﺒﻲ ﺍﻛﺘﺒﻠﻚ ﺗﻨﺎﺯﻝ ﻋﻨﻬﺎ ﺧﺎﻟﺺ ﻋﺸﺎﻥ ﺗﺘﺄﻛﺪﻱ
ﻧﺎﺩﻳﺔ ﺑﺈﺻﺮﺍﺭ : ﻃﺐ ﻣﺎ ﺍﻧﺎ ﻣﻤﻜﻦ ﺍﺭﻭﺡ ﻭﺁﺟﻲ ﻣﻊ ﻋﻠﻲ ... ﻋﻠﻰ ﺍﻷﻗﻞ ﺍﺣﻨﺎ ﺍﻻﺗﻨﻴﻦ ﻃﺮﻳﻘﻨﺎ ﻭﺍﺣﺪ ... ﻟﻜﻦ ﺍﻧﺘﻲ ﺍﻟﻠﻲ ﻃﺮﻳﻘﻚ ﻣﺨﺘﻠﻒ
ﻧﻮﺭﺍ : ﺍﻧﺘﻲ ﻭﻋﻠﻲ ﻃﺮﻳﻘﻜﻮﺍ ﻣﺶ ﻭﺍﺣﺪ ﻳﺎ ﻧﺎﺩﻳﺔ ... ﺍﺻﻞ ﻋﻠﻲ ﻣﺶ ﻳﺮﺟﻊ ﻋﻠﻰ ﺍﻟﺒﻴﺖ ﺑﻌﺪ ﻣﺎﻳﺨﻠﺺ ﺷﻐﻠﻪ
ﻧﺎﺩﻳﺔ ﺑﻀﻴﻖ : ﺍﻣﺎﻝ ﺣﻴﺮﻭﺡ ﻓﻴﻦ ﻳﻌﻨﻲ ?
ﻧﻮﺭﺍ : ﻭﻟﻮ ﺍﻥ ﺩﻱ ﺣﺎﺟﺔ ﻣﺎﺗﺨﺼﻜﻴﺶ ﻟﻜﻦ ﺍﻧﺎ ﺣﺎﻗﻮﻟﻚ ... ﺍﺻﻞ ﻋﻠﻲ ﻋﺎﺯﻣﻨﻲ ﻋﻠﻰ ﺍﻟﻌﺸﺎ ﺑﺮﻩ ﺍﻟﺒﻴﺖ ﺍﻟﻠﻴﻠﺔﺩﻱ ... ﺃﻱ ﺍﺳﺘﻔﺴﺎﺭﺍﺕ ﺗﺎﻧﻴﺔ ?
ﻗﻄﺐ ﺟﺒﻴﻨﻪ ﻓﻲ ﺩﻫﺸﺔ ﻓﻠﻢ ﻳﺤﺪﺙ ﺃﻥ ﻗﺎﻡ ﺑﺪﻋﻮﺗﻬﺎ ﻟﻠﻌﺸﺎﺀ ﻫﺬﻩ ﺍﻟﻠﻴﻠﺔ ﻭﻟﻜﻦ ﻷﺑﺄﺱ ﺇﻥ ﻛﺎﻧﺖ ﺗﻠﻚ ﻫﻲ ﺍﻟﻄﺮﻳﻘﺔ ﺍﻟﻤﺜﻠﻰ ﻟﻠﺘﺨﻠﺺ ﻣﻦ ﻧﺎﺩﻳﺔ ... ﺍﺑﺘﺴﻢ ﻗﺎﺋﻼ : ﻋﻦ ﺍﺫﻧﻜﻮ ﺑﻘﻰ ﻋﺸﺎﻥ ﻋﻨﺪﻱ ﺷﻐﻞ ... ﻋﺎﻳﺰﺓ ﺣﺎﺟﺔ ﻳﺎ ﺣﺒﻴﺒﺘﻲ ﻗﺒﻞ ﻣﺎ ﺍﻣﺸﻲ ?
ﻟﻢ ﺗﺴﺘﻄﻊ ﺍﻥ ﺗﻔﻬﻢ ﻛﻴﻒ ﻭﺍﺗﺘﻬﺎ ﺍﻟﺠﺮﺃﺓ ﻟﻔﻌﻞ ﺫﻟﻚ ﻭﻟﻜﻨﻬﺎ ﺍﻗﺘﺮﺑﺖ ﻣﻦ ﻋﻠﻲ ﻭﻃﺒﻌﺖ ﻗﺒﻠﺔ ﺭﻗﻴﻘﺔ ﻋﻠﻰ ﻭﺟﻨﺘﻪ ﻭﻫﻲ ﺗﻮﺩﻋﻪ ﻗﺎﺋﻠﺔ : ﻣﻊ ﺍﻟﺴﻼﻣﺔ ﻳﺎ ﺣﺒﻴﺒﻲ .
ﺍﻣﺘﺪﺕ ﻳﺪﻫﺎ ﻟﺘﺨﺘﻄﻒ ﺍﻟﻤﻔﺎﺗﻴﺢ ﻣﻦ ﻳﺪ ﻧﻮﺭﺍ ﺑﺴﺮﻋﺔ ﺛﻢ ﺗﻮﺟﻬﺖ ﺇﻟﻰ ﺳﻴﺎﺭﺓ ﻧﻮﺭﺍ ﻭﻗﺎﺩﺗﻬﺎ ﻓﻲ ﻃﺮﻳﻘﻬﺎ ﺍﻟﻰ ﺍﻟﺸﺮﻛﺔ ﻭﻗﺪ ﻋﺰﻣﺖ ﻋﻠﻰ ﺃﻥ ﺗﻨﺘﻬﻲ ﻣﻦ ﻫﺬﺍ ﺍﻷﻣﺮ ﺍﻟﻠﻴﻠﺔ ... ﻓﻠﻢ ﺗﻌﺪ ﺗﻄﻴﻖ ﺻﺒﺮﺍ ﻋﻠﻰ ﻣﺎ ﻳﻔﻌﻠﻪ ﻛﻞ ﻣﻦ ﻋﻠﻲ ﻭﻧﻮﺭﺍ ... ﺃﻣﺎ ﻋﻠﻲ ﻓﻨﻈﺮ ﺇﻟﻰ ﻧﻮﺭﺍ ﻗﺎﺋﻼ : ﻣﺘﺸﻜﺮ ﺍﻧﻚ ﺍﻧﻘﺬﺗﻴﻨﻲ ... ﻭﻣﻌﻠﺶ ﻣﺶ ﺣﺎﻗﺪﺭ ﺍﻣﺸﻴﻠﻚ ﻣﻮﺿﻮﻉ ﺍﻟﻌﺰﻭﻣﺔ ﺩﻩ ﻋﺸﺎﻥ ﻋﻨﺪﻱ ﺷﻐﻞ ﻛﺘﻴﺮ
ﺍﻭﻣﺄﺕ ﺑﺮﺃﺳﻬﺎ ﻣﺘﻔﻬﻤﺔ ﻗﺒﻞ ﺍﻥ ﺗﻘﻮﻝ : ﻭﻻ ﻳﻬﻤﻚ ﻳﺎ ﺣﺒﻴﺒﻲ
ﺍﻣﺴﻚ ﻋﻠﻲ ﺑﻴﺪﻫﺎ ﻭﺭﻓﻌﻬﺎ ﺇﻟﻰ ﻓﻤﻪ ﻣﻘﺒﻼ ﺇﻳﺎﻫﺎ ﻭﻫﻮ ﻳﻘﻮﻝ ﺑﺠﺪﻳﺔ : ﻣﺎﺗﻘﻠﻘﻴﺶ ﻳﺎ ﻧﻮﺭﺍ ... ﺍﻧﺎ ﺣﺎﻧﻬﻲ ﺍﻟﻤﻬﺰﻟﺔ ﺩﻱ ﺍﻟﻨﻬﺎﺭﺩﺓ ﺍﻥ ﺷﺎﺀﺍﻟﻠﻪ
ﻧﻮﺭﺍ ﺑﺈﺭﺗﺒﺎﻙ : ﺍﻧﺖ ﺗﻘﺼﺪ ﺇﻳﻪ ﺑﺎﻟﻤﻬﺰﻟﺔ ?
ﻋﻠﻲ : ﺍﻧﺎ ﻣﺘﺄﻛﺪ ﺍﻧﻚ ﻓﺎﻫﻤﺔ ﻭﺣﺎﺳﺔ ﺑﻜﻞ ﺣﺎﺟﺔ ... ﺍﻧﺎ ﻛﻨﺖ ﻣﻨﺘﻈﺮ ﺍﻧﻚ ﺗﺘﺤﺮﻛﻲ ﻋﺸﺎﻥ ﺍﻧﺎ ﻛﻤﺎﻥ ﺃﺧﺪ ﺧﻄﻮﺓ ... ﻭﺍﻇﻦ ﻛﺪﻩ ﺁﻥ ﺍﻵﻭﺍﻥ ... ﻳﻼ ... ﺳﻼﻡ ﻋﻠﻴﻜﻢ
ﻧﻮﺭﺍ : ﻭﻋﻠﻴﻜﻢ ﺍﻟﺴﻼﻡ ﻭﺭﺣﻤﺔ ﺍﻟﻠﻪ
ﻏﺎﺩﺭ ﻋﻠﻲ ﻭﺗﺮﻙ ﻧﻮﺭﺍ ﺧﻠﻔﻪ ﺗﺘﻤﺘﻢ ﻗﺎﺋﻠﺔ ﺑﻘﻠﻖ : ﺭﺑﻨﺎ ﻳﺴﺘﺮ ﻳﺎ ﻋﻠﻲ
ﻓﻲ ﻏﺮﻓﺔ ﻣﻜﺘﺒﻪ ﺑﺎﻟﺸﺮﻛﺔ ﻛﺎﻥ ﻋﻠﻲ ﻳﺘﺤﺪﺙ ﻣﻊ ﺍﺣﻤﺪ ﺑﺎﻟﻬﺎﺗﻒ ﻭﻳﺨﺒﺮﻩ ﺑﻜﻞ ﻣﺎﺣﺪﺙ ﻃﺎﻟﺒﺎ ﻣﺸﻮﺭﺗﻪ ... ﻭﻛﻌﺎﺩﺗﻪ ﻟﻢ ﻳﺒﺨﻞ ﺑﻬﺎ ﺍﺣﻤﺪ ﻭﻣﻌﻬﺎ ﺑﻌﺾ ﺍﻟﺘﻘﺮﻳﻊ ﻟﻌﻠﻲ ﻟﺘﺄﺧﺮﻩ ﻓﻲ ﺇﺗﺨﺎﺫ ﺧﻄﻮﺓ ﻣﻦ ﺷﺄﻧﻬﺎ ﺍﻥ ﺗﺮﺩﻉ ﻧﺎﺩﻳﺔ ﻋﻦ ﺃﻓﻌﺎﻟﻬﺎ ﺣﺘﻰ ﺃﻧﻪ ﻛﺎﻥ ﻳﻬﺘﻒ ﺑﻪ ﻗﺎﺋﻼ ﺑﺈﻧﻔﻌﺎﻝ : ﺍﻧﺎ ﻧﻔﺴﻲ ﺍﻓﻬﻢ ﺍﻧﺖ ﻣﺴﺘﻨﻲ ﺇﻳﻪ ﻋﺸﺎﻥ ﺗﻮﻗﻔﻬﺎ ﻋﻨﺪ ﺣﺪﻫﺎ ...? ﻭﻻ ﺣﻀﺮﺗﻚ ﻓﺮﺣﺎﻥ ﺑﺪﻭﺭ ﺷﻬﺮﻳﺎﺭ ﻭﺍﻟﺴﺘﺎﺕ ﺣﻮﺍﻟﻴﻪ ... ﻭﻻ ﻋﺎﺟﺒﻚ ﻣﻨﻈﺮ ﺍﻷﺧﺘﻴﻦ ﻭﻫﻤﺎ ﻭﺍﻗﻔﻴﻦ ﻟﺒﻌﺾ ﻋﺸﺎﻥ ﺧﺎﻃﺮ ﺣﻀﺮﺗﻚ ?
