الجزء الخامس
#التائبة
احس راسي يريد ينفجر ، صعد ضغطي وبعد مكمت اسمع. لزمت التلفون وإيدي ترجف، اتصلت على أدهم وما حصلته، گال الرجال:
- هسة شنو الموضوع اختي؟
جاوبته بعصبية:
- اتصل عليه اخي
- هو لو تلفونه يتحصل كان ما اجيت
معرفت شجاوبه، گلت:
- عيني من يجي زوجي اخلي يتصل عليك
- اختي بدون زحمة اني وراية مصاريف والتزامات
- اخي كلتلك من يجي زوجي اتفاهم ويا
راح الرجال، ورجعت اتصل على ادهم، دخلت للبيت وادعي يفتح تلفونه، كعدت بالاستقبال افكر، معقولة ادهم هيجي يسوي، وين الحب وين الاهتمام وين الاخلاق اللي مشفت بمثلها ابد.
بقيت افكر شنو مصلحة ادهم هيجي يسوي وين يريد يوصل، قريت عقد البيت الف مرة، كلشي مفتهمت منه غير الاسماء والمبلغ.
ثاني يوم الصبح اندك الباب، باوعت من الشباك وكان الرجال نفسه، ويا بنية شابة، طلعت فتحت الباب:
- صباح الخير اختي
- صباح النور
- العفو ما دبرتو الايجار؟
- اخي صدكني انت متوهم
صار حوار بيناتنا، الى ان دخلتهم للبيت، گالت البنية ( زوجته):
- عيني زوجج اجر بيتنا وانطا الزوجي مقدم 6 اشهر
- اختي اني اول مرة اشوفكم، وبعدين احنة اشترينا البيت من رجال مقعد مو من عدكم
- حبيبتي ماعدنا احد بهذا البيت غير اني وزوجي واطفالي
- لعد منو هذا اللي كان بالبيت؟
- منعرف على منو تحجين
حجيتلهم الموضوع وبقو صافنين واحد عالثاني، كال الرجال:
- اختي وين عقد البيت بدون زحمة
انطيته العقد وضل يباوع ساعة بي، كال:
- اختي العقد مزور مو صحيح، تفضلي شوفي
باوعت بالعقد واني كلشي ما اعرف بي، اذا مزور او حقيقي، كلت:
- اخوية، هذا بيتي وارجوكم ما اريد تجون مرة ثانية
كال الرجال بإنفعال:
- اختي العزيزة.. باجر اريد البيت فارغ، ولتخليني استخدم وياج الاجراء القانوني
- شتسوي سوي، هذا بيتي وهذا العقد بإسمي، اطلعو من بيتي احسن من ما اشتكي عليكم
طلعو من البيت واني الخوف كاتلني..
دورت بالتلفون ولكيت رقم وحدة من البنات اللي كانو يشتغلون بالبيت وطردتهم، اتصلت عليها وسألتها عن ادهم، كالت ما اعرفه، حجيت وياها بالموضوع بس البنية كلشي مفتهمت، توقعت تساعدني بشي او تنطيني حل.
سديت التلفون وبقيت افتر بالبيت حايرة شتصرف.
ثاني يوم الصبح اجاني الرجال وحده، حجيت ويا من ورا الباب:
- اخي اعتقد البارحة كلتلك ....
قاطعني وگال:
- اختي فرغي البيت لان العصر راح اجيب الشرطة عليج
- سوي اللي تريده اني ما اطلع من البيت
- على العموم خلي الشرطة هم يحلون الموضوع وياج
راح ودخلت للبيت، اتصلت على ادهم، تلفونه مغلق.
للعصر اندك الباب، باوعت من الشباك لكيت الرجال ويا شرطة 3، اختنگت وگلبي راد يطلع من مكانه. ماعرف وين اروح وين انهزم، توكلت على الله ورحت فتحت الباب، گال الضابط:
- مساء الخير.. وردتنا شكوى عليج
- اي شكوى؟
طلب الضابط مني يدخلون.
