ﻭﺻﻴﺔ ﺻﻔﻴﺔ المؤلّف : منال إبراهيم

19

* ﺍﻟﻔﺼﻞ ﺍﻟﺘﺎﺳﻊ ﻋﺸﺮ *
ﺭﺑﻤﺎ ﻛﺎﻥ ﻣﻦ ﺍﻷﻓﻀﻞ ﻟﺒﻌﻀﻨﺎ ﺃﻥ ﻳﻌﺘﺮﻑ ﺑﺄﺧﻄﺎﺋﻪ ﺃﻭ ﺇﻥ ﺷﺌﺘﻢ ﻓﻘﻮﻟﻮﺍ ﺧﻄﺎﻳﺎﻩ ... ﻭﻳﺤﺎﻭﻝ ﺃﻥ ﻳﺘﻮﺏ ﻋﻨﻬﺎ ﺑﺪﻻ ﻣﻦ ﺇﻟﻘﺎﺀ ﺍﻟﺘﻬﻢ ﺟﺰﺍﻓﺎ ﻋﻠﻰ ﺍﻷﺧﺮﻳﻦ ... ﻓﻬﺎ ﻫﻲ ﺃﻣﻴﺮﺓ ﺍﻟﺘﻲ ﻳﻈﻦ ﺑﻬﺎ ﺯﻭﺟﻬﺎ ﻇﻦ ﺍﻟﺴﻮﺀ ﻭﺍﻟﺘﻲ ﻗﺮﺭ ﺃﻥ ﻳﺮﺍﻗﺒﻬﺎ ﺣﺘﻰ ﻳﺘﺨﻠﺺ ﻣﻦ ﺷﻜﻮﻛﻪ ... ﺗﺠﻠﺲ ﻓﻲ ﺇﻧﺘﻈﺎﺭﻩ ﻗﻠﻘﺔ ﻣﻦ ﻏﻴﺎﺑﻪ ﺣﺘﻰ ﻫﺬﻩ ﺍﻟﺴﺎﻋﺔ ... ﺗﻔﻜﺮ ﻓﻲ ﺣﺎﻟﻬﻤﺎ ﻣﻌﺎ ﻭﻓﻲ ﻣﺎ ﺁﻟﺖ ﺇﻟﻴﻪ ﺣﻴﺎﺗﻬﻤﺎ ﻓﻲ ﺍﻷﻭﻧﺔ ﺍﻷﺧﻴﺮﺓ ... ﻭﺗﺘﺴﺎﺋﻞ ﻋﻤﺎ ﻳﺤﻤﻠﻪ ﺍﻟﻤﺴﺘﻘﺒﻞ ﻟﻬﻤﺎ ... ﺗﺴﺘﺮﺟﻊ ﺫﻛﺮﻳﺎﺕ ﺍﻟﻤﺎﺿﻲ ﻋﻨﺪﻣﺎ ﺍﻧﺘﻘﻞ ﺟﻤﺎﻝ ﻟﻠﻌﻤﻞ ﺑﻨﻔﺲ ﺍﻟﻤﺪﺭﺳﺔ ﺍﻟﺘﻲ ﺗﻌﻤﻞ ﺑﻬﺎ ... ﻭﻛﻴﻒ ﺃﻋﺠﺐ ﻛﻞ ﻣﻨﻬﻤﺎ ﺑﺎﻷﺧﺮ ﺫﻟﻚ ﺍﻹﻋﺠﺎﺏ ﺍﻟﺬﻱ ﺗﺤﻮﻝ ﻓﻴﻤﺎ ﺑﻌﺪ ﺇﻟﻰ ﺣﺐ ﻛﺒﻴﺮ ... ﻛﺎﻥ ﺯﻭﺟﻬﺎ ﻣﻀﺮﺏ ﺍﻷﻣﺜﺎﻝ ﻓﻲ ﺧﻠﻘﻪ ﻭﺇﻟﺘﺰﺍﻣﻪ ... ﻭﻟﻜﻦ ﺫﻟﻚ ﻛﻠﻪ ﺗﺤﻮﻝ ﺇﻟﻰ ﺍﻟﻨﻘﻴﺾ ﻣﻨﺬ ﺗﻌﺮﻑ ﺇﻟﻰ ﺫﻟﻚ ﺍﻟﻤﺪﻋﻮ ﻓﺘﺤﻲ ... ﻗﻄﻊ ﺗﻔﻜﻴﺮﻫﺎ ﺻﻮﺕ ﻫﺎﺗﻔﻬﺎ ﻣﻌﻠﻨﺎ ﻋﻦ ﻗﺪﻭﻡ ﺭﺳﺎﻟﺔ ... ﺍﻣﺴﻜﺖ ﺑﺎﻟﻬﺎﺗﻒ ﻭﻫﻲ ﺗﺨﺸﻰ ﺃﻥ ﺗﻔﺘﺤﻬﺎ ﺣﺘﻰ ﻻ ﺗﻜﻮﻥ ﻛﺴﺎﺑﻘﺘﻬﺎ ... ﻓﻘﺪ ﺟﺎﺀﺗﻬﺎ ﻣﻦ ﻧﻔﺲ ﺍﻟﺮﻗﻢ ﺍﻟﻤﺠﻬﻮﻝ ﺍﻟﻬﻮﻳﺔ ... ﺑﻌﺪ ﺗﺮﺩﺩ ﻓﺘﺤﺘﻬﺎ ﺍﺧﻴﺮﺍ ﻟﺘﺸﻌﺮ ﺑﻌﺪﻫﺎ ﺃﻥ ﻗﻠﺒﻬﺎ ﻳﻜﺎﺩ ﻳﺘﻮﻗﻒ ﻋﻦ ﺍﻟﻨﺒﺾ ... ﻟﻢ ﺗﻔﻖ ﻣﻦ ﺻﺪﻣﺘﻬﺎ ﺑﻌﺪ ﺣﺘﻰ ﺍﻋﻠﻦ ﻫﺎﺗﻔﻬﺎ ﺍﻟﺮﻧﻴﻦ ﻟﺘﺠﺪﻩ ﻧﻔﺲ ﺍﻟﺮﻗﻢ ... ﺑﺄﻳﺪ ﻣﺮﺗﻌﺸﺔ ﻓﺘﺤﺖ ﺍﻟﺨﻂ ﻟﻴﺄﺗﻴﻬﺎ ﺻﻮﺗﻪ ﺍﻟﻜﺮﻳﻪ ﻗﺎﺋﻼ ﺑﺘﻬﻜﻢ :
- ﻣﺶ ﻗﻠﺘﻠﻚ ﻗﺒﻞ ﻛﺪﻩ ﻭﺍﻧﺘﻲ ﻣﺎﺻﺪﻗﺘﻴﺶ ﻛﻼﻣﻲ ... ﻭﻻ ﻛﺎﻥ ﻻﺯﻡ ﻳﻌﻨﻲ ﺗﺸﻮﻓﻲ ﺑﻌﻨﻴﻜﻲ ﻋﺸﺎﻥ ﺗﺼﺪﻗﻲ ﻭﺗﻌﺮﻓﻲ ﻣﻴﻦ ﻋﺪﻭﻙ ﻭﻣﻴﻦ ﺣﺒﻴﺒﻚ
- ﺍﻣﻴﺮﺓ ﺑﺤﺰﻡ : ﺍﻧﺖ ﻣﻴﻦ ﻭﻋﺎﻳﺰ ﻣﻨﻲ ﺇﻳﻪ ﺑﺎﻟﻈﺒﻂ ?
