المغتصب حقها

10

#المغتصب _ حقها
.. البارت العاشر
"زهراء " جهاد "

::: فهد

فتح ابويه ويانه موضوع علياء وگال اذا واحد منكم رايدها حتئ نحجزها اله هاي عادتنه متنطي ابنيه من ملتنه الا بعلمنا وبموافقتنه بحكم احنه ولد عمها واولئ بيها من الغريب. رائد مزوج ومرتضئ وولد عمي كلهم مارايدين زواج هسه حاجاني ابويه وگال اخذها بت عمك وحلوه ومؤدبه ليش انخليها تطلع للغريب گتله لا يابه اني ماريد زواج هسه اريد اكمل بيتي
گال اي اخطبها هسه ومن اتكمل بيتك ازوجها علياء هوايه عزيزه عليه ماريد اطلعها واني عندي ولد حگ زواج جريت حسره گتله المشكله مو بيها
ليش اني ماعرفها تعرفني بيها توكلوا علئ الله يابه وخل البنيه اتشوف نصيبها انه لو رايد زواج جان بدون متگلي  اترخصت منه وطلعت هواي فكرت شسوي وشلون احل مصيبتها سمعت متقدملها شخص فكرت اني اخذها واعاقبها  بس بعدين تركت هلسالفه الخانت ثقه اهلها اضمنها متخوني  اتوقعت راح ترفض مثل كل مره بس من سمعت هيه موافقه.  گلت هاهيه هذا الحل الوحيد خل تزوج بلكي الله يهديها وتعقل وتصون نفسها وتعوف هلسوالف  بس اشلون گلبي يريدها اني من زمان مخيل عليها حركاتها سوالفها شقاها خجلها لسانها كلشي بيها يعجبني رايدها من كل گلبي بس السالفه الصارت خلت هوايه حواجز بيناتنه دست علئ گلبي وقنعت روحي بكلمة مو من نصيبي
وره يومين رجعت من الدوام واني اشوف نسوان وزلمه وياهن طبو بيت جدي دگيت هورن حتئ ايفتحولي الباب فتحتها سجئ جانت تغسل بالحوش سلمت عليها

فهد » سجئ منهمه ذوالي الجماعه  الطبو بيت جدي تعرفيهم

سجئ » گالو اليوم يجي الولد المتقدم العلياء يشوفها وتشوفه احتمال همه ذولي الشفتهم

باوعت بحسره والله ماردتها توصل لهنا جنت ناويها الي مو الغيري بس بعد هاهيه خل اتروح الله يسعدها بحياتها اني بيدي سلمتها للغريب وهيه بيدها ضيعت گلبي المشتريها شفت سجئ تباوعلي وبعيونها حجي

فهد » گولي من الاخير شعندج

سجئ » ليش ضيعتها من ايدك والله تحبك تموت عليك ورايدتك رغم هيه ماگايلتلي لان قريبه منك تخاف لا اگلك  وتنزل من عينك هذا تفكيرها صديقتي وافهمها وادريك انت هم رايدها بس مو راضي اتصدگها واني متأكده هيه وافقت بس علمود تخلص من بلوه زهراء الحيه ومن نضراتك الها الي كلها كره وحقد

فهد » سجئ لتحجين حجي اكبر من راسج وعوفي هلموضوع الي دسوي هيه هسه زينه العقل خل تنستر ابيت رجلها وتحمد ربها ما نفضحت سوالفها وتخزينه سدي المي كافي عاد فيضتي الشارع

» سجئ اي اگلب الموضوع اگلب صدگني راح تتندم اوف ياخويه اوف شوكت راح افهمك

گتلها بگلبي خل افهم روحي بالاول وبعدين انتي اتفهميني حاولت هلفتره ابتعد عنها ابتعد ماريد اشوف تجهيزاتهم العرسها وگلبي ينمرد خليني مبتعد وحاقد عليها احسن مصير جدامي وياخذني الحنين لسوالفها لكن سبحان الله احس القدر يجبرني اواجه گعدت بالسته ونص الفجر جنت بايت بشقتي الي تبعد عن مركز دوامي بفرعين باوعت الشقه حالها يرثه الة كلها وصخ وخبصه
هو مو وصخ وصخ يعني ملابس وصخه ونضيفه مطشره اوراق ومعاملات مبعثره كوابه جاي اتعاجز اشيلهن نفاضات الجگاير اني من النوع النضيف واحب كلشي نضيف بس ما أمد ايدي واشيل شغله ابد
باوعت داير مدايري لا بعد مابيها مجال لعبت نفسي من المنضر دخلت سبحت لبست ملابسي العسكريه كشخت وتعطرت وطلعت الشقه الي يم شقتي ساكناتها نسوان اثنين يطلعن بعمر الاربعين خطيه وحيدات مالهن احد يخيطن ويبيعن ومشيات عيشتهن كل ماشوفهن احط بيدهن جم فلس صدقه ثواب مساعده
هنه بدون ماگللهن گامن  بالمقابل كل فتره يجن ينضفن البيت يرتبنه ويرحن هلفتره ماتواجدت هنا هواي يعني بس سواد الليل وميدرن بيه حتئ انطيهن المفتاح ويدخلن رحت وبلغتهن انهو البيت يحتاجله ترتيب وهنه هم ماقصرن راسا وافقن حطيت المفتاح بيدهن وياه خمسين الف وطلعت شغلت سيارتي وبوجهي للمركز حيل تعبت شكاوي وقضايا هوايه تراكمن علينه مع العلم اني صارلي اسبوع متواجد بالمكتب بس مدري ليش الحض عوج وياي اليوم جنت گاعد بالمكتب وادخن وصافن افكار توديني وافكار تجيبني اندگت الباب