ﺍﺟﺎﺑﻪ ﻋﻠﻰ ﻗﺎﺋﻼ ﺑﻨﻔﺎﺫ ﺻﺒﺮ : ﻳﺎ ﺑﻨﻲ ﺍﺩﻡ ﺍﻧﺖ ﺍﻧﺎ ﻣﺶ ﻗﺎﻳﻠﻚ ﺗﺒﻄﻞ ﻃﻮﻟﺔ ﻟﺴﺎﻧﻚ ﺩﻱ ﻣﻌﺎﻳﺎ ... ﻭﺑﻌﺪﻳﻦ ﺍﻧﺖ ﻟﻴﻪ ﻣﺶ ﻋﺎﻳﺰ ﺗﻔﻬﻤﻨﻲ ... ﻳﺎ ﺍﺣﻤﺪ ﺍﻧﺖ ﻋﺎﺭﻑ ﻛﻮﻳﺲ ﺍﻥ ﺃﻱ ﺻﺪﺍﻡ ﻣﻊ ﻧﺎﺩﻳﺔ ﻣﻌﻨﺎﻩ ﺻﺪﺍﻡ ﻣﻊ ﻋﻤﻲ ﻧﻔﺴﻪ ... ﻭﻻ ﺗﻔﺘﻜﺮ ﻋﻤﻚ ﺣﻴﻘﻒ ﻓﺼﻔﻲ ﺃﻧﺎ ﻭﻧﻮﺭﺍ ﺿﺪ ﻧﺎﺩﻳﺔ
ﺍﺣﻤﺪ : ﻭﺍﻟﻠﻪ ﺍﻧﺖ ﺗﻌﻤﻞ ﺍﻟﻠﻲ ﻋﻠﻴﻚ ﻭﻻ ﻋﻤﻚ ﻭﻗﻒ ﻓﺼﻒ ﺍﻟﻐﻠﻂ ﺗﺒﻘﻰ ﻣﺸﻜﻠﺘﻪ ﻫﻮ ... ﻭﺑﻌﺪﻳﻦ ﺍﻧﺎ ﻣﻦ ﺭﺃﻳﻲ ﺗﺴﻴﺐ ﺍﻟﺒﻴﺖ ﻭﺗﺮﻭﺡ ﺗﻘﻌﺪ ﻣﻊ ﻃﻨﻂ ﺳﻤﻴﺔ ﻟﺤﺪ ﻣﺎ ﺗﻼﻗﻲ ﺷﻘﺔ ﺗﻌﻴﺶ ﻓﻴﻬﺎ ... ﺍﻭ ﺣﺘﻰ ﺗﻔﻀﻞ ﻣﻌﺎﻫﺎ ﻋﻠﻄﻮﻝ ... ﻛﺪﻩ ﻛﺪﻩ ﻟﻤﻴﺎ ﺑﻜﺮﺓ ﺗﺘﺠﻮﺯ ﺍﻥ ﺷﺎﺀﺍﻟﻠﻪ ﻭﻭﺍﻟﺪﺗﻚ ﺣﺘﺒﻘﻰ ﻟﻮﺣﺪﻫﺎ
ﻋﻠﻲ ﺑﺈﺫﻋﺎﻥ : ﻣﻌﺎﻙ ﺣﻖ ... ﻭﻟﻌﻠﻤﻚ ﺍﻧﺎ ﻛﻨﺖ ﻧﺎﻭﻱ ﺍﻭﺍﺟﻬﻬﺎ ﻓﻌﻼ ﺍﻟﻨﻬﺎﺭﺩﺓﺑﺲ ﻛﻨﺖ ﻣﺤﺘﺎﺝ ﺣﺪ ﻳﺸﺠﻌﻨﻲ ﻭﻟﻮ ﺍﻧﻲ ﻣﺎﻛﻨﺘﺶ ﺍﺣﺐ ﺍﻋﻤﻞ ﻣﺸﻜﻠﺔ ﻣﻊ ﻋﻤﻲ ... ﺍﻟﻠﻪ ﻳﺴﺎﻣﺤﻬﺎ ﺑﻘﻰ ﻧﺎﺩﻳﺔ
ﻟﻢ ﻳﻜﺪ ﻳﻨﻬﻲ ﺟﻤﻠﺘﻪ ﺣﺘﻰ ﻓﻮﺟﺊ ﺑﻄﺮﻕ ﻋﻠﻰ ﺑﺎﺏ ﺍﻟﻐﺮﻓﺔ ﺑﺎﺕ ﻳﺪﺭﻙ ﺟﻴﺪﺍ ﻣﻦ ﺻﺎﺣﺒﺘﻪ ﻓﻘﺎﻝ ﻷﺣﻤﺪ : ﺍﻟﻈﺎﻫﺮ ﺍﻧﻬﺎ ﺑﺘﻴﻴﺠﻲ ﻋﻠﻰ ﺍﻟﺴﻴﺮﺓ ... ﻳﻼ ﻣﻊ ﺍﻟﺴﻼﻣﺔ ﺍﻧﺖ ﺑﻘﻰ ... ﺍﻏﻠﻖ ﻋﻠﻲ ﺍﻟﻬﺎﺗﻒ ﻣﻊ ﺍﺣﻤﺪ ﻭﺳﻤﺢ ﻟﻬﺎ ﺑﺎﻟﺪﺧﻮﻝ ﻭﻋﻨﺪﻣﺎ ﺩﺧﻠﺖ ﻟﻢ ﻳﺠﺪ ﺷﻴﺌﺎ ﻓﻲ ﻳﺪﻫﺎ ﻫﺬﻩ ﺍﻟﻤﺮﺓ ﻓﻘﺎﻝ ﺳﺎﺧﺮﺍ : ﺟﺎﻳﺔ ﺑﺈﻳﺪﻙ ﻓﺎﺿﻴﺔ ﺍﻟﻨﻬﺎﺭﺩﺓ ﻳﻌﻨﻲ ? ﻣﺎﻓﻴﺶ ﺣﺎﺟﺔ ﻭﻗﻔﺖ ﻣﻌﺎﻛﻲ ﻭﻣﺤﺘﺎﺟﺔ ﺷﺮﺡ ﻭﻻ ﺇﻳﻪ ?
ﺍﺟﺎﺑﺖ ﻗﺎﺋﻠﺔ ﺑﻬﺪﻭﺀ ﻟﻢ ﻳﻌﺘﺪﻩ ﻓﻲ ﺻﻮﺗﻬﺎﻣﻦ ﻗﺒﻞ : ﺍﻧﺎ ﻋﺎﻳﺰﻙ ﺍﺗﻜﻠﻢ ﻣﻌﺎﻙ ﻓﻤﻮﺿﻮﻉ ﻣﻬﻢ ﺍﻭﻱ ﻳﺎ ﻋﻠﻲ ... ﻳﺎﺗﺮﻯ ﻣﻤﻜﻦ ﺗﺴﻤﻌﻨﻲ ﻭﺗﻔﻬﻤﻨﻲ ﻭﺗﺤﺲ ﺑﻴﺎ ﻭﻻ ﺣﺘﻴﺠﻲ ﻋﻠﻴﺎ ﺍﻧﺖ ﻛﻤﺎﻥ ﺯﻱ ﺍﻟﺰﻣﻦ
ﻋﻠﻲ ﺑﺘﻬﻜﻢ : ﺑﺲ ﺳﻴﺒﻲ ﺍﻟﺰﻣﻦ ﻓﺤﺎﻟﻪ ... ﻭ ﻳﺎ ﺭﻳﺖ ﺗﺴﻴﺒﻚ ﻣﻦ ﺍﻟﻔﻴﻠﻢ ﺍﻟﻠﻲ ﺑﺘﻌﻤﻠﻴﻪ ﺩﻩ ... ﻭﺗﻴﺠﻲ ﻧﻠﻌﺐ ﻋﻠﻰ ﺍﻟﻤﻜﺸﻮﻑ ﺍﺣﺴﻦ ... ﻭﻳﺎﺭﻳﺖ ﺗﺠﺎﻭﺑﻲ ﻋﻠﻰ ﺳﺆﺍﻟﻲ ﻣﻦ ﻏﻴﺮ ﻟﻒ ﻭﻻ ﺩﻭﺭﺍﻥ ... ﺍﻧﺘﻲ ﻋﺎﻳﺰﺓ ﻣﻨﻲ ﺇﻳﻪ ﺑﺎﻟﻈﺒﻂ ﻳﺎ ﻧﺎﺩﻳﺔ ?
ﺍﺑﺘﺴﻤﺖ ﻗﺎﺋﻠﺔ : ﻛﻮﻳﺲ ﺍﻭﻱ ... ﻣﺎﺩﺍﻡ ﺳﺄﻟﺘﻨﻲ ﺍﻟﺴﺆﺍﻝ ﺩﻩ ﺍﻧﺎ ﺣﺎﺟﺎﻭﺑﻚ ﺑﺼﺮﺍﺣﺔ ﻻﻧﻚ ﻭﻓﺮﺕ ﻋﻠﻴﺎ ﻛﺘﻴﺮ ... ﺃﻧﺎ ﻋﺎﻳﺰﺍﻙ ﺍﻧﺖ ﻳﺎ ﻋﻠﻲ
ﺃﻧﺘﺎﺑﻪ ﺷﻌﻮﺭ ﺑﺎﻹﺷﻤﺌﺰﺍﺯ ﻟﻮﻗﺎﺣﺘﻬﺎ ﻓﻘﺎﻝ ﺑﺈﺳﺘﻨﻜﺎﺭ : ﻣﺶ ﻓﺎﻫﻢ ﻋﺎﻳﺰﺍﻧﻲ ﺍﺯﺍﻱ ﻳﻌﻨﻲ ?
ﻧﺎﺩﻳﺔ : ﺯﻱ ﺃﻱ ﺳﺖ ﻣﺎ ﺑﺘﻌﻮﺯ ﺃﻱ ﺭﺍﺟﻞ ... ﺑﺤﺒﻚ ﻭﻋﺎﻳﺰﺍﻙ ... ﻭﺍﻋﺘﻘﺪ ﺍﻥ ﺍﻧﺖ ﻛﻤﺎﻥ ﺑﺘﺤﺒﻨﻲ ﻭﻋﺎﻳﺰﻧﻲ ﻭﺳﺒﻖ ﻭﻃﻠﺒﺖ ﺇﻳﺪﻱ ﻣﻦ ﺑﺎﺑﺎ ﻗﺒﻞ ﻛﺪﻩ ... ﻳﺒﻘﻲ ﺍﻳﻪ ﺍﻟﻤﺎﻧﻊ ﺍﻧﻨﺎ ﻧﻜﻮﻥ ﻟﺒﻌﺾ ?
ﻋﻠﻲ ﺑﺈﻧﻔﻌﺎﻝ : ﺍﻧﺘﻲ ﺍﺗﺠﻨﻨﺘﻲ ... ﻧﻜﻮﻥ ﻟﺒﻌﺾ ﺍﺯﺍﻱ ﻳﻌﻨﻲ ? ﺩﻩ ﺍﻧﺎ ﻭﺍﻧﺘﻲ ﻣﺎﻳﻨﻔﻌﺶ ﻻ ﻓﺤﺮﺍﻡ ﻭﻻ ﻓﺤﻼﻝ ... ﻳﺒﻘﻰ ﻧﻜﻮﻥ ﻟﺒﻌﺾ ﺍﺯﺍﻱ ?