- ﺃﻧﺎ ﻣﻌﺠﺐ .. ﻭ . ﻣﻌﺠﺐ ﻣﻦ ﺯﻣﺎﻥ ﻛﻤﺎﻥ ... ﻭﺑﺼﺮﺍﺣﺔ ﻣﺴﺘﺨﺴﺮﻙ ﻓﺮﺍﺟﻞ ﺯﻱ ﺟﻮﺯﻙ ﺩﻩ ... ﻣﺶ ﻣﻘﺪﺭ ﻗﻴﻤﺔ ﺍﻟﻨﻌﻤﺔ ﺍﻟﻠﻲ ﻓﺈﻳﺪﻩ ... ﺑﻴﻤﻮﺕ ﻓﺎﻟﺮﻣﺮﻣﺔ ﻧﻘﻮﻝ ﺇﻳﻪ ﺑﺲ
- ﺍﻧﺖ ﻟﻮ ﻣﺎﻗﻠﺘﺶ ﺍﻧﺖ ﻣﻴﻦ ﻭﻋﺎﻳﺰ ﺇﻳﻪ ﺩﻟﻮﻗﺘﻰ ﺣﺎﻻ ﺣﺎﻗﻔﻞ ﺍﻟﺴﻜﺔ ﻓﻮﺷﻚ
- ﻣﺎﻗﻠﺘﻠﻚ ﺃﻧﺎ ﻣﻌﺠﺐ ... ﻭﻋﺎﻳﺰ ﺇﻳﻪ ﻓﺄﻧﺎ ﻋﺎﻳﺰﻙ ﺍﻧﺖ ﻳﺎ ﺟﻤﻴﻞ ... ﻭﻟﻮ ﺑﺘﺤﺒﻴﻪ ﻭﺑﺎﻗﻴﺔ ﻋﻠﻴﻪ ﺍﻭﻱ ﻳﺒﻘﻰ ﺗﻠﺤﻘﻴﻪ ﻗﺒﻞ ﻣﺎ ﻓﻀﻴﺤﺘﻪ ﺗﺒﻘﻰ ﺑﺠﻼﺟﻞ ... ﺍﺻﻞ ﺑﺼﺮﺍﺣﺔ ﺍﻧﺎ ﻧﺎﻭﻱ ﺍﻧﺰﻟﻪ ﻓﻴﻠﻢ ﺟﺎﻣﺪ ﺍﻭﻱ ﻋﻠﻰ ﺍﻟﻴﻮﺗﻴﻮﺏ ... ﺍﻧﺘﻲ ﺣﺘﻲ ﺷﻮﻓﺘﻲ ﻣﺸﻬﺪ ﻣﻨﻪ ... ﻣﺶ ﻋﺎﺭﻑ ﺭﺃﻳﻚ ﻓﻴﻪ ﺑﺼﺮﺍﺣﺔ ... ﺑﺲ ﺃﻧﺎ ﻟﺴﻪ ﻋﻨﺪﻱ ﻣﺸﺎﻫﺪ ﺗﺎﻧﻴﺔ ﺇﻧﻤﺎ ﺇﻳﻪ ﺣﺘﻌﺠﺒﻚ ﺍﻭﻱ ... ﻧﻤﺮﺓ ﺗﻠﻴﻔﻮﻧﻲ ﻣﻌﺎﻛﻲ ... ﻓﻜﺮﻱ ﻛﻮﻳﺲ ﻓﻜﻼﻣﻲ ﻭﺍﻧﺎ ﻣﺴﺘﻨﻲ ﻣﻨﻚ ﺗﻠﻴﻔﻮﻥ ﻓﺄﻱ ﻭﻗﺖ ﺍﻧﺎ ﺗﺤﺖ ﺃﻣﺮﻙ ... ﻟﻮ ﻣﺎ ﺍﺗﺼﻠﺘﻴﺶ ﺣﺎﻋﺮﻑ ﺍﻧﻚ ﻛﺪﻩ ﻣﺶ ﺑﺘﺤﺒﻴﻪ ﻭﻻ ﻳﻔﺮﻕ ﻣﻌﺎﻛﻲ ... ﺳﻼﻡ ﻳﺎ ﻗﻄﺔ
**********************
ﺩﻟﻒ ﻋﻠﻲ ﺇﻟﻰ ﺩﺍﺧﻞ ﺍﻟﻐﺮﻓﺔ ﻓﻮﺟﺪ ﻧﻮﺭﺍ ﺗﻀﻊ ﺑﻌﺾ ﺍﻟﻮﺳﺎﺋﺪ ﻭﺍﻷﻏﻄﻴﺔ ﻋﻠﻰ ﺍﻷﺭﺽ ﺇﺳﺘﻌﺪﺍﺩﺍ ﻟﻠﻨﻮﻡ ﻓﻨﻈﺮ ﺇﻟﻴﻬﺎ ﻗﺎﺋﻼ ﺑﺪﻫﺸﺔ :
- ﺑﺘﻌﻤﻠﻲ ﺇﻳﻪ ﻳﺎ ﻧﻮﺭﺍ ?
