انا عالقة بين الاحياء الاموات

الجزء الاول

الجزء الاول ..

مرحبا اني دانيا وهاي قصتي بالتفصيل
لاتستغربون من العنوان وحاولوا تكملون القصة للنهايه حتى تفهمون الصار ويايه بالضبط ويخليكم تصدكون قصة حياتي

ولو ادري بيكم هواي مراح تصدكون قصتي وحتعتبروها من عالم الخيال بس صدكوني كل حرف اكتبه حقيقي وصار وياي .. حقكم لو اني بمكانكم مااصدك بس العاش هذا الشي يفهمني و راح انقل الكم جزء جزء .. اني قصتي يصدكها بس اللي يؤمن بعالم الاحياء الاموات يعني شخص ميكون لا عايش ولا ميت وذاكرته وروحه كل وحدة بمكان .. يمكن اكو ناس سامعه بي وقارية عنه واكو ناس راح تسمعه اول مرة عن طريقي .. راح تفتهمون كلشي من نوصل للنهاية .. ملاحظة (قصتي مو رعب)

يلا نبدي

..
..

الساعة 4 الفجر بعد مشاهدتي لفلم الرعب وحدي بالصالة كمت من القنفه جسمي مفلش وتعبانه رحت طفيت التلفزيون وضوة الصالة
مشيت مشيت .... سمعت صوت احد يمشي بالمطبخ
البيت كله ظلمه ظلام دامس
رحت للمطبخ مااعرف شلون اجتني الجرأة اروح

والمطبخ ظلمه شفت خيال واحد يمشي برة المطبخ خياله من الشباك
متت رعب وانشلت رجلي من الخوف احس اخرسيت وميطلعلي صوت
جسم واحد طويل ضخم يروح ويجي يريد يفتح الباب وديفكر شيسوي
رجعت ليورة خطوة خطوة اخاف اصيح ليشوفني ولسوء حظي طخيت الثلاجه قوي وصار صوت
التفت عليه هالشخص اللي مااعرفه شنو بشر لو وحش لو حيوان لو جن
متت خوف بمكاني مداكدر اصيح كأنو صوتي انربط .. صار يحاول يدفر الباب
اخر شي استجمعت قوتي وجان رأسآ يطلع صوتي عيطت الحكولي بأقوى صوت عندي
رأسآ اختفى هالمخلوق

اجه جدي يركض وجدتي يسمون عليه بسم الله شبيج بنتي واني واكعه بالكاع صفرة وخايفه

كتلهم حرامي حرامي

جدي جاب السلاح وراد يطلع كتله لتطلع اترجاك والله يقتلك شخص ضخم ومرعب لتطلع
جدي كلي شبيج بنتي متأثرة بأفلام الرعب اللي تشوفيها كل يوم
كتله لتطلع اترجاك وجان ميسمع مني وطلع يفتر يدور بالحديقه والكراج
جدتي حضنتني واخذتني للغرفه تقره عليه ايات
اجه جدي كال بنتي كلشي ماكو يمكن حرامي تافه جبان وانهزم ..

هو يحجي بس اني دافكر واتذكر شكله المرعب شلون جان وجنت ادعي انو اني فعلا جنت اتخيل وهالشي كابوس مو حقيقة

صار الصبح رحت للمطبخ شفت جدتي تسوي الريوك وريحة الكهوة وصوت فيروز وجدي يرش الحديقة
اجواء حلوة وهادئة وياهم

طبعا نسيت اعرفكم عن نفسي دانيا من بغداد عمري 21 سنه .. راح تستغربون وين اهلي

لمن جان عمري 6 سنوات جنه طالعين سياحه اني وامي وابويه .. اني الوحيدة لاهلي
بالطريق الله شاء واخذ امانته
صار حادث مأساوي اكبر حادث يشهده التاريخ رعب انكلبت السيارة كلب مو طبيعي صارت علج . . . .
امي وابويه اتكطعوا وسبحان الله سبحان الله اني كاعدة من وره مصار بيه ولا خدش ولا اي جرح بسيط كل الدنيا اتعجبت شلون طلعت سلامات من الحادث سبحان الله

اللي ممكتوبله يموت تحرسه الملائكة من بين مليار موت
لمن ماتوا عشت يم بيت جدي اهل امي .. طبعا امي هم جانت الوحيدة لاهلها يعني بقيت من الدنيا الهم بس اني
وحتى اشبه امي نسخه منها وعوضتهم حرمانهم منها
جدي وجدتي ناس تخاف الله وماعليهم بالقيل والقال حياة بسيطة وسعادة
عايشه وياهم براحتي اكل ونوم بس هههه
طبعا اني من النوع مو هلكد ذكيه وثوله مرات
حتى المدرسة اكرهها جنت وبطلت منها للاول متوسط بس هسه كلش ندمانه عليها واتمنى يرجع الوكت جان هسه اني كليه ومبقه شي اتخرج بس يلا نصيبي

بذيج الليلة سهرت على فلم رعب وحضرت حبشكلات فلم مرعب جان
ولمن كملت سمعت خطوات بالمطبخ
ربي يشهد جان مخلوق ضخم مرعب ورة الباب يريد يفتحه

فديوم نمت بالصالة بالليل وشفت حلم مرعب
نفسه الوحش يتقرب مني واني انهزم وهو يتقرب ولزمني عيط بوجهي صوت مرعب وعالي وخنكني كأنو خنكني حقيقة

كعدت مرعوبه من الحلم وركبتي تأذيني كأنو خنكني صدك متت بجي وكلت هذا منو شنو ليش!!

راحت ايام اجت ايام نسيت السالفة

جدي كاعد بالحديقة يسوي شوي كباب ومعلاك
وجدتي تسوي الزلاطه
عازمين كرايب جدتي وفرحانين واني جنت اسولف ويه البنات وندردش ونضحك

صار المغرب كلبي نغزني التفت يمين يسار ماكو شي

سمعت صوت كأنو بأذني <<لن اتركك>>
نشف دمي وكلت للبنات سمعتوا شي كالوا لا .. ويضحكن
بصراحه حسيت بقلق رهيب
رحت للحمام اغسل وجهي والصوت بأذني يرجع كل شوي <<هل انتي جاهزة>>

كمت اعيط منو انت ؟؟ اذا انت رجال اطلع !! لا تحسسني اني مخبله وداتخيل

اختفى الصوت صار هدوء

وجان تنمد ايد على جتفي سريعه انجلطت من الخوف ووجهي صار اصفر كركم
وجان اسمع صوت جدتي شبيج حبيبتي دانيا شبي وجهج مخطوف
حضنتها وكتلها خايفه كلش
كالت من شنو بنتي لتخافين احنه وياج وافلام الرعب بعد ممنوعه منها فهمتي
كتلها اي

....

الساعة 3 الفجر ميجيني نوم وحدي بالغرفة اتكلب بالفراش ..
مركزة ع صوت الساعة تيك توك تيك توك تيك توك

جان يدك عليه رقم غريب رديت الووو
محد يجاوب الووووو .... محد يجاوب بس اسمع صوت انفاس كأنو واحد كوة يجر نفس

خفت وسديت الخط ....

كعدت اكلب بالفيس شويه وجان تاخذني النومه واخيرا نمت نومه عميقة

يتبع .....

الكاتبة AYOO MD