ﻧﺎﺩﻳﺔ ﺑﻀﻴﻖ : ﺍﻧﺖ ﻓﺎﻛﺮﻧﻲ ﺇﻳﻪ ﻋﺸﺎﻥ ﺍﻃﻠﺐ ﻣﻨﻚ ﺣﺎﺟﺔ ﺯﻱ ﺩﻱ ﻓﺎﻟﺤﺮﺍﻡ ? ﺍﻧﺎ ﺃﻗﺼﺪ ﻃﺒﻌﺎ ﺍﻧﻨﺎ ﻧﺘﺠﻮﺯ
ﺑﻤﺰﻳﺪ ﻣﻦ ﺍﻹﻧﻔﻌﺎﻝ ﺃﺟﺎﺑﻬﺎ : ﻧﺘﺠﻮﺯ ﺍﺯﺍﻱ ﻳﺎ ﻣﺨﺒﻮﻟﺔ ﺍﻧﺘﻲ ? ﺍﻧﺘﻲ ﻧﺎﺳﻴﺔ ﺍﻧﻲ ﺟﻮﺯ ﺍﺧﺘﻚ ?
ﺍﻗﺘﺮﺑﺖ ﺑﻮﺟﻬﻬﺎ ﻣﻦ ﻭﺟﻬﻪ ﻭﻗﺎﻟﺖ ﺑﺠﺪﻳﺔ : ﺑﺈﻳﺪﻙ ﺍﻧﻚ ﺗﻔﻚ ﺍﻟﻘﻴﺪ ﺍﻟﻠﻲ ﺑﺎﺑﺎ ﻗﻴﺪﻙ ﺑﻴﻪ ... ﻭﺑﻌﺪﻫﺎ ﻧﺴﺘﻨﻰ ﻟﻤﺎ ﺗﺨﻠﺺ ﻋﺪﺗﻲ ﻭﻋﺪﺗﻚ ﻭﻧﺘﺠﻮﺯ ﻋﻠﻄﻮﻝ ... ﻗﻮﻟﺖ ﺇﻳﻪ ?
ﺃﺧﺬ ﻳﺘﻤﺎﻳﻞ ﺑﻤﻘﻌﺪﻩ ﻣﺤﺎﻭﻻ ﺍﻹﺳﺘﺮﺧﺎﺀ ﻗﺒﻞ ﺍﻥ ﻳﺠﻴﺒﻬﺎ ﻗﺎﺋﻼ : ﺑﺘﻬﻜﻢ : ﻳﺎﺍﺍﻩ ... ﺧﺮﺍﺏ ﺑﻴﺖ ﺃﺧﺘﻚ ﻋﻨﺪﻙ ﺑﺎﻟﺴﺎﻫﻞ ﻛﺪﻩ ... ﺍﻃﻠﻘﻬﺎ ﻭﺍﺗﺠﻮﺯﻙ ... ﻭﺩﻩ ﻋﺸﺎﻥ ﺇﻳﻪ ﺑﻘﻰ ﺍﻥ ﺷﺎﺀﺍﻟﻠﻪ ? ﺇﻳﻪ ﺇﻷﻭﺑﺸﻦ ﺍﻟﺰﻳﺎﺩﺓ ﺍﻟﻠﻲ ﻋﻨﺪﻙ ﻣﺶ ﻋﻨﺪ ﻧﻮﺭﺍ ? ﺇﻳﻪ ﺍﻟﻠﻲ ﻓﻴﻜﻲ ﻣﻤﻴﺰ ﻋﻨﻬﺎ ﻋﺸﺎﻥ ﺍﻃﻠﻘﻬﺎ ﻭﺍﺗﺠﻮﺯﻙ ﺍﻧﺘﻲ ( ﻗﺎﻟﻬﺎ ﻭﻫﻮ ﻳﺸﻴﺮ ﺑﻮﺟﻬﻪ ﻧﺤﻮﻫﺎ ﺑﺈﺷﻤﺌﺰﺍﺯ )
ﻧﺎﺩﻳﺔ : ﺍﻧﺖ ﻋﺎﺭﻑ ﻛﻮﻳﺲ ﺍﻥ ﻣﻌﺎﻳﺎ ﺣﺘﻜﺴﺐ ﺍﻛﺘﺮ ... ﺍﻧﺎ ﺍﻟﻠﻲ ﺑﺈﻳﺪﻱ ﺃﺧﻠﻴﻚ ﺗﻔﻀﻞ ﻋﺎﻳﺶ ﻓﺎﻟﻨﻌﻴﻢ ﺩﻩ ... ﻭﺃﻧﺎ ﺍﻟﻠﻲ ﺑﺈﻳﺪﻱ ﺑﺮﺿﻪ ﺃﺧﺮﺟﻚ ﻣﻦ ﺟﻨﺔ ﻋﻤﻚ ﺯﻱ ﺣﻮﺍ ﻣﺎ ﺧﺮﺟﺖ ﺍﺩﻡ ﻣﻦ ﺍﻟﺠﻨﺔ
ﻗﺎﻡ ﻣﻦ ﻣﻜﺎﻧﻪ ﻭﻭﻗﻒ ﺍﻣﺎﻣﻬﺎ ﻗﺎﺋﻼ ﺑﺘﺤﺪﻱ : ﺗﻌﺮﻓﻲ ﺇﻧﻲ ﺯﻋﻼﻥ ﺍﻭﻱ ﻭﻣﻀﺎﻳﻖ ﻋﺸﺎﻥ ﻋﻨﺪﻱ ﺑﻨﺖ ﻋﻢ ﺑﺎﻟﺤﻘﺎﺭﺓ ﺩﻱ ... ﺃﺣﺐ ﺃﻗﻮﻟﻚ ﺇﻧﻲ ﻣﺎﺑﺪﻟﺶ ﺿﺎﻓﺮ ﻧﻮﺭﺍ ﺑﺮﻗﺒﺔ ﻣﻠﻴﻮﻥ ﻭﺍﺣﺪﺓ ﻣﻦ ﻋﻴﻨﺘﻚ ... ﻭﺍﺣﺐ ﺃﻗﻮﻟﻚ ﻛﻤﺎﻥ ﺃﻥ ﻣﻌﻠﻮﻣﺎﺗﻚ ﻏﻠﻂ ... ﻭﺍﻥ ﺣﻮﺍ ﻣﺶ ﻫﻴﺎ ﺍﻟﻠﻲ ﺧﺮﺟﺖ ﺃﺩﻡ ﻣﻦ ﺍﻟﺠﻨﺔ ﺯﻱ ﻣﺎ ﺍﻧﺘﻲ ﻣﺘﺼﻮﺭﺓ ... ﺍﻟﻠﻲ ﺧﺮﺝ ﺁﺩﻡ ﻫﻮ ﺍﻟﺸﻴﻄﺎﻥ ... ﻭﺍﻟﺠﻨﺔ ﺍﻟﻤﺰﻋﻮﻣﺔ ﺑﺘﺎﻋﺘﻚ ﺩﻱ ﺃﻧﺎﺳﻴﺒﻬﺎﻟﻚ ﻭﻣﺎﺷﻲ ﺑﻤﺰﺍﺟﻲ ... ﻭﻣﺶ ﺣﺴﺘﻨﻰ ﺷﻴﻄﺎﻧﺔ ﺯﻳﻚ ﺗﺨﺮﺟﻨﻲ ﻣﻨﻬﺎ ... ﻋﻦ ﺇﺫﻧﻚ ﻳﺎ ..... ﻳﺎ ﺑﻨﺖ ﻋﻤﻲ
ﺍﺧﺘﺘﻢ ﻋﻠﻲ ﻛﻼﻣﻪ ﺛﻢ ﺍﻟﺘﻘﻂ ﺳﻠﺴﻠﺔ ﻣﻔﺎﺗﻴﺤﻪ ﻭﻏﺎﺩﺭ ﺗﺎﺭﻛﺎ ﻧﺎﺩﻳﺔ ﻭﻫﻲ ﺗﻜﺎﺩ ﺗﻤﻴﺰ ﻣﻦ ﺍﻟﻐﻴﻆ ﻭ ﺗﺘﻮﻋﺪﻩ ﻗﺎﺋﻠﺔ : ﻣﺎﺷﻲ ﻳﺎ ﻋﻠﻲ ... ﺇﻥ ﻣﺎﻛﻨﺖ ﺃﻧﺪﻣﻚ ﻭﺍﺩﻓﻌﻚ ﺗﻤﻦ ﺍﻟﻠﻲ ﻗﻮﻟﺘﻪ ﺩﻩ ﻏﺎﻟﻲ ﺍﻭﻱ ... ﻣﺎﺑﻘﺎﺵ ﺃﻧﺎ ﻧﺎﺩﻳﺔ ﺻﻔﻮﺕ
ﺑﻌﺪ ﺩﻗﺎﺋﻖ ﻛﺎﻧﺖ ﻧﺎﺩﻳﺔ ﺗﻘﻒ ﺃﻣﺎﻡ ﻏﺮﻓﺔ ﻣﻜﺘﺐ ﻭﺍﻟﺪﻫﺎ ﻭﺗﺘﺤﺪﺙ ﺇﻟﻰ ﺍﻟﺴﻜﺮﺗﻴﺮﺓ ﻗﺎﺋﻠﺔ : ﺑﺄﻗﻮﻟﻚ ﺇﻳﻪ ﻳﺎ ﻫﺪﻯ ... ﺍﻧﺎ ﺣﺎﺳﺔ ﺑﺼﺪﺍﻉ ﺟﺎﻣﺪ ﺍﻭﻱ ... ﻣﻤﻜﻦ ﻟﻮ ﺳﻤﺤﺘﻲ ﺗﻌﻤﻠﻴﻠﻲ ﻓﻨﺠﺎﻥ ﻗﻬﻮﺓ ﻣﻦ ﺇﻳﺪﻳﻜﻲ ... ﺃﻧﺎ ﻋﺎﺭﻓﺔ ﻃﺒﻌﺎ ﺍﻥ ﺩﻱ ﻣﺶ ﺷﻐﻠﺘﻚ ﺑﺲ ﺃﻧﺎ ﻋﺎﻳﺰﺓ ﺃﺷﺮﺑﻪ ﻣﻦ ﺇﻳﺪﻳﻜﻲ ﺍﻧﺘﻲ ... ﻣﻤﻜﻦ ?