ﺃﺟﺎﺑﺘﻪ ﻧﻮﺭﺍ ﻭﻫﻲ ﺗﻌﻴﺪ ﺗﺮﺗﻴﺐ ﺗﻠﻚ ﺍﻷﺷﻴﺎﺀ ﻗﺎﺋﻠﺔ ﺩﻭﻥ ﺃﻥ ﺗﻨﻈﺮ ﺇﻟﻴﻪ :
- ﺑﻴﺘﻬﻴﺄﻟﻲ ﺍﻧﺖ ﺷﺎﻳﻒ ﺃﻧﺎ ﺑﺎﻋﻤﻞ ﺇﻳﻪ
- ﺃﻧﺎ ﺷﺎﻳﻒ ﺑﺲ ﻣﺶ ﻓﺎﻫﻢ
- ﺣﺎﻧﺎﻡ ﻋﻨﺪﻙ ﻣﺎﻧﻊ
- ﺣﺘﻨﺎﻣﻲ ﻋﻠﻰ ﺍﻷﺭﺽ ﻟﻴﻪ ?
- ﻹﻥ ﺯﻱ ﻣﺎ ﺍﻧﺖ ﺷﺎﻳﻒ ﺍﻷﻭﺿﺔ ﻣﺎﻓﻴﻬﺎﺵ ﻏﻴﺮ ﺳﺮﻳﺮ ﻭﺍﺣﺪ ﻭﻣﺎﻓﻴﺶ ﺣﺘﻰ ﻛﻨﺒﺔ ﺍﻧﺎﻡ ﻋﻠﻴﻬﺎ
- ﻃﻴﺐ ﻭﻟﻴﻪ ﻣﺎﺗﻨﺎﻣﻴﺶ ﻋﻠﻰ ﺍﻟﺴﺮﻳﺮ ?
- ﻹﻧﻚ ﺣﺘﻨﺎﻡ ﻋﻠﻴﻪ
- ﻭﻓﻴﻬﺎ ﺇﻳﻪ ﻳﻌﻨﻲ ?
- ﻓﻴﻬﺎ ﺍﻧﻚ ﺗﺤﻤﺪ ﺭﺑﻨﺎ ﺇﻧﻲ ﻭﺍﻓﻘﺖ ﺇﻧﻲ ﺍﻧﺎﻡ ﻣﻌﺎﻙ ﺗﺤﺖ ﺳﻘﻒ ﻭﺍﺣﺪ ... ﻟﻜﻦ ﺍﻛﺘﺮ ﻣﻦ ﻛﺪﻩ ﻣﺎﺗﺤﻠﻤﺶ
ﺍﻧﻬﺖ ﻧﻮﺭﺍ ﻋﺒﺎﺭﺗﻬﺎ ﺍﻷﺧﻴﺮﺓ ﺛﻢ ﺗﻤﺪﺩﺕ ﻋﻠﻰ ﺍﻷﺭﺽ ﻭﺳﺤﺒﺖ ﺍﻟﻐﻄﺎﺀ ﻟﺘﻐﻄﻲ ﺑﻪ ﺟﺴﺪﻫﺎ ﻛﺎﻣﻼ ... ﺟﻠﺲ ﻋﻠﻲ ﻣﻔﺘﺮﺷﺎ ﺍﻷﺭﺽ ﺇﻟﻰ ﺟﻮﺍﺭﻫﺎ ﻭﺳﺤﺐ ﺍﻟﻐﻄﺎﺀ ﻗﺎﺋﻼ ﺑﻬﺪﻭﺀ :
- ﻧﻮﺭﺍ ... ﻣﺎﻳﻨﻔﻌﺶ ﺍﻟﻠﻲ ﺍﻧﺘﻲ ﺑﺘﻌﻤﻠﻴﻪ ﺩﻩ ... ﻭﻋﻤﻮﻣﺎ ﻳﺎ ﺳﺘﻲ ... ﺇﺫﺍ ﻛﻨﺘﻲ ﻣﺼﻤﻤﺔ ﺗﻨﺎﻣﻲ ﺑﻌﻴﺪ ﻋﻨﻲ ﻳﺒﻘﻰ ﺍﻃﻠﻌﻲ ﻧﺎﻣﻲ ﺍﻧﺘﻲ ﻋﻠﻰ ﺍﻟﺴﺮﻳﺮ ﻭﺃﻧﺎ ﺍﻟﻠﻲ ﺣﺎﻧﺎﻡ ﻫﻨﺎ ﻋﻠﻰ ﺍﻷﺭﺽ
- ﻣﺎﺗﻌﻤﻠﺶ ﻧﻔﺴﻚ ﻗﻠﺒﻚ ﻋﻠﻴﺎ ﺍﻭﻱ
- ﻋﻠﻲ ﺑﻀﻴﻖ : ﻻ ﺣﻮﻝ ﻭﻻ ﻗﻮﺓ ﺍﻻ ﺑﺎﻟﻠﻪ ... ﺑﺮﺿﻪ ﻣﺶ ﺣﺎﻳﺄﺱ ﻳﺎ ﻧﻮﺭﺍ ﻣﻬﻤﺎ ﻋﻤﻠﺘﻲ ... ﻣﺶ ﺣﺎﻳﺄﺱ ﺍﻧﻚ ﺗﺴﺎﻣﺤﻴﻨﻲ ﻭﺗﻘﺒﻠﻲ ﺗﻜﻤﻠﻲ ﻣﻌﺎﻳﺎ ﻣﺸﻮﺍﺭ ﺣﻴﺎﺗﻚ
- ﺍﺣﻨﺎ ﻣﺶ ﺧﻼﺹ ﺍﺗﻔﻘﻨﺎ ﻋﻠﻰ ﺍﻟﻄﻼﻕ ... ﻟﺰﻭﻣﻪ ﺇﻳﻪ ﺑﻘﻰ ﺍﻟﻜﻼﻡ ﺩﻩ ?
