عن النقاب والعفة أتحدث

السلام باليد

شوفت من شويه صورة لشاب واقف جمب بنت قاعده ورجله لازقه في رجلها بحجه " زحمه المواصلات وكده "الناس عادي قاعده جمبها عادي ..

افتكرت في البدايه لما كان شاب من قرايبي بيمد إيده ليا عشان يسلم كنت بتكسف أقول " مبسلمش " كنت بضطر أمد إيدي واسلم وأبص في الارض واضغط علي سناني ...

سمعت الشيخ حازم شومان بيقول

"مكسوف تعمل الطاعه عشان هيقول عليك عامل فيها شيخ ! طب وعتاب ربنا ليك ! "

يومها قررت إنه لا لو قدام مين بالازم مش هسلم ،وجه إختبار ربنا ليا في البدايه قدام أُمي وعيلتي وابن خالتي جاي من السفر ودخل ومد إيده يسلم ... بصيت لأُمي وبصيت لخالتي وبصيت لإيده وقولتله مش بسلم ... قالي مش فاهم قولتله يعني شيل إيدك يا شبح وسبت المكان وقومت مش استنيت حتي أسمع رده ...

" كنت عارفه ان هيحصل تريقه عليا "

جه وقتها في بالي جمله الشيخ محمد الغليظ لما قال :

"اطلع من الذنب بشياكه ، اوعي تتحرج بس اوعي تحرج اللي قدامك ولو لزم الامر ! احرجه بس اوعي تعمل الذنب ...

- لما ابو صاحبتي كان واقف مع بابا وانا معديه فنادي عليا حاولت افهمه ان مبسلمش بس هو مستوعبش ومد إيده ليا بصيت لبابا وبصيت لإيده في اقل من ثانيه قولتله اسفه مش بسلم ...

قالي هاه ؟ جبتي الجمله دي منين يابنتي ! وبص لبابا قولتله هو مش انا قولتها ! قالي اه قولتله يبقي فيه ... وابتسمت ليه ومشيت ...

- بيجي كتير في بالي البوست بتاع حط في إيده حاجه حلوة بلاش تحرجيه ... انا ضد البوست دا تماماً لان الزمن دا صعب يفهوا رد فعلك ...

- عاوزة اقولك كلمتين حطيهم قاعده في حياتك ...

1 - ممنوع منعاً باتاً تسمحي لأي شاب في العربيه انه يخبط علي كتفك في المواصلات عشان يديكي الأُجره واللي يعمل كده إحرجيه ... إحرجيه ...

" شوفت قدامي بنت لما اتحطت في الموقف دا ديرت وشها وقالت ليه هو في حاجه ياكابتن قالها الأُجره قالتله هو صعب حضرتك تمد إيدك وتقول الاجره اهي ! الشاب اتكسف وقال اسف مش قصدي قالتله لا معلش ابقي خد بالك بعد كده "

2 - ممنوع منعاً باتاً تركبي القطر او المواصله أياً كانت وكمان تسمحي لشاب انه يقف جمبك او علي الأقل رجله تكون جمب رجلك بالظبط .. إحرجيه وقولي ليه إبعد شويه ...

" الدين مفيهوش إحراج بس فيه ذنوب بتتكتب ليكِ والدين مش بيتجزأ "

3 -متسلميش علي شاب حتي لو كان قد والدك نهائي اللمسه لإيده في حد ذاتها " حرام " والحرام قبل العيب

4 - العربيه اللي تحب تركب اربعه في كرسي لو مش جمبك بنت يبقي تنزلي متسمحيش لنفسك تقعدي رابع جمب شاب نهائي ...

مش صعب .. مش مستحيل ... هيتريقوا ... هيحفلوا .. المهم تكوني ذات أثر تعلمي غيرك الصح مش الغلط ، البنت اللي احرجت الشاب قدامي كانت دافع ليا اني انطق واقول لغيري مبسلمش ... كانت دافع ليا اني اتغير وما اتكسفش ..

الحوار كان بالنسبه ليا ان اول لمسه ايد تكون من زوجي بس  بس لما بنت قالتلي انا مبقيتش بسلم علي اي شاب زيك لاقيت الموضوع اكبر من ان اول لمسه ايد تكون ايد زوجي لا الموضوع بقي اثر ليا ... سألت وقتها نفسي كام واحده كانت بتقلدني لما بسلم !!!

كان دافع ليا اني اقول للسواق لا انا مفيش شاب يركب جمبي رابع ...

متتكسفيش ... متتكسفيش ..انتِ غيرك بيقلدك فبلاش تخلي غيرك يقلدك في الغلط 💙"))

واثقه انك هتقدري

بصي يابنت النبي من الاخر كده الحرام قبل العيب وربك قبل الناس

#إسراء_عاطف