عن النقاب والعفة أتحدث

النقاب

صلوا علي من ياتي يوم القيامه ويقول امتي

لااله الا انت سبحانك اني كنت من الظالمين

النقاب ..

بصّوا ، بدايةً كدة .. البسي النقاب حباً فيه ، واستشعاراً لعظيم فضله ، وصوناً لقلبك قبل جوارحك ، وسِتراً واختباءً من فتنِ الدنيا ❤

- النقاب فيه كلام كتير، ومش كاتبة البوست عشان افتيلكم بحكمه الشرعي .. لكن يا بناتي اذا فعلاً طلع حكم النقاب واجب ، الي هوا تركه إثم وذنب كبير ، فلما تقفي بين يدي الله وتُسألي ، لي ما لبستيه ؟ .. اي حجتك أمام الله سبحانه وتعالى ؟! .. هتقولي مكنتش اعرف !
هقولك "الحَلاَلُ بَيِّنٌ، وَالحَرَامُ بَيِّنٌ، وَبَيْنَهُمَا أُمُورٌ مُشْتَبِهَةٌ، فَمَنْ تَرَكَ مَا شُبِّهَ عَلَيْهِ مِنَ الإِثْمِ، كَانَ لِمَا اسْتَبَانَ أَتْرَكَ، وَمَنِ اجْتَرَأَ عَلَى مَا يَشُكُّ فِيهِ مِنَ الإِثْمِ، أَوْشَكَ أَنْ يُوَاقِعَ مَا اسْتَبَانَ، وَالمَعَاصِي حِمَى اللَّهِ، مَنْ يَرْتَعْ حَوْلَ الحِمَى يُوشِكُ أَنْ يُوَاقِعَهُ"

فاتقي الشُّبهات ، واعلمي والله ان خُطوتِك نحو النقاب وحتى لو فيها مشقة عليكِ ، هتِفتَحلك من أبواب الخير وتغلقلك ابواب الشر ، وهتشوفي البركة تعُم حياتك ، وتتذوقي لذة الايمان وتجدي حلاوتها في صدرك .. وهو ده العوض العظيم الي بنقول عنه في "من ترك شيئاً لله عوضهُ الله خَيراً منه" ❤

- النقاب مش حتة قماشة هتحطيها على وجهك ، بقدر ما هو صون لقلبك من أن يقع في ظلمة المعصية ! فتلاقيكي كل ما تُقبلي على معصية وتتذكري القدر الي ربنا وضعك فيه بارتدائك للنقاب، فتتراجعي وتدايقي من نفسك ، وهتلاقي ضميرك بيأنبك دايماً بمجرد تفكيرك في المعصية ، فتقولي "يعني انتِ متقبة وهتعملي كدة"!

- اصدقي الله يصدقكِ .. لو في موانع ومش عارفة تلبسي النقاب، فقط اصدقي نيتك لله، ووالله هتجدي من التساهيل الي تعينك على لبسه، وحتى لو أهلك مش موافقين، هتلاقي ربنا بيعينك وبيرزقك التدابير الي تقدري بسببها تلبسيه .. لكن اصدقي الله، واجعلي نيتك لله وحده، مش عشان تبقي "ذات النقاب" ولا عشان تعملي فوتوسيشين العفيفات، ولا عشان تبقي بتنجانة ولا كوساية حتى ! لا .. ده عشان إرضاءً لله فقط، ولابْتغاء الجنة ❤

- الي بتقول النقاب مش هيمنعك من حاجة .. !
ده خطأ، بالعكس .. في حجات مش هتعرفي تعمليها بسبب النقاب، وهتلاقي في بداية الأمر عناء ومشقة .. لكن هو ده القصد من الموضوع ، انك مع كل التعب ده ، ومفيش اي حاجة تمنعك انك تكشفي وشك او تلبسي الاحمر والاخضر ، بس بتعملي كدة لله فقط .. وهو ده الي، بيميزك عن غيرك .. ويجعلك من ناحية الظاهر أفضل من غيرك، وصبرك وتحملك ده هتأجري عليه أجر عظيم ، وهتلاقي ميزان حسناتك اتملى بسببه ❤ !

- متسمعيش للي، بيقولك "انتِ لسة صغيرة" .. ومتهتميش لكلام الناس، والي تعترض على نقابك اديها على دماغها 😂 انتِ الصح ، واياكِ تعتقدي غير كدة، لان عمره ماكانت طاعة ربنا فيها خطأ.

أخيراً .. النقاب مش مكياج اول ما تحطيه هيخفي عيوب وجهك، انما النقاب فونديشن قوي هيعينك على مسح عيوبك ، وهيكونلك سبب في تقدمك للافضل.

#فآطمة_عبدالتواب.

لااله الا انت سبحانك اني كنت من الظالمين

صلوا علي من ياتي يوم القيامه ويقول امتي