- ﻭﻣﻴﻦ ﻗﺎﻟﻚ ﺇﻧﻲ ﺣﺎﻃﻠﻘﻚ ﺍﺻﻼ
- ﻳﻌﻨﻲ ﺇﻳﻪ ? ﻫﻮ ﻟﻌﺐ ﻋﻴﺎﻝ ﻭﻻ ﺇﻳﻪ ? ﺍﺣﻨﺎ ﻣﺶ ﻛﻨﺎ ﺍﺗﻔﻘﻨﺎ ﺧﻼﺹ ... ﺇﻳﻪ ﺍﻟﻠﻲ ﺧﻼﻙ ﺗﺮﺟﻊ ﻓﻜﻼﻣﻚ ?
ﺍﻣﺘﺪﺕ ﻳﺪﻩ ﻟﺘﻤﺴﺢ ﻋﻠﻰ ﺷﻌﺮﻫﺎ ﺑﺤﻨﺎﻥ ﻗﺎﺋﻼ ﺑﺈﺑﺘﺴﺎﻣﺔ :
- ﺃﻧﺎ ﻗﻠﺖ ﻛﺪﻩ ﺑﺲ ﻋﺸﺎﻥ ﺗﻬﺪﻱ ﺳﺎﻋﺘﻬﺎ ... ﻟﻜﻦ ﺃﻧﺎ ﻋﻤﺮﻱ ﻣﺎ ﺣﺎﻃﻠﻘﻚ ﻣﻬﻤﺎ ﻋﻤﻠﺘﻲ
ﺩﻓﻌﺖ ﻧﻮﺭﺍ ﻳﺪﻩ ﺑﻌﻴﺪﺍ ﻋﻨﻬﺎ ﻭﻗﺎﻟﺖ ﺑﻀﻴﻖ :
- ﻟﻮ ﺳﻤﺤﺖ ﺍﺑﻌﺪ ﺇﻳﺪﻙ ﺩﻱ ﻋﻨﻲ ... ﺳﺒﻖ ﻭﻗﻠﺘﻠﻚ ﺇﻧﻲ ﻣﺶ ﻃﺎﻳﻘﺔ ﺣﺘﻰ ﻟﻤﺴﺘﻚ ﺩﻱ
- ﺃﻧﺎ ﻣﺶ ﻣﺼﺪﻕ ﺍﻧﻚ ﻛﺮﻫﺘﻴﻨﻲ ﺑﺎﻟﺴﻬﻮﻟﺔ ﺩﻱ ... ﻣﻌﻘﻮﻝ ﺍﻟﺤﺐ ﻳﺘﺤﻮﻝ ﻟﻜﺮﻩ ﺑﺎﻟﺒﺴﺎﻃﺔ ﻭﺍﻟﺴﺮﻋﺔ ﺩﻱ
- ﻋﺎﺩﻱ ﺟﺪﺍ ... ﻟﻤﺎ ﻳﻜﻮﻥ ﺍﻟﻄﺮﻑ ﺍﻟﺘﺎﻧﻲ ﻣﺎﻳﺴﺘﺎﻫﻠﺶ ﺍﻟﺤﺐ ﺩﻩ ﻳﺒﻘﻰ ﻻﺯﻡ ﻳﺘﺤﻮﻝ
ﺗﻨﻬﺪ ﻋﻠﻲ ﻗﺎﺋﻼ ﺑﺄﺳﻰ :
- ﺃﻧﺎ ﻣﺶ ﻓﺎﻫﻢ ﺍﻧﺘﻲ ﺑﺘﺤﺎﺳﺒﻴﻨﻲ ﻋﻠﻰ ﺇﻳﻪ ﺑﺎﻟﻈﺒﻂ ? ﻋﻠﻰ ﻣﺸﺎﻋﺮ ﻣﺎﻛﺎﻧﺘﺶ ﺑﺈﻳﺪﻱ ﻭﺍﺗﺨﻠﺼﺖ ﻣﻨﻬﺎ ﻗﺒﻞ ﻣﺎ ﺍﺗﺠﻮﺯﻙ ... ﻭﻻ ﻋﻠﻰ ﺇﻧﻲ ﻭﺍﻓﻘﺖ ﺇﻧﻲ ﺍﺗﺠﻮﺯﻙ ﻭﺷﻮﻓﺖ ﺍﻧﻚ ﺣﺘﻜﻮﻧﻲ ﺍﻟﺰﻭﺟﺔ ﺍﻟﻤﻨﺎﺳﺒﺔ ﺍﻟﻠﻲ ﺍﻗﺪﺭ ﺍﻛﻤﻞ ﻣﻌﺎﻫﺎ ﺣﻴﺎﺗﻲ
- ﻻ ﺩﻩ ﻭﻻ ﺩﻩ ... ﺍﻧﺎ ﺑﺤﺎﺳﺒﻚ ﻋﻠﻰ ﺍﻧﻚ ﻛﺪﺑﺖ ﻋﻠﻴﺎ ﻟﻤﺎ ﺳﺄﻟﺘﻚ ﺇﺫﺍ ﻛﻨﺖ ﺑﺘﺤﺒﻨﻲ ﻭﻻ ﻷ ... ﻭﺑﻌﺪﻳﻦ ﻣﻴﻦ ﻗﺎﻝ ﺇﻧﻲ ﺑﺤﺎﺳﺒﻚ ... ﺍﻧﺎ ﺑﺲ ﺑﺎﺣﺎﻭﻝ ﺍﺳﺎﻋﺪﻙ ﺍﻧﻚ ﺗﺘﺨﻠﺺ ﻣﻦ ﺟﻮﺍﺯﺓ ﺍﺗﻔﺮﺿﺖ ﻋﻠﻴﻚ
- ﺃﻧﺎ ﻋﻤﺮﻱ ﻣﺎﻛﺪﺑﺖ ﻋﻠﻴﻜﻲ ﻳﺎ ﻧﻮﺭﺍ ... ﺍﻧﺎ ﻟﻤﺎ ﻗﻠﺘﻠﻚ ﻛﺪﻩ ﻛﻨﺖ ﺣﺎﺳﺲ ﺍﻟﻜﻼﻡ ﺩﻩ ﻓﻌﻼ ... ﺑﺲ ﻛﻨﺖ ﺑﺎﻛﺪﺏ ﻧﻔﺴﻲ ... ﻭﺍﻗﻮﻝ ﺣﺒﻴﺘﻬﺎ ﺍﻣﺘﻰ ﻭﺍﺯﺍﻱ ... ﻭﺑﻌﺪﻳﻦ ﺍﻧﺘﻲ ﻏﻠﻄﺎﻧﺔ ﻳﺎ ﻧﻮﺭﺍ ... ﺍﻧﺘﻲ ﻣﺎ ﺍﺗﻔﺮﺿﺘﻴﺶ ﻋﻠﻴﺎ ﻭﻻ ﺣﺎﺟﺔ ... ﺩﻩ ﺟﻮﺍﺯ ﻳﺎ ﻧﻮﺭﺍ ﻳﻌﻨﻲ ﻋﻤﺮﺑﺤﺎﻟﻪ ﺣﻨﻘﻀﻴﻪ ﻣﻊ ﺑﻌﺾ ... ﻳﻌﻨﻲ ﻟﻮ ﻣﺎﻛﻨﺘﺶ ﻣﻮﺍﻓﻖ ﻛﻨﺖ ﻗﻠﺖ ﺩﻩ ﺑﺼﺮﺍﺣﺔ ﻟﻌﻤﻲ
