معسكر الجن

الفصل الثالث

و انا في الطريق بالسياره رايح للموقع حق الحراسه عشان نلحق نسعف عمر جالس أتصل على جوال مصطفى بس دقيقه مصطفي ما يرد. جواله مقفل!! كيف كذا انا دوبي مقفل معه من شويه، يارب ايش قاعد يصير سترك يارب لا يكون صارلهم شي او مصطفى صار مثل عمر، كملت طريقي بسرعه و انا خايف و متوتر... وصلت الموقع، كانت الساعه واحده و نصف قبل الفجر.. الموقع مظلم الانوار مطفيه!! مسكت كشافي بسرع و نزلت من السياره و ركضت لين عند الموقع و جالس اصارخ... مصطفى.... مصطفى.... عمر... مصطفى وينكم، عمر و مصطفى مو موجودين الموقع فاضي مافيه احد بديت اتوتر و اخاف بزياده جلست اطالع حولي كل شي مختفي سيارة مصطفى مختفيه و حتى سلاحه مو موجود.. دقيقه... الدنيا صارت ظلام اكثر و لا الكشاف نوره يضعف!! بديت اخاف اكثر جالس اتمشي بالمكان و كل شوي الجو يصير ظلام اكثر كأن في احد جالس يضيق مجال الكشاف مع إني استخدم كشاف قوي، كملت و جالس أصايح... مصطفى... عمر... محد يرد علي... فجأه الكشاف طفى و سمعت صراخ عالي... انفجعت و علطول لفيت وراي و جلست اراكض ابغى ارجع للسياره و امشي من هنا جالس اراكض و كلي خوف و الصراخ يزداد و الصوت يعلى... فجاه و انا اراكض حسيت بضربه قويه على راسي، طحت علي الأرض مو قادر اتحرك بديت أنزف من راسي فجأه لمحت شخص... علي.... اي ذا علي رمى علي غطاء اسود و حط يده عليه خنقني و غمى عيوني... وقتها انا اغمى علي.....