كعدنا بالاستقبال، گال الضابط:
- هذا الرجال يكول انتي متدفعين ايجار
- ادفع ايجار على شنو وهذا بيتي
- عندج شي يثبت ان هذا بيتج؟
جبتله العقد وقراه، گال:
- اختي هذا العقد وين سويتو ؟
- هنا بالبيت
- بس هذا العقد مزور
- يعني شنو مزور
- شوفي الاختام
- اني اشتريت هذا البيت
- منين اشتريتي؟
- غير من صاحبه
- قصدج من هذا الشخص؟
اشر على الرجال، جاوبته:
- لا .. صاحب البيت كان رجال جبير ومقعد، او وقعنا العقد هنا بالبيت
- وبعدين ... صدقتو العقد بالبيت ايضا؟
- لا زوجي راح صدقه
- وين زوجج؟
- مسافر
- اكيد عنده علم بوجدنا
- لا
- لا .. شنو لا؟.. اتصلتي بي
- اي بس تلفونه مغلق لان هو مسافر
- واذا مسافر يعني ماكو وسائل تواصل اجتماعي؟
معرفت شجاوبه، گال:
- اني اسف اختي.. بس القانون فوق الجميع
- يعني شنو ؟
- يعني فرغي البيت حتى يستلمو اصحابه
- مستحيل.. هذا بيتي وما اطلع منه لو تدفنوني بي
باوع الضابط بعيوني ورجع قرأ العقد، گال:
- استخدمت وياج اسلوب الشفقة بس يظهر انتي مترباية على العناد
بهاي الاثناء اتصل شخص على الضابط، جاوب على الاتصال وضل يباوع بعيوني ويحجي مع المتصل، بس الضابط مكال غير كلمة نعم وكررها لحدما خلصت المكالمة.
سد التلفون وضل يضحك، بعدين گال:
- الصدفة تلعب دور .. تعرفين انتي متهمة بجريمتين
بقيت صافنة عليه:
- اني؟.. شنو هذا الكلام
- تم مطابقة اسمج مع اسم مشبته بيها اليوم تم تقديم بلاغ ضدها .
- ممكن توضح
- الجريمة الاولى انتي متهمة بقتل عائلتج، والجريمة الثانية هي نصب واحتيال
گال الشرطي:
- سيدي اقبض عليها؟
گلت:
- تقبض علية شنو، اشو كلامكم مو مفهوم، بعدين اكو واحد يقتل عائلته؟
- اي اكو.. معلوماتنا تكول ان انتي مو بنتهم، يعني لقيطة، وسجلج غسان اللي هو ابوج بإسمه يعني انتي بنتهم على الورق فقط
- وشنو يعني.... قابل اني اول وحدة بالعالم هيجي يصير وياها
- لا اكيد ... بس القصد، ان اكو خلاف صار بيناتكم، واكيد انتي استغليتي الموقف حتى تخلصين منهم بعد ان خليتي بسيارتهم عبوة لاصقة
ضليت فاتحة حلكي، ما اعرف شنو ارد، كمل الضابط كلامه:
- تكدرين تخلصين من تهمة النصب اذا طلعتي من البيت بدون مشاكل، وايضا بالامكان ان يتخفف عنج الحكم بخصوص اهلج اذا سلمتي نفسج
- انت شمدريك اني عندي مشاكل مع اهلي وشمدريك اني مو بنتهم؟
- قدم احد الاشخاص معلومات بخصوص الحادثة الي صارلها بحدود 7 او 8 اشهر، وانطانا مواصفات واسم الجاني. بس يظهر حضرتج محترفة بالاختفاء
- منو هذا الشخص؟
- للاسف احنة مننطي معلومات المشتكي او المُبلغ
وگف الضابط وگال:
- راح انطيج مهلة لحد باجر الصبح تجي تسلمين نفسج، واعتقد هذا وقت كافي حتى ترتبين امورج
بقيت ابجي ما اعرف شديصير بية، طلعو من البيت وبقيت افتر بمكاني، ذبيت من راسي وركضت على التلفون اتصل بأدهم بس ماكو نتيجة.
صار الليل واني دايخة شسوي والخوف كاتلني مستحيل ادخل سجن، وبقيت اسأل نفسي منو هذا اللي بلغ عني ولبسني هاي التهمة، حتى موضوع البيت نسيته، اني ما اعرف اي احد من غير ادهم، هو بس يعرف سيرة حياتي. بس معقول ابوية حاجي بموضوعي الى اشخاص غير ادهم، بس شنو مصلحتهم هيجي يسوون، اني مأذيت احد. هيجي ادهم تسوي بية، الله ينتقم منك.