- ﻧﻮﺭﺍ ﺑﺘﻬﻜﻢ : ﻋﻤﺮ ﺑﺤﺎﻟﻪ ... ﺍﻧﺖ ﺑﺎﻳﻦ ﻋﻠﻴﻚ ﺑﺘﺤﻠﻢ
- ﻋﻠﻲ ﺑﺈﺻﺮﺍﺭ : ﻭﻣﺎﻟﻪ ... ﻛﻞ ﺣﺎﺟﺔ ﺣﻠﻮﺓ ﺍﺑﺘﺪﺕ ﺑﺤﻠﻢ ... ﻭﺍﻧﺎ ﻣﺘﺄﻛﺪ ﺇﻧﻪ ﺣﻴﻴﺠﻲ ﺍﻟﻴﻮﻡ ﺍﻟﻠﻲ ﺣﻠﻤﻲ ﻳﺘﺤﻘﻖ ﻓﻴﻪ
ﺍﻧﻬﻲ ﻋﻠﻲ ﺟﻤﻠﺘﻪ ﺍﻷﺧﻴﺮﺓ ﻭﺗﻤﺪﺩ ﻋﻠﻰ ﺍﻷﺭﺽ ﺑﺠﻮﺍﺭﻫﺎ ﺛﻢ ﺳﺤﺐ ﺍﻟﻐﻄﺎﺀ ﻟﻴﺘﺪﺛﺮ ﺑﻪ ﻓﺎﻋﺘﺪﻟﺖ ﻧﻮﺭﺍ ﻓﻲ ﺟﻠﺴﺘﻬﺎ ﻭﻗﺎﻟﺖ ﺑﺪﻫﺸﺔ :
- ﺍﻧﺖ ﺑﺘﻌﻤﻞ ﺇﻳﻪ ?
- ﻋﻠﻲ ﺑﻼ ﻣﺒﺎﻻﺓ : ﺯﻱ ﻣﺎ ﺍﻧﺘﻲ ﺷﺎﻳﻔﺔ ... ﺇﺫﺍ ﻛﻨﺘﻲ ﺍﻧﺘﻲ ﻣﺶ ﻋﺎﻳﺰﺓ ﺗﻄﻠﻌﻲ ﺗﻨﺎﻣﻲ ﺟﻨﺒﻲ ﺃﻧﺎ ﺑﻘﻰ ﺣﺎﻧﺰﻝ ﺃﻧﺎﻡ ﺟﻨﺒﻚ
ﻗﺎﻣﺖ ﻧﻮﺭﺍ ﻣﻦ ﻣﻜﺎﻧﻬﺎ ﻭﺍﺗﺠﻬﺖ ﺇﻟﻰ ﺍﻟﻔﺮﺍﺵ ﻭﺟﻠﺴﺖ ﻋﻠﻴﻪ ﻗﺎﺋﻠﺔ :
- ﻣﺶ ﺍﻧﺖ ﻋﺠﺒﺎﻙ ﻧﻮﻣﺔ ﺍﻷﺭﺽ ﺩﻱ ... ﺧﻼﺹ ﺧﻠﻴﻬﺎﻟﻚ
ﺿﺤﻚ ﻋﻠﻰ ﻗﺎﺋﻼ : ﺷﻮﻓﺘﻲ ﺑﻘﻰ ﺧﻠﻴﺘﻚ ﺗﻨﺎﻣﻲ ﻋﻠﻰ ﺍﻟﺴﺮﻳﺮ ﺍﺯﺍﻱ ﺑﺮﺿﻪ
ﺗﻤﺪﺩﺕ ﻧﻮﺭﺍ ﻋﻠﻰ ﺍﻟﻔﺮﺍﺵ ﻭﺃﻭﻟﺘﻪ ﻇﻬﺮﻫﺎ ﺣﺘﻰ ﻻ ﻳﺮﻯ ﺗﻠﻚ ﺍﻹﺑﺘﺴﺎﻣﺔ ﺍﻟﺘﻲ ﺍﺭﺗﺴﻤﺖ ﻋﻠﻰ ﺷﻔﺘﻴﻬﺎ
******************************
- ﻋﻠﻲ ﺑﻀﻴﻖ : ﻳﺎ ﻧﻮﺭﺍ ﻋﺸﺎﻥ ﺧﺎﻃﺮﻱ ﺑﻼﺵ ﺍﻟﻌﻨﺪ ﺩﻩ
- ﺍﺳﻔﺔ ﻣﺶ ﻋﺎﻳﺰﺓ ﺍﺧﺮﺝ ﻣﻌﺎﻙ ﻓﺤﺘﺔ ... ﻣﺶ ﻋﺎﻳﺰﺓ ﺍﺗﻔﺴﺢ ﻳﺎ ﺳﻴﺪﻱ ﻫﻴﺎ ﺍﻟﻔﺴﺢ ﻛﻤﺎﻥ ﺑﺎﻟﻌﺎﻓﻴﺔ
ﻋﻘﺪ ﺫﺭﺍﻋﻴﻪ ﺍﻣﺎﻡ ﺻﺪﺭﻩ ﻭﻗﺎﻝ ﺑﻨﻔﺎﺫ ﺻﺒﺮ :
- ﻳﺎ ﻧﻮﺭﺍ ﺍﺣﻤﺪ ﻭﻟﺒﻨﻰ ﻣﺴﺘﻨﻴﻴﻦ ﺗﺤﺖ ... ﻋﺎﻳﺰﺍﻧﻲ ﺃﻗﻮﻟﻬﻢ ﺇﻳﻪ ﺑﺲ ?
