المغتصب حقها

20

المغتصب حقها
زهراء جهاد
..................

» ولك ماما حيدر اثبت خل ابدلك.

» اليت الوح ويه بابا

» اي ميخالف ابدلك وروح
مو بابا ميقبل اتروح بهذن الهدوم ويبطل مياخذك

» يلا لعت بتليلي بترعه

» ههههههه فدوه للسانك الحلو يلا كملنه كملنه اهااا يلا انطيني بوسه وانزل

» هاج اخدي

» افيش شگد طيبه يلا حبيبي انزل علئ كيفك لتوگع دير بالك علئ نفسك ماما

راح ويه ابوه لبيت عمهم جاي من السفر وديرحون يشوفوه رتبت الغرفه ونزلت جوه

:::

طبعا بهاي الخمس سنوات هواي اشياء اتغيرت ماعدا حالي نفسه
حيدوري كبر بين اديه وگدام عيني
هو روحي من الدنيا عايشه علموده
طبعه طبع ابوه فد عنيد وعصبي وروحه بخشمه ميتحاجه
اعيونه زرگ مثل اعيونه اني وكرار
ج واشگر والشعر طويل وذاب نفسه ومدبدب هلگد ميشرب مميات كل اشوي وگال ثوعان بس مشبعني قهر نطقه صعب ايتأتئ شكم مره گتله لكرار خل انودي ايشوفه دكتور شي وميقبل ويتخبل من افتح الموضوع وياه
شسوي ما باليد حيله
حتئ عمتي من اگوللها اتگلي دتفتحيلنه باب الدكاتره راسا تلصمني علئ حلگي عفته وگعت بلكي يكبر ويتعدل نطقه
بس سوالفه اتخبل من يگعد يحجي اگرطه گرط فد متعلق بيه ويحبني
وكله ايصيلي هلياء
عمتي هم اتحبه ومداريته اكثر مني هيه تصرف عليي اطلعه تشتريله تونسه نوبات تنومه يمها حتئ يصيحلها يمه واني خابصني هلياء وهلياء

نجف ازوجت اخو صديقتها خوش ولد ومهندس ورايدها من زمان وره ماجبت بسنه تقدملها وبشهر واحد كملو كلشي وازوجو وهسه حامل

عبدالله ديطبق هسه مدرس بعده ما ازوج وامه خابصته كل ما ايطب خل ازوجك خل اخطبلك هو يگللها خل اشبع دياحه ونوب ازوج

علاوي مرحله اولئ السنه

اما كرار ف اتعين وصار دوامه رسمي لاكن بعده هو هو ماتغير ولا راح يتغير بعده ذاك العصبي المخبل المختل عقليا ايده والكفخه والرزاله بهاي الخمس سنوات العشت بيهن وياه شفت الي ماشافته مره ضگت انواع العذاب علئ ايد هل شخص ماگدر اذكر الي صار ويايه والي شفته محد راح يتحمل يسمعني جنت اسيره بيده يتفنن بتعذيبي مجرد كلام ماگدر احجي لان قسوة الكلام ماراح تتحملوها

بالنسبه الاهلي اكبر صار عنده بنيه سماها ساره والحمدلله مرتاح ويه سجئ

ومحمد رضا ازوج وحده من المنطقه خوش ابنيه وحبابه وحلوه رادها ورادته واخذناها اله صارلهم شكم شهر من ازوجو

ومرجان هم خطبها حسين ابن عمي حارث وديكمل بيتهم وياخذها

مصطفئ ميريد زواج