بهاي الاثناء اتصل بية رقم غريب، جاوبت بسرعة:
- الو ..
- هلو سارة شلونج
- الحمد لله .. منو حضرتج؟
- اني تغريد
(تغريد كانت تشتغل ويانة بالبيت)
سئلتني على وضعي وحجيتلها اللي صار، گالت:
- معقولة ليهسة كاعدة بالبيت
- لعد شسوي؟
- انتي عاقلة لو مخبلة، ولج امشي لمي ملابسج وفلوسج وطلعي من البيت بسرعة
- وين اروح
- تعاليلي هسة بسرعة
- اني ممسوية شي
- دتعالي بسرعة ونسولف على راحتنا
- وشلون اذا اجوي الصبح وملكوني راح تتلبسني كل التهم
- اذا دخلتي المركز بعد متطلعين لو اعدام لو مؤبد
- عفية تغريد شدتحجين انتي
- راح تبقين تسولفين، تعالي بسرعة، وديري بالج اخاف الشرطة مراقبين البيت
- هسة راح اجيج
اخذت ذهبي وفلوسي واخذت جنطة ملابسي وطلعت اتلفت اخاف الشرطة مراقبة البيت.
كانت الساعة بحدود 9/ م. اخذت تكسي ورحتلها للشقة.
استقبلتني تغريد ودخلت الشقتها.
كعدنا نحجي واني خايفة وابجي ما اعرف شسوي، گالت:
- معرفتي منو قدم البلاغ؟
- لا ... بس ماكو غيره
- منو ؟
- ادهم
- ممعقولة، وشنو مصلحته يعني؟
- حتى ياخذ فلوس ابوية والبيت
- ما اعتقد على مود هذا الشي، بس يظهر اكو موضوع ثاني
- مثل شنو؟
- والله هذا الولد ملعب ومراح ينطي على نفسه لزمة، هاي اذا طلع صدك هو اللي بلغ عليج
- شسوي تغريد فهميني عفية راح انتحر والله
- عندي صديق، يمكن يكدر يخلصج من هاي المشكلة
- شلون؟
- يطلعج للخارج
- وين اروح هناك منو الية؟
- الغربة ولا السجن سارة، وبعدين هناك محد يعرفج وتكدرين تمارسين حياتج بصورة طبيعي
كان جسمي يرجف وكلما يندك باب الشقة اللي كبال شقة تغريد اموت الف موتة عبالي الشرطة اجوني.
صارت الساعة بحدود 12، اندك الباب، ختلت جوة الجرباية، ضحكت تغريد وگالت:
- لتخافين هذا زيد
- زيد منو
غمزتلي وكالت:
- روحي بالغرفة قفلي الباب ونامي
- ليش شكو
ضحكت وكالت:
- اكو ذنب اريد ارتكبه
دخلت الغرفة وقفلت الباب. مددت على الجرباية، وكنت اسمع صوت تغريد وهي تضحك وتتشاقة وي صديقها زيد.
خليت المخدة على اذني ومحسيت من نمت.
كعدت الصبح على صوت تغريد:
- نوم العوافي، گومي تريكي
تريگت كوة، نفسي مزدودة، هذا الكابوس شلون راح يخلص، الله يرحمج ماما، ما اخذت بنصيحتج.
گالت تغريد:
- لتطلعين من الشقة ابد
- عفية لتروحين وتعوفيني
- هذا خابرني من الصبح
( تقصد احد الزبائن )
- شكد تتأخرين
- ساعة واجي
- عفية اني انطيج فلوس بس ابقي فدوة
- حبيبتي لتخافين.. وبعدين هذا ابو صماخ اذا يزعل .. راح يگطع علية الامدادات
توسلت بيها تبقة بس شفتها مصممة على الطلعة.
طلعت تغريد وبقيت وحدي بالشقة، قفلت الباب ونزلت البردات، صارت الشقة ظلمة، وبقيت كاعدة ورا الباب خايفة يجوني الشرطة.
وللظهر رجعت تغريد بيدها مسواك، گالت:
- ها حبيبتي شو بعدج هنا؟
- لعد وين اروح
- عبالي القو عليج القبض ههههههه
- فال الله ولا فالج
- شبيج مظلمة الغرفة.. روحي رفعي البردات
رفعت البردات، گالت تغريد:
- تعالي نسويلنا غدة.