ﺃﻭﻣﺄﺕ ﻫﺪﻯ ﺑﺮﺃﺳﻬﺎ ﻣﻮﺍﻓﻘﺔ ﻭﻗﺎﻟﺖ ﺑﺈﺫﻋﺎﻥ : ﺣﺎﺿﺮ ﻳﺎ ﻣﺪﺍﻡ ﻧﺎﺩﻳﺔ ﻣﻦ ﻋﻨﻴﺎ
ﺍﻃﻤﺄﻧﺖ ﻧﺎﺩﻳﺔ ﺇﻟﻰ ﻣﻐﺎﺩﺭﺓ ﻫﺪﻯ ﻓﺄﺧﺬﺕ ﺗﺒﻌﺜﺮ ﺧﺼﻼﺕ ﺷﻌﺮﻫﺎ ﺑﻄﺮﻳﻘﺔ ﻋﺸﻮﺍﺋﻴﺔ ﻭ ﺗﻐﻴﺮ ﻣﻦ ﻫﻨﺪﺍﻣﻬﺎ ﺛﻢ ﺍﺻﻄﻨﻌﺖ ﺍﻟﺒﻜﺎﺀ ﻭﻫﻲ ﺗﺪﻟﻒ ﺇﻟﻰ ﺩﺍﺧﻞ ﻏﺮﻓﺔ ﻭﺍﻟﺪﻫﺎ ﻣﺴﺮﻋﺔ ﺩﻭﻥ ﺇﺳﺘﺌﺬﺍﻥ ﺛﻢ ﺍﺳﺮﻋﺖ ﻧﺤﻮﻩ ﻭﺃﻟﻘﺖ ﺑﻨﻔﺴﻬﺎ ﻓﻲ ﺃﺣﻀﺎﻧﻪ ﻗﺎﺋﻠﺔ : ﺑﺎﺑﺎ ﺍﻟﺤﻘﻨﻲ ﻳﺎ ﺑﺎﺑﺎ
ﺷﻌﺮ ﺑﺎﻟﻔﺰﻉ ﻟﺮﺅﻳﺘﻬﺎ ﻋﻠﻰ ﻫﺬﻩ ﺍﻟﺤﺎﻟﺔ ﻓﻘﺎﻝ ﺑﻘﻠﻖ : ﻣﺎﻟﻚ ﻳﺎ ﻧﺎﺩﻳﺔ ﻭﺇﻳﻪ ﺍﻟﻠﻲ ﻣﺒﻬﺪﻟﻚ ﺑﺎﻟﺸﻜﻞ ﺩﻩ ﻳﺎ ﺣﺒﻴﺒﺘﻲ
ﺃﺟﺎﺑﺘﻪ ﻭﻫﻲ ﺗﺪﻓﻦ ﻭﺟﻬﻬﺎ ﻓﻲ ﺻﺪﺭﻩ ﺣﺘﻰ ﻻ ﻳﻼﺣﻆ ﺩﻣﻮﻋﻬﺎ ﺍﻟﻤﺰﻳﻔﺔ : ﻋﻠﻲ ﻳﺎ ﺑﺎﺑﺎ ... ﻋﻠﻲ ﺑﺎﻳﻦ ﻋﻠﻴﻪ ﺍﺗﺠﻨﻦ ... ﻣﺶ ﺣﺘﺼﺪﻕ ﻫﻮ ﻋﻤﻞ ﻣﻌﺎﻳﺎ ﺇﻳﻪ
ﺃﺟﺎﺑﻬﺎ ﻗﺎﺋﻼ ﺑﺪﻫﺸﺔ : ﻋﻠﻲ ! ﻋﻠﻲ ﻫﻮ ﺍﻟﻠﻲ ﺑﻬﺪﻟﻚ ﻫﺪﻭﻣﻚ ﻭﺷﻌﺮﻙ ﺑﺎﻟﺸﻜﻞ ﺩﻩ ... ﻃﺐ ﻟﻴﻪ ?
ﻧﺎﺩﻳﺔ ﺑﺒﻜﺎﺀ ﻣﺼﻄﻨﻊ : ﺍﻧﺎ ﺑﻘﺎﻟﻲ ﻣﺪﺓﺳﺎﻛﺘﺔ ﻭﻣﺶ ﻗﺎﺩﺭﺓ ﺍﺗﻜﻠﻢ ﻭﻗﻮﻝ ﻟﺤﻀﺮﺗﻚ ﻋﻠﻰ ﺍﻟﻠﻲ ﺑﻴﻌﻤﻠﻪ ﻣﻌﺎﻳﺎ .... ﺗﺼﻮﺭ ﻳﺎ ﺑﺎﺑﺎ ... ﺑﻘﺎﻟﻪ ﻣﺪﺓ ﺑﻴﻄﺎﺭﺩﻧﻲ ﺑﻜﻼﻣﻪ ﻫﻨﺎ ﻭﻓﺎﻟﻔﻴﻼ .... ﺍﻧﺎ ﺑﺤﺒﻚ ﻳﺎ ﻧﺎﺩﻳﺔ ... ﺍﻧﺎ ﻣﺶ ﻗﺎﺩﺭ ﺍﻋﻴﺶ ﻣﻦ ﻏﻴﺮﻙ ﻳﺎ ﻧﺎﺩﻳﺔ ... ﺍﻧﺎ ﻛﻨﺖ ﻋﺎﻳﺰ ﺍﺗﺠﻮﺯﻙ ﺍﻧﺘﻲ ﺑﺲ ﻋﻤﻲ ﻫﻮ ﺍﻟﻠﻲ ﻓﺮﺽ ﻋﻠﻴﺎ ﺇﻧﻲ ﺍﺗﺠﻮﺯ ﻧﻮﺭﺍ .... ﻭﻛﻼﻡ ﻛﺘﻴﺮ ﺯﻱ ﺩﻩ ﻳﺎ ﺑﺎﺑﺎ .... ﻭﺍﻧﺎ ﺣﺎﻭﻟﺖ ﺃﺻﺪﻩ ﻛﺘﻴﺮ ﻭﺃﻗﻮﻟﻪ ﻋﻴﺐ ﻳﺎ ﻋﻠﻲ ﻣﺎﻳﺼﺤﺶ ﺩﻩ ﺍﻧﺖ ﺟﻮﺯ ﺃﺧﺘﻲ ... ﻳﻘﻮﻟﻲ ﺣﺎﻃﻠﻘﻬﺎ ﻋﺸﺎﻥ ﺧﺎﻃﺮﻙ ﺍﻧﺘﻲ ﻭﻧﺘﺠﻮﺯ ﺑﻌﺪﻫﺎ ... ﺍﻗﻮﻟﻪ ﻣﺎﻗﺪﺭﺵ ﺍﺑﻨﻲ ﺳﻌﺎﺩﺗﻲ ﻋﻠﻰ ﺗﻌﺎﺳﺔ ﺍﺧﺘﻲ ﻭﺧﺮﺍﺏ ﺑﻴﺘﻬﺎ ... ﻳﻘﻮﻟﻲ ﺍﻧﺎ ﻛﺪﻩ ﻭﻻ ﻛﺪﻩ ﻣﺶ ﻃﺎﻳﻘﻬﺎ ﻣﻦ ﺍﺻﻠﻪ ... ﻟﺤﺪ ﺍﻟﻨﻬﺎﺭﺩﺓ ﻣﺎ ﺍﺗﺠﺮﺃ ﻭﺍﺗﻬﺠﻢ ﻋﻠﻴﺎ ﻭﺃﻧﺎ ﻓﻤﻜﺘﺒﻪ ﻭﻳﻘﻮﻟﻲ ﺧﻼﺹ ﻣﺎﺑﻘﺘﺶ ﻗﺎﺩﺭ ﺍﺑﻌﺪ ﻋﻨﻚ ﺍﻛﺘﺮ ﻣﻦ ﻛﺪﻩ ﻳﺎ ﻧﺎﺩﻳﺔ ... ﺑﻘﻰ ﺍﻧﺎ ﻳﻔﻜﺮ ﻓﻴﺎ ﺑﺎﻟﻄﺮﻳﻘﺔ ﺩﻱ .... ﻳﺮﺿﻴﻚ ﻳﺎﺑﺎﺑﺎ ﺍﻟﻠﻲ ﺣﺼﻞ ﺩﻩ ?
ﻛﺎﻥ ﻳﺴﺘﻤﻊ ﺇﻟﻴﻬﺎ ﻭﻗﺪ ﺍﺭﺗﺴﻤﺖ ﻣﻌﺎﻟﻢ ﺍﻟﺬﻫﻮﻝ ﻭﺍﻟﺼﺪﻣﺔ ﻋﻠﻲ ﻭﺟﻬﻪ ... ﻇﻞ ﺻﺎﻣﺘﺎ ﻟﻔﺘﺮﺓ ﻳﺤﺎﻭﻝ ﺇﺳﺘﻴﻌﺎﺏ ﻣﺎ ﻗﺎﻟﺘﻪ ﻧﺎﺩﻳﺔ ﻟﻠﺘﻮ ... ﺑﻌﺪ ﻓﺘﺮﺓ ﻧﻄﻖ ﻗﺎﺋﻼ : ﻣﻌﻘﻮﻝ ﻋﻠﻲ ﻳﻌﻤﻞ ﺣﺎﺟﺔ ﺯﻱ ﺩﻱ
ﺃﺳﺮﻋﺖ ﺗﺠﻴﺒﻪ ﻗﺎﺋﻠﺔ : ﻟﻴﻚ ﺣﻖ ﻣﺎﺗﺼﺪﻗﺶ ﻳﺎ ﺑﺎﺑﺎ ... ﺍﻧﺎ ﻧﻔﺴﻲ ﻣﺎﻛﻨﺘﺶ ﻣﺼﺪﻗﺔ ... ﻭﻟﺤﺪ ﺩﻟﻮﻗﺘﻲ ﺑﺮﺿﻪ ﻣﺶ ﻗﺎﺩﺭﺓ ﺍﺳﺘﻮﻋﺐ ﺍﻟﻠﻲ ﺣﺼﻞ ... ﺑﺲ ﺣﻀﺮﺗﻚ ﻋﺎﺭﻑ ﺇﻧﻪ ﻛﺎﻥ ﺑﻴﺤﺒﻨﻲ ﻭﻋﺎﻳﺰ ﻳﺘﺠﻮﺯﻧﻲ ... ﻭﺑﻌﺪﻳﻦ ﺍﻧﺎ ﻣﺼﻠﺤﺘﻲ ﺇﻳﻪ ﻓﺈﻧﻲ ﺍﻛﺪﺏ ﻳﻌﻨﻲ ...
ﺭﺑﺖ ﻋﻠﻰ ﻇﻬﺮﻫﺎ ﻣﻬﺪﺋﺎ ﻭﻗﺎﻝ ﺑﺠﺪﻳﺔ : ﻣﺎ ﺗﺰﻋﻠﻴﺶ ﻧﻔﺴﻚ ﻳﺎ ﺣﺒﻴﺒﺘﻲ ... ﺍﻧﺎ ﺣﺎﻋﺮﻑ ﺷﻐﻠﻲ ﻣﻌﺎﻩ ... ﻫﻮ ﻓﻤﻜﺘﺒﻪ ﺩﻟﻮﻗﺘﻲ ?