ﺻﻤﺘﺖ ﻧﻮﺭﺍ ﺑﺮﻫﺔ ﻟﺘﻔﻜﺮ ﺛﻢ ﻗﺎﻟﺖ ﺑﺠﺪﻳﺔ :
- ﻣﺎﺷﻲ ﺃﻧﺎ ﺟﺎﻳﺔ ﻣﻌﺎﻙ
ﺍﺑﺘﺴﻢ ﻋﻠﻲ ﻓﺎﺭﺩﻓﺖ ﻗﺎﺋﻠﺔ :
- ﻣﺎﺗﻔﺮﺣﺶ ﺍﻭﻱ ﻛﺪﻩ ... ﺍﻧﺎ ﺟﺎﻳﺔ ﺑﺲ ﻋﺸﺎﻥ ﺧﺎﻃﺮ ﺍﺣﻤﺪ ﻭﻟﺒﻨﻰ ﻣﺶ ﻋﺸﺎﻧﻚ ... ﺣﺮﺍﻡ ﻧﻀﻴﻊ ﻋﻠﻴﻬﻢ ﺷﻬﺮ ﺍﻟﻌﺴﻞ ﺑﺘﺎﻋﻬﻢ ... ﻫﻤﺎ ﻣﺎﻟﻬﻤﺶ ﺫﻧﺐ ﻓﺤﺎﺟﺔ ... ﻣﺎﻓﻴﺶ ﺩﺍﻋﻲ ﻧﻨﻜﺪ ﻋﻠﻴﻬﻢ
ﺯﻓﺮ ﻋﻠﻲ ﺑﺸﺪﺓ ﺛﻢ ﻗﺎﻝ ﺑﻤﺸﺎﻏﺒﺔ :
- ﻭﺃﻧﺎ ﺍﻟﻠﻲ ﻛﻨﺖ ﻓﺎﻛﺮﻙ ﻃﻴﺒﺔ ... ﺍﺗﻀﺢ ﺍﻥ ﻣﺎﻓﻴﺶ ﺣﺪ ﻃﻴﺐ ﻓﺎﻟﺰﻣﻦ ﺩﻩ
- ﻭﺍﻟﻠﻪ ﺇﺫﺍ ﻛﺎﻥ ﻋﺎﺟﺒﻚ
ﺍﺳﺮﻉ ﻳﺠﻴﺒﻬﺎ ﻋﻠﻰ ﺍﻟﻔﻮﺭ ﻗﺎﺋﻼ :
- ﻋﺎﺟﺒﻨﻲ ﻳﺎ ﺳﺘﻲ ﻋﺎﺟﺒﻨﻲ ... ﻭﺇﻥ ﺟﻴﺘﻲ ﻟﻠﺤﻖ ﻋﺎﺟﺒﻨﻲ ﺍﻭﻱ ﻛﻤﺎﻥ ... ﺑﺲ ﻳﻼ ﺑﻴﻨﺎ ﺑﻘﻰ
******************************
ﻛﺎﻧﺖ ﺃﻣﻴﺮﺓ ﺗﺠﻠﺲ ﻣﻊ ﺷﻘﻴﻘﺘﻬﺎ ﺃﻣﻨﻴﺔ ﻟﺘﻘﺺ ﻋﻠﻴﻬﺎ ﺗﻔﺎﺻﻴﻞ ﻣﺎﺣﺪﺙ ﻭﻫﻲ ﺗﺴﺘﻤﻊ ﺇﻟﻴﻬﺎ ﺑﺈﻫﺘﻤﺎﻡ ﻭﺫﻫﻮﻝ ﻣﻤﺎ ﺗﺴﻤﻊ ... ﺍﻧﺘﻬﺖ ﺃﻣﻴﺮﺓ ﻣﻦ ﻛﻼﻣﻬﺎ ﻗﺎﺋﻠﺔ ﺑﺤﻴﺮﺓ :
- ﻗﻮﻟﻴﻠﻲ ﻳﺎ ﺃﻣﻨﻴﺔ ﺍﻋﻤﻞ ﺇﻳﻪ ﻭﺍﺗﺼﺮﻑ ﺍﺯﺍﻱ ... ﺃﻧﺎ ﺧﻼﺹ ﺩﻣﺎﻏﻲ ﻗﺮﺑﺖ ﺗﻨﻔﺠﺮ ﻣﻦ ﺍﻟﺘﻔﻜﻴﺮ
ﻗﺎﺳﻤﺘﻬﺎ ﺃﻣﻨﻴﺔ ﺣﻴﺮﺗﻬﺎ ﻭﻫﻲ ﺗﺠﻴﺒﻬﺎ ﻗﺎﺋﻠﺔ :
- ﻭﺍﻟﻠﻪ ﻣﺎ ﺃﻧﺎ ﻋﺎﺭﻓﺔ ﻳﺎ ﺃﻣﻴﺮﺓ ﺍﻗﻮﻟﻚ ﺇﻳﻪ ? ﻭﺍﻟﻤﺸﻜﻠﺔ ﻛﻤﺎﻥ ﺍﻥ ﺍﺣﻤﺪ ﻣﺴﺎﻓﺮ ﻋﺸﺎﻥ ﻛﻨﺖ ﺍﻗﻮﻟﻚ ﺧﻠﻲ ﺍﺣﻤﺪ ﻳﺘﺼﺮﻑ ﻣﻌﺎﻩ
- ﻳﻌﻨﻲ ﺍﻧﺘﻲ ﺭﺃﻳﻚ ﺃﻭﺍﺟﻬﻪ ﻭﺍﻃﻠﺐ ﺍﻟﻄﻼﻕ ﻭﻻ ﺍﺳﺘﻨﻰ ﺷﻮﻳﺔ ﻟﺤﺪ ﻣﺎ ﺍﺗﺄﻛﺪ