كملنا الغدة وكعدنة نسولف، گالت تغريد:
- شنو رأيج بالموضوع الكلتلج عليه
- لا ما اكدر اطلع للخارج
- زين، تريدين اجيبلج زبائن هنا
- تغريد شنو هذا الحجي
- اسفة حبيبتي بس يعني توقعت تستحين تكوليلي
- اني بيا حال وانتي تحجين هذا الحجي، وبعدين اني من زمان عفت هذا الموضوع
- ما ادري هسة سمعت منج
- عالعموم مو موضوعنا هذا، بس اريد اعرف القبلة وين
ضحكت وگالت:
- شنو راح تذبحيني
- لا اريد اصلي
- شوف هاي البطرانة، شنو هالخرافات يمعودة.. دروحي
وصلت فكرة التغريد حتى متسوي بية مثل مسوة بية ادهم وتضل تعزم علية ولد.
بقيت 4 ايام بشقة تغريد، وحسيت بالامان، بس بقى مصيري مجهول، ما اكدر اعبر باب الشقة.
وكنت اتصل على ادهم بس تلفونه مغلق. وبيوم گلت التغريد:
- اريد اطلع اختكنت
- شنو هاي المجازفة
- عندج عباية؟
- لا ... تريدين حجاب
- اي .. بس المهم اغير من شكلي
- زين .. وين تريدين تروحين
- اي مكان بس اغير جو
- لتتأخرين
بدلت وطلعت.
بقيت افكر اروح للبيت اشوف الوضع لو لا، كنت خايفة ومترددة، وكانت تغريد تتصل بية كل شوية وسببتلي حالة نفسية.
رجعت للشقة، ولكيت بيها ثنين شباب وكانت تغريد كاعدة وياهم، كانت الساعة بحدود 6 العصر، وكفت بالباب ما اعرف ادخل لو لا، گالت تغريد:
- تعالي سوسة ماكو غريب
سلمت ودخلت، فكال واحد من عدهم:
- منين هاي الحلوة؟
اني رحت للغرفة ركض وقفلت الباب، اسمع ضحك صار وراية. خفت لا يتكرر الموقف، بس الحمد لله مصار شي.
ورا ساعة او اكثر اجتي تغريد وگالت:
- شلونها مشاويرج
- خلصتها خايفة واتلفت
- حقج والله، تعالي اشوفج شجبت
شوفتني ملابسها .. الخ.
مر اسبوع وبديت احس بتغريد تتضايق مني حتى اسلوبها تغير وصارت حدية وبدت تطلب مني فلوس اكل وغيرها، اني مكلت شي لان ممعقولة تبقة البنية تصرف علية. انطيتها فلوس اكثر من اللي طلبته حتى اكسبها من جديد.
مر اكثر من اسبوع واني بشقة تغريد، وكنت اتصل على ادهم باستمرار بس بدون نتيجة. وبيوم جربت اتصل من تلفون تغريد، انطتني تلفونها وكتبت رقم ادهم، تفاجئت من طلع رقمه عدها محفوظ، سألتها:
- منين تعرفين ادهم ؟
- شنو هذا السؤال، غير كان يجيج باستمرار
- اقصد رقمه شيسوي عندج
ضحكت وگالت:
- خاف اكول وتزعلين
- لتكولين احسن لان ميفرق شي عندي
انطيتها التلفون، وكعدت اباوع عالتلفزيون، ورا شوية اندك الباب، كانت تغريد بالحمام، انهزمت للغرفة، وسمعت تغريد تكول:
- سارة افتحي الباب
رحتلها للحمام:
- عفية خاف الشرطة
- يا شرطة يمعودة دروحي فتحي الباب هي الشرطة ادك بيبان
رحت افتح الباب وجسمي يرجف، باوعت من فتحة المفتاح مشفت شي، دنكت اباوع جوة الباب هم مشفت شي، اندك الباب مرة ثانية بس بقوة ، گمزت، گلت:
- منو ؟
محد جاوب، انوب اندك الباب مرة ثالثة، فتحت الباب على كيف وانصدمت، احس جسمي صار بي شلل، رجعت ليورا واني اكول:
- يمه ...
محسيت على نفسي من نزلت دموعي....
(يتبع)....
تابعونا غدا في تمام الساعة 9 مساءً مع الجزء السادس .. وافر حبي وتقديري.
ماء السماء الكندي
