شايف الشفق القطبي الكيوت اللي هناك ده ؟ تعالى أحكيلك قصته.
مبدأياً لازم نعرف أن كوكب الأرض عبارة عن مغناطيس ضخم ، والمغناطيس ده بيولد مجال مغناطيسي كبير بيحيط بكوكب الأرض، قد يصل ل٣٦ألف ميل في الفضاء.
والمجال ده ليه أدوار رئيسية كتير هنتكلم النهاردة بس عن واحدة منها وهي (الحماية) .
بيعمل المجال المغناطيسي لكوكب الأرض كواقي من الأشعة الكونية الضارة ومن الجسيمات المشحونة اللي بتطردها الشمس -باعتبارها نجم كبير - ولو أنت مش متخيل الرعب من الجسيماا دي ، فأنا حابب أقولك إنها بتكون عندها كمية حركة كبيرة جدا وبالتالي سرعة كبيرة قد تصل إلى مليون ميل في الساعة ، وبكده تكون قادرة على تحطيم أي كوكب وتعريضه لبعض المخاطر زي ما بيتعرض لها كوكب المريخ بسبب إن معندهوش مجال مغناطيسي يحميه.
فين الشفق القطبي؟ جايلك في الكلام .
لما تيجي الجسيمات المشحونة تقرب لكوكب الأرض ، يظهر دور الحقل المغناطيسي ويبدأ يطردها .
نتيجة لشكل الحقل المغناطيسي - اللي بتسببه الرياح الشمسية- بتاخد الجسيمات دي مسارات لولبية لحد ما توصل لمنطقة القطبين ، وهنا تبدأ تخترق الغلاف الخارجي ، ونتيجة لتصادمتها مع غازات الغلاف الجو -ونظراً لطاقة الجسيمات الكبيرة - تبدأ الغازات تتأين على الفور مصدرة فوتونات تخرج على تلك الأشكال اللي إحنا بنشوفها في القطبين.
بيختلف اللون باختلاف الغاز المتأين ، فعادة بيكون أخضر أو أحمر فاتح وده ناتج من الأكسجين ، أو أزرق بنفسجي وده بيرجع لتأين النيتروجين .
المضحك في الأمر إن زمان الموضوع كان ليه تفسير تاني :
•شعب الإسكيمو اعتبر ده ناتج من وجود كائن فضائي بيتجسس عليهم
•اليونان اعتبرت ده إله وسموه أورورا
• الألمان اعتبروا الغلاف الخارجي بيتحرق
وبس
#بوحسنيات
المصادر
https://youtu.be/oxObDlJ33H4
https://ar.m.wikipedia.org/wiki/%D8%B4%D9%81%D9%82_%D9%82%D8%B7%D8%A8%D9%8A
https://www.britannica.com/science/aurora-atmospheric-phenomenon
https://www.aljazeera.net/news/miscellaneous/2019/1/14/%D8%A7%D9%84%D8%B4%D9%81%D9%82-%D8%A7%D9%84%D9%82%D8%B7%D8%A8%D9%8A-%D9%81%D9%8A-%D8%A2%D9%8A%D8%B3%D9%84%D9%86%D8%AF%D8%A7-%D9%8A%D8%B3%D8%AA%D9%82%D8%B7%D8%A8-%D8%A7%D9%84%D8%B3%D9%8A%D8%A7%D8%AD-%D8%A5%D9%84%D9%89-%D8%AD%D8%AA%D9%81%D9%87%D9%85