- ﻭﺍﻟﻠﻪ ﻳﺎ ﺃﻣﻴﺮﺓ ﻗﺒﻞ ﺍﻟﻤﻜﺎﻟﻤﺔ ﺍﻟﻠﻲ ﺟﺎﺗﻠﻚ ﺩﻱ ﻛﻨﺖ ﺣﺎﻗﻮﻟﻚ ﻃﺒﻌﺎ ﻻﺯﻡ ﺗﻮﺍﺟﻬﻴﻪ ﻭﺗﻄﻠﺒﻲ ﺍﻟﻄﻼﻕ ﻭﺑﺪﻭﻥ ﺗﺮﺩﺩ ... ﻟﻜﻦ ﺑﻌﺪ ﺍﻟﻤﻜﺎﻟﻤﺔ ﺍﻗﻮﻝ ﺍﻟﻤﻔﺮﻭﺽ ﺗﺴﺘﻨﻲ ﻟﻤﺎ ﺗﺘﺄﻛﺪﻱ ﻭﺗﻌﺮﻓﻲ ﻣﻴﻦ ﺍﻟﺒﻨﻲ ﺍﺩﻡ ﺩﻩ ﻭﻋﺎﻳﺰ ﻣﻨﻚ ﺇﻳﻪ ... ﻣﺶ ﻳﻤﻜﻦ ﻳﻜﻮﻥ ﺍﻟﻠﻲ ﺷﻮﻗﺘﻴﻪ ﺩﻩ ﻣﺶ ﺣﻘﻴﻘﻲ ﻭﻳﻜﻮﻥ ﺍﻟﺒﻨﻰ ﺍﺩﻡ ﺩﻩ ﻫﻮ ﺍﻟﻠﻲ ﻣﻔﺒﺮﻛﺔ ﻓﻌﻼ ﻋﺸﺎﻥ ﻳﻄﻠﻘﻚ ﻣﻦ ﺟﻮﺯﻙ
- ﻭﻟﻮ ﻛﺎﻧﺖ ﺣﻘﻴﻘﺔ ﻓﻌﻼ ... ﺍﻋﻤﻞ ﺇﻳﻪ ﺳﺎﻋﺘﻬﺎ ?
- ﺗﺒﻘﻲ ﺳﺎﻋﺘﻬﺎ ﻣﺎﻇﻠﻤﺘﻴﻬﻮﺵ ﻭﺗﻘﺪﺭﻱ ﺗﻄﻠﺒﻲ ﺍﻟﻄﻼﻕ ﺯﻱ ﻣﺎ ﺍﻧﺘﻲ ﻋﺎﻳﺰﺓ
- ﺍﻧﺎ ﺣﺎﺗﺄﻛﺪ ﺑﻨﻔﺴﻲ ﺍﻥ ﺍﻟﻜﻼﻡ ﺩﻩ ﺻﺤﻴﺢ ﻭﻻ ﻷ ... ﻭﻟﻮ ﻃﻠﻊ ﻣﻈﺒﻮﻁ ﻳﺒﻘﻰ ﺳﺎﻋﺘﻬﺎ ﻃﺒﻌﺎ ﺣﺎﻃﻠﺐ ﺍﻟﻄﻼﻕ ﺑﺲ ﻣﺶ ﻗﺒﻞ ﻣﺎ ﺃﻋﺮﻓﻪ ﺟﺰﺍﺀ ﺍﻟﺨﻴﺎﻧﺔ ﺇﻳﻪ ? ﻟﻜﻦ ﺍﻟﻠﻲ ﺍﻧﺎ ﺧﺎﻳﻔﺔ ﻣﻨﻪ ﺍﻥ ﺍﻟﺒﻨﻰ ﺍﺩﻡ ﺩﻩ ﻳﻨﺸﺮ ﺍﻟﺼﻮﺭ ﺩﻱ ﻓﻌﻼ
- ﻣﺎ ﺍﻋﺘﻘﺪﺵ ﺍﻧﻪ ﻣﻤﻜﻦ ﻳﻌﻤﻞ ﻛﺪﻩ ... ﺍﺻﻼ ﻳﺒﻘﻰ ﻏﺒﻲ ﻓﻌﻼ ﻟﻮ ﻋﻤﻞ ﻛﺪﻩ ... ﺍﻧﺎ ﺍﻋﺘﻘﺪ ﺍﻧﻬﺎ ﻭﺳﻴﻠﺔ ﺿﻐﻂ ﻋﻠﻴﻜﻲ ﻣﺶ ﺍﻛﺘﺮ ... ﻫﻮ ﻣﻤﻜﻦ ﻳﻔﺘﻜﺮ ﺍﻧﻚ ﻣﻤﻜﻦ ﺗﻮﺍﻓﻘﻲ ﻋﻠﻰ ﺍﻟﻠﻲ ﻫﻮ ﻋﺎﻳﺰﻩ ﻋﺸﺎﻥ ﺣﺘﺨﺎﻓﻲ ﻣﻦ ﺍﻟﻔﻀﺎﻳﺢ ... ﻟﻜﻦ ﻟﻮ ﻧﺰﻝ ﺍﻟﺼﻮﺭ ﻓﻌﻼ ... ﻣﺶ ﺣﻴﺒﻘﻰ ﻋﻨﺪﻩ ﺣﺎﺟﺔ ﻳﻀﻐﻂ ﻋﻠﻴﻜﻲ ﺑﻴﻬﺎ .... ﺍﻋﺘﻘﺪ ﺇﻧﻪ ﻣﺶ ﻣﻤﻜﻦ ﻳﻌﻤﻞ ﻛﺪﻩ ...