ﻧﺎﺩﻳﺔ : ﺍﻛﻴﺪ ﻣﺸﻲ ﺑﻌﺪﺍﻟﻠﻲ ﻋﻤﻠﻪ ﻣﺶ ﺣﻴﻘﺪﺭ ﻳﻮﺭﻱ ﻭﺷﻪ ﻟﺤﻀﺮﺗﻚ
ﺍﻣﺴﻚ ﺻﻔﻮﺕ ﺑﺎﻟﻬﺎﺗﻒ ﻟﻴﻘﻮﻡ ﺑﺈﺳﺘﺪﻋﺎﺀ ﻋﻠﻲ ﻭﻟﻜﻨﻪ ﺳﺮﻋﺎﻥ ﻣﺎﺗﺬﻛﺮ ﺷﻴﺌﺎ ﻓﺎﻟﺘﻔﺖ ﺇﻟﻰ ﻧﺎﺩﻳﺔ ﻗﺎﺋﻼ : ﺍﻧﺘﻲ ﺟﻴﺘﻲ ﻟﺤﺪ ﻣﻜﺘﺒﻲ ﺑﺎﻟﺸﻜﻞ ﺩﻩ ﻳﻌﻨﻲ ﺍﻛﻴﺪ ﺍﻟﺴﻜﺮﺗﻴﺮﺓ ﺷﺎﻓﺘﻚ ﻭﺍﻧﺘﻲ ﻣﺒﻬﺪﻟﺔ ﻛﺪﻩ
ﻃﻤﺄﻧﺘﻪ ﻧﺎﺩﻳﺔ ﻗﺎﺋﻠﺔ : ﻻ ﻣﺎﺗﻘﻠﻘﺶ ﺣﻀﺮﺗﻚ ... ﻫﻴﺎ ﻣﺎﻛﺎﻧﺘﺶ ﻣﻮﺟﻮﺩﺓ ﻋﻠﻰ ﻣﻜﺘﺒﻬﺎ ﻟﻤﺎ ﺍﻧﺎ ﺟﻴﺖ ... ﻭﻋﻤﻮﻣﺎ ﺍﻧﺎ ﺍﺳﻔﺔ ﺇﻧﻲ ﻣﺎﺧﺪﺗﺶ ﺑﺎﻟﻲ ﻣﻦ ﺣﺎﺟﺔ ﺯﻱ ﺩﻱ ... ﺍﻧﺎ ﻛﻨﺖ ﻣﻨﻬﺎﺭﺓﻭﻣﺶ ﺑﻔﻜﺮ ﻏﻴﺮ ﻓﺎﻟﻠﻲ ﻋﻤﻠﻪ ﻋﻠﻲ
ﻃﻠﺐ ﺻﻔﻮﺕ ﻣﻦ ﺳﻜﺮﺗﻴﺮﺗﻪ ﺃﻥ ﺗﻘﻮﻡ ﺑﺈﺳﺘﺪﻋﺎﺀ ﻋﻠﻲ ﺇﻟﻰ ﻣﻜﺘﺒﻪ ﻭﻟﻜﻨﻬﺎ ﻣﺎﻟﺒﺜﺖ ﺍﻧﺄﺧﺒﺮﺗﻪ ﺑﻌﺪ ﻗﻠﻴﻞ ﺍﻥ ﻋﻠﻲ ﻗﺪ ﻏﺎﺩﺭ ﺍﻟﺸﺮﻛﺔ ﻣﻨﺬ ﻗﻠﻴﻞ ﻟﻴﺘﺄﻛﺪ ﻟﻪ ﻛﻼﻡ ﻧﺎﺩﻳﺔ ﺍﻟﺘﻲ ﻗﺎﻟﺖ : ﺷﻮﻓﺖ ﻳﺎ ﺑﺎﺑﺎ ﺻﺪﻗﺘﻨﻲ ... ﺁﻫﻮ ﻣﺎﻗﺪﺭﺵ ﻳﻮﺍﺟﻬﻚ ﺃﺧﺪ ﺑﻌﻀﻪ ﻭﻣﺸﻲ
ﺍﺟﺎﺑﻬﺎ ﺻﻔﻮﺕ ﻭﻫﻮ ﻳﺠﻤﻊ ﺃﺷﻴﺎﺋﻪ ﺍﻟﻤﻮﺿﻮﻋﺔ ﻋﻠﻰ ﺍﻟﻤﻜﺘﺐ ﺇﺳﺘﻌﺪﺍﺩﺍ ﻟﻠﻤﻐﺎﺩﺭﺓ : ﺗﻌﺎﻟﻲ ﻣﻌﺎﻳﺎ ﻋﻠﻰ ﺍﻟﺒﻴﺖ ﺑﺴﺮﻋﺔ
ﻛﺎﻧﺖ ﻧﻮﺭﺍ ﺗﺠﻤﻊ ﻣﻼﺑﺴﻬﺎ ﻭﻣﻼﺑﺲ ﻋﻠﻲ ﺇﺳﺘﻌﺪﺍﺩﺍ ﻟﻤﻐﺎﺩ ﺭﺓ ﺍﻟﻔﻴﻼ ﺑﻨﺎﺀ ﻋﻠﻰ ﻣﺎ ﺍﺧﺒﺮﻫﺎ ﺑﻪ ﻋﻠﻲ ﻣﻨﺬﻋﺎﺩ ﻣﻦ ﺍﻟﺸﺮﻛﺔ ﻣﺒﻜﺮﺍ ... ﻭﻋﻠﻲ ﻳﺠﻠﺲ ﻋﻠﻰ ﻓﺮﺍﺷﻪ ﻏﺎﺭﻗﺎ ﻓﻲ ﺑﺤﺮ ﺃﻓﻜﺎﺭﻩ ... ﻳﺤﺎﻭﻝ ﺃﻥ ﻳﺒﺤﺚ ﻋﻦ ﻛﻠﻤﺎﺕ ﻣﻨﺎﺳﺒﺔ ﻳﻘﻮﻟﻬﺎ ﻟﻌﻤﻪ ﻣﺒﺮﺭﺍ ﺑﻬﺎ ﺗﺮﻛﻪ ﻟﻠﻔﻴﻼ ... ﺍﻧﺘﻬﺖ ﻧﻮﺭﺍ ﻣﻦ ﺣﺰﻡ ﺍﻟﺤﻘﺎﺋﺐ ﻓﺎﻟﺘﻔﺘﺖ ﺇﻟﻰ ﻋﻠﻲ ﻗﺎﺋﻠﺔ : ﺍﻧﺎ ﺧﻼﺹ ﺧﻠﺼﺖ ﻳﺎ ﻋﻠﻲ .
ﻗﺎﻡ ﻋﻠﻲ ﻣﺘﺠﻬﺎ ﻧﺤﻮﻫﺎ ﻭﺃﺣﺎﻁ ﺧﺼﺮﻫﺎ ﺑﺬﺭﺍﻋﻴﻪ ﻗﺎﺋﻼ : ﻧﻮﺭﺍ ... ﺃﻧﺎ ﻋﺎﻳﺰ ﺃﻗﻮﻟﻚ ﺍﻧﻨﺎ ﻣﻤﻜﻦ ﻧﺘﻌﺐ ﺷﻮﻳﺔ ﻓﺤﻴﺎﺗﻨﺎ ﺍﻟﻔﺘﺮﺓ ﺍﻟﻠﻲ ﺟﺎﻳﺔ ... ﺣﺘﻘﻔﻲ ﺟﻨﺒﻲ ﻭﺗﺴﺎﻧﺪﻳﻨﻲ ﻭﻻ ﻣﺎﻋﻨﺪﻛﻴﺶ ﺇﺳﺘﻌﺪﺍﺩ ﻟﻠﺘﻀﺤﻴﺔ ﺩﻱ ?
ﺃﺭﺧﺖ ﺭﺃﺳﻬﺎ ﻋﻠﻰ ﺻﺪﺭﻩ ﻗﺎﺋﻠﺔ : ﺍﻧﺖ ﻋﺎﺭﻑ ﺍﻹﺟﺎﺑﺔ ﻣﻦ ﻗﺒﻞ ﻣﺎ ﺗﺴﺄﻝ ﻳﺎ ﻋﻠﻲ ... ﺃﻧﺎ ﻣﺴﺘﻌﺪﺓ ﺍﺗﺤﻤﻞ ﺃﻱ ﺣﺎﺟﺔ ﻓﺎﻟﺪﻧﻴﺎ ﻃﺎﻟﻤﺎ ﺣﺎﻛﻮﻥ ﻣﻌﺎﻙ ﻭﺟﻨﺒﻚ ... ﺑﺲ ﺍﻧﺖ ﻧﺎﺳﻲ ﻓﻠﻮﺱ ﻣﺎﻣﺎ ﺍﻟﻠﻲ ﻓﺎﻟﺒﻨﻚ ﺗﻘﺪﺭ ﺗﺎﺧﺪﻫﻢ ﻭﺗﺒﺘﺪﻱ ﺑﻴﻬﻢ ﻣﺸﺮﻭﻉ ﺻﻐﻴﺮ ﻭﺍﻧﺎ ﻭﺍﺛﻘﺔ ﺍﻧﻪ ﺑﻜﺮﺓ ﺣﻴﻜﺒﺮ ﻭﺣﺘﺒﻘﻰ ﻭﺍﺣﺪ ﻣﻦ ﻛﺒﺎﺭ ﺭﺟﺎﻝ ﺍﻷﻋﻤﺎﻝ ﻛﻤﺎﻥ ... ﻭﺍﻟﻌﺮﺑﻴﺔ ﺑﺘﺎﻋﺘﻲ ﻫﻴﺎ ﻛﻤﺎﻥ ﻣﻦ ﻓﻠﻮﺱ ﻣﺎﻣﺎ ... ﻳﻌﻨﻲ ﺍﺣﻨﺎ ﻣﺶ ﻣﺤﺘﺎﺟﻴﻴﻦ ﺣﺎﺟﺔ ﻣﻦ ﺣﺪ
ﺿﻤﻬﺎ ﺇﻟﻴﻪ ﺍﻛﺜﺮ ﻭﻫﻮ ﻳﻘﻮﻝ ﺑﺤﺐ : ﺭﺑﻨﺎ ﻣﺎﻳﺤﺮﻣﻨﻴﺶ ﻣﻨﻚ ﻳﺎ ﺣﺒﻴﺒﺘﻲ ... ﺑﺲ ﺍﻧﺘﻲ ﻣﺘﺨﻴﻠﺔ ﺍﻥ ﺃﻧﺎ ﻣﻤﻜﻦ ﺍﻭﺍﻓﻖ ﺍﺧﺪ ﻓﻠﻮﺳﻚ ﻋﺸﺎﻥ ﺍﺑﺘﺪﻱ ﺑﻴﻬﺎ ﻣﺸﺮﻭﻉ ... ﻓﻠﻮﺳﻚ ﺩﻱ ﺣﺎﺟﺔ ﺗﺨﺼﻚ ﺍﻧﺘﻲ ﻭﺑﺲ ... ﻣﺎﺗﻘﻠﻘﻴﺶ ﺍﻧﺎ ﻣﻦ ﺑﻜﺮﺓ ﺣﺎﺩﻭﺭ ﻋﻠﻰ ﺷﻐﻞ ... ﻭﺍﻋﺘﻘﺪ ﺍﻥ ﻋﻨﺪﻱ ﺧﺒﺮﺓ ﻛﺎﻓﻴﺔ ﻷﻱ ﺷﺮﻛﺔ ﺍﻧﻬﺎ ﺗﻮﺍﻓﻖ ﺗﺸﻐﻠﻨﻲ ... ﻳﻼ ﺑﻴﻨﺎ ﺑﻘﻰ ﻋﺸﺎﻥ ﻧﻠﺤﻖ ﻧﻤﺸﻲ ﻗﺒﻞ ﻋﻤﻲ ﻣﺎ ﻳﺮﺟﻊ ﻹﻧﻲ ﺑﺼﺮﺍﺣﺔ ﻟﺴﻪ ﻣﺎﻋﻨﺪﻳﺶ ﺇﺳﺘﻌﺪﺍﺩ ﻟﻠﻤﻮﺍﺟﻬﺔ ﻣﻌﺎﻩ
ﺣﻤﻞ ﻋﻠﻲ ﻭﻧﻮﺭﺍ ﺣﻘﺎﺋﺒﻬﻢ ﻭﻫﺒﻄﻮﺍ ﺍﻟﺪﺭﺝ ﻣﺘﺠﻬﻴﻦ ﻧﺤﻮ ﺍﻟﺨﺎﺭﺝ ﻟﻜﻦ ﺩﺧﻮﻝ ﺻﻔﻮﺕ ﻭﻣﻌﻪ ﻧﺎﺩﻳﺔ ﺍﺳﺘﻮﻗﻔﻬﻢ ... ﻧﻈﺮﺍ ﺇﻟﻰ ﺗﻠﻚ ﺍﻟﺤﻘﺎﺋﺐ ﺍﻟﺘﻲ ﻳﺤﻤﻼﻧﻬﺎ ﺑﺪﻫﺸﺔ ... ﺍﻧﺘﻬﺰﺗﻬﺎ ﻧﺎﺩﻳﺔ ﻓﺮﺻﺔ ﻛﻲ ﺗﻘﻮﻝ : ﺷﻮﻓﺖ ﻳﺎ ﺑﺎﺑﺎ ... ﺟﺎﻟﻚ ﻛﻼﻣﻲ ... ﺁﻫﻮ ﻣﺎﺷﻲ ﻭﺳﺎﻳﺐ ﺍﻟﻔﻴﻼ ﻛﻤﺎﻥ ... ﻣﺎﻋﻨﺪﻭﺵ ﺇﺳﺘﻌﺪﺍﺩ ﻳﻮﺭﻱ ﻭﺷﻪ ﻟﺤﻀﺮﺗﻚ ﺑﻌﺪ ﻋﻤﻠﺘﻪ ﺍﻟﺴﻮﺩﺓ
ﺭﺃﻯ ﻋﻠﻲ ﺃﻧﻪ ﻟﻢ ﻳﻌﺪ ﻫﻨﺎﻙ ﺑﺪ ﻣﻦ ﺍﻟﻤﻮﺍﺟﻬﺔ ﻓﻮﺿﻊ ﺍﻟﺤﻘﻴﺒﺔ ﺍﻟﺘﻲ ﻛﺎﻥ ﻳﺤﻤﻠﻬﺎ ﻭﺍﻟﺘﻔﺖ ﺇﻟﻴﻬﺎ ﻗﺎﺋﻼ : ﻋﻤﻠﺔ ﺇﻳﻪ ﺩﻱ ﺍﻟﻠﻲ ﺑﺘﺘﻜﻠﻤﻲ ﻋﻨﻬﺎ ?
