الجرم الأكبر " كامل"

الفصل الخامس

الفصل الخامس
********

هدأ مروان قليلا وهو يواصل سرده وإخباره بما علمَ، وراح يستعيد في ذهنه ثانيًا صوت حسناء وهي تسترسل هاتفة:

_ شاهين في النهاية بشر له لحظات ضعف، هذيانه وهو نايم جمبي، خلاني أتأكد إن وراه بلاوي!
بطريقتي الخاصة معاه خليته يطمنلي ويحكيلي كل اللي جواه ويفضفض عشان يرتاح، والحقيقة اللي مقدرش انكرها، إن عمك فعلا بيحبني، وليا تأثير عليه، وانا استغليت ده عشان احمي نفسي وقت الزوم منه، وسجلت كل كلمة قالها على تليفوني، ونقلتها لفلاشة محتفظة بيها..!
وواصلت حسناء استرسالها، وهي تقص مالديها لمروان:

_الجرم الأكبر بدأ من سنين طويلة، قبل أنت ماتيجي على الدنيا..! في شباب جدك وجدتك، أما كانت حامل، وفي ليلة جالها طلق الولادة، وتعبت أوي وجدك خاف عليها ومارضيش إن داية تولدها زي المعتاد في الوقت ده، ونقلها للمشفى وفعلا كانت ولادتها متعثرة، فولدت بعملية، ونزل المولود ضعيف، والجدة حالتها الصحية اتدهوت مع جرح الولادة وفضلت في المشفى حوالي شهر، والطفل بعد أسبوع طلع من الحضانة وأخده جدك على البيت تراعيه الخدامة نعيمة لحد ما تتعافى أمه!
وعدئ الشهر ورجعت الجدة بيتها تراعي هي الولد!

وبعد 3 سنين الجدة جابت ابوك أمين الله يرحمه
كان في اختلاف كبير وعجيب بين الأخين.. شاهين كان عدواني طماع متهور أناني، لدرجة كان بيأذي ابوك لو حس بتدليل زيادة، وده كان سبب إن جدك يعامله بقسوة شوية وكانت دايما ثقته بيعطيها لوالدك أمين، لحد ما عدت السنين وكان ابوك ناوي يكتب وصيته لأنه كان مريض قلب وحس انه هيموت، وخاف يسيب. ثروته لشاهين يبددها على حياة الهلس، فكتب النصيب الأكبر لأمين، لأنه كان متأكد إن شاهين هيضيع فلوسه كلها وهيحاول يستعطفه وياخد منه بحجة انه أخوه الكبير ..

لكن ربنا أراد لحاجة تانية. تحصل!!
مرضت الخدامة جدا وجدك نقلها المشفى ووقف جمبها واتكفل بكل علاجها، ولأنها ضميرها كان معذبها قررت تعترف بحاجة ماكانش حد ممكن يكتشفها ابدا

صمتت تبتلع ريق حلقها، ثم تتفوهت:

_ شاهين... مش عمك من الأساس!

جحظت عين مروان وانفرج فمه قليلا دون أراده ومعالم الصدمة تُكسي وجهه، ربما توقع الكثير والكثير من ذاك العم.. ولكن أن يكون هو ذاته شخص مزيف ولا يمت له بقرابة؟!!! هذا مالم يمر بخياله قط!

أسترسلت حسناء حديثها دون أن تنتبه لتعبيرات مروان المصدومة، هاتفة!
_لأن عمك وهو لسه طفل رضيع مات بعد ما سابه جدك معاها بيومين بس، وهي معرفتش تتصرف، ازي تبلغ جدك بالمصيبة دي وهو حزين على تدهور صحة مراته، لحد ما فكرة خبيثة سيطرت عليها، إنها هتبدل الولد اللي مات بطفل تاني.. والطفل التاني ده ماكانش غير... ابن اختها الغير شرعي!!!!