- ﻣﻨﻚ ﻟﻠﻪ ﻳﺎ ﺟﻤﺎﻝ ﻋﺸﺎﻥ ﺍﻧﺖ ﺍﻟﻠﻲ ﺣﻄﺘﻨﻲ ﻓﺎﻟﻤﻮﻗﻒ ﺩﻩ ... ﺑﺲ ﺻﺪﻗﻨﻲ ﻟﻮ ﻛﺎﻥ ﺩﻩ ﺻﺤﻴﺢ ﺍﻧﺎ ﺣﺎﻋﺮﻑ ﺍﺯﺍﻱ ﺍﻧﺪﻣﻚ ﻋﻠﻴﻪ
- ﺃﻣﻨﻴﺔ ﺑﻘﻠﻖ : ﺍﻧﺘﻲ ﻧﺎﻭﻳﺔ ﻋﻠﻰ ﺇﻳﻪ ﺑﺎﻟﻈﺒﻂ ﻳﺎ ﺍﻣﻴﺮﺓ ?
- ﺍﺗﺄﻛﺪ ﺍﻷﻭﻝ ﻭﺑﻌﺪﻳﻦ ﺣﺘﺸﻮﻓﻲ ﺍﻧﺎ ﺣﺎﻋﻤﻞ ﺇﻳﻪ
****************************
ﻛﺎﻥ ﺻﻔﻮﺕ ﻳﺠﻠﺲ ﺑﻐﺮﻓﺔ ﻣﻜﺘﺒﻪ ﺣﻴﻦ ﺩﺧﻠﺖ ﺳﻜﺮﺗﻴﺮﺗﻪ ﺗﺨﺒﺮﻩ ﺑﻮﺟﻮﺩ ﺷﺨﺺ ﺑﺎﻟﺨﺎﺭﺝ ﻳﺮﻏﺐ ﻓﻲ ﻣﻘﺎﺑﻠﺘﻪ ﺩﻭﻥ ﻭﺟﻮﺩ ﻣﻮﻋﺪ ﻣﺴﺒﻖ .
- ﻣﺎﻗﺎﻟﻜﻴﺶ ﺇﺳﻤﻪ ﺇﻳﻪ ?
- ﻻ ﻳﺎ ﻓﻨﺪﻡ ... ﻫﻮ ﻛﻞ ﺍﻟﻠﻲ ﻗﺎﻟﻪ ﺇﻧﻪ ﻳﺒﻘﻰ ﺻﺪﻳﻖ ﺣﻀﺮﺗﻚ ﻭﻣﺎﺷﻮﻓﺘﻮﺵ ﻣﻦ ﺣﻮﺍﻟﻲ ﻋﺸﺮﻳﻦ ﺳﻨﺔ ... ﻭﺭﻓﺾ ﻳﻘﻮﻝ ﺇﺳﻤﻪ ﻋﺸﺎﻥ ﻋﺎﻳﺰ ﻳﻌﻤﻠﻬﺎ ﻣﻔﺎﺟﺄﺓ ﻟﺤﻀﺮﺗﻚ
ﺍﺧﺬ ﺻﻔﻮﺕ ﻳﻔﻜﺮ ﻟﺒﺮﻫﺔ ﻓﻲ ﻛﻴﻨﻮﻧﺔ ﺫﻟﻚ ﺍﻟﺼﺪﻳﻖ ﺍﻟﺬﻱ ﻟﻢ ﻳﺮﻩ ﻣﻨﺬ ﻋﺸﺮﻳﻦ ﻋﺎﻣﺎ ﺣﺘﻰ ﺍﺑﺘﺴﻢ ﻓﺠﺄﺓ ﻗﺎﺋﻼ :
- ﻣﻌﻘﻮﻝ ﻳﻜﻮﻥ ﻫﻮ ?
ﻧﻈﺮ ﺇﻟﻰ ﺍﻟﺴﻜﺮﺗﻴﺮﺓ ﻗﺎﺋﻼ :
- ﻗﻮﻟﻴﻠﻪ ﻳﺘﻔﻀﻞ ﻟﻤﺎ ﻧﺸﻮﻑ ﻫﻮ ﻣﻴﻦ ... ﻭﻻ ﺍﻗﻮﻟﻚ ﺍﻧﺎ ﺟﺎﻱ ﻣﻌﺎﻛﻲ ﺍﺷﻮﻓﻪ ﻣﻴﻦ
- ﺗﺤﺖ ﺃﻣﺮ ﺣﻀﺮﺗﻚ
ﺧﺮﺟﺖ ﺍﻟﺴﻜﺮﺗﻴﺮﺓ ﺛﻢ ﺗﺒﻌﻬﺎ ﺻﻔﻮﺕ ﻟﻴﺠﺪﻩ ﺟﺎﻟﺴﺎ ﻭﻗﺪ ﺃﻭﻻﻩ ﻇﻬﺮﻩ ﻓﻘﺎﻝ ﻣﺤﺪﺛﺎ ﺇﻳﺎﻩ :
- ﻣﻴﻦ ﺣﻀﺮﺗﻚ ?
ﺍﻟﺘﻔﺖ ﺍﻟﺮﺟﻞ ﻗﺎﺋﻼ ﺑﻮﺩ :
- ﺍﺯﻳﻚ ﻳﺎ ﺻﻔﻮﺕ ?
ﻋﻠﺖ ﺛﻐﺮﻩ ﺇﺑﺘﺴﺎﻣﺔ ﻋﺮﻳﻀﺔ ﻭﻫﻮ ﻳﻘﻮﻝ ﺑﺪﻫﺸﺔ :
- ﻣﻌﻘﻮﻝ ﺍﻟﻠﻲ ﺃﻧﺎ ﺷﺎﻳﻔﻪ ﺩﻩ ? ﺳﻌﻴﺪ ﺷﻜﺮﻱ ﻓﻤﻜﺘﺒﻲ ... ﺑﺎﻟﺤﻀﻦ ﻳﺎ ﺳﻌﻴﺪ .......
ﻳﺘﺒﻊ