ﻧﻈﺮ ﺇﻟﻴﻪ ﺻﻔﻮﺕ ﻗﺎﺋﻼ : ﺗﻌﺮﻑ ﺍﻥ ﺃﻧﺎ ﻛﺎﻥ ﻋﻨﺪﻱ ﺃﻣﻞ ﺍﻥ ﻧﺎﺩﻳﺔ ﺗﻜﻮﻥ ﻓﻬﻤﺘﻚ ﻏﻠﻂ ﻟﺤﺪ ﻣﺎﻭﺻﻠﺖ ﻫﻨﺎ ﻭﺷﻮﻓﺖ ﺍﻟﺸﻨﻂ ﺩﻱ ... ﻟﻠﺪﺭﺟﺔﺩﻱ ﺍﻧﺖ ﻣﺶ ﻋﺎﻣﻠﻲ ﺃﻱ ﺇﻋﺘﺒﺎﺭ ... ﻃﺐ ﻟﻤﺎ ﺍﻧﺖ ﻣﺶ ﻋﺎﻳﺰ ﺗﺘﺠﻮﺯﻫﺎ ﻭﺍﻓﻘﺘﻨﻲ ﻟﻴﻪ ? ﻣﺶ ﺍﻧﺎ ﻭﻗﺘﻬﺎ ﻗﻮﻟﺘﻠﻚ ﻟﻮ ﻣﺶ ﻣﻮﺍﻓﻖ ﻗﻮﻟﻲ ﺑﺼﺮﺍﺣﺔ ... ﻃﺐ ﻟﻤﺎ ﺍﻧﺖ ﻣﺶ ﻋﺎﻳﺰﻫﺎ ﻭﺍﺧﺪﻫﺎ ﻣﻌﺎﻙ ﺩﻟﻮﻗﺘﻲ ﻭﺭﺍﻳﺢ ﻓﻴﻦ ? ﻭﻻ ﻋﺎﻳﺰ ﺗﻤﺜﻞ ﻋﻠﻴﻬﺎ ﺍﻧﻚ ﻣﻈﻠﻮﻡ
ﻋﻠﻲ ﺑﺪﻫﺸﺔ : ﺃﻧﺎ ﻣﺶ ﻓﺎﻫﻢ ﺣﺎﺟﺔ ... ﺣﻀﺮﺗﻚ ﺑﺘﺘﻜﻠﻢ ﻋﻦ ﺇﻳﻪ ﺑﺎﻟﻈﺒﻂ ?
ﺍﺳﺮﻋﺖ ﻧﺎﺩﻳﺔ ﺗﺠﻴﺐ ﻗﺎﺋﻠﺔ : ﻃﺒﻌﺎ ﻋﺎﻳﺰ ﺗﻨﻜﺮ ﺍﻟﻠﻲ ﻋﻤﻠﺘﻪ ﻭﺗﺒﺎﻥ ﺍﺩﺍﻣﻬﺎ ﺍﻧﻚ ﺍﻟﺒﺮﺉ ﺍﻟﻤﻈﻠﻮﻡ ﺍﻟﻤﻔﺘﺮﻯ ﻋﻠﻴﻪ
ﺻﻔﻮﺕ ﺑﺤﺪﺓ : ﻣﺎﻓﻴﺶ ﺩﺍﻋﻲ ﺗﻨﻜﺮ ﺍﻟﻠﻲ ﻋﻤﻠﺘﻪ ... ﺍﻧﺖ ﻧﺎﺳﻲ ﺍﻧﻲ ﻋﺎﺭﻑ ﺍﻧﻚ ﻛﻨﺖ ﺑﺘﺤﺒﻬﺎ ﻭﻋﺎﻳﺰ ﺗﺘﺠﻮﺯﻫﺎ .... ﻧﺎﺩﻳﺔ ﺣﻜﺘﻠﻲ ﻛﻞ ﺣﺎﺟﺔ ﻋﻦ ﺍﻟﻠﻲ ﻋﻤﻠﺘﻪ ﻣﻌﺎﻫﺎ ﻓﻤﻜﺘﺒﻚ ... ﺍﻧﺖ ﻳﺎ ﻋﻠﻲ ! ﺩﻱ ﺃﺧﺮ ﺣﺎﺟﺔ ﻛﻨﺖ ﺍﺗﻮﻗﻌﻬﺎ
ﻭﺿﻌﺖ ﻧﻮﺭﺍ ﺣﻘﻴﺒﺘﻬﺎ ﻭﺗﻘﺪﻣﺖ ﻣﻨﻬﻤﺎ ﻗﺎﺋﻠﺔ ﻭﻫﻲ ﺗﻨﻈﺮ ﻧﺤﻮ ﻧﺎﺩﻳﺔ : ﻛﺪﺍﺑﺔ .
ﻧﺎﺩﻳﺔ ﺑﺤﺪﺓ : ﻫﻴﺎ ﻣﻴﻦ ﺩﻱ ﺍﻟﻠﻲ ﻛﺪﺍﺑﺔ ?
ﺍﺳﺘﻄﺮﺩﺕ ﻧﻮﺭﺍ ﻗﺎﺋﻠﺔ ﺑﺈﺳﺘﻨﻜﺎﺭ : ﺍﻧﺘﻲ ... ﺻﺤﻴﺢ ﺃﻧﺎ ﻣﺎﻋﺮﻓﺶ ﺍﻧﺘﻲ ﻗﻮﻟﺘﻲ ﺇﻳﻪ ﺑﺎﻟﻈﺒﻂ ﻟﺒﺎﺑﺎ ... ﻟﻜﻦ ﺃﻧﺎ ﻣﺘﺄﻛﺪﺓ ﺍﻧﻚ ﻛﺪﺍﺑﺔ ﻭﺣﻘﻴﺮﺓ ﻛﻤﺎﻥ
ﻧﻘﻠﺖ ﻧﺎﺩﻳﺔ ﺑﺼﺮﻫﺎ ﺑﻴﻦ ﻧﻮﺭﺍ ﻭﺑﻴﻦ ﻭﺍﻟﺪﻫﺎ ﺛﻢ ﻗﺎﻟﺖ : ﺷﺎﻳﻒ ﻳﺎ ﺑﺎﺑﺎ ... ﺷﺎﻳﻒ ﺑﺘﻘﻮﻟﻲ ﺇﻳﻪ ... ﻭﺃﻧﺎ ﺍﻟﻠﻲ ﻛﻨﺖ ﺯﻋﻼﻧﺔ ﻋﺸﺎﻧﻬﺎ ... ﻭﻛﻨﺖ ﺧﺎﻳﻔﺔ ﻟﻤﺎ ﺗﻌﺮﻑ ﺗﺘﺼﺪﻡ ﻓﺠﻮﺯﻫﺎ
ﻧﻮﺭﺍ : ﺟﻮﺯﻱ ﺃﻧﺎ ﻭﺍﺛﻘﺔ ﻓﻴﻪ ﻛﻮﻳﺲ ... ﺯﻱ ﻣﺎ ﺍﻧﺎ ﻋﺎﺭﻓﺎﻛﻲ ﻛﻮﻳﺲ ... ﻭﻋﺎﺭﻓﺔ ﺍﻧﻚ ﺇﻧﺴﺎﻧﺔ ﺣﻘﻮﺩﺓ ﻭﺃﻧﺎﻧﻴﺔ ﻭﻃﻤﺎﻋﺔ ... ﻣﺎﺑﺘﻔﻜﺮﻳﺶ ﻏﻴﺮ ﻓﻨﻔﺴﻚ ﻭﺑﺲ ... ﻋﺎﻳﺰﺓ ﻛﻞ ﺣﺎﺟﺔ ﻟﻴﻜﻲ ... ﺍﺳﺘﻜﺘﺮﺗﻲ ﻋﻠﻴﺎ ﺇﻧﻲ ﺍﻵﻗﻲ ﺇﻧﺴﺎﻥ ﻳﺤﺒﻨﻲ ﻭﺃﺣﺒﻪ ... ﻃﻤﻌﺘﻲ ﻓﻴﻪ ﻟﻨﻔﺴﻚ ... ﻃﺐ ﻣﺎﻛﺎﻥ ﻋﻨﺪﻙ ﺍﻟﻠﻲ ﺑﻴﺤﺒﻚ ﻭﺑﺘﺤﺒﻴﻪ ﻭﺍﺗﺠﻮﺯﺗﻴﻪ ﻭﺭﺑﻨﺎ ﻛﺮﻣﻚ ﻭﻛﻨﺘﻲ ﺣﺎﻣﻞ ... ﻳﻌﻨﻲ ﻛﺎﻥ ﺣﻴﺒﻘﻰ ﻋﻨﺪﻙ ﺑﻴﺖ ﻭﺯﻭﺝ ﻭﺃﻭﻻﺩ ... ﻭﺍﻧﺘﻲ ﺍﻟﻠﻲ ﺿﺤﻴﺘﻲ ﺑﻜﻞ ﺩﻩ ... ﺟﺎﻳﺔ ﺩﻟﻮﻗﺘﻲ ﺗﻄﻤﻌﻲ ﻓﺎﻟﻠﻲ ﻓﺈﻳﺪ ﻏﻴﺮﻙ ﻟﻴﻪ ?
ﻧﺎﺩﻳﺔ ﺑﺬﻫﻮﻝ : ﺷﺎﻳﻒ ﻳﺎ ﺑﺎﺑﺎ ﺑﺘﻜﻠﻤﻨﻲ ﺍﺯﺍﻱ ?
ﺍﻟﺘﻔﺖ ﺻﻔﻮﺕ ﺇﻟﻰ ﻧﻮﺭﺍ ﻗﺎﺋﻼ ﺑﻠﻬﺠﺔ ﺻﺎﺭﻣﺔ : ﺍﻧﺘﻲ ﺍﺯﺍﻱ ﺗﻜﻠﻤﻲ ﺍﺧﺘﻚ ﺍﻟﻜﺒﻴﺮﺓ ﺑﺎﻟﻄﺮﻳﻘﺔ ﺩﻱ ﺍﺩﺍﻣﻲ ﻳﺎ ﺑﻨﺖ ... ﻭﺍﺯﺍﻱ ﺗﺘﻬﻤﻴﻬﺎ ﺑﺎﻟﺸﻜﻞ ﺩﻩ ?
