فتح ل رنين تلفونو وبقت تلعب وتضحك والناس دي كلها بتتونس الا هو ساكت ومره مره يتكلم مع شادي ومجتبى قمنا انا وترتيل نجيب العصير وبدينا نوزع حاولت اتفادى م امشي ع جهة ناس منذر وامشي ع ناس امي بس سبقتني ترتيل ومشت لناس امي قلت " وااي لييه حظي دا كدا دي غلطتي كان انبهه ع ترتيل من المطبخ" مشيت عليهم كان في شادي ومجتبى ولدن وشجن وشهد ومنذر ورنين لسه شايلها وم نزلت منو كنت ماشه ورجولي بتطاقش مع بعض من الخوف لمن وصلتهم مجتبى قال احلى عصير ولا إييه شادي قال ليو كيف م يكون احلى عصير وجابتو مرتي شخصياً قعدو يضحكو لدن قالت لي ي زوول براحه م تجيبها كبار كبار كدا كلامهم زادني ربكه اكتفيت بالابتسامة بس مديت ليهم وجا دور منذر مديت ليو شال الكبايه وعاين لي عين م قدرت افهمها مديت ل شجن قالت لي شكراً م عايزه ومعاها عين من فوق ل تحت م شتغلت بيها كتير رنين قالت لي نن عايزه عصير قلت ليها دا عصيرك تعالي اشربك كانت بتعلب في التلفون وهي مركزه قالت لي ديبي ل جيبي قلت ليها تعالي اشربك علشان م توسخي ملابسك هزت لي راسها ب لا منذر قال لي خليها بشربها انا! ختيت لي عصيرها ورجعت المطبخ دخلت الكبابي ترتيل جات وراي قلت ليها ي كلبانه انتي لييه خليتني امشي ع ناس ابو الهول اخوك دا انا كنت عايزه اقدم لناس امي قعدت تضحك قالت لي نسييتك ونسيت درامتك معاو لكن برضو ي نهى م تخافي منو منذر دا طيب والله قلت ليها انا اخاف!! مع قعد أخاف من زول انا ع فكره مع نفسي "بس لو تعرفي اخوك عمل لي فوبيا عديييل" وبعدين الله يورينا طيبة القلب البتقولي فيها دي! قالت كدي بيني وبينك كدا م قعد تخافي قلت ليها ابداً لا عاش ولا كان اليخوفني... منذر جا داخل المطبخ انا تلقائياً مسكت في يد ترتيل قووي قال ترتيل جيبي مويه وطلع بقيت مساافه ماسكها من غير تحريك اي ساكن والعيون منططه وهي بتعاين لي وشغالة تضحك هزاز قالت لي واااضح واضح جداً ي بتي انك م بتخافي منو بدلالة يدك المتلجه الماسكه يدي دي لاااا والملامح موووت ضربتها وقلت ليها ترتيل انطمي مني وماشة منك ذاتو قعدت تضحك ومسكت يدي قالت لي خلاص سكت اقيفي فكيت يدها وقلت ليها ابيييت مشيت الهول نادتني شهد قالت لي تعالي اقعدي معانا قلت مشيت ليها قعدتني جنبها واستلمتني بالونسه اثناء م بتنوس رنين نزلت من منذر وجاتني جاريه شلتها وحضنتني قلت ليها مالك؟ نعستي قالت لي اي نانوم وبقت تتنايص وتدعك في عيونها وعايزه تبكي قلت ليها طيب ارح النوم قلت لي شهد ثواني وبجي مشيت ل امي قلت ليها رنو عايزه تنوم ح اوديها البيت ل ابوي قالت لي ابوك وحسام طلعو مشوار اتصل قبل شويه وكلمني قلت ليها اهااا نسيت كان كلمني حسام انا كمان خالتو وداد قالت لي نوميها في غرفه ترتيل قلت ليها طيب لمن وصلت الغرفه هي خلاص شبهه نامت رقدها وانتظر لحدي م اتأكدت انها نامت وطلعت براحه من الغرفه وانا ماشه في الممر لاقاني منذر ماشي ع غرفتو ( غرفتو في نهاية المرر) قال لي ي انتي دقيقه وااي انا من الخوفه الدخلت فيني قلت لي عايز شنوو قال لي قبيل..قاطعتو وقلت لي قبييل شنو عليك الله خلاص انا اسفه مش انت شايفني غلطانه معليش وبعتذر وإن شاء الله م ح اجي بيتكم دا تاني ولو م امك وترتيل اصلا م كنت ح اكون هنا كنت بتكلم وظاهر الخوف في وشي والعيون مليانه دموع والصوت مقطع قال لي بس.. م نتظرت كمل كلامو ونزلت تحت باقصى سرعه عندي دخلت الحمام طوالي لانو خلاص بديت ابكي و م عايزه يشوفوني ببكي غسلت وشي كوويس وهديت شويه وطلعت مشيت لامي قعدت جنبها وقلت ليها براحه امي انا ماشه البيت قالت لي ليه مالك م تكوني تعبتي تاني لو تعبتي نمشي الدكتور قلت ليها امي روقي دقيقه خليني اتفاهم معاك انا كويسه قالت لي اها مالك قلت ليها ضروري امشي انذكرت عندي بحث م مجهزاهو وبكره التسليم قالت لي بس ياها دي طوالي حالتك ي نهى قلت ليها اعمل شنو ي امي عارفه براك مجالي دا ضاغط وحساس قالت طيب قلت ليها بعد م انشي اعتذري لي لناس ترتيل قالت لي طيب خالتو وداد قالت لي ي نهى ديل طلعو الحوش بره امشي ليهم قلت ليها طيب طلعت وانا ماشه شوفت منذر واقفه جنبو سجى وماسكه يدو الملفوفه! قالت لي بمياعه كدا ماالك ي منذر سلاامتك يحليلك سحروك الضربك شنو سحب يدو منها وم عارفه قال ليها شنو م ركزت معاهم تاني وطوالي طلعت ع البيت طول الطريق بتذكر في كلام سجى والطريقه المسكت بيها يدو م عارفه ليه حسيت بضييق كدا مشيت البيت دخلت غرفتي غيرت وزحيت اثار المكياج كلها فتحت الفيس وبقيت اقلب لاقاني في اشخاص قعد تعرفهم صفحة منذر! صديق مشترك ترتيل فضوول مني بس دخلت الصفحه وي ريت لو م دخلت! الود دا سمممح بالجد اول مره الاحظ لملامحو بتحسيها مزيج بين الحِـده والهدوء تحسي بي رزيين وعندو لحيه شي كدا عجيب قفلت التلفون ونومت تاني يوم من الصباح طلعت الجامعه بدري،...
#يتبع
