تعالو خل اسولفلكم قصة واحد و ادوخكم بسالفتهه
.. دوم اطالب بحقوق المرأه و احجي ، فكثير اتلقى مناقشات بهالخصوص .. من بينهم شخص
قصته هي ...
يكول اني رجال جنت احب وحده، تقدمتلها كذا مره و انرفضت فهي بعد ما ايست من اهلها يوافقون علي تزوجت وراحت بحال سبيلها ..
لما اتزوجت هي انتهت من حياتي بس اللي صار ، صرت انسان بارد من صدك گلبي ما كام يحس ابد ، برد بداخلي كل شيء
دخلت بعلاقات هوايه بس ابد ولا وحده مست گلبي لو حسيت اتجاهه بحب
مرت ١٠ سنوات و اني رافض اتزوج ابد ، تعدى عمري ال٣٥ سنه ، الوالد و الوالده جزعو وهم يقنعون بيه اتزوج انريد نشوف جهالك لان اني الجبير واخواني الصغار تزوجو و خلفو واني لا ..
ويشكون للعالم رفضي للزواج ، وصلة لمرحله الناس كامت تنطيني نسوان و تخطبلي بناتهم و اني قافل ما اتزوج
الى فد يوم تمرضت الوالده و سوتلها فام عليه و تبجي وراح اموت و ما اشوف جهالك .. فكلتلها خطبيلي اللي ترضيها و تشوفيها مناسبه المهم رضاج عليه ..
خطبتلي بنت اختها ، بنت حلوة و بنت اصول و ابد ما ينقصها شي بس كل احساس الي وياها ماكو وكأني حجر ما احس تزوجتها و عاشرتها و ما عاشرت مني الا جسمي ابد ما وصلت گلبي ولا بيوم حبيتها كل اللي عندي احيانا استخطيها لا اكثر
اقل زله منها ما اتحمل اتعصب و اكلب الدنيا و اصيح و هي تتحمل ، و العجيب من تتحمل اكرهه اكثر و انفر اكثر واكوم احقد على امي بساعة اللي ورطتني بهالزواج ..
كلت يصيرلي من عندها جهال و تصير ام جهالي و احبها ... صارو عندي جهال كرهت العيشه كلها تورطت بمسؤليه اني ما رايد اتحملها
انقهر عليها حيل شنو ذنبها برجال مثلي ما يحس و هي انسانه مداريتني مثل المي بالصينيه احاول اعوضها بفلوس اسد كل احتياجاتها بسبب تأنيب الضمير بس كل هذا احس ما يعوضها لان هي ما تهمني
لو شفتها مغثوثه لو حزنانه اكوم اطلع ولا اسالها شبيج هناك و اني بالشارع اسأل نفسي عود اني ليش ما كلتلها شبيج من شنو ضايجه .. و من ارجع نفس البرود ما اهتملها
تعرفني ما اهتملها و تعرف بكل علاقاتي و اشيائي شيء خطر محد يتقرب لا هي و لا اطفالي لدرجة جهازي لو عفته بدون رمز محد يتجرأ يلزمه
هواي حاولت اتغير بس ما اكدر لان كلبي ما يحب ولا يحاول يحب اني اتمنى اعيش ويا عائلتي بحب و ود حالي حال الناس بس ما اكدر بيني وبينهم خندق جبير
مرات اقل خطأ منها ابهذل احوالها وبعدين اصفن ويا نفسي ، لو اللي جنت احبها هي زوجتي و غلطت ابهذلها هشكل ؟ اجاوب نفسي ع السريع لا مستحيل
هواي اقارن و احط اللي جنت احبها ويا زوجتي وشسوي لو جانت هي بموقفها .. و يتبينلي شكد اني ظالم زوجتي
بيوم من الايام طلكت زوجتي لاتفه الاسباب و رفضت ترجع رغم كل محاولات الاقارب شجابرها تعيش ويا واحد مثلي ظالم
من طلقتها ارتاحيت حيل ارتاحيت و خلصت من تأنيب الضمير الجنت بيه عليها ، اطلع امشي اسافر بكيفي لا حسيب و لا رقيب و لا مسؤليه و نفقتهم واصله و الامور تمام
بس اشتاق لجهالي و احسهم صارو ضحيتي اني وضحية مشاعري البارده ، هي ما ملت تتوسل بيه حتى ارجعها لذمتي ما اعرف اشافت مني حتى تحبني
بس اني ما احبها ، بنفسي و كل احلامي الكى انسانه و احبها و اعيش وياها حياة ثانيه ، منتظر لحظة يوم اللي احب من صدك و ترجعلي المشاعر اللي فقدتها و اتخلص من البرود
...تكولي تريد تتزوج ثانيه تحب ادور براحتك بس خليني اني و جهالك يمك و خليك خيمه فوك راسي ما احاسبك ولا اكولك على شغله ابد
و اني باقي لا لاكي الانسانه اللي اكدر احبها ولا اكدر احب ام جهالي و اتقبلها و اريد ارجعها لخاطر جهالي بس ... بس من هسه متضايق من رجعتها
.......بنهاية كلامه الي كاتبلي اساسا ما اعرف ليش دا احجيلج بس شفتج هواي خابصه الجو بحقوق المراه و هالسوالف فذكرتيني بزوجتي
...........
صراحه حرت و دخت لان الأنسان ممكن يتحكم بكل شيء الا المشاعر .. القلب هو العضو الوحيد اللي ما بي خلايا حسيه و الدماغ ما يحكمه
رأيكم ؟؟