ﻧﻮﺭﺍ : ﺃﻧﺎ ﻣﺎﻗﻮﻟﺘﺶ ﻏﻴﺮ ﺍﻟﺤﻘﻴﻘﺔ ﺍﻟﻠﻲ ﺍﻧﺖ ﺑﺈﻳﺪﻙ ﻭﺻﻠﺘﻨﺎ ﻟﻴﻬﺎ ... ﺍﻧﺖ ﺍﻟﺴﺒﺐ ﻳﺎ ﺑﺎﺑﺎ ﻓﻜﻞ ﺩﻩ ... ﻟﻜﻦ ﺃﻧﺎ ﺧﻼﺹ ﻣﺶ ﺣﺎﺳﻜﺖ ... ﻛﻔﺎﻳﺔ ﺑﻘﻰ ﻇﻠﻢ ﻟﺤﺪ ﻛﺪﻩ ... ﺣﺎﻓﻀﻞ ﻣﺴﺘﺤﻤﻠﺔ ﻟﺤﺪ ﺍﻣﺘﻰ ... ﺃﻣﻲ ﻭﻣﺎﺗﺖ ﺑﺤﺴﺮﺗﻬﺎ ... ﺣﺎﺳﺘﻨﻰ ﻟﻤﺎ ﺃﺣﺼﻠﻬﺎ ﺍﻧﺎ ﻛﻤﺎﻥ
ﺻﻔﻮﺕ ﺑﺬﻫﻮﻝ : ﻫﻴﺎ ﻭﺻﻠﺖ ﺍﻧﻚ ﺗﻘﻮﻟﻴﻠﻲ ﺍﻧﺎ ﺍﻟﻜﻼﻡ ﺩﻩ ﻳﺎ ﺑﻨﺖ
ﻧﻮﺭﺍ ﺑﺈﺻﺮﺍﺭ : ﺣﻀﺮﺗﻚ ﺍﻟﻠﻲ ﻭﺻﻠﺘﻬﺎ ﻳﺎ ﺑﺎﺑﺎ ... ﻣﺎﻓﻜﺮﺗﺶ ﺍﻧﺖ ﺃﻭ ﺍﻱ ﺃﺏ ﺑﻴﻌﻤﻞ ﺯﻳﻚ ﻛﺪﻩ ﻭﻳﻔﺮﻕ ﺑﻴﻦ ﻭﻻﺩﻩ ﺩﻩ ﻣﻤﻜﻦ ﻳﻮﺻﻠﻬﻢ ﻹﻳﻪ ... ﻣﻤﻜﻦ ﻳﺨﻠﻴﻬﻢ ﻳﺤﻘﺪﻭﺍ ﻋﻠﻰ ﺑﻌﺾ ﺍﺯﺍﻱ ﻭﻳﻜﺮﻫﻮﺍ ﺑﻌﺾ ﺍﺯﺍﻱ ... ﻃﻮﻝ ﻋﻤﺮﻙ ﺑﺘﻔﺮﻕ ﻣﺎ ﺑﻴﻨﺎ ﻓﻜﻞ ﺣﺎﺟﺔ ... ﻃﻮﻝ ﻋﻤﺮﻙ ﻣﺤﻤﻠﻨﻲ ﺍﻧﺎ ﻭﺃﻣﻲ ﺫﻧﺐ ﺟﺪﻱ ... ﻃﻮﻝ ﻋﻤﺮﻙ ﺑﺘﺘﻌﺎﻣﻞ ﻭﻛﺄﻧﻚ ﻣﺎﺧﻠﻔﺘﺶ ﻏﻴﺮ ﻧﺎﺩﻳﺔ ﻭﺑﺲ ... ﻭﺭﻏﻢ ﺍﻥ ﺍﻟﻮﺿﻊ ﺍﻟﻤﻔﺮﻭﺽ ﻳﻜﻮﻥ ﻣﻌﻜﻮﺱ ﻭﺍﻧﺎ ﺍﻟﻠﻲ ﺍﻛﻮﻥ ﺑﺎﺣﻘﺪ ﻋﻠﻴﻬﺎ ... ﻟﻜﻦ ﺍﻧﺎ ﻋﻤﺮﻱ ﻣﺎﺣﻘﺪﺕ ﻋﻠﻴﻬﺎ ﻭﻻ ﻛﺮﻫﺘﻬﺎ ... ﻫﻴﺎ ﺍﻟﻠﻲ ﻋﻠﻄﻮﻝ ﺑﺘﻜﺮﻫﻨﻲ ﻣﻦ ﻭﺍﺣﻨﺎ ﻋﻴﺎﻝ ﺻﻐﻴﺮﻳﻦ ﻭﻛﺄﻧﻲ ﻋﺪﻭﺗﻬﺎ ... ﻭﺣﺠﺘﻬﺎ ﺍﻟﺠﺎﻫﺰﺓ ﺍﻥ ﺃﻣﻲ ﻛﺎﻧﺖ ﺍﻟﺴﺒﺐ ﻓﻄﺮﺩ ﺃﻣﻬﺎ ... ﻣﻊ ﺍﻧﻬﺎ ﻣﺎﻛﺎﻧﺘﺶ ﺗﻌﺮﻑ ﺑﻮﺟﻮﺩﻫﺎ ﻣﻦ ﺃﺳﺎﺳﻪ ... ﻃﻮﻝ ﻋﻤﺮﻫﺎ ﻣﺘﻌﻮﺩﺓ ﺗﺎﺧﺪ ﻣﻨﻲ ﻛﻞ ﺣﺎﺟﺔ ... ﻭﻳﻮﻡ ﻣﺎ ﺍﺭﺗﺒﻄﺖ ﺑﺈﻧﺴﺎﻥ ﻳﺤﺒﻨﻲ ﻭﺃﺣﺒﻪ ... ﻃﻤﻌﺖ ﻓﻴﻪ ﻟﻨﻔﺴﻬﺎ ... ﻭﺍﻟﻠﻪ ﺍﻋﻠﻢ ﺍﻓﺘﺮﺕ ﻋﻠﻴﻪ ﺑﺈﻳﻪ ... ﻟﻜﻦ ﺍﻟﻠﻲ ﺍﻧﺎ ﻭﺍﺛﻘﺔ ﻣﻨﻪ ﻛﻮﻳﺲ ﺍﻧﻚ ﻛﺪﺍﺑﺔ ﻭﺧﻠﻴﻜﻲ ﻛﺪﻩ ﻣﻮﺗﻲ ﺑﻨﺎﺭﻙ ﻭﺍﻧﺎ ﻭﻫﻮ ﺍﻥ ﺷﺎﺀﺍﻟﻠﻪ ﺣﻨﻌﻴﺶ ﺳﻌﺪﺍ ﻭﻣﺒﺴﻮﻃﻲ ... ﺑﺲ ﺑﻌﺪ ﻣﺎ ﻧﺒﻌﺪ ﻋﻦ ﺍﻟﺒﻴﺖ ﺍﻟﻠﻲ ﺍﻧﺘﻮﺍ ﻓﻴﻪ ﻭﻧﻌﻴﺶ ﻓﻤﻜﺎﻥ ﺗﺎﻧﻲ ﺍﻧﻀﻒ ﻣﻦ ﻫﻨﺎ ﺑﻜﺘﻴﺮ ... ﻣﻜﺎﻥ ﻣﺎﻳﻜﻮﻧﺶ ﻓﻴﻪ ﻇﻠﻢ ﻭﻻ ﺣﻘﺪ ﻭﻻ ﺃﻧﺎﻧﻴﺔ ... ﻣﻜﺎﻥ ﻣﺎ ﺍﺗﻌﺎﻗﺒﺶ ﻓﻴﻪ ﺑﺬﻧﺐ ﺍﻧﻲ ﺑﻨﺖ ﺻﻔﻴﺔ ... ﻣﻜﺎﻥ ﻣﺎﻳﻜﻮﻧﺶ ﻓﻴﻪ ﺃﺏ ﻇﺎﻟﻢ ﺯﻳﻚ ﻛﺪﻩ ... ﺣﺴﺴﻨﻲ ﻳﺎﻟﻴﺘﻢ ﻭﻫﻮ ﻋﻠﻰ ﻭﺵ ﺍﻟﺪﻧﻴﺎ
ﺍﻗﺘﺮﺏ ﻣﻨﻬﺎ ﺻﻔﻮﺕ ﻗﺎﺋﻼ ﻭﻫﻮ ﻳﺮﻓﻊ ﻳﺪﻩ ﻟﻴﻬﻢ ﺑﺼﻔﻌﻬﺎ : ﺇﺧﺮﺳﻲ ﻳﺎ .... ﻟﻜﻦ ﻟﺴﺎﻧﻪ ﺗﻮﻗﻒ ﻓﺠﺄﺓ ﻋﻨﺪﻣﺎ ﻭﺟﺪ ﻳﺪ ﻋﻠﻲ ﺗﻤﺴﻚ ﺑﻴﺪﻩ ﻗﺎﺋﻼ : ﺃﻧﺎ ﺃﺳﻒ ﺍﻭﻱ ﻳﺎ ﻋﻤﻲ ... ﺑﺲ ﺃﻧﺎ ﻣﺎﺳﻤﺤﺶ ﻟﺤﺪ ﻳﻤﺪ ﺇﻳﺪﻩ ﻋﻠﻰ ﻣﺮﺍﺗﻲ ﺍﺩﺍﻡ ﻋﻴﻨﻲ ﺣﺘﻰ ﻟﻮ ﻛﺎﻥ ﺍﻟﺤﺪ ﺩﻩ ﻫﻮ ﺃﺑﻮﻫﺎ ... ﻭﺧﺼﻮﺻﺎ ﻛﻤﺎﻥ ﻟﻤﺎ ﺗﻜﻮﻥ ﺣﺎﻣﻞ
ﺷﻬﻘﺖ ﻧﺎﺩﻳﺔ ﻗﺎﺋﻠﺔ ﺑﻔﺰﻉ : ﺇﻳﻪ ﺣﺎﻣﻞ !
ﺻﻔﻮﺕ ﺑﺬﻫﻮﻝ ﻣﻤﺎ ﻓﻌﻠﻪ ﻋﻠﻲ : ﺍﻧﺖ ﺍﺗﺠﻨﻨﺖ ﻳﺎ ﻋﻠﻲ ?
ﻋﻠﻲ ﺑﺤﺰﻡ : ﺃﻧﺎ ﺍﺑﻘﻰ ﻣﺠﻨﻮﻥ ﻓﻌﻼ ﻟﻮ ﺍﺳﺘﻨﻴﺖ ﺍﻧﺎ ﻭﻣﺮﺍﺗﻲ ﻓﺎﻟﺒﻴﺖ ﺩﻩ ﺩﻗﻴﻘﺔ ﻭﺍﺣﺪﺓ ... ﺛﻢ ﺍﻗﺘﺮﺏ ﻣﻦ ﺍﻟﻄﺎﻭﻟﺔ ﺍﻟﻤﻮﺿﻮﻋﺔ ﺑﺒﻬﻮ ﺍﻟﻔﻴﻼ ﻭﺗﺮﻙ ﻋﻠﻴﻬﺎ ﻣﻔﺎﺗﻴﺤﻪ ﻗﺎﺋﻼ : ﺩﻱ ﻣﻔﺎﺗﻴﺢ ﺍﻟﻔﻴﻼ ﻭﻣﻜﺘﺒﻲ ﻓﺎﻟﺸﺮﻛﺔ ﻭﻣﻌﺎﻫﻢ ﻛﻤﺎﻥ ﻣﻔﺘﺎﺡ ﺍﻟﻌﺮﺑﻴﺔ ... ﺍﻧﺎ ﻣﺶ ﻧﺎﺳﻲ ﺍﻥ ﺣﻀﺮﺗﻚ ﺍﻟﻠﻲ ﻛﻨﺖ ﺟﺎﻳﺒﻬﺎﻟﻲ ﻫﺪﻳﺔ ﺗﺨﺮﺟﻲ ﻣﻦ ﺍﻟﺠﺎﻣﻌﺔ ... ﻭﻳﺎﺭﻳﺖ ﺗﻌﺘﺒﺮ ﺃﻱ ﻣﻠﻴﻢ ﺣﻀﺮﺗﻚ ﺻﺮﻓﺘﻪ ﻋﻠﻴﺎ ﺍﻧﺎ ﺍﻭ ﺣﺪ ﻣﻦ ﺇﺧﻮﺍﺗﻲ ﺩﻳﻦ ﻋﻠﻴﺎ ﺣﺎﺳﺪﺩﻫﻮﻟﻚ ﺍﻭﻝ ﻣﺎ ﺍﺷﺘﻐﻞ ... ﺍﻧﺎ ﻗﺒﻞ ﻣﺎ ﺍﻣﺸﻲ ﻋﺎﻳﺰ ﺍﻗﻮﻝ ﻟﺤﻀﺮﺗﻚ ﻛﻠﻤﺔ ﺃﺧﻴﺮﺓ ... ﻃﻮﻝ ﻣﺎﺣﻀﺮﺗﻚ ﻣﺶ ﺷﺎﻳﻒ ﻣﻦ ﺍﻟﺪﻧﻴﺎ ﻛﻠﻬﺎ ﻏﻴﺮ ﻧﺎﺩﻳﺔ ﻭﺑﺲ ﺣﺘﺨﺴﺮﻧﺎ ﻛﻠﻨﺎ ﻭﺍﺣﺪ ﻭﺭﺍ ﺍﻟﺘﺎﻧﻲ ... ﻋﻦ ﺇﺫﻧﻚ ﻳﺎ ﻋﻤﻲ ... ﺛﻢ ﺍﻗﺘﺮﺏ ﻣﻦ ﻧﻮﺭﺍ ﺍﻟﺘﻲ ﻛﺎﻧﺖ ﺗﺒﻜﻲ ﻭﺗﻨﺘﺤﺐ ﺑﺸﺪﺓ ﻣﻨﺬ ﺍﻥ ﻓﺮﻏﺖ ﻣﻦ ﺣﺪﻳﺜﻬﺎ ﻭﻗﺒﻞ ﺭﺃﺳﻬﺎ ﻗﺎﺋﻼ : ﻛﻔﺎﻳﺔ ﻛﺪﻩ ﻳﺎ ﻧﻮﺭﺍ ... ﺍﻹﻧﻔﻌﺎﻝ ﺩﻩ ﻣﺶ ﻛﻮﻳﺲ ﻋﺸﺎﻥ ﺍﻟﺒﻴﺒﻲ ... ﻳﻼ ﺑﻴﻨﺎ ﻳﺎ ﺣﺒﻴﺒﺘﻲ
ﺣﻤﻞ ﻋﻠﻲ ﻭﻧﻮﺭﺍ ﺣﻘﺎﺋﺒﻬﻢ ﻭﺍﻧﻄﻠﻘﻮﺍ ﻣﻐﺎﺩﺭﻳﻦ ﻧﺤﻮ ﻣﻨﺰﻝ ﺳﻤﻴﺔ ﺑﻴﻨﻤﺎ ﻭﻗﻒ ﺻﻔﻮﺕ ﻣﻜﺎﻧﻪ ﻣﺬﻫﻮﻻ ﻣﻤﺎ ﻗﺎﻟﺘﻪ ﻧﻮﺭﺍ ﻭﻓﻌﻠﻪ ﻋﻠﻲ ... ﻓﻴﻤﺎ ﻛﺎﻧﺖ ﻧﺎﺩﻳﺔ ﺗﺤﺪﺛﻪ ﻗﺎﺋﻠﺔ : ﺷﻮﻓﺖ ﻳﺎ ﺑﺎﺑﺎ ... ﺷﻮﻓﺖ ﻛﺎﻧﺖ ﺑﺘﻜﻠﻢ ﺣﻀﺮﺗﻚ ﺍﺯﺍﻱ ... ﻓﻴﻪ ﺑﻨﺖ ﻣﺤﺘﺮﻣﺔ ﺗﻜﻠﻢ ﺑﺎﺑﺎﻫﺎ ﺑﺎﻟﻄﺮﻳﻘﺔ ﺩﻱ ﻭﺗﻘﻮﻟﻪ ﺍﻟﻜﻼﻡ ﺍﻟﻠﻲ ﻗﺎﻟﺘﻪ ﺩﻩ ... ﺷﻮﻓﺖ ﻋﻠﻲ ﻭﺍﻟﻠﻲ ﻋﻤﻠﻪ ﻳﺎ ﺑﺎﺑﺎ ?
ﺻﻔﻮﺕ : ﻣﻌﻘﻮﻝ ﺩﻩ ﻋﻠﻲ ﺍﻟﻠﻲ ﻣﺎﻛﺎﻧﺶ ﺑﻴﻜﺴﺮﻟﻲ ﻛﻠﻤﺔ ... ﻣﻌﻘﻮﻝ ﻳﺨﺮﺝ ﻋﻦ ﻃﻮﻋﻲ ﺑﺎﻟﺸﻜﻞ ﺩﻩ ﻭﻳﻌﻤﻞ ﺍﻟﻠﻲ ﻋﻤﻠﻪ ﺩﻩ
ﻧﺎﺩﻳﺔ ﺑﺨﺒﺚ : ﺷﻮﻓﺖ ﻳﺎﺑﺎﺑﺎ ... ﻫﻴﺎ ﺍﻟﻠﻲ ﺟﺮﺃﺕ ﻋﻠﻲ ﻋﻠﻴﻚ ﻋﺸﺎﻥ ﺑﺘﻜﺮﻫﻚ ﻭﻓﺎﻛﺮﺓ ﺍﻧﻚ ﺑﺘﻔﻀﻠﻨﻲ ﻋﻠﻴﻬﺎ .
ﺻﻔﻮﺕ ﺑﺪﻫﺸﺔ : ﺍﻟﻠﻲ ﻣﺶ ﻗﺎﺩﺭ ﺍﻓﻬﻤﻪ ﻣﻨﻴﻦ ﻗﺎﻟﻚ ﺍﻟﻜﻼﻡ ﺍﻟﻠﻲ ﻗﺎﻟﻬﻮﻟﻚ ﺩﻩ ﻭﻣﻨﻴﻦ ﻣﺘﻤﺴﻚ ﺑﻴﻬﺎ ﺑﺎﻟﺸﻜﻞ ﺩﻩ ?
ﺍﺳﺮﻋﺖ ﻧﺎﺩﻳﺔ ﺗﺠﻴﺒﻪ ﻗﺎﺋﻠﺔ : ﻣﺎﻫﻮ ﻟﻤﺎ ﻟﻘﻰ ﻧﻔﺴﻪ ﺧﻼﺹ ﺣﻴﺨﺴﺮ ﻛﻞ ﺣﺎﺟﺔ ... ﻗﺎﻝ ﻳﻌﻤﻞ ﻧﻔﺴﻪ ﺑﺮﺉ ﻭﻳﻌﻤﻞ ﺍﻧﻪ ﻣﺘﻤﺴﻚ ﺑﻴﻬﺎ ﻋﺸﺎﻥ ﻫﻴﺎ ﺗﺼﺪﻗﻪ ... ﻭﻃﺎﻟﻤﺎ ﺍﻧﺎ ﺭﻓﻀﺘﻪ ﻳﺒﻘﻰ ﺧﻼﺹ ﻣﺎﺑﻘﺎﺵ ﺍﺩﺍﻣﻪ ﻏﻴﺮﻫﺎ
ﺻﻔﻮﺕ : ﺍﻧﺎ ﻟﺤﺪ ﺩﻟﻮﻗﺘﻲ ﻣﺶ ﻗﺎﺩﺭ ﺍﺻﺪﻕ ﺍﻟﻠﻲ ﻋﻤﻠﻮﻩ ﺩﻩ ..
ﺍﺳﺮﻋﺖ ﺗﺒﺚ ﺳﻤﻮﻣﻬﺎ ﻛﺄﻓﻌﻰ ﺭﻗﻄﺎﺀ ﻭﻫﻲ ﺗﻘﻮﻝ ﺑﺪﻫﺎﺀ : ﺣﻀﺮﺗﻚ ﻣﺶ ﻻﺯﻡ ﺗﺴﻜﺖ ﻳﺎ ﺑﺎﺑﺎ ... ﻻﺯﻡ ﺗﻌﺎﻗﺒﻬﻢ ﻋﻠﻰ ﺍﻟﻠﻲ ﻋﻤﻠﻮﻩ ﺩﻩ ... ﻣﻌﻘﻮﻝ ﻳﺘﺠﺮﺃﻭﺍ ﻋﻠﻰ ﺣﻀﺮﺗﻚ ﺑﺎﻟﺸﻜﻞ ﺩﻩ ﻭﻳﻤﺸﻮﺍ ﻭﻛﺄﻥ ﻣﺎﻓﻴﺶ ﺣﺎﺟﺔ ﺣﺼﻠﺖ
ﺻﻔﻮﺕ ﺑﺪﻫﺸﺔ : ﻭﺍﻧﺎ ﺣﺎﻋﺎﻗﺒﻬﻢ ﺍﺯﺍﻱ ﺑﺲ ﻳﺎ ﻧﺎﺩﻳﺔ ?
ﻧﻈﺮﺕ ﺇﻟﻰ ﺍﻟﻔﺮﺍﻍ ﺃﻣﺎﻣﻬﺎ ﻭﻗﺎﻟﺖ ﺑﺨﺒﺚ : ﺃﻧﺎ ﺑﻘﻰ ﻋﻨﺪﻱ ﺍﻟﻄﺮﻳﻘﺔ ﺍﻟﻠﻲ ﺣﺘﺨﻠﻴﻬﻢ ﻳﺮﺟﻌﻮﺍ ﺯﺍﺣﻔﻴﻦ ﻭﻳﺒﻮﺳﻮﺍ ﺇﻳﺪ ﺣﻀﺮﺗﻚ ﻋﺸﺎﻥ ﺗﺴﺎﻣﺤﻬﻢ ﻛﻤﺎﻥ ............
ﻳﺘﺒﻊ ﺍﻷﺧﻴﺮ
أنت تقرأ
ﻭﺻﻴﺔ ﺻﻔﻴﺔ المؤلّف : منال إبراهيم
Romanceﺣﻴﻨﻤﺎ ﻳﺘﻤﻠﻚ ﺍﻟﻄﻤﻊ ﻣﻦ ﻧﻔﻮﺱ ﺍﻟﺒﺸﺮ ﺣﻴﻨﻤﺎ ﺗﺼﺒﺢ ﺍﻷﻧﺎﻧﻴﺔ ﻭﺍﻷﻧﺎﻧﻴﺔ ﻓﻘﻂ ﻫﻲ ﺍﻟﺤﺎﻛﻤﺔ ... ﺗﺮﻯ ﻣﻦ ﻳﺪﻓﻊ ﺍﻟﺜﻤﻦ ? ﺣﻴﻨﻤﺎ ﻳﺘﻌﺮﺽ ﺍﻹﻧﺴﺎﻥ ﻟﻠﻈﻠﻢ ﻣﻦ ﺃﻗﺮﺏ ﺍﻷﻗﺮﺑﻴﻦ ... ﻓﺈﻟﻰ ﻣﻦ ﻳﻠﺠﺄ ﻭﻳﺴﺘﻜﻴﻦ ? ﻭﻋﻨﺪﻣﺎ ﺗﺄﺗﻴﻚ ﺍﻟﻄﻌﻨﺔ ﻣﻦ ﺣﺒﻴﺐ ... ﻓﺂﻧﻰ ﻟﺠﺮﻭﺣﻚ ﺃﻥ ﺗﻄﻴﺐ . ﻭﻟﻜﻦ ... ﻻﺑﺪ ﻟﻬﺬﺍ ﺍﻟﻈﻠﻢ ﻣﻦ